ନନ୍ଦିଘୋଷ ବ୍ୟୁରୋ : ଉତ୍ତରାଖଣ୍ଡ ବଦ୍ରିନାଥରେ ହିମସ୍ଖଳନ ଘଟଣାରେ ରେସ୍କ୍ୟୁ ଅପରେସନ ଶେଷ। ଏହି ସୂଚନା ଦେଇଛନ୍ତି ଉତ୍ତରାଖଣ୍ଡର ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି। ପୁରା ଘଟଣାରେ ୪୬ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିବା ବେଳେ ୮ ଜଣଙ୍କ ମୃତ୍ୟୁ ହୋଇଛି। ଆଜି ଅଷ୍ଟମ ବ୍ୟକ୍ତିଙ୍କ ମୃତଦେହ ଉଦ୍ଧାର ହୋଇଥିଲା। ଦୁଇ ଦିନ ଧରି ଚାଲିଥିଲା ଅପରେସନ । ଚମୋଲି ଗାଁ ନିକଟରେ ବର୍ଡର ରୋଡ୍ ଅର୍ଗାନାଇଜେସନ ଦ୍ଵାରା ରାସ୍ତା ତିଆରି କରାଯାଉଥିଲା। ହିମସ୍ଖଳନ ହେବାରୁ ୫୦ରୁ ଅଧିକ ଶ୍ରମିକ ବରଫ ତଳେ ଚାପି ହୋଇଥିଲେ। ଦୁଇ ଦିନ ଧରି ଅକ୍ଲାନ୍ତ ପରିଶ୍ରମ ପରେ ୪୬ ଜଣଙ୍କୁ ଉଦ୍ଧାର କରାଯାଇଥିଲା। ସେନା, ଆଇଟିବିପି, ଏସଡିଆରଏଫ, ବିଆରଓ, ଏନଡିଆରଏଫ ପକ୍ଷରୁ ୨୦୦ ଜଣ ଯବାନ ଉଦ୍ଧାର କାର୍ଯ୍ୟରେ ନିୟୋଜିତ ହୋଇଥିଲେ। ଉଦ୍ଧାର କାର୍ଯ୍ୟରେ ଭିକ୍ଟିମ ଲୋକେଟିଂ କ୍ଯାମେରା, ଥର୍ମାଲ ଇମେଜିଂ କ୍ୟାମେରା, ଗ୍ରାଉଣ୍ଡ ପେନେଟ୍ରେସନ ରାଡାର, ସ୍ବତନ୍ତ୍ର କୁକୁର ନିୟୋଜିତ ହୋଇଥିଲେ। ଏହା ସହ ସେନାର ୩ ହେଲିକପ୍ଟର, ବାୟୁସେନାର ୨ ହେଲିକପ୍ଟର ଓ ଏକ ସିଭିଲ ହେଲିକପ୍ଟରକୁ ସାମିଲ କରାଯାଇଥିଲା।
