ନନ୍ଦିଘୋଷ ବ୍ୟୁରୋ : କେବେ ସରିବ ରାଉରକେଲା ୱାନ ପ୍ରକଳ୍ପ । ଶହେ କୋଟି ଟଙ୍କା ବ୍ୟୟରେ ୨୦୨୦ ରୁ ଆରମ୍ଭ ହୋଇଛି ନିର୍ମାଣ କାମ । ୨୦୨୩ ସୁଦ୍ଧା କାମ ସାରିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା । ହେଲେ କାମ ସରିବାର ନାଁ ନେଉନି । ନିମ୍ନ ମାନର କାମ ଯୋଗୁଁ ଅନେକ ସ୍ଥାନରେ ଫାଟି ଗଲାଣି । ସେପଟେ ଶୀଘ୍ର କାମ ସାରିବାକୁ ପଦକ୍ଷେପ ନିଆଯାଉଥିବା କହିଛନ୍ତି ରାଉରକେଲା ସ୍ମାର୍ଟ ସିଟିର ଆର୍କିଟେକ ଓ କେନ୍ଦ୍ର ମନ୍ତ୍ରୀ ।
ନାହିଁ ନାହିଁରେ ଚାଲିଛି ରାଉରକେଲା ୱାନ ପ୍ରକଳ୍ପ । ଶହେ କୋଟି ଟଙ୍କା ବ୍ୟୟରେ ୨୦୨୦ରୁ ଆରମ୍ଭ ହୋଇଥିଲା ଇଣ୍ଟିଗ୍ରେଟେଡ କମାଣ୍ଡ କଣ୍ଟ୍ରୋଲ ସେଣ୍ଟର, ଆଦିବାସୀ ସଂଗ୍ରହାଳୟ ଓ ଅଡିଟୋରିୟମ ଓ କନଭେନସନ ସେଣ୍ଟର । ୨୦୨୩ରେ କାମ ସାରିବାକୁ ଲକ୍ଷ୍ୟ ରଖାଯାଇଥିଲା । ହେଲେ ଏବେ ସୁଦ୍ଧା କାମ ସରିବାର ନାଁ ନେଉନି । ସେପଟେ ନିମ୍ନମାନର କାମ ଯୋଗୁଁ ଅନେକ ସ୍ଥାନରେ ସୃଷ୍ଟି ହେଲାଣି ଫାଟ । ପ୍ୟାଚ ପକାଇ ସେସବୁକୁ ଲୁଚାଇବାକୁ ଚେଷ୍ଟା କରାଯାଉଛି । ତଦାରଖ ଦାୟିତ୍ବରେ ଥିବା ଅଧିକାରୀଙ୍କ ବେପରୁଆ ମନୋଭାବ ଯୋଗୁଁ ଠିକାସଂସ୍ଥା ଠକୁଥିବା ଅଭିଯୋଗ କରିଛନ୍ତି ଲୋକେ ।
ରାଉରକେଲା ଓ୍ଵାନ ବିଲିଡିଙ୍ଗର ବିଭିନ୍ନ ସ୍ଥାନରେ ସୃଷ୍ଟି ହୋଇଥିବା ଫାଟରେ କେମିକାଲ ଦେଇ ଲୁଚାଇବାକୁ ଚେଷ୍ଟା କରାଯାଉଥିବାରୁ ଏହାର ସ୍ଥାୟିତ୍ବ ନେଇ ପ୍ରଶ୍ନ ଉଠିଛି । କାମ ବିଳମ୍ବ ହେଉଥିବାରୁ ସହରରେ ଟ୍ରାଫିକ ଲାଇଟ ପରିଚାଳନା ଓ ସିସିଟିଭି କ୍ୟାମେରା କାର୍ଯ୍ୟକ୍ଷମ ହେବାରେ ବିଳମ୍ୱ ହେଉଥିବା ଅଭିଯୋଗ ହେଉଛି । ସେପଟେ କାମ କିପରି ଶୀଘ୍ର ସରିବ ସେନେଇ ପଦକ୍ଷେପ ନିଆଯାଉଥିବା କହିଛନ୍ତି ସ୍ମାର୍ଟ ସିଟିର ଆର୍କିଟେକ ଓ କେନ୍ଦ୍ର ମନ୍ତ୍ରୀ ଜୁଏଲ ଓରାମ । ପ୍ରକଳ୍ପ ନିର୍ମାଣ କାର୍ଯ୍ୟ ବିଳମ୍ବ ହେବା ସହ ନିମ୍ନମାନର କାର୍ଯ୍ୟ ହେଉଥିବାରୁ ଏହାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ବିଭିନ୍ନ ମହଲରେ ଦାବି ହୋଇଛି ।
