ଗୋ-ମାଫିଆଙ୍କ ନେଟଓ୍ବର୍କ ସମ୍ପୂର୍ଣ୍ଣ ଧ୍ବଂସ କରିବାକୁ ବାଲେଶ୍ବର ଓ ମୟୂରଭଞ୍ଜ ପୋଲିସର ବଡ଼ ଧରଣର ଅପରେସନ
ନନ୍ଦିଘୋଷ ବ୍ୟୁରୋ: ବେଆଇନ ଗୋ-ଚାଲାଣ ଓ ଗୋ-ମାଫିଆଙ୍କ ନେଟୱର୍କକୁ ସମ୍ପୂର୍ଣ୍ଣ ଧ୍ୱଂସ କରିବାକୁ ବାଲେଶ୍ୱର ପୋଲିସ ପକ୍ଷରୁ ବଡ଼ ଧରଣର ଅପରେସନ ଆରମ୍ଭ । ଗତକାଲି ମଧ୍ୟରାତ୍ରରୁ ପୋଲିସର ଏକ ସ୍ୱତନ୍ତ୍ର ଟିମ୍ ବିଭିନ୍ନ ସନ୍ଦିଗ୍ଧ ଗୋ-ମାଫିଆଙ୍କ ଘର ଓ ଆଡ୍ଡା ଉପରେ ଏକକାଳୀନ ଚଢ଼ାଉ ଜାରି ରଖିଛି । ଜିଲ୍ଲାର ପ୍ରାୟ ୭ଟି ଭିନ୍ନ ଭିନ୍ନ ସ୍ଥାନରେ ଏହି ମେଗା ରେଡ୍ ଚାଲିଛି । ବସ୍ତା ଓ ଜଳେଶ୍ୱର ଏସଡିପିଓଙ୍କ ନେତୃତ୍ୱରେ ଏହି ଚଢ଼ାଉ କରାଯାଇଛି । କମର୍ଦ୍ଦା ଥାନା ଅନ୍ତର୍ଗତ ଗୋଟିଏ ସ୍ଥାନ ସମେତ ବାଲିଆପାଳ ଅଞ୍ଚଳରେ ମଧ୍ୟ ପୋଲିସ ସର୍ଚ୍ଚ ଅପରେସନ ଜାରି ରଖିଛି ।
ସେହିପରି ମୟୂରଭଞ୍ଜ ଜିଲ୍ଲାରେ ମଧ୍ୟ ଚାଲିଛି ବଡ଼ ଧରଣର ଚଢ଼ାଉ । ମୟୂରଭଞ୍ଜ ଜିଲ୍ଲା ପୋଲିସ ୩ଟି ଥାନା ଅଞ୍ଚଳରେ ଚଢ଼ାଉ କରିଛି । ରାଇରଙ୍ଗପୁର, ବୈଶିଙ୍ଗା ଓ ଝାରପୋଖରିଆ ଥାନା ଅଞ୍ଚଳରେ ଗୋ-ମାଫିଆ ଓ ଗଂଜେଇ ମାଫିଆଙ୍କ ଉପରେ ରେଡ ହେଉଛି । ମୟୂରଭଞ୍ଜ ପୋଲିସର ଏକ ସ୍ୱତନ୍ତ୍ର ଟିମ୍ ଝାରପୋଖରିଆ ଥାନା ଅଧୀନ ଝାରପୋଖରିଆ ଅଞ୍ଚଳର ଉତ୍ତମ କୁମାର ଦଣ୍ଡପାଟ ଏବଂ ଶୀର୍ଷା ଅଞ୍ଚଳର ଅର୍ଜୁନ ପଟ୍ଟନାୟକଙ୍କ ଘରେ ଚଢ଼ାଉ କରିଛି । ସେହିପରି ରାଇରଙ୍ଗପୁର ଗ୍ରାମାଞ୍ଚଳ କେନ୍ଦ୍ରାଇ ଭିଲେଜ, ଏସ କେ ଟକରା ଓ ଏସ.କେ. ତବରେଜ, ଏବଂ ବୈଶିଙ୍ଗା ଥାନା ଅଂଚଳରେ ରେଡ କରିଛି । ବର୍ତ୍ତମାନ ସୁଦ୍ଧା ରେଡ୍ ସମୟରେ ମାଫିଆଙ୍କଠାରୁ ସ୍କର୍ପିଓ, ବାଇକ, ବ୍ୟାଙ୍କ ଆକାଉଣ୍ଟ ପାସବୁକ୍, ଜମି କାଗଜପଟ୍ଟା, ସୁନା ଗହଣା ଜବତ ହୋଇଛି । ଏହାସହ କିଛି ଗୋ-ମାଫିଆଙ୍କୁ ମଧ୍ୟ ଅଟକ ଅଛନ୍ତି ।
ଏହି ମେଗା ଅପରେସନରେ କେତେ ଗୋ-ମାଫିଆ ଗିରଫ ହୋଇଛନ୍ତି ଓ କେତେ ପରିମାଣର ବେଆଇନ ସାମଗ୍ରୀ ଜବତ ହୋଇଛି, କେତେ ଗୋରୁ ଉଦ୍ଧାର ହୋଇଛନ୍ତି ତାହାର ସମ୍ପୂର୍ଣ୍ଣ ରିପୋର୍ଟ ପ୍ରକାଶ କରାଯିବ ବୋଲି ପୋଲିସ ପ୍ରଶାସନ ପକ୍ଷରୁ କୁହାଯାଇଛି । ପୋଲିସର ଏହିଭଳି କଡ଼ା ଆଭିମୁଖ୍ୟ ଯୋଗୁଁ ସ୍ଥାନୀୟ ଅଞ୍ଚଳରେ ଗୋ-ମାଫିଆଙ୍କ ମଧ୍ୟରେ କକୁଆ ଭୟ ସୃଷ୍ଟି ହୋଇଛି ।
