ବାଲିଗୁଡ଼ା : ନାହିଁ ନାହିଁରେ ଚାଲିଛି ସରକାରୀ ବିଦ୍ୟାଳୟ । ସ୍କୁଲରେ ନା ଅଛି ଆବଶ୍ୟକୀୟ ଶ୍ରେଣୀ ଗୃହ । ନା ଅଛି ସୁଦୃଢ ଭିତ୍ତିଭୂମି । ସମସ୍ୟା ଘେରରେ କନ୍ଧମାଳ ଜିଲ୍ଲା ବାଲିଗୁଡ଼ା ଏନଏସିର ପିପଳସାହି ଉଚ୍ଚ ପ୍ରାଥମିକ ବିଦ୍ୟାଳୟ । ବିଦ୍ୟାଳୟରେ ବାଲ ବାଟିକା ଠାରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ୧୮୭ ଜଣ ଛାତ୍ରଛାତ୍ରୀ ପାଠ ପଢୁଛନ୍ତି । ହେଲେ ବିଦ୍ୟାଳୟରେ ନାହିଁ ଆନୁସଙ୍ଗିକ ସୁବିଧା ସୁଯୋଗ । ପାଚେରୀ ନଥିବାରୁ ମୁକୁଳା ପଡ଼ିଛି ବିଦ୍ୟାଳୟ କ୍ୟାମ୍ପସ । ଶ୍ରେଣୀ ଗୃହ ଛାତରୁ ପ୍ଲାଷ୍ଟର ଖସି ଲୁହା ରଡ଼ ଜଳଜଳ ହୋଇ ଦେଖାଗଲାଣି । ଖାଲି ସେତିକି ନୁହେଁ ଭଙ୍ଗାଦଦରା ଘରେ ରୋଷେଇ ହେଉଛି ପିଲାଙ୍କ ମଧ୍ୟାହ୍ନ ଭୋଜନ । ବିଦ୍ୟାଳୟ ସମସ୍ୟା ସଂପର୍କରେ ଅନେକ ଥର ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରାଗଲାଣି ହେଲେ ଫଳ ଶୂନ ।
ପାଚେରୀ ନଥିବାରୁ ବିଦ୍ୟାଳୟ ପରିସରରେ ରାତି ହେଲେ ଅସାମାଜିକ ଲୋକେ ଆଡ୍ଡା ଜମାଉଛନ୍ତି । ପିଲା ମଧ୍ୟାହ୍ନ ଭୋଜନ ଖାଇବା ସମୟରେ ସ୍କୁଲ ପରିସରକୁ ଗାଈଗୋରୁ, ଛେଳି ମଧ୍ୟ ପଶି ଆସୁଥିବା ଅଭିଯୋଗ ହୋଇଛି । ସରକାର ଏଥିପ୍ରତି ଦୃଷ୍ଟି ଦେଇ ବିଦ୍ୟାଳୟ ସମସ୍ୟା ସୁଧାରିବାକୁ ଦାବି କରିଛନ୍ତି ବିଦ୍ୟାଳୟ ପରିଚାଳନା କମିଟି ସଭାପତି ଓ ସଦସ୍ୟ । ସେପଟେ ସମସ୍ୟା ସଂପର୍କରେ ଆମେ ଅବଗତ ଅଛୁ । ଉପରିସ୍ଥ ଅଧିକାରୀଙ୍କ ସହ ଆଲୋଚନା କରି ସମସ୍ୟାର ସମାଧାନ କରାଯିବ ବୋଲି କହିଛନ୍ତି ଗୋଷ୍ଠୀ ଶିକ୍ଷା ଅଧିକାରୀ । ଏହି ବିଦ୍ୟାଳୟ ପ୍ରତି ପ୍ରଶାସନ ଓ ଶିକ୍ଷା ବିଭାଗର କେବେ ଦୃଷ୍ଟି ପଡୁଛି ? କେବେ ସମସ୍ୟାର ସମାଧାନ ହେଉଛି ତାକୁ ହିଁ ଅପେକ୍ଷା ।
