ନନ୍ଦିଘୋଷ ବ୍ୟୁରୋ : ଦ୍ବିତୀୟ ଦିନରେ ପହଞ୍ଚିଲା ମିଳିତ ଚାଷୀ ମହାସଂଘର ରାସ୍ତାରୋକ । ନବରଙ୍ଗପୁର ଜିଲ୍ଲାର ଉମରକୋଟ,ରାଇଘର, ଝରିଗାଁ ଏହି ତିନିଟି ବ୍ଳକରେ ମକା ଏବଂ ଧାନ ଅଭାବୀ ବିକ୍ରିକୁ ନେଇ ଚାଷୀମାନେ ଆନ୍ଦୋଳନକୁ ଓହ୍ଲାଇଛନ୍ତି । ଗତକାଲି ଚାଷୀମାନେ ରାସ୍ତାରେ ଧାନ ମକା ପକେଇବା ସହ ଟ୍ରାକ୍ଟର ରଖି ଆନ୍ଦୋଳନ କରିଥିଲେ । ଦାବି ପୁରଣ ନହେଲେ ଆସନ୍ତା ୨୯ ତାରିଖ ପର୍ଯ୍ୟନ୍ତ ତିନିଟି ବ୍ଳକରେ ଆନ୍ଦୋଳନ ଜାରି ରହିବ ବୋଲି ଚାଷୀଙ୍କ ସହ ପୂର୍ବତନ ସାଂସଦ ପ୍ରଦୀପ ମାଝୀ କହିଥିଲେ । ଗତକାଲି ରାତିରେ ଚାଷୀମାନେ ରାତି ଅନିଦ୍ରା ହୋଇ ପ୍ରତିବାଦ କରିଥିଲେ । ସେହିଭଳି ଝରିଗାଁ ଠାରେ ଆନ୍ଦୋଳନକାରୀ ଚାଷୀଙ୍କ ଏକ ଅଭିନବ ଆନ୍ଦୋଳନ ଦେଖିବାକୁ ମିଳିଛି । ଏକ ଆଦିବାସୀ ନାଟକର ବ୍ୟବସ୍ଥା କରି ସମସ୍ତ ଚାଷୀ ରାତ୍ରି ଅନିଦ୍ରା ହୋଇ ଆନ୍ଦୋଳନ କରୁଥିବା ଦେଖିବାକୁ ମିଳିଛି ।
