ନୂଆଦିଲ୍ଲୀ : ଭାରତ ସରକାର ସିଗାରେଟ୍ ଏବଂ ଅନ୍ୟାନ୍ୟ ତମାଖୁ ସମ୍ବନ୍ଧୀୟ ଉତ୍ପାଦ ଉପରେ କମ୍ପେନସେଶନ ସେସ୍ ହଟାଇ ଜିଏସଟି ବୃଦ୍ଧି କରିବାକୁ ବିଚାର କରୁଛନ୍ତି। ବର୍ତ୍ତମାନ, ସିଗାରେଟ୍ ଏବଂ ଅନ୍ୟାନ୍ୟ ଉତ୍ପାଦଗୁଡ଼ିକ ଉପରେ ସେସ୍ ଏବଂ ଅନ୍ୟାନ୍ୟ ଟିକସ ବ୍ୟତୀତ ୨୮ ପ୍ରତିଶତ ଜିଏସଟି ଲାଗୁ ହେଉଛି, ଯାହା ମୋଟ ପରୋକ୍ଷ ଟିକସକୁ ୫୩ ପ୍ରତିଶତକୁ ପହଞ୍ଚାଇଛି। ବିଚାର କରାଯାଉଥିବା ପରାମର୍ଶଗୁଡ଼ିକ ମଧ୍ୟରୁ ଗୋଟିଏ ହେଉଛି ଚିଏସଟିକୁ ୪୦ ପ୍ରତିଶତକୁ ବୃଦ୍ଧି କରିବା ଏବଂ ଏହା ଉପରେ ଅତିରିକ୍ତ ଉତ୍ପାଦ ଶୁଳ୍କ ଲାଗୁ କରିବା। ସରକାରଙ୍କ ଧାରଣା ହେଉଛି, କମ୍ପେନସେଶନ ସେସ୍ ଏବଂ ଅନ୍ୟାନ୍ୟ ସେସ୍ ହଟାଇବା ପରେ କୌଣସି ରାଜସ୍ୱ କ୍ଷତି ନହେବା ଉଚିତ୍, ଯାହା ୩୧ ମାର୍ଚ୍ଚ, ୨୦୨୬ ରେ ଲାଗୁ ହେବାର ଅଛି। ଅଧିକାରୀମାନଙ୍କ ଅନୁସାରେ, ସରକାର କମ୍ପେନସେଶନ ସେସ୍କୁ ଅନ୍ୟ କୌଣସି ସେସ୍ ସହିତ ବଦଳାଇବାକୁ ମନସ୍ଥ ନାହାନ୍ତି। ଅଧିକାରୀଙ୍କ ଅନୁଯାୟୀ, ଜିଏସଟି ପରିଷଦର ମନ୍ତ୍ରୀସ୍ତରୀୟ ପ୍ୟାନେଲ୍ ୨୦୨୬ ପରେ କମ୍ପେନସେଶନ ସେସ୍ ର ଭବିଷ୍ୟତ ବିଷୟରେ ଆଲୋଚନା କରିପାରନ୍ତି। ଜଣେ ଅଧିକାରୀ କହିଛନ୍ତି ଯେ ଏହି ସେସ୍ ପ୍ରଭାବଶାଳୀ ବୋଲି ବିବେଚନା କରାଯାଏ ନାହିଁ। ରିପୋର୍ଟ ଦାଖଲ କରିବା ପୂର୍ବରୁ ପ୍ୟାନେଲ ସମସ୍ତ ବିକଳ୍ପ ଉପରେ ବିଚାର କରିବ ବୋଲି ଆଶା କରାଯାଉଛି। ଏହା ପରେ ଜିଏସଟି ପରିଷଦ ସୁପାରିଶଗୁଡ଼ିକ ଉପରେ ଚୂଡ଼ାନ୍ତ ନିଷ୍ପତ୍ତି ନେବ।
ସିଗାରେଟ୍ ଏବଂ ଅନ୍ୟାନ୍ୟ ଧୂମହୀନ ତମାଖୁ ଉତ୍ପାଦ ସମେତ କ୍ଷତିକାରକ ବିବେଚିତ ସାମଗ୍ରୀଗୁଡ଼ିକ ଉପରେ ବର୍ତ୍ତମାନ କମ୍ପେନସେଶନ ସେସ୍, ମୌଳିକ ଉତ୍ପାଦ ଶୁଳ୍କ ଏବଂ ଜାତୀୟ ବିପର୍ଯ୍ୟୟ ଆକସ୍ମିକ ଶୁଳ୍କ ବ୍ୟତୀତ ୨୮ ପ୍ରତିଶତ ଜିଏସଟି ଲାଗୁ ହୋଇଛି। କିନ୍ତୁ ସିଗାରେଟ୍ ଉପରେ ମୋଟ ୫୩ ପ୍ରତିଶତ କର – ଜିଏସଟି ଏବଂ ଅନ୍ୟାନ୍ୟ ଶୁଳ୍କ – ଏବେ ବି ବିଶ୍ୱ ସ୍ୱାସ୍ଥ୍ୟ ସଂଗଠନ ଦ୍ୱାରା ସୁପାରିଶ କରାଯାଇଥିବା ୭୫ ପ୍ରତିଶତ ହାରଠାରୁ ବହୁତ କମ୍। ସିଗାରେଟ୍ ଏବଂ ପାନ ମସଲା ସମେତ ତମାଖୁ ଏବଂ ତମାଖୁ ଉତ୍ପାଦ ସରକାରଙ୍କ ଟିକସ ରାଜସ୍ୱରେ ଗୁରୁତ୍ୱପୂର୍ଣ୍ଣ ଅବଦାନ ରଖେ – ଏହା ୨୦୨୨-୨୩ରେ ୭୨,୭୮୮ କୋଟି ଟଙ୍କା ରୋଜଗାର କରିଛି। ଅଧିକାରୀ ଜଣକ କହିଛନ୍ତି, କମ୍ପେନସେଶନ ସେସ୍କୁ ହେଲ୍ଥ ସେସ୍ ସହିତ ବଦଳାଇବା ପାଇଁ ଅନ୍ୟ ଏକ ବିକଳ୍ପ ବିଚାରାଧୀନ ଅଛି । କିନ୍ତୁ କିଛି ରାଜ୍ୟ ଏହାର ସପକ୍ଷରେ ନାହାନ୍ତି । କେନ୍ଦ୍ର ମଧ୍ୟ ନୀତିଗତ ଭାବରେ ଏକ ନୂତନ ସେସ୍ ପ୍ରଚଳନ କରିବା ସପକ୍ଷରେ ନାହିଁ। ସିଗାର ଏବଂ ସିଗାରେଟ୍ ଭଳି ଉତ୍ପାଦ ଉପରେ ୫ପ୍ରତିଶତ କମ୍ପେନସେଶନ ସେସ୍ ଲାଗୁ କରାଯାଏ। ଏହା ପରେ, ପ୍ରତି ହଜାର ସିଗାର କିମ୍ବା ସିଗାରେଟ୍ ପାଇଁ ୨,୦୭୬ ଟଙ୍କାରୁ ୪,୧୭୦ ଟଙ୍କା ପର୍ଯ୍ୟନ୍ତ ଅତିରିକ୍ତ ନିର୍ଦ୍ଦିଷ୍ଟ ଟିକସ ଆଦାୟ କରାଯାଏ । ଯାହା ସେମାନଙ୍କର ଲମ୍ବ, ଫିଲ୍ଟର ଏବଂ ସ୍ୱାଦ ଅଛି କି ନାହିଁ ତାହା ଉପରେ ନିର୍ଭର କରେ।
