ବ୍ରହ୍ମପୁର : ଗଞ୍ଜାମ ଜିଲ୍ଲା ବ୍ରହ୍ମପୁର ସ୍ଥିତ ଲାଞ୍ଜିପଲ୍ଲୀ ବାଇପାସ ଛକ । ରାତି ପାହିଲେ ବ୍ୟସ୍ତବହୁଳ ହୋଇପଡେ ଲାଞ୍ଜିପଲ୍ଲୀ ବାଇପାସ । ସହରର ହଜାର ହଜାର ସଂଖ୍ୟାରେ ଗାଡି ଏହି ବାଇପାସ ଦେଇ ଯାତାୟତ କରନ୍ତି । ହେଲେ ପ୍ରତିଦିନ ଛୋଟବଡ଼ ଦୁର୍ଘଟଣାରେ ଯାଉଛି ଜୀବନ । ଯାହାକୁ ନେଇ ସ୍ଥାନୀୟ ଲୋକେ ବାରମ୍ବାର ଓଭରବ୍ରିଜ ନିର୍ମାଣ କରିବାକୁ ଦାବି କରି ଆସୁଛନ୍ତି । ହେଲେ ପ୍ରଶାସନିକ ଅବହେଳା ଯୋଗୁଁ ତାହା କାଗଜ କଲମରେ ସୀମିତ ହୋଇ ରହିଯାଇଛି । ନେତା ଓ ମନ୍ତ୍ରୀଙ୍କ ଠାରୁ ଆରମ୍ଭ କରି ବଡ ବଡ ସରକାରୀ ଅଧିକାରୀମାନେ ଓଭରବ୍ରିଜ ନିର୍ମାଣ ପାଇଁ ପ୍ରତିଶ୍ରୁତି ଦେଇଥିଲେ । ଏପରିକି ବ୍ରିଜ ନିର୍ମାଣ ହେବ କହି ସେଠାରେ ଦୋକାନୀଙ୍କୁ ଉଚ୍ଛେଦ ମଧ୍ୟ କରାଯାଇଥିଲା । ହେଲେ ଏପର୍ଯ୍ୟନ୍ତ ଓଭରବ୍ରିଜ କାମ ଆରମ୍ଭ ହୋଇନି । ଏନେଇ ବିଭିନ୍ନ ସଙ୍ଗଠନର ସଦସ୍ୟ ଓ ସହରବାସୀ ଜାତୀୟ ରାଜପଥ କାର୍ଯ୍ୟାଳୟ ଘେରାଉ କରିଥିଲେ ।
ଗତ ଫେବୃଆରୀରେ ଆଇଆଇଟି ମାଡ୍ରାସର ପ୍ରଫେସର ଭେଙ୍କଟେଶ ବାଲ ସୁବ୍ରମଣ୍ୟମଙ୍କ ନେତୃତ୍ବରେ ଏକ ଟିମ ବ୍ରହ୍ମପୁର ଗସ୍ତ କରିଥିଲେ । ଏହି ଟିମ ବ୍ରହ୍ମପୁର ଏସପିଙ୍କ ସହ ଦୁର୍ଘଟଣାର ସମୀକ୍ଷା କରିଥିଲେ I ବ୍ରହ୍ମପୁରକୁ ଲାଗି ରହିଥି ବା ମୋଟ ୧୦ଟି ସ୍ଥାନକୁ ବ୍ଲାକସ୍ପଟ୍ ଭାବେ ଘୋଷଣା କରାଯାଇଥିଲା । ଏହା ସହ ଓଭରବ୍ରିଜ ନିର୍ମାଣ ଓ ସର୍ଭିସ୍ ରୋଡ଼କୁ ଦୁଇ ଲାଇନ କରିବା ନିମନ୍ତେ ସରକାରଙ୍କୁ କହିଥିଲେ । ଏହାପରେ ଲାଞ୍ଜିପଲ୍ଲୀ ବାଇପାସରେ ପୋଲିସ ପକ୍ଷରୁ ଅଧିକ କର୍ମଚାରୀ ନିୟୋଜିତ ଅଛନ୍ତି । ସୁରକ୍ଷିତ ଭାବେ ଯାତାୟତ ପାଇଁ ବାଇପାସ୍ ଛକରେ ସୂଚନାଫଳକ ଲଗାଯାଇଛି । ଫଳରେ ଲାଞ୍ଜିପଲ୍ଲୀ ବାଇପାସ ଛକରେ ଦୁର୍ଘଟଣାର ମାତ୍ରା କମିଥିବା ବେଳେ ସମ୍ପୂର୍ଣ୍ଣ ନିୟନ୍ତ୍ରଣ କରାଯାଇନାହିଁ । ଲାଞ୍ଜିପଲ୍ଲୀ ବାଇପାସ ଛକରେ ବ୍ୟାରିକେଡ ଲଗାଯିବା ଓ କର୍ମଚାରୀ ନିୟୋଜିତ ପରେ ଦୁର୍ଘଟଣା କମ ହୋଇଛି । ସେଠାରେ ଓଭରବ୍ରିଜ ନିର୍ମାଣ ନେଇ ସରକାର ଯୋଜନା କରୁଛନ୍ତି । ହେଲେ ଓଭରବ୍ରିଜ ହେଲେ ହିଁ ଦୁର୍ଘଟଣାକୁ ସମ୍ପୂର୍ଣ ରୂପେ ରୋକାଯାଇପାରିବ । ତେବେ କେବେ ବ୍ରିଜ ନିର୍ମାଣ କାର୍ଯ୍ୟ ଆରମ୍ଭ ହେବ ତାହା ହିଁ ଦେଖିବାକୁ ବାକି ରହିଲା I
