କୋଣାର୍କ : ସରିଲା ସୁଭଦ୍ରା ଶକ୍ତି ମେଳା । ସପ୍ତାହେ ବ୍ୟାପୀ ଅନୁଷ୍ଠିତ ମେଳାରେ ୩କୋଟିର ବ୍ୟବସାୟ । ଲକ୍ଷପତି ଦିଦି ବନିଲେ ୫୦ ଜଣ ମହିଳା । କୋଣାର୍କ ଉତ୍ସବ ଅବସରରେ ଚନ୍ଦ୍ରଭାଗା ନିକଟରେ ଅନୁଷ୍ଠିତ ହୋଇଥିଲା ସୁଭଦ୍ରା ଶକ୍ତି ମେଳା । ଡିସେମ୍ବର ପହିଲାରୁ ଆରମ୍ଭ ହୋଇଥିବା ମେଳା ରବିବାର ଉଦଯାପିତ ହୋଇଛି । ଉଦଯାପନୀ ସନ୍ଧ୍ୟାରେ ମୁଖ୍ୟଅତିଥି ଭାବେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ଯୋଗ ଦେଇଥିଲେ । ସୁଭଦ୍ରା ଶକ୍ତି ମେଳାରେ ୧୫୦ରୁ ଅଧିକ ଷ୍ଟଲ ଲାଗିଥିଲା । ରାଜ୍ୟର ବିଭିନ୍ନ ପ୍ରାନ୍ତରୁ ଆସିଥିବା ଏସଏଚଜି ମହିଳା ମାନେ ନିଜେ ପ୍ରସ୍ତୁତ ସାମଗ୍ରୀକୁ ବିକ୍ରି ପାଇଁ ଆଣିଥିଲେ। ଯେଉଁ ମହିଳା, ସ୍ୱୟଂ ସହାୟକ ଗୋଷ୍ଠୀ ଭଲ ବ୍ୟବସାୟ କରିଛନ୍ତି ସେମାନଙ୍କୁ ସମ୍ମାନିତ କରାଯାଇଥିଲା। ଗୋଟିଏ ଜାଗାରେ ସୁଲଭ ଦରରେ ଆବଶ୍ୟକ ସାମଗ୍ରୀ ମିଳିଥିବାରୁ ବେଶ ଖୁସି ଗ୍ରାହକ।
ସୁଭଦ୍ରା ଶକ୍ତି ମେଳାରେ ହସ୍ତଶିଳ୍ପ, ଟେରା କୋଟା, ବାଉଁଶ ଶିଳ୍ପ, ହସ୍ତତନ୍ତ ଓ ଘରୋଇ ସାମଗ୍ରୀ ଠାରୁ ଆରମ୍ଭ କରି ସ୍ୱାସ୍ଥ୍ୟ ଓ ୱେଲନେସ ଉତ୍ପାଦ, ବିଭିନ୍ନ ପ୍ରକାର ଜୈବିକ ଖାଦ୍ୟ ସାମଗ୍ରୀ, ମସଲା ଏବଂ ମିଲେଟଭିତ୍ତିକ ବ୍ୟଞ୍ଜନର ଆସର ଜମିଥିଲା । ଶୁଖୁଆ, ମାଟି ହାଣ୍ଡି ଗୁଡ଼, ଘର ସାଜସଜା ସାମଗ୍ରୀ ଷ୍ଟଲ ଗୁଡିକରେ ପ୍ରବଳ ଭିଡ଼ ଦେଖିବାକୁ ମିଳିଥିଲା । ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ମେଳାକୁ ଉତ୍ସବ ମୁଖର କରିଥିଲା । ମେଳାରେ ମହିଳାଙ୍କୁ ସଶକ୍ତ କରିବା ସହ ସରକାରଙ୍କ ସମସ୍ତ ସୁବିଧା ସୁଯୋଗ ବିଷୟରେ ଅବଗତ କରାଇବା ପାଇଁ ଏକ ଷ୍ଟଲ ମଧ୍ୟ ଖୋଲିଥିଲା ।
