ରାଞ୍ଚି: ବ୍ୟାପକ ବିକ୍ଷୋଭ ଓ ବିରୋଧ ପରେ ଝାଡ଼ଖଣ୍ଡର ସମ୍ମେଦ ଶିଖରର ପର୍ଯ୍ୟଟନ ସ୍ଥଳ ମାନ୍ୟତାକୁ ପ୍ରତ୍ୟାହର କରିଛନ୍ତି କେନ୍ଦ୍ର ସରକାର। ଜୈନ ତୀର୍ଥାଙ୍କର ପାର୍ଶ୍ୱନାଥଙ୍କ ନାମରେ ନାମିତ ଗିରିଡିହର ପାର୍ଶ୍ୱନାଥ ପର୍ବତରେ ଥିବା ସମ୍ମେଦ ଶିଖର ଜୈନ ଧର୍ମାବଳମ୍ବୀଙ୍କର ପବିତ୍ର ତୀର୍ଥସ୍ଥଳ ଅଟେ। ଏହାକୁ ପର୍ଯ୍ୟଟନ ସ୍ଥଳର ମାନ୍ୟତା ଦେବା ଦ୍ୱାରା ତୀର୍ଥସ୍ଥଳର ପବିତ୍ରତା ହ୍ରାସ ପାଇବ ବୋଲି ଜୈନ ଧର୍ମାବଳମ୍ବୀ ବିରୋଧ କରି ଆସୁଥିଲେ। ଝାଡ଼଼ଖଣ୍ଡରୁ ରାଜସ୍ଥାନ ଓ ଦିଲ୍ଲୀରେ ମଧ୍ୟ ଏହା ବିରୋଧରେ ଆନ୍ଦୋଳନ ହେଉଥିଲା । ହିନ୍ଦୁ ସଂଗଠନ ମଧ୍ୟ ବିରୋଧରେ ସାମିଲ ଥିଲେ ।
ସମ୍ମେଦ ଶିଖରକୁ ପର୍ଯ୍ୟଟନ ସ୍ଥଳୀ ମାନ୍ୟତାକୁ କେନ୍ଦ୍ର ସରକାର ତତ୍କାଳ ପ୍ରଭାବରେ ପ୍ରତ୍ୟାହାର କରିଛନ୍ତି। ଏହି ସ୍ଥାନକୁ ପର୍ଯ୍ୟଟନ ସ୍ଥଳୀ ଭାବେ ସାମିଲ କରାଯିବ ନାହିଁ । କେନ୍ଦ୍ର ପରିବେଶ ମନ୍ତ୍ରଣାଳୟ ପକ୍ଷରୁ ଜାରି ବିଜ୍ଞପ୍ତିରେ ପର୍ଯ୍ୟଟନ ଏବଂ ଇକୋ-ଟୁରିଜିମ୍ ଗତିବିଧି ଉପରେ ପ୍ରତିବନ୍ଧକ ଲଗାଇବାକୁ ନିର୍ଦ୍ଦେଶ ଦିଆଯାଇଛି। ଏନେଇ କେନ୍ଦ୍ର ପରିବେଶ ମନ୍ତ୍ରୀ ଭୂପେନ୍ଦ୍ର ଯାଦବ ଟ୍ୱିଟ କରି ଏ ବିଷୟରେ ସୂଚନା ଦେଇଛନ୍ତି।
ତିନି ବର୍ଷ ପୂର୍ବେ ଜାରି କରାଯାଇଥିବା ଆଦେଶକୁ କେନ୍ଦ୍ର ସରକାର ପ୍ରତ୍ୟାହାର କରି ନେଇଛନ୍ତି। ଗୁରୁବାର କେନ୍ଦ୍ର ପରିବେଶ ମନ୍ତ୍ରଣାଳୟ ପକ୍ଷରୁ ଏହି ବିଜ୍ଞପ୍ତି ଜାରି ହୋଇଛି। ଇକୋ ସେନ୍ସିଟିଭ୍ ଜୋନ୍ ବିଜ୍ଞପ୍ତିର ଧାରା -3 ଅନୁଯାୟୀ, ଏହି ସ୍ଥାନକୁ ନିଷେଧ କରାଯାଇଛି। ଏହି ସ୍ଥାନକୁ ଯେମିତି କେହି ପର୍ଯ୍ୟଟକ ନଯିବେ ସେଥିପାଇଁ ରାଜ୍ୟ ସରକାରଙ୍କୁ ତତ୍କାଳ ପଦକ୍ଷେପ ନେବା ପାଇଁ ନିର୍ଦ୍ଦେଶ ଦିଆଯାଇଛି ।
ଏହା ସହତି କେନ୍ଦ୍ର ସରକାର ଏହି ପ୍ରସଙ୍ଗରେ ଏକ କମିଟି ମଧ୍ୟ ଗଠନ କରିଛନ୍ତି। ଯେଉଁଥିରେ ଜୈନ ସମ୍ପ୍ରଦାୟର ଦୁଇ ଜଣ ଓ ଜଣେ ଆଦିବାସୀ ସଦସ୍ୟ ରହିବ ।
