ପେଟରେ ଯନ୍ତ୍ରଣା। ତା ସାଙ୍ଗକୁ ଅର୍ଶ ଓ ଦାନ୍ତ ବିନ୍ଧା। ଦିନେ ଦୁଇଦିନ ଭିତରେ ହୋଇଥାନ୍ତା ଅପରେସନ। ହେଲେ ଚିକିତ୍ସା ନ କରାଇ ପୋଲିସ ନେଲା ଜେଲ। ବହୁ ଚର୍ଚ୍ଚିତ ପୀତବାସ ପଣ୍ଡା ହତ୍ଯା ମାମଲାର ଅନ୍ୟତମ ଅଭିଯୁକ୍ତ ତଥା ପୂର୍ବତନ ବ୍ରହ୍ମପୁର ବିଧାୟକ ବିକ୍ରମ ପଣ୍ଡାଙ୍କୁ MKCG ମେଡିକାଲରୁ ଡିସଚାର୍ଜ କରି ଜେଲ ପଠାଇଛି ପୋଲିସ। ଜଣେ ଅସୁସ୍ଥ ପୂର୍ବତନ ବିଧାୟକଙ୍କ ପ୍ରତି ପୋଲିସର ଏପରି ଅମାନୁଷିକ ବ୍ୟବହାର ସମସ୍ତଙ୍କୁ ଚକିତ କରିଛି। ପୂର୍ବତନ ବିଧାୟକ ବିକ୍ରମ ପଣ୍ଡା ଚିକିତ୍ସା ପାଇଁ ଗତ ୧୦ ତାରିଖରେ MKCG ମେଡିକାଲରେ ଭର୍ତ୍ତି ହୋଇଥିଲେ। ଅର୍ଶ ବ୍ୟଥା ଉପଶମ ପାଇଁ ସେ ଔଷଧ ଖାଉଥିଲେ। ଆସନ୍ତା ଦିନେ କିମ୍ବା ଦୁଇଦିନ ଭିତରେ ତାଙ୍କର ହୋଇଥାନ୍ତା ଗଲ ଷ୍ଟୋନ ସର୍ଜରୀ। କିନ୍ତୁ ଅଚାନକ ତଳ ମହଲାରେ ଡାକ୍ତରଙ୍କ ସହ କଥା ହେବାକୁ କହି MKCGର ଉପର ମହଲାରେ ଚିକିତ୍ସିତ ହେଉଥିବା ବିକ୍ରମଙ୍କୁ ପୋଲିସ ଡାକ୍ତରଙ୍କ ସହ ଆଲୋଚନା କରିବା କହି ତଳ ମହଲାକୁ ଡାକିଥିଲା। ତଳେ ବିକ୍ରମ ଓ ତାଙ୍କ ପରିବାର ଲୋକ ପହଞ୍ଚିବା ପରେ ପୋଲିସ ତାଙ୍କୁ ଜେଲ ପଠାଇବାକୁ କହିଥିବା ଅଭିଯୋଗ ହୋଇଛି। ପୋଲିସର ଏପରି ଆଚରଣକୁ ନେଇ ଆପତ୍ତି ଉଠାଇଥିଲେ ବିକ୍ରମଙ୍କ ପରିବାର ଓ ଓକିଲ। ପୋଲିସ କହିଛି ଗଲ ବ୍ଲାଡର ଷ୍ଟୋନ ଅପରେସନ ପାଇଁ ବିକ୍ରମ ପଣ୍ଡା ମେଡିକାଲ କର୍ତ୍ତୃପକ୍ଷଙ୍କୁ ସହମତି ଦେଇନାହାନ୍ତି। କିନ୍ତୁ ଗଣମାଧ୍ୟମ ସାମ୍ନାରେ ଅପରେସନ ପାଇଁ ନିଜେ ସହମତି ଦେଇଥିବା କହିଛନ୍ତି ବିକ୍ରମ।
ବିକ୍ରମ ପଣ୍ଡାଙ୍କ ପ୍ରତି ପୋଲିସର ଏପରି ଆଚରଣକୁ ନେଇ କଡ଼ା ନିନ୍ଦା କରିଛନ୍ତି ବିକ୍ରମ ପଣ୍ଡାଙ୍କ ଓକିଲ। ଅଭିଯୋଗ କରିଛନ୍ତି ରାଜନୈତିକ ଅଭିସନ୍ଧି ରଖି ସରକାରଙ୍କ ପ୍ରରୋଚନାରେ ପୋଲିସ ଜଣେ ପୂର୍ବତନ ବିଧାୟକଙ୍କ ପ୍ରତି ଏପରି ବ୍ୟବହାର କରିଛି। ବିକ୍ରମ ପଣ୍ଡା ହେଉଛନ୍ତି ଜଣେ ପୂର୍ବତନ ବିଧାୟକ। ତାଙ୍କର ସମସ୍ତ ଚିକିତ୍ସା ଖର୍ଚ୍ଚ ବିଧାନସଭା ବହନ କରିବାର ବ୍ୟବସ୍ଥା ରହିଛି। ତାଙ୍କ ମହକିଲଙ୍କ ଅବସ୍ଥା ଗୁରୁତର ରହିଛି। ତାଙ୍କୁ ତୁରନ୍ତ ଚିକିତ୍ସା କରିବାର ଆବଶ୍ୟକତା ରହିଛି। ବିକ୍ରମ ପଣ୍ଡା ଅପରେସନ ପାଇଁ ଡାକ୍ତରଖାନା କର୍ତ୍ତୃପକ୍ଷଙ୍କୁ ସହମତି ଦେଇଥିବାବେଳେ କେମିତି ପୋଲିସ ମନା କରୁଛି ତାହା ଆଶ୍ଚର୍ଯ୍ୟ ଲାଗୁଛି। ଏ ନେଇ ସେ ମୁଖ୍ୟମନ୍ତ୍ରୀଙ୍କୁ ଅବଗତ କରିବେ ବୋଲି କହିଛନ୍ତି ବିକ୍ରମଙ୍କ ଓକିଲ। ଅସୁସ୍ଥ ବିକ୍ରମଙ୍କୁ ଉପଯୁକ୍ତ ଚିକିତ୍ସା ଆବଶ୍ୟକ ହେଉଛି। କିନ୍ତୁ ପୋଲିସର ଏଭଳି କାର୍ଯ୍ୟ ନେଇ ବିଭିନ୍ନ ମହଲରେ ସନ୍ଦେହ ସୃଷ୍ଟି ହୋଇଛି।
