କୋଲକତା: ଆରଜି କର ମେଡିକାଲ କଲେଜ ଓ ହସ୍ପିଟାଲ ଦୁଷ୍କର୍ମ ଓ ହତ୍ଯା ଘଟଣା। ସିବିଆଇ ଉପରେ ବର୍ଷିଲେ ସୁପ୍ରିମ କୋର୍ଟ। ଏହି ମାମଲାକୁ ନେଇ ସିବିଆଇର ଷ୍ଟାଟସ ରିପୋର୍ଟ ଅତି କଦର୍ଯ୍ୟ ଓ ଦୁର୍ଭାଗ୍ଯଜନକ ବୋଲି କହିଛନ୍ତି କୋର୍ଟ। ଦୁଷ୍କର୍ମ ଓ ହତ୍ଯା ମାମଲାର ତଦନ୍ତ ନେଇ ସୁପ୍ରିମକୋର୍ଟରେ ସିବିଆଇ ଦାଖଲ କରିଥିଲା ସାନି ଷ୍ଟାଟସ ରିପୋର୍ଟ। ପ୍ରଧାନ ବିଚାରପତି ଜଷ୍ଟିସ ଡି.ୱାଇ. ଚନ୍ଦ୍ରଚୂଡ କହିଛନ୍ତି- ସିବିଆଇର ଷ୍ଟାଟସ ରିପୋର୍ଟ ଅତ୍ଯନ୍ତ କଦର୍ଯ୍ୟ। ଏହି ରିପୋର୍ଟକୁ ନେଇ କୋର୍ଟ ଖୁବ୍ ଅସୁଖୀ ଅଛନ୍ତି। ଏହା ସହ ମୃତା ଛାତ୍ରୀଙ୍କ ନାମ ହଟାଇବା ଲାଗି ୱିକିପିଡିଆକୁ ଦେଇଛନ୍ତି ନିର୍ଦ୍ଦେଶ। ସିବିଆଇ ପକ୍ଷରୁ ସଲିସିଟର ଜେନେରାଲ ତୁଷାର ମେହେଟ୍ଟା ମୋକଦ୍ଦମା ପରିଚାଳନା କରୁଛନ୍ତି।
ବର୍ତ୍ତମାନ ସୁଦ୍ଧା ସିବିଆଇ ଯାହା ଅଗ୍ରଗତି କରିଛି ତାହା ପ୍ରକାଶ କରିବା ଅନୁଚିତ ବୋଲି କହିଛନ୍ତି କୋର୍ଟ। ସେପଟେ ପଶ୍ଚିମବଙ୍ଗ ସରକାରଙ୍କ ଉପରେ ବର୍ଷିଛନ୍ତି ସୁପ୍ରିମକୋର୍ଟ। ସରକାରୀ ହସ୍ପିଟାଲଗୁଡିକରେ ମହିଳା ଡାକ୍ତରମାନଙ୍କୁ ରାତ୍ରୀକାଳୀନ ଡ୍ଯୁଟି ନଦେବାକୁ ରାଜ୍ଯ ସରକାର ଯେଉଁ ନିଷ୍ପତ୍ତି ନେଇଛନ୍ତି ତାହାକୁ ସମାଲୋଚନା କରିଛନ୍ତି କୋର୍ଟ। କିପରି ଆପଣ କହିପାରିବେ ଯେ ମହିଳାମାନେ ରାତ୍ରୀରେ କାମ କରିପାରିବେ ନାହିଁ ବୋଲି ପ୍ରଶ୍ନ କରିଛନ୍ତି କୋର୍ଟ। ମହିଳା ଡାକ୍ତରଙ୍କ ଲାଗି ଏହି ସୀମା କାହିଁକି। ସେମାନେ କୌଣସି ରିହାତି ଚାହାଁନ୍ତି ନାହିଁ। ଏକା ସିଫ୍ଟରେ ବି ମହିଳାମାନେ କାମ କରିପାରିବେ ବୋଲି କହିଛନ୍ତି ଅଦାଲତ।
