ଜଗତସିଂହପୁର : ଘନଘନ ଚଢ଼ାଉ ଓ ଧରପଗଡ଼ରେ ବ୍ରେକ । କିଛି ଦିନର ଆକ୍ସନ ପରେ ଚୁପ ପ୍ରଶାସନ । ଜଗତସିଂହପୁର ଜିଲ୍ଲା ତରିକୁନ୍ଦର ବେହେରାହିମ୍ପୁର ଓ ଧନୀପୁର ଅଞ୍ଚଳର ସାତପୁରା ଠାରେ ବାଂଲାଦେଶୀଙ୍କୁ ଚିହ୍ନଟ ପରେ ଆରମ୍ଭ ହୋଇଥିଲା ଧରପଗଡ଼ । ଜିଲ୍ଲା ପ୍ରଶାସନ ଓ ପୋଲିସ ପ୍ରଶାସନ ପକ୍ଷରୁ ଅନୁପ୍ରବେଶକାରୀଙ୍କୁ ଚିହ୍ନଟ କରାଯାଇ ଉଚ୍ଛେଦ କରାଯାଇଥିଲା । ପରେ ବେଆଇନ ବାଲିଘାଟ ଓ ଇଟା ଭାଟି ଗୁଡିକୁ ବନ୍ଦ କରିବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ତନାଘନା ଚାଲିଥିଲା । ପ୍ରଥମେ ମହାନଦୀର କିଳିପାଳ ଘାଟ, ଜଇପୁର ମହାନଦୀ ଘାଟ, କ୍ରିଷ୍ଣାନନ୍ଦପୁର ଠାରେ ବେଆଇନ ବାଲିଘାଟ ଉପରେ ଚଢାଉ କରାଯାଇଥିଲା । ୭୮ ଟି ହାଇୱା ସହ ୯ଟି ଏକ୍ସ ଭାଇଟର ମେସିନ୍ ଜବତ କରାଯାଇଥିଲା । ବିଓଁଳ ଠାରେ ଥିବା ଇଟା ଭାଟି ଉପରେ ବୁଲଡୋଜର ଚାଲିଥିଲା । ଏବେ ପ୍ରଶାସନର ସ୍ଥାଣୁତା ନେଇ ଚର୍ଚ୍ଚା ଜୋର ଧରିଛି ।
ବର୍ତ୍ତମାନ ଜଗତସିଂହପୁର ଜିଲ୍ଲାରୁ ବେଧଡ଼କ ବାଲି ଚୋରା ଚାଲାଣ ଚାଲିଛି । ଶ୍ମଶାନ ଓ ଗୋଚରଜମିକୁ ଜୋରଜବରଦସ୍ତି କବଜା କରି ଇଟା ଭାଟି ମାଲିକ ମାନେ ଇଟା ଭାଟି ଖୋଲିସାରିଲେଣି । ଚାରିଆଡ଼େ ଖାଲି ଧୂଆଁ ଆଉ ଧୂଆଁ । ହେଲେ ପ୍ରଶାସନ ଚୁପ ବସିଥିବା ଅଭିଯୋଗ ହୋଇଛି । ଏଠି ପ୍ରଶ୍ନ ଉଠୁଛି- ଏବେ କଣ ଜିଲ୍ଲାରେ ନାହାନ୍ତି ଅନୁପ୍ରବେଶକାରୀ ? ନା ବେଆଇନ ବାଲିଘାଟ କି ଇଟା ଭାଟି ନାହିଁ ? କାହା ଚାପରେ ଚୁପ ବସିଛି ପ୍ରଶାସନ ?
