ନନ୍ଦିଘୋଷ ବ୍ୟୁରୋ ; ଆରବ ସାଗରରେ ଭାରତୀୟ ନୌସେନା ପକ୍ଷରୁ ବ୍ରହ୍ମୋସ ମିସାଇଲର ପରୀକ୍ଷଣ। ଆରବ ସାଗରରେ ନୌସେନାର ଯୁଦ୍ଧ ଜାହାଜରୁ ଏହି ସୁପରସୋନିକ କ୍ରୁଜ ମିସାଇଲର ପରୀକ୍ଷଣ କରାଯାଇଛି। ଦୀର୍ଘ ଦୂରଗାମୀ ସଠିକ ଆକ୍ରମଣ ପାଇଁ ପ୍ଲାଟଫର୍ମ, ବ୍ୟବସ୍ଥା ଏବଂ ପ୍ରସ୍ତୁତିକୁ ସୁନିଶ୍ଚିତ କରିବାକୁ ଏହି ପରୀକ୍ଷଣ କରାଯାଇଥିଲା। ଭାରତୀୟ ନୌସେନା ଯେକୌଣସି ସମୟରେ ଯେକୌଣସି ସ୍ଥାନରେ ଦେଶର ସାମୁଦ୍ରିକ ସ୍ୱାର୍ଥକୁ ସୁରକ୍ଷା ଦେବାରେ ପ୍ରସ୍ତୁତ ବୋଲି କହିଛି ନୌସେନା। ନୌସେନାର INS ସୁରତ ବିଶ୍ୱସ୍ତରରେ ସବୁଠାରୁ ବଡ଼ ଏବଂ ଉନ୍ନତ ବିଧ୍ୱଂସକ ମଧ୍ୟରେ ସ୍ଥାନ ପାଇଛି। ୭୫% ସ୍ୱଦେଶୀ ସାମଗ୍ରୀ ସହିତ ଏହା ଅତ୍ୟାଧୁନିକ ଅସ୍ତ୍ର-ସେନ୍ସର ସିଷ୍ଟମ ଏବଂ ଉନ୍ନତ ନେଟୱର୍କ କ୍ଷମତାସମ୍ପନ୍ନ। ୨୨ ଏପ୍ରିଲରେ ପହଲଗାଓଁ ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ବୃଦ୍ଧି ପାଉଥିବା ଉତ୍ତେଜନା ମଧ୍ୟରେ ଏହି ପରୀକ୍ଷଣ କରାଯାଇଛି। ପହଲଗାଓଁ ଆକ୍ରମମରେ ୨୬ ଜଣ ସାଧାରଣ ନାଗରିକଙ୍କ ମୃତ୍ୟୁ ହୋଇଥିଲା।ପୂର୍ବରୁ ଭାରତୀୟ ନୌସେନାର ଯୁଦ୍ଧଜାହାଜ INS ସୁରତରୁ ଆରବ ସାଗରରେ ମଧ୍ୟମ ଦୂରଗାମୀ ଭୂପୃଷ୍ଠରୁ-ଆକାଶକୁ ମାଡ଼ କରୁଥିବା କ୍ଷେପଣାସ୍ତ୍ର MR-SAM ସଫଳ ପରୀକ୍ଷଣ କରିଥିଲା। MR-SAM ଭୂପୃଷ୍ଠରୁ-ଭୂପୃଷ୍ଠକୁ କ୍ଷେପଣାସ୍ତ୍ର ଏବଂ ଅନ୍ୟାନ୍ୟ ଆକାଶରୁ ଆକ୍ରମଣ ବିରୁଦ୍ଧରେ ଅତ୍ୟନ୍ତ ପ୍ରଭାବଶାଳୀ।
