ନୂଆ ସରକାରରେ ସ୍ବୟଂସହାୟକ ଗୋଷ୍ଠୀଙ୍କୁ କରାଯାଉଛି ଅବହେଳା । ଯୋଗାଇ ଦିଆଯାଉନି ସରକାରୀ ସୁବିଧା । ପୂର୍ବ ସରକାରଙ୍କ ସମୟରୁ ମଣ୍ଡିରେ ଧାନ କ୍ରୟ ପ୍ରକ୍ରିୟାରେ ସାମିଲ ଥିବା ଏସଏଚଜି ଗୃପକୁ ବାଦ ଦେବାକୁ ଚାଲିଛି ମସୁଧା । ଚଳିତ ବର୍ଷ କୋରାପୁଟ ଜିଲ୍ଲାରେ ରବି ଧାନ ମଣ୍ଡିରେ ସରକାରଙ୍କ ପକ୍ଷରୁ ଲ୍ୟାମ୍ପ, ପାଣିପଞ୍ଚାୟତ ଏବଂ ମହିଳା ସ୍ବୟଂସହାୟକଙ୍କ ଜରିଆରେ ଧାନ କ୍ରୟ କରାଯିବା ନେଇ ସମସ୍ତ ପ୍ରକ୍ରିୟା ଶେଷ ହୋଇଛି । ମଣ୍ଡି ଶୁଭାରମ୍ଭ ପୂର୍ବରୁ ଏସଏଚଜି ଗ୍ରୁପ ମାନଙ୍କୁ ହଠାତ୍ ନୂତନ ଗାଇଡଲାଇନ ନାମରେ ଧାନ କ୍ରୟରେ ସାମିଲ ପ୍ରକ୍ରିୟାରୁ ବାଦ ଦେବାକୁ ହୋଇଛି ଷଡ଼ଯନ୍ତ୍ର । ଜିଲ୍ଲାର ସମସ୍ତ ୨୪ଟି ଏସଏଚଜି ଧାନ କ୍ରୟ କାର୍ଯ୍ୟରେ ସାମିଲ ଥିବା ବେଳେ ଜିଲ୍ଲାପାଳଙ୍କ ନିର୍ଦ୍ଦେଶରେ ନୂତନ ଗାଇଡଲାଇନ ଅନୁଯାୟୀ ତଦନ୍ତ କରି ମହିଳା ଏସଏଚଜି ମାନଙ୍କୁ ଏକ ପ୍ରକାର ହତାଶ କରାଯାଉଥିବା ଅଭିଯୋଗ ହୋଇଛି । ଏନେଇ ଏସଏଚଜି ମହିଳା ମହାସଂଘ ପକ୍ଷରୁ ଜୟପୁର ଉପଜିଲ୍ଲାପାଳଙ୍କ କାର୍ଯ୍ୟାଳୟ ଘେରାଉ ସହିତ ଏକ ଦାବିପତ୍ର ପ୍ରଦାନ କରାଯାଇଛି । ନୂତନ ଭାବେ ପ୍ରସ୍ତୁତ ଗାଇଡଲାଇନକୁ ରଦ୍ଦ କରିବା ସହ ଏସଏଚଜିକୁ ଧାନକ୍ରୟ ମଣ୍ଡିରେ ସୁଯୋଗ ପ୍ରଦାନ କରିବାକୁ ଦାବି ହୋଇଛି ।
ଗତ ୨୦୧୯ ମସିହା ଠାରୁ ପୂର୍ବ ସରକାରଙ୍କ ମହିଳା ସଶକ୍ତିକରଣ ଏବଂ ଆତ୍ମନିର୍ଭରଶୀଳ ମାଧ୍ୟମରେ ଆୟ କରିବା ନେଇ ରାଜ୍ୟରେ ଧାନକ୍ରୟ ପ୍ରକ୍ରିୟାରେ ଏଏଚଜିକୁ ସାମିଲ କରାଯାଇଥିଲା । ଏହିପରି ସମୁଦାୟ କ୍ରୟ ଟଙ୍କାର ୧ ପ୍ରତିଶତ ଟଙ୍କା ଏସଏଚଜିଙ୍କୁ ପାରିଶ୍ରମିକ ବାବଦକୁ ମିଳୁଥିଲା । ବର୍ତ୍ତମାନ ନୂତନ ଗାଇଡ ଲାଇନ ଅନୁଯାୟୀ କୋରାପୁଟ ଜିଲ୍ଲାରେ ମହିଳା ଏସଏଚଜି ମାନେ ମଣ୍ଡିରେ ଧାନ କ୍ରୟ କରିବାକୁ ହେଲେ ମଣ୍ଡିର ଆନୁସଙ୍ଗିକ ଭିତ୍ତିଭୂମି ଏବଂ ପାରିପାର୍ଶ୍ବିକ ଉନ୍ନତୀକରଣ ପାଇଁ ଏସଏଚଜି ଦ୍ବାରା ଖର୍ଚ୍ଚ କରିବାକୁ ନିର୍ଦ୍ଦେଶ ହୋଇଛି । ହେଲେ ଧାନ ମଣ୍ଡିରେ ଲ୍ୟାମ୍ପ ଏବଂ ପାଣି ପଞ୍ଚାୟତ ପକ୍ଷରୁ ଧାନ କ୍ରୟ କରାଯାଉଥିବା ବେଳେ ସେମାନଙ୍କୁ ଏହି ନିୟମ ଲାଗୁ କରାଯାଉନଥିବା ଅଭିଯୋଗ ହୋଇଛି । ସେପଟେ ଧାନ ମଣ୍ଡିରେ ମହିଳା ଏସଏଚଜି ମାନଙ୍କ ସଂପୃକ୍ତି ଉପରେ ପ୍ରଶ୍ନ ଉଠାଇଥିଲେ ବିଜେପିର ନବରଙ୍ଗପୁର ସାଂସଦ ବଳଭଦ୍ର ମାଝୀ । ତୁରନ୍ତ ସମସ୍ୟାର ସମାଧାନ କରାଯାଇ ମହିଳା ଏସଏଚଜିଙ୍କୁ ମଣ୍ଡିରେ ଧାନକ୍ରୟ ପ୍ରକ୍ରିୟାରେ ସାମିଲ କରିବାକୁ ଦାବି ହୋଇଛି ।
