ଜୟପାଟଣା : କଳାହାଣ୍ଡି ଜିଲ୍ଲା ଜୟପାଟଣା ଥାନା ଅନ୍ତର୍ଗତ ବିମଳା ବାଗବନ୍ଦ ପୋଖରୀରୁ ମଣିଷ କଙ୍କାଳ ଉଦ୍ଧାର। ଗାଧୋଇବା ସମୟରେ ଗାଁ ପିଲାମାନେ ସୋଲ ଭାବି ନ ଜାଣି ମଣିଷର ଏକ ଅଙ୍ଗ ଟାଣି ଆଣିଥିଲେ । ଜୟପାଟଣା ପୋଲିସ ଓ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଛାନଭିନ ଆରମ୍ଭ କରିଛି । ଉଦ୍ଧାର ହୋଇଥିବା ଏହି ଗଳିତ ଅଙ୍ଗ ଗତ ୭ ମାସ ଧରି ନିଖୋଜ ଥିବା ସ୍ଥାନୀୟ ଅଞ୍ଚଳର ଭିନ୍ନକ୍ଷମ ଯୁବତୀ ଅମୃତ ପୁଝାରୀଙ୍କର ବୋଲି ପରିବାର ଲୋକେ ଓ ଗ୍ରାମବାସୀ ସନ୍ଦେହ କରୁଛନ୍ତି । ତେବେ ପୋଖରୀରେ ପ୍ରାୟ ୧୫ ଫୁଟ ଗଭୀର ପାଣି ଥିବାରୁ ଅନ୍ୟାନ୍ୟ ଅଙ୍ଗ ପ୍ରତ୍ୟଙ୍ଗ ଖୋଜୁଛି ଅଗ୍ନିଶମ ବାହିନୀ । ଫରେନ୍ସିକ୍ ଟିମ୍ ଏବଂ ଡିଏନଏ ଟେଷ୍ଟର ରିପୋର୍ଟ ଆସିଲେ ମୃତଦେହର ପ୍ରକୃତ ପରିଚୟ ସ୍ପଷ୍ଟ ହେବ ବୋଲି ଥାନା ଅଧିକାରୀ ଅର୍ଚ୍ଚନା ନାଏକ କହିଛନ୍ତି ।
