ପଟ୍ଟାମୁଣ୍ଡାଇ : ମିଲର ମାଲାମାଲ । ଚାଷୀ ବେହାଲ । ସୋସାଇଟି ସେକ୍ରେଟାରୀ ଓ ମିଲରଙ୍କ ମଧୁଚନ୍ଦ୍ରିକାରେ ଚାଲିଛି ଧାନ କିଣାବିକା। ପଟ୍ଟାମୁଣ୍ଡାଇ, ଆଳି, ରାଜକନିକା ବ୍ଲକର ବିଭିନ୍ନ ମିଲ୍ ଆଗରେ ଏଭଳି ଦେଖିବାକୁ ମିଳିଛି । ଅଧିକାଂଶ ମିଲରେ ନାହିଁ ନାମଫଳକ । ଟାର୍ଗେଟ ନଥିବା କହି ଚାଷୀଙ୍କୁ ହତାଶ କରୁଛନ୍ତି ମିଲର। ଫଳରେ ଦିନ ଦିନ ଧରି ହଜାର ହଜାର କୁଇଣ୍ଟାଲ ଧାନ ଟ୍ରାକ୍ଟରରେ ଲୋଡ ହୋଇପଡିରହିଛି। ମଣ୍ଡିକୁ ଯାଉନାହାନ୍ତି ମିଲର୍ସ । ନିଜ ଖର୍ଚ୍ଚରେ ଧାନ ଆଣି ମିଲ୍ ସାମ୍ନାରେ ଦିନଦିନ ଧରି ଅପେକ୍ଷା କରୁଛି ଚାଷୀ। ହେଲେ ଉଠିପାରୁନି ଧାନ।
ଟାର୍ଗେଟ ଅନୁଯାୟୀ ଚାଷୀଙ୍କ ପାଖରୁ ଅଧିକାଂଶ ଧାନ ଉଠାଯାଇଥିବା ଯୋଗାଣ ବିଭାଗ ତଥ୍ୟ କହୁଛି l ହେଲେ ବାସ୍ତବ ଚିତ୍ର କିଛି ଅଲଗା l ପ୍ରଶାନ୍ତି ‘ଫୁଡ୍ସ ‘ ରାଇସ ମିଲ୍ ସାମ୍ନାରେ ଝୁଲିଛି ତାଲା । ମିଲରେ ଧାନ ବଦଳରେ ଛଣ ଗଦା ସହ ଛିଣ୍ଡା ବସ୍ତାର ଅଳିଆ ଆବର୍ଜନା ପଡ଼ିରହିଛି l ମୁନାଫା ପାଇଁ କେଉଁଠି ଜରି ବସ୍ତା ଭର୍ତ୍ତି ଧାନ ଗ୍ରହଣ କରାଯାଉଛି ତ ଆଉ କେଉଁଠି ଓ୍ବେ ବ୍ରିଜ ବଦଳରେ ଛୋଟ ଡିଜିଟାଲ ଓଜନ ମେସିନରେ ଧାନ ଓଜନ କରି ଚାଷୀଙ୍କୁ ଲୁଟୁଛନ୍ତି ମିଲର। ଅନ୍ୟପଟେ ମିଲରଙ୍କୁ ଧାନ ବଏଲର ଅନୁମତି ମିଳିନଥିବାବେଳେ ମିଲରେ କିଭଳି ବଏଲିଂ ଚାଲିଛି ତାକୁ ନେଇ ଉଠିଛି ପ୍ରଶ୍ନ। ପଟ୍ଟାମୁଣ୍ଡାଇ ବ୍ଲକ ଯୋଗାଣ ଅଧିକାରିଣୀ ଓ ମିଲରଙ୍କ ମଧୁଚନ୍ଦ୍ରିକାରେ ମିଲ ଚାଲିଥିବା ଅଭିଯୋଗ ହୋଇଛି। ଅନ୍ୟପଟେ ମିଲରେ ବଏଲିଂ ଲାଗି ଟେଷ୍ଟ ହେଉଥିବା ସଫେଇ ଦେଇଛନ୍ତି ଜିଲ୍ଲା ଯୋଗାଣ ନିଗମ ପରିଚାଳକ । ଖବର ପ୍ରସାରଣ ପରେ ଯୋଗାଣ ବିଭାଗ ପକ୍ଷରୁ କି ପଦକ୍ଷେପ ନିଆଯାଉଛି ଓ କେବେ ଚାଷୀଙ୍କୁ ତାଙ୍କ ହକ୍ ମିଳୁଛି ତାକୁ ଅପେକ୍ଷା ।
