ସ୍ବାମୀର ଦ୍ବିତୀୟ ବିବାହ ପରେ ଝିଅକୁ ଧରି ପ୍ରଥମ ସ୍ତ୍ରୀର ହୋହାଲ୍ଲା
ନନ୍ଦିଘୋଷ ବ୍ୟୁରୋ: ଗଞ୍ଜାମ ଜିଲ୍ଲା କୋଟିନାଡ଼ା ଥାନା କଲେଜ ଛକ ପଣ୍ଡା କୋଲନୀରେ ଅଭାବନୀୟ ଘଟଣା । ସ୍ବାମୀର ଦ୍ବିତୀୟ ବିବାହ ପରେ ପ୍ରଥମ ସ୍ତ୍ରୀର ହୋହାଲ୍ଲା । ଝିଅକୁ ଧରି ସ୍ବାମୀଙ୍କ ଘରେ ପଶିବାକୁ ପ୍ରଥମ ସ୍ତ୍ରୀଙ୍କ ଉଦ୍ୟମ ।
ଅଭିଯୋଗ ଅନୁସାରେ, ଅଞ୍ଚଳରେ ରହୁଥିବା ସନ୍ତୋଷ ଗୌଡ ୧୫ ବର୍ଷ ତଳେ କବିସୂର୍ଯ୍ୟନଗର ଆମ୍ବପୁଆ ଗ୍ରାମର ଶାନ୍ତିଲତା ଗୌଡଙ୍କୁ ବିବାହ କରିଥିଲେ । ଘର ସମସ୍ୟା ନେଇ ସ୍ଵାମୀ-ସ୍ତ୍ରୀ ମଧ୍ୟରେ ଅନେକ ବାର ଝଗଡ଼ା ହୋଇଆସୁଥିଲା । ଏନେଇ ଶାନ୍ତି ସ୍ୱାମୀ ବିରୋଧରେ ଥାନାରେ ଏତଲା ଦେବା ସହ ୧୩ ବର୍ଷର ପୁଅ ଓ ୮ ବର୍ଷର ଝିଅକୁ ଧରି ବାପ ଘର ଆମ୍ବପୁଆରେ ରହୁଥିଲେ । କିଛିବର୍ଷ ପରେ କୁଳ ଲୋକଙ୍କ ହସ୍ତକ୍ଷେପ ପରେ ସନ୍ତୋଷ ପୁଅକୁ ପଢ଼ାଇବା ବାହାନାରେ ଘରକୁ ନେଇ ଆସିଥିଲେ । ଗତ ୬ ଦିନ ତଳେ ସନ୍ତୋଷ ଦ୍ବିତୀୟ ବିବାହ କରିଥିବା ବିଷୟ ଜାଣିବା ପରେ ଶାନ୍ତି ସ୍ୱାମୀ ଘର ଆଗରେ ଝିଅକୁ ଧରି ବସି ପାଟିତୁଣ୍ଡ କରିଥିଲେ । ବାରମ୍ବାର ଘର ଭିତରକୁ ଯିବାକୁ ଚେଷ୍ଟା କରିଥିଲେ । ଗ୍ରୀଲ ଆରପଟେ ସ୍ୱାମୀ ସନ୍ତୋଷଙ୍କ ପରିବାର ଲୋକ ଓ ଶାନ୍ତିଙ୍କ ମଧ୍ୟରେ ପ୍ରବଳ ହୋହାଲ୍ଲା ହେବାରୁ ଗ୍ରାମରେ ଏକ ଅପ୍ରୀତିକର ପରିସ୍ଥିତି ଉପୁଜିଥିଲା । ତେବେ ସ୍ଵାମୀ ସନ୍ତୋଷ ଖସି ପଳାଇବାରୁ ଶାନ୍ତି ପିଛା କରିବା ସହ କୋଟିନାଡ଼ା ଥାନାକୁ ଆସି ଅଭିଯୋଗ କରିଛନ୍ତି ।
