ମହିଳାଙ୍କୁ ଅତ୍ୟାଚାର ବିରୋଧରେ ବିଜେଡିର ଗର୍ଜନ, ବିଜେପିର ମିଛ ବିରୋଧରେ ଲଢ଼େଇ ପାଇଁ ମହିଳାଙ୍କ ସଙ୍କଳ୍ପ

ଯାଜପୁର : ସ୍ବପ୍ନ ଦେଖାଇ ଭୋଟ ନେଲେ, ବର୍ଷେ ଭିତରେ ଧୂଳିସାତ କଲେ । ସୁଭଦ୍ରା ଯୋଜନାରେ ୨ ବର୍ଷରେ ୫୦ ହଜାର ଟଙ୍କା ଦେବାକୁ କହି ବର୍ଷକୁ ମାତ୍ର ଦୁଇଟି କିସ୍ତିରେ ୧୦ ହଜାର ଟଙ୍କା ଦେଲେ। ଦିନକୁ ମାତ୍ର ୨୭ ଟଙ୍କାରେ କିପରି ମହିଳା ହେବେ ସ୍ବାବଲମ୍ବୀ। ମିଶନ ଶକ୍ତିରେ କାମ କରୁଥିବା ମହିଳାଙ୍କୁ ଦରମା ଦେଉନି ବିଜେପି ସରକାର। ରାଜ୍ୟରେ ମହିଳାଙ୍କ ପ୍ରତି ଅତ୍ୟାଚାର ବଢିବା ସହ ସୀମା ଟପିଛି ଦୁଷ୍କର୍ମ। ବିଜେପି ସରକାର ବିରୋଧରେ ଏଭଳି ଅଭିଯୋଗ କରି ରଣହୁଙ୍କାର ଦେଇଛନ୍ତି ବିଜେଡିର ହେଭିୱେଟ ନେତାଙ୍କ ଠାରୁ ଆରମ୍ଭ କରି ମହିଳା ନେତ୍ରୀ। ସୁପ୍ରିମୋ ନବୀନ ପଟ୍ଟନାୟକଙ୍କ ନିର୍ଦ୍ଦେଶ ପରେ ଯାଜପୁର ବରୁଆଁ ଦଶହରା ପଡିଆରେ ଡବଲ ଇଞ୍ଜିନ ସରକାରକୁ କରାଯାଇଛି ତୀବ୍ର ସମାଲୋଚନା। ନିର୍ବାଚନ ସମୟରେ ଲମ୍ବା ପ୍ରତିଶୃତି ଦେଇଥିଲା ବିଜେପି। କିନ୍ତୁ ବର୍ଷକରେ ଏହା ମିଛ ବୋଲି ପ୍ରମାଣିତ ହୋଇଛି। ଏନେଇ ଗାଁ ଗାଁରେ ଜନଜାଗରଣ କରିବାକୁ ମହିଳା ସମାବେଶରେ ସଙ୍କଳ୍ପ ନେଇଛନ୍ତି ମା’ମାନେ ।

ପୁଣି ଥରେ ନବୀନ ପଟ୍ଟନାୟକଙ୍କୁ ମୁଖ୍ୟମନ୍ତ୍ରୀ ଆସନରେ ବସାଇବା ପାଇଁ ସଙ୍କଳ୍ପ ନେଇଛନ୍ତି ହଜାର ହଜାର ମହିଳା। ବିଜେପି ସରକାରର ବର୍ଷ ଏକ, ବିଫଳତାର ଅନେକ ଉଦାହରଣ ଦେଇ ଗେରୁଆ ଦଳର ବର୍ଷ ପୂର୍ତ୍ତି ଉତ୍ସବକୁ କଟାକ୍ଷ କରିଛି ବିଜେଡି । ଗତ ବର୍ଷକ ଭିତରେ ରାଜ୍ଯରେ ୮ ପ୍ରତିଶତ ବଢ଼ିଛି ନାରୀ ନିର୍ଯାତନା। ପ୍ରତିଶୃତି ପ୍ରତାରଣାରେ ପରିଣତ ହୋଇଥିବାରୁ ଜନଜାଗରଣ କରି ଓଡ଼ିଶାବାସୀଙ୍କୁ ସଚେତନ କରୁଛି ବିଜେଡି। ନବୀନ ପଟ୍ଟନାୟକଙ୍କ ନେତୃତ୍ୱରେ ଓଡ଼ିଶାର ୭୦ ଲକ୍ଷରୁ ଅଧିକ ମହିଳା ସାମାଜିକ, ଆର୍ଥିକ ଓ ରାଜନୈତିକ କ୍ଷେତ୍ରରେ ସଶକ୍ତ ଓ ସ୍ୱାବଲମ୍ବୀ ହୋଇଥିଲେ। ନିଜକୁ ଲୋକଙ୍କ ସରକାର କହି ଆସୁଥିବା ବିଜେପି ସରକାର, ଲୋକଙ୍କୁ ସଶକ୍ତ କରିବାରେ ବିଫଳ ହୋଇଛି। ସମାବେଶ ଆରମ୍ଭରୁ ବିମାନ ଦୁର୍ଘଟଣା ଓ ଡାଇରିଆରେ ପ୍ରାଣ ହରାଇଥିବା ମୃତକଙ୍କ ପାଇଁ ଶୋକସଭା କରାଯାଇଥିଲା।