ଜୟପୁର ; କୋରାପୁଟ ଜିଲ୍ଲା ଦଶମନ୍ତପୁର ବ୍ଲକର ଡେଙ୍ଗାଡାନିଗୁଡ଼ା ଗାଁ । ଗାଁରେ ରହୁଛନ୍ତି ପ୍ରାୟ ୧୩୦ ପରିବାର । ରାଷ୍ଟ୍ରାୟତ ଶିଳ୍ପ ପ୍ରତିଷ୍ଠା ହେଲେ ଗାଁର ଉନ୍ନତି ହେବ ଭାବି ଭିଟାମାଟିକୁ କମ୍ପାନୀ ହାତରେ ଟେକି ଦେଇଥିଲେ । ଏବେ ସେହି କମ୍ପାନୀ ଗ୍ରାମବାସୀଙ୍କ ପାଇଁ ପାଲଟିଛି ଅଭିଶାପ । ଇଏ ହେଉଛନ୍ତି ଜିରୁ ଭୋଇ । ବୟସ ୩୫ ବର୍ଷ । ଗାଁକୁ ଲାଗିଥିବା ଆଲମିନୁୟମ୍ କମ୍ପାନି ଅଞ୍ଚଳ ସବୁବେଳେ ଗାଈ ଚାରାଇବାକୁ ଯାଉଥିଲେ । ପ୍ରତିଦିନ କମ୍ପାନିର ରେଡ ମଡ ପଣ୍ଡର କେମିକାଲ୍ ଯୁକ୍ତ ଧୁଳି ଓ ପାଣି ଦ୍ବାରା ସେ ଏବେ ପେଟ ରୋଗରେ ଆକ୍ରାନ୍ତ । ସେହିପରି ଗାଁର ଚାଷୀ ରାମ ଜାନି । କମ୍ପାନିର ପ୍ରଦୁଷଣ ତାଙ୍କ ଆଖି ଦୁଇଟିକୁ ନଷ୍ଟ କରିଦେଇଛି । ଏପରି ଗୋଟିଏ କି ଦୁଇଟି ଘଟଣା ନୁହେଁ କମ୍ପାନିର ବିଶାକ୍ତ ପାଣି ଅନେକ ଚର୍ମ ଓ ବିଭିନ୍ନ ରୋଗରେ ପୀଡ଼ିତ ଥିବା ଅଭିଯୋଗ ହୋଇଛି ।
ଗାଁର ୪ଟି ନଳକୂପ କାମ କରୁ ନଥିବାରୁ ଲୋକେ ଝରଣା ଉପରେ ନିର୍ଭର କରନ୍ତି । କମ୍ପାନିର କେମିକାଲ୍ ଯୁକ୍ତ ପାଣି ସିପେଜ୍ ହୋଇ ପାଣିରେ ମିଶୁଛି । ପ୍ରଶାସନ ପକ୍ଷରୁ ୮ଲକ୍ଷ ଟଙ୍କା ବ୍ୟୟରେ ଏକ ଟାଙ୍କି କରାଯାଇ ପାଣି ଯୋଗାଇବାକୁ ବ୍ଯବସ୍ଥା ହୋଇଥିଲା । ହେଲେ ତାହା ଏବେ ଅଚଳ । କମ୍ପାନିର ରେଡମଡ ପଣ୍ଡ ଯୋଗୁଁ ଚାଷ କାମ ପ୍ରଭାବିତ ହୋଇଛି । ସେପଟେ ନାଲକୋର ପେରିଫେରି ଅଞ୍ଚଳରେ ସମସ୍ତ ବ୍ଯବସ୍ଥା କରିବା ସହ ଚିକିତ୍ସା କରାଯାଉଥିବା ପ୍ରେସନୋଟ ମାଧ୍ୟମରେ ସୁଚନା ଦେଇଛନ୍ତି କମ୍ପାନି କର୍ତ୍ତୃପକ୍ଷ । ଜିଲ୍ଲାପାଳଙ୍କ କହିବା କଥା, ନାଲକୋ କର୍ତ୍ତୃପକ୍ଷ ସେମାନଙ୍କ କାର୍ଯ୍ୟ ତୁଲାଇବା ସହ ସରକାରଙ୍କ ଅନେକ ଯୋଜନା ବି ଆମେ କାର୍ଯ୍ୟକାରୀ କରିଛୁ । କମ୍ପାନି ଓ ପ୍ରଶାସନ କରୁଛି ସବୁ କରୁଛି, ହେଲେ ପ୍ରକୃତରେ ଏହା ଲୋକଙ୍କ ପାଇଁ କେତେ ଉପଯୋଗୀ ହେଉଛି ତାହା ଗାଁର ଚିତ୍ରରୁ ସ୍ପଷ୍ଟ ଅନୁମେୟ ।
