ଭଦ୍ରକ : ଗାଁରେ ଯାତ୍ରା ଦେଖୁଥିଲେ ପରିବାର ଲୋକେ। ଘରେ ପଶି କଳାକନା ବୁଲାଇଲେ ଚୋର । ଚୋରି ସାରି ଘରୁ ବାହାରୁଥିବା ବେଳେ ଜଣକୁ କାବୁ କଲେ ଗ୍ରାମବାସୀ । ସୁନା ଗହଣା ଟଙ୍କା ଧରି ଅନ୍ୟ ତିନି ଚୋର ଛୁ ମାରିଛନ୍ତି । ଘଟଣା ଘଟିଛି ଭଦ୍ରକ ଜିଲା ଅଗରପଡା ଥାନାରେ ଆଡିଆ ଗ୍ରାମରେ l ଗତକାଲି ରାତିରେ ଗ୍ରାମର ନିରଞ୍ଜନ ମଲ୍ଲିକଙ୍କ ପରିବାର ଲୋକେ ଘର ତାଲା ପକାଇ ଯାତ୍ରା ଦେଖିବାକୁ ଯାଇଥିଲେ । ନିରଞ୍ଜନଙ୍କ ପୁଅ ଆଶୁତୋଷ ଯାତ୍ରା ମଝିରେ ଘର ଆଡେ ବୁଲି ଯାଇଥିଲା ବେଳେ ତାଙ୍କ ଘର ଭିତରୁ ୨ ଜଣ ଲୁଟେରା ବାହାରି ଦୌଡ଼ି ପଳାଇଥିଲେ l ଖସି ଯାଉଥିବା ବେଳେ ଜଣକୁ କାବୁ କରିନେଇଥିଲେ ଆଶୁତୋଷ l ଲୁଟେରା ଜଣକ ଏକ ସ୍କୃ ଡ୍ରାଇଭରରେ ଆଶୁତୋଷଙ୍କ ବେକକୁ ଆକ୍ରମଣ କରିଥିଲା l ଗୁରୁତର ଆହତ ହୋଇଥିଲେ ମଧ୍ୟ ଲୁଟେରାକୁ ଛାଡି ନଥିଲେ l ପରେ ଗ୍ରାମବାସୀ ପହଞ୍ଚି ଉକ୍ତ ଲୁଟେରାକୁ ମାଡ ମାରି ଘର ଭିତରେ ଅଟକ ରଖିଥିଲେ l ଲୁଟେରା ଯୁବକର ଘର ଧାମନଗର ଥାନା ଅଧୀନରେ l କାବୁ ଚୋରର ମୋବାଇଲ୍ କଲ ଲିଷ୍ଟରୁ ଚୋରିରେ ସମ୍ପୃକ୍ତ ଥିବା ସନ୍ଦେହରେ ଅନ୍ୟ 3 ଜଣ ଯୁବକଙ୍କୁ ମଧ୍ୟ ଅଟକ ରଖିଛି। ନିରଞ୍ଜନଙ୍କ ଘର ଅଲିମିରା ଲକର ଭାଙ୍ଗି 15 ଲକ୍ଷରୁ ଉର୍ଦ୍ଧ୍ୱ ସୁନା ରୁପା ଅଳଙ୍କାର ସହ ନଗଦ ଦେଢ଼ ଲକ୍ଷ ଟଙ୍କା ଲୁଟି ନେଇଥିବା ଅଭିଯୋଗ ହୋଇଛି। ପୋଲିସ ଘଟଣାର ତଦନ୍ତ ଚଳାଇଛି।
