ବୁଲ୍ଡୋଜର୍ ଜଷ୍ଟିସକୁ ହାଇକୋର୍ଟଙ୍କ ଭତ୍ସନା
କଟକ: ବୁଲ୍ଡୋଜର୍ ଜଷ୍ଟିସକୁ ହାଇକୋର୍ଟଙ୍କ ଭତ୍ସନା। ଅଦାଲତି ଅଙ୍କୁଶ ସତ୍ତ୍ବେ ଭାଙ୍ଗିଦେଲେ ଗୋଷ୍ଠୀ ଗୃହ। ଯାହାକୁ ନେଇ ଜିଲ୍ଲା ପ୍ରଶାସନ ଉପରେ ୧୦ ଲକ୍ଷ ଟଙ୍କାର ଜରିମାନା ଜାରି କରାଯାଇଛି । କୁମାରପୁର ଶାସନ ଯୁବଗୋଷ୍ଠୀ କେନ୍ଦ୍ର ଏବଂ ଅନ୍ୟମାନଙ୍କ ପକ୍ଷରୁ ଆଗତ ମାମଲାର ବିଚାର କରି ହାଇକୋର୍ଟର ବିଚାରପତି ଜଷ୍ଟିସ୍ ଏସ୍.କେ. ପାଣିଗ୍ରାହୀ ଏହି ନିର୍ଦ୍ଦେଶ ଦେଇଛନ୍ତି । ପ୍ରଶାସନ ଉପରେ ୧୦ ଲକ୍ଷ ଟଙ୍କାର ଜରିମାନାରୁ ୨ ଲକ୍ଷ ତତ୍କାଳୀନ ଆଠଗଡ଼ ତହସିଲଦାରଙ୍କ ଠାରୁ ଆଦାୟ କରାଯିବ ବୋଲି ହାଇକୋର୍ଟ ତାଙ୍କ ଆଦେଶରେ ସ୍ପଷ୍ଟ କରିଛନ୍ତି। ନିର୍ଦ୍ଦିଷ୍ଟ କିସ୍ତି ଆକାରରେ ସଂପୃକ୍ତ ତହସିଲଦାରଙ୍କ ଦରମାରୁ ଏହି ଜରିମାନା ଆଦାୟ କରାଯିବ ।
ସେହିପରି ବାକି ୮ ଲକ୍ଷ ଟଙ୍କା ଜିଲ୍ଲା ପ୍ରଶାସନ ୮ ସପ୍ତାହ ମଧ୍ୟରେ ଆବେଦନକାରୀଙ୍କୁ ପ୍ରଦାନ କରିବେ। ହାଇକୋର୍ଟଙ୍କ କଟକଣା ସତ୍ତ୍ୱେ ଉଚ୍ଛେଦ କରିଥିବା ସଂପୃକ୍ତ ତହସିଲଦାରଙ୍କ ବିରୋଧରେ ବିଭାଗୀୟ କାର୍ଯ୍ୟାନୁଷ୍ଠାନ ପାଇଁ ମଧ୍ୟ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ସୁପ୍ରିମ୍କୋର୍ଟଙ୍କ ନିର୍ଦ୍ଦେଶ ଆଧାରରେ ଉଚ୍ଛେଦ କିପରି କରାଯିବ ସେନେଇ ଏକ ଗାଇଡ୍ଲାଇନ୍ ଜାରି କରିବାକୁ ହାଇକୋର୍ଟ ମୁଖ୍ୟ ଶାସନ ସଚିବଙ୍କୁ ନିର୍ଦ୍ଦେଶ ଦେଇଛନ୍ତି।
