ଭୁବନେଶ୍ବର : କାହା ସ୍ବାର୍ଥରେ ଅନ୍ତ୍ୟୋଦୟ ଗୃହ ଯୋଜନା ? ରାଜ୍ୟ ରାଜକୋଷରୁ ୩ ବର୍ଷରେ ସାଢେ ୭ ହଜାର କୋଟି ଟଙ୍କା କାହା ପାଇଁ ? ପ୍ରଧାନମନ୍ତ୍ରୀ ଆବାସ ଯୋଜନାରେ କଚ୍ଚା ଘରେ ରହୁଥିବା ଗରିବ ଲୋକଙ୍କୁ ପକ୍କା ଘର ଯୋଗାଇବାର ବ୍ୟବସ୍ଥା ଥିବା ବେଳେ, କ’ଣ ପାଇଁ ପୁଣି ଏକ ଯୋଜନାର ବୋଝ ? ରାଜ୍ୟରେ ପ୍ରଚାର ସର୍ବସ୍ବ ସରକାର ଆଉ ଏକ ଯୋଜନା ମାଧ୍ୟମରେ ନିଜର ଆତ୍ମ ପ୍ରଚାର କରୁଛନ୍ତି କି ? ଆବାସ ଯୋଜନାର ସଠିକ କାର୍ଯ୍ୟକାରିତା ଉପରେ ରହିଛି କି ସନ୍ଦେହ ? ଦିବ୍ୟାଙ୍ଗ, ବିଧବା, ରୋଗାକ୍ରାନ୍ତ, ସହିଦ ପରିବାର, ଘରପୋଡ଼ି, ବାତ୍ୟା, ବନ୍ୟା, ହାତୀ ଉପଦ୍ରବରେ କ୍ଷତିଗ୍ରସ୍ତ ପରିବାରକୁ ପକ୍କାଘର ଯୋଗାଇବା ପାଇଁ ଅନ୍ତ୍ୟୋଦୟ ଗୃହ ଯୋଜନା ଉଦ୍ଦିଷ୍ଟ ବୋଲି ସରକାର ପ୍ରଚାର କରିଛନ୍ତି। ଆବାସ ଯୋଜନା ହିତାଧିକାରୀ ଚୟନ ମାନଦଣ୍ଡରେ ସମସ୍ତେ ସାମିଲ ହୋଇଥିବା ବେଳେ, ଏଭଳି ଏକ ନୂଆ ଯୋଜନାର ଆବଶ୍ୟକତାକୁ ନେଇ ପ୍ରଶ୍ନ କରିଛନ୍ତି ବିରୋଧୀ କଂଗ୍ରେସ ଓ ବିଜେଡି।
ଆବାସ ଯୋଜନାରେ କେନ୍ଦ୍ର ୬୦ ଓ ରାଜ୍ୟ ୪୦ ପ୍ରତିଶତ ଅନୁଦାନ ଦେଉଥିବା ବେଳେ, ଅନ୍ତ୍ୟୋଦୟ ଗୃହ ଯୋଜନାର ଅର୍ଥରାଶି ରାଜ୍ୟ ସରକାରଙ୍କ ନିଜସ୍ବ ବଜେଟରୁ ଖର୍ଚ୍ଚ ହେବ। ୨୫୦ ବର୍ଗଫୁଟର ଘର ପାଇଁ ସରକାର ଦେବେ ୧ ଲକ୍ଷ ୨୦ ହଜାର ଟଙ୍କା। ଯଦି ଆବାସ ଯୋଜନାରେ ରାଜ୍ୟର ସମସ୍ତ ହିତାଧିକାରୀ ସାମିଲ ହୋଇପାରିବେ, ତାହାଲେ ଅନ୍ତ୍ୟୋଦୟ ଗୃହ ଯୋଜନାର ଆବଶ୍ୟକତା କ’ଣ ? ଆବାସ ତାଲିକାରୁ ବାଦ୍ ପଡ଼ିଥିବା ହିତାଧିକାରୀଙ୍କୁ ପକ୍କାଘର ଯୋଗାଇବା ପାଇଁ ନବୀନ ସରକାରରେ ହୋଇଥିଲା ବିଜୁ ପକ୍କାଘର ଯୋଜନା। ଏବେ ବିଜେପି କିନ୍ତୁ କରୁଛି ଅଜବ ଯୁକ୍ତି। ୨୦୧୬ରୁ ଆରମ୍ଭ ହୋଇଥିଲା ପିଏମ୍-ଆବାସ ଯୋଜନା। ମଞ୍ଜୁର ହୋଇଛି ୨୮ ଲକ୍ଷ ୨୫ ହଜାର ଘର, ୨୩ ଲକ୍ଷ ଘର କାମ ସରିଛି। ଯେଉଁମାନେ ବଞ୍ଚିତ ହୋଇଛନ୍ତି, ସେମାନଙ୍କ ପାଇଁ ଏବେ ସାରା ରାଜ୍ୟରେ ସର୍ଭେ ଚାଲିଛି। ଅନ୍ତ୍ୟୋଦୟ ଗୃହ ଯୋଜନାର ହିତାଧିକାରୀ ଚୟନ ପାଇଁ କୌଣସି ବିଜ୍ଞପ୍ତି ହୋଇନଥିବା ବେଳେ ଏହାର ତାଲିକାକୁ ନେଇ ମଧ୍ୟ ଉଠିଛି ପ୍ରଶ୍ନ।
