ଚମ୍ପୁଆ : ଚମ୍ପୁଆରେ ଦନ୍ତା ଆତଙ୍କ । ରୋଷେଇ ଘର ଝରକା ତାଡ଼ି ଘର ଭିତରୁ ଭାତ ଖାଇଲା ଗୋଠଛଡା ହାତୀ । ଗତ ଏକ ସପ୍ତାହରୁ ଅଧିକ ହେବ ଚମ୍ପୁଆ ଆଖପାଖ ଅଞ୍ଚଳରେ ଆତଙ୍କ ସୃଷ୍ଟି କରିଥିବା ଗୋଠଛଡା ହାତୀ ଗତରାତି ମଙ୍ଗଳପୁର ଓ ଅଢଙ୍ଗା ପାଳ ଗାଁରେ ବ୍ୟାପକ କ୍ଷୟକ୍ଷତି କରିଛି । ମଙ୍ଗଳ ପୁର ଗାଁ ରେ ଗୋଟିଏ ରୋଷେଇ ଘର ଝରକା ଭାଙ୍ଗି ଘର ଭିତରୁ ରନ୍ଧା ଖାଦ୍ୟ ଖାଇଯିବା ବେଳେ ବହୁସମୟ ଧରି ସେହି ଘର ନିକଟରେ ଉତ୍ପାତ କରିଥିଲା । ଚମ୍ପୁଆ ରେଞ୍ଜର ଯାମୁଦଲକ ଓ କୋଦଗାଡିଆ ପଞ୍ଚାୟତରେ ଉତ୍ପାତ ଜାରି ରଖି ଥିବା ଏହି ଗୋଠଛଡା ଦନ୍ତା ଏବେ ଗାଁ ରେ ପଶି ଘର ଭାଙ୍ଗିବା ଆରମ୍ଭ କରିଛି। ସାତହଳିଆ ଗାଁ ରେ ୪ଟି ଘର ଭାଙ୍ଗି ଥିବାବେଳେ ମଙ୍ଗଳପୁର ଗାଁ ରେ ଗାଁର ବେଲମତୀ ମୁଣ୍ଡାଙ୍କ ରୋଷେଇ ଘର ଝରକା ଭାଙ୍ଗି ଘର ଭିତରେ ଉତ୍ପାତ କରିଛି । ଗ୍ରାମବାସୀ ଘଉଡେଇବାରୁ ଅଢଙ୍ଗାପାଳ ଗାଁ କୁ ଚାଲି ଯାଇଥିଲା । ସେଠାରେ ବ୍ୟାପକ ଗହମ ଚାଷ ସହିତ ପନିପରିବା ଚାଷ ନଷ୍ଟ କରିଛି । ଗତ ଏକ ସପ୍ତାହ ରୁ ଅଧିକ ହେବ ହାତୀଟି ଅଞ୍ଚଳ ଛାଡି ଯିବାର ନାଁ ଧରୁନାହିଁ। ହାତୀ ଟି ଦିନବେଳା ନିକଟସ୍ଥ ଜଙ୍ଗଲରେ ରହି ରାତି ହେବା ମାତ୍ରେ ଗାଁ ଭିତରକୁ ପଶିଆସୁଥିବାରୁ ଲୋକେ ଭୟଭୀତ ଅବସ୍ଥାରେ ରହୁଛନ୍ତି । ବନ ବିଭାଗ ପଦକ୍ଷେପ ନେଉ ନଥିବାରୁ ଅସନ୍ତୋଷ ଦେଖାଦେଇଛି।
