ଓଡ଼ିଶା ବନିବ ଗ୍ଲୋବାଲ କାପାବିଲିଟି ସେଣ୍ଟର, ବିଶ୍ୱରେ ଚମକିବେ ଓଡ଼ିଆ ପିଲା

ନନ୍ଦିଘୋଷ ବ୍ୟୁରୋ: ଭାରତର ପରବର୍ତ୍ତୀ ବିକାଶ ଓ ନିଯୁକ୍ତିର ଇଞ୍ଜିନ ଭାବେ ଏଆଇ, ଫିନଟେକ, ଇନସ୍ୟୁରଟେକର ଉଦ୍ଦେଶ୍ୟ, ଲକ୍ଷ୍ୟ ଓ କାର୍ଯ୍ୟପନ୍ଥା ଉପରେ ପର୍ଯ୍ୟବେସିତ ବ୍ଲାକ ସ୍ୱାନ ସମ୍ମିଟ ଉଦଯାପିତ ହୋଇଛି । ସିଙ୍ଗାପୁରର ଜିଏଫଟିଏନ ଓ ଓଡିଶା ସରକାରଙ୍କ ସହଯୋଗରେ ଭାରତରେ ପ୍ରଥମ ଥର ପାଇଁ ଅନୁଷ୍ଠିତ ଏହି ସମ୍ମିଳନୀରେ ୨୧ଟି ଦେଶର ଜଣାଶୁଣା ଟେକ୍ନୋଲୋଜି କମ୍ପାନୀର ପ୍ରମୁଖ ଯୋଗ ଦେଇଥିଲେ । ଓଡିଶା ଟେକ୍ନୋଲୋଜି କ୍ଷେତ୍ରରେ ହବ ହେବାକୁ ଯାଉଛି ଏବଂ ଓଡ଼ିଶାରର ବିଶ୍ୱର ପ୍ରମୁଖ କମ୍ପାନୀ ସେମାନଙ୍କ ଗ୍ଲୋବାଲ କାପାବିଲିଟି ସେଣ୍ଟର ଖୋଲିବାକୁ ଯାଉଛନ୍ତି ବୋଲି ଆଇଟି ମନ୍ତ୍ରୀ କହିଛନ୍ତି ।

ଆଗାମୀ ଦିନରେ ଓଡ଼ିଶା ବନିବ ଗ୍ଲୋବାଲ କାପାବିଲିଟି ସେଣ୍ଟର । ବିଶ୍ୱର ପ୍ରମୁଖ କମ୍ପାନୀ ଓଡିଶାମୁହାଁ । ସରକାରଙ୍କ ଲୋକାଲ ଟୁ ଗ୍ଲୋବାଲ ଚିନ୍ତା । ଟେକ୍ନୋଲୋଜି କ୍ଷେତ୍ରରେ ଓଡିଶା ଲେଖିବ ନୂଆ ଫର୍ଦ୍ଦ । ସାରା ବିଶ୍ୱରେ ଚମକିବେ ଓଡ଼ିଆ ପିଲା ।  ଓଡ଼ିଆ ପିଲାଙ୍କୁ ଗ୍ରାଜୁଏସନ ପରେ ସିଧା ନିଯୁକ୍ତି ପାଇଁ ନୂଆ ଭିଜନ୍ ତିଆରି ହେଉଛି । ୫ ବର୍ଷରେ ୭ ହଜାର ପିଲାଙ୍କୁ ଅପ ସ୍କିଲିଂ କରାଯିବ । ବ୍ଲାକ ସ୍ୱାନ ସମ୍ମିଳନୀରେ ଡିଜିଟାଲ ଅର୍ଥନୀତିର ଅଭିବୃଦ୍ଧି ପାଇଁ ଯୋଜନା ହୋଇଛି । ସେହିପରି ଓଡ଼ିଶାରେ ଲିଡ଼ିଙ୍ଗ ବ୍ୟାଙ୍କ୍ ପିଲାମାନଙ୍କୁ ଟ୍ରେନିଂ ଦେବା ଉପରେ ଆଲୋଚନା ମଧ୍ଯ ହୋଇଛି । ରାଜ୍ଯରେ ଟେକ୍ନୋଲୋଜିର ବିକାଶ ଅଧିକ ଭିତ୍ତିଭୂମିର ଆବଶ୍ୟକତା ଅଛି ବୋଲି ଆଇଟି ମନ୍ତ୍ରୀ କହିଛନ୍ତି ।

ଜିଏଫଟିଏନର ମୁଖ୍ୟ ରବି ମେନନ, ପ୍ରତିଷ୍ଠାତା  ସ୍ବପ୍ନେନ୍ଦୁ ମହାନ୍ତି ଓ ଅନ୍ୟମାନଙ୍କ ସହ ଲୋକସେବା ଭବନରେ ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ ଓଡ଼ିଶାରେ ଥିବା ସମ୍ଭାବନା ବିଷୟରେ ଆଲୋଚନା କରିଛନ୍ତି । ଟେକ୍ନୋଲୋଜି ଜରିଆରେ କିପରି କମ ସମୟରେ ଅଧିକ କାମ କରିହେବ, ଦୁନିଆରେ ଯେଉଁଠି ବି ରହିଲେ ଟେକ୍ନୋଲୋଜି ସାହାଯ୍ୟରେ ଲୋକଙ୍କ ସମସ୍ୟାର ସମାଧାନ କରିହେବ, ସେ ବାବଦରେ ଆଲୋଚନା ହୋଇଛି । ବିଶେଷ କରି ବ୍ୟାଙ୍କିଙ୍ଗ, ଅଣ ବ୍ୟାଙ୍କିଙ୍ଗ ଓ ଆର୍ଥିକ ସେବାକୁ ସ୍ୱଚ୍ଛ, ସରଳ ଓ ସହଜ କରିବା ପାଇଁ ଟେକ୍ନୋଲୋଜି କାହିଁକି ଜରୁରୀ ସେ ପ୍ରସଙ୍ଗରେ ଅତିଥି ମାନେ ବିସ୍ତୃତ ଚର୍ଚ୍ଚା କରିଛନ୍ତି । ଜିଏଫଟିଏନ-ଗ୍ଲୋବାଲ ଫାଇନାନ୍ସ ଟେକ୍ନୋଲୋଜି ନେଟୱର୍କ ଅଧୀନରେ ଓଡ଼ିଶାର ବିଭିନ୍ନ ସରକାରୀ କଲେଜରୁ ଗ୍ରାଜୁଏସେନ ପଢୁଥିବା ୧୨ଶହ ପିଲାଙ୍କୁ ପ୍ରଥମ ପର୍ଯ୍ୟାୟରେ ପ୍ରଶିକ୍ଷଣ ଦିଆଯାଇଛି । ଏଥିରୁ ୭୦ଜଣ ଜାପାନରେ ହେବାକୁ ଯାଉଥିବା ବ୍ଲାକ ସ୍ୱାନର ପରବର୍ତ୍ତୀ ସମ୍ମିଳନୀ ଯୋଗ ଦେବାର ସୁଯୋଗ ପାଇଛନ୍ତି ।

ସମ୍ମିଳନୀରେ ଓଡିଶା ସରକାର ବିଭିନ୍ନ ଟେକ୍ନୋଲୋଜି ଆଧାରିତ କମ୍ପାନୀମାନଙ୍କ ସହ ୧୬ଟି ଚୁକ୍ତିନାମା ସ୍ୱାକ୍ଷରିତ କରିଛନ୍ତି । ଏଥିରେ କଲେଜ ଛାତ୍ରଛାତ୍ରୀଙ୍କୁ କମ୍ପାନୀଗୁଡିକ ଫିନଟେକ ଓ ଇନସ୍ୟୁରଟେକ ପ୍ରସଙ୍ଗରେ ପ୍ରଶିକ୍ଷଣ ଦେବେ । ଉଦଯାପନୀ ଉତ୍ସବରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଅନ୍ୟମାନଙ୍କ ମଧ୍ୟରେ ରାଜ୍ୟପାଳ ହରିବାବୁ କୁମ୍ଭମପଟି, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, ବିଭିନ୍ନ ମନ୍ତ୍ରୀ ଓ ଅଧିକାରୀ ଉପସ୍ଥିତ ଥିଲେ ।