ମହାକାଶଚାରୀ ଗ୍ରୁପ କ୍ୟାପଟେନ ଶୁଭାଂଶୁ ଶୁକ୍ଲାଙ୍କୁ ଶୂୁଭେଚ୍ଛା ଜଣାଇଲେ ତାଙ୍କ ବାପା ଓ ମାଆ

ନନ୍ଦିଘୋଷ ବ୍ୟୁରୋ : ମହାକାଶଚାରୀ ଗ୍ରୁପ କ୍ୟାପଟେନ ଶୁଭାଂଶୁ ଶୁକ୍ଲାଙ୍କୁ ଶୂୁଭେଚ୍ଛା ଜଣାଇଛନ୍ତି ତାଙ୍କ ବାପା ଓ ମାଆ। ବାପା ଶଂଭୁ ଦୟାଲ ଶୁକ୍ଲା ଓ ମାଆ ଆଶା ଶୁକ୍ଲା ପୁଅ ଶୁଭାଂଶୁଙ୍କୁ ମହାକାଶ ଯାତ୍ରା ଲାଗି ଶୁଭେଚ୍ଛା ଜଣାଇଛନ୍ତି। ଆଜି ଭାରତୀୟ ସମୟ ମଧ୍ୟାହ୍ନ ୧୨ଟା ୧ ମିନିଟରେ ମିଶନ ଆରମ୍ଭ ହେବ। ମହାକାଶ ଯାନର ହେବ ଉତକ୍ଷେପଣ। କେତେବେଳେ ଏହି ମିଶନ ଆରମ୍ଭ ହେବ ଏହାକୁ ନେଇ ଶୁଭାଂଶୁଙ୍କ ବାପାମାଆଙ୍କ ମଧ୍ୟରେ ଅନେକ ଉତ୍ସାହ ରହିଛି। ଆମର ସମସ୍ତ ଆଶୀର୍ବାଦ ପୁଅ ଶୁଭାଂଶୁଙ୍କ ଉପରେ ରହିଛି ବୋଲି କହିଛନ୍ତି ଉଭୟ। ମିଶନ ଯେପରି ସଫଳ ହେବ ସେଥିଲାଗି ଭଗବାନଙ୍କ ନିକଟରେ ପ୍ରାର୍ଥନା କରିଛନ୍ତି ଶୁଭାଂଶୁଙ୍କ ବାପାମା। ଲକ୍ଷ୍ନୌ, ରାଜ୍ୟ ଏବଂ ଦେଶ ପାଇଁ ଗୌରଣ ଆଣିଦେବେ ଶୁଭାଂଶୁ ଶୁକ୍ଲା।

ବହୁପ୍ରତୀକ୍ଷିତ ଆକ୍ସିଅମ-୪ ମିଶନରେ ଅନ୍ତର୍ଜାତୀୟ ମହାକାଶ ଷ୍ଟେସନ-ଆଇଏସଏସକୁ ଯିବେ ଭାରତୀୟ ମହାକାଶଚାରୀ ଗ୍ରୁପ କ୍ୟାପଟେନ ଶୁଭାଂଶୁ ଶୁକ୍ଳା। ପୂର୍ବରୁ ବହୁବାର ଖରାପ ପାଗ ଯୋଗୁ ଏହି ଅଭିଯାନ ସ୍ଥଗିତ ରହିଥିଲା ବୋଲି କହିଥିଲା ଭାରତୀୟ ମହାକାଶ ଗବେଷଣା ସଂଗଠନ- ଇସ୍ରୋ । କେନେଡି ସ୍ପେସ ସେଣ୍ଟରରୁ ଆରମ୍ଭ ହେବାକୁ ଥିବା ଏଏକ୍ସ-୪ ମିଶନରେ ସାମିଲ ହେବେ ଶୁଭାଂଶୁଙ୍କ ସମେତ ଆମେରିକା, ପୋଲାଣ୍ଡ ଓ ହଙ୍ଗେରୀର ଚାରି ମହାକାଶଚାରୀ। ଏହି ମିଶନରେ ସାମିଲ ଅଛନ୍ତି ଆକ୍ସିୟମ ସ୍ପେସ, ନାସା, ସ୍ପେସ ଏକ୍ସ ଓ ଇସ୍ରୋ । ୧୯୮୪ରେ ପ୍ରଥମ ଭାରତୀୟ ଭାବେ ରାକେଶ ଶର୍ମା ମହାକାଶକୁ ଯାଇଥିବାବେଳେ ପ୍ରାୟ ଚାରି ଦଶନ୍ଧି ପରେ ଶୁଭାଂଶୁ ଅନ୍ତର୍ଜାତୀୟ ମହାକାଶ ଷ୍ଟେସନକୁ ଯିବେ। ଅନ୍ୟ ଯେଉଁ ତିନିଜଣ ଆଇଏସଏସକୁ ଯିବେ ସେମାନେ ହେଲେ ହଙ୍ଗେରୀର ତିବୋର କାପୁ, ନାସାର ପୂର୍ବତନ ଆଷ୍ଟ୍ରୋନଟ ପେଗି ହୁଇଟସନ, ପୋଲାଣ୍ଡ ତଥା ୟୁରୋପିଆନ ସ୍ପେସ ଏଜେନ୍ସିର ସ୍ଲାଓଜ ଉଜନସ୍କି ଉଇସନିସ୍କି। ମହାକାଶଚାରୀମାନେ ଆଇଏସଏସରେ ୧୪ ଦିନ ରହିବେ । ସେଠାରେ ସେମାନେ ବୈଜ୍ଞାନିକ ଗବେଷଣା କରିବା ସହ ୩୦ଟି ଦେଶର ବୈଜ୍ଞାନକଙ୍କ ସହ ଯୋଗାଯୋଗରେ ରହିବେ।