ନନ୍ଦିଘୋଷ ବ୍ୟୁରୋ: ଭରସାରେ ରଖିଥିଲେ କେୟାରଟେକର୍, ହେଲେ ସେହି କେୟାରଟେକର୍ ସାଜିଲା କିଲର୍ । ଯାହା ହାତରେ ଘରର ସୁରକ୍ଷା ଦାୟିତ୍ୱ ଦେଇଥିଲେ, ସେହି ହାତରେ ଚାଲିଗଲା ଘର ମାଲିକାଣୀ କୁଞ୍ଜଲତାଙ୍କ ଜୀବନ । ସୁନା ଓ ଟଙ୍କା ଲୋଭରେ ଅତି ନିର୍ମମ ଭାବେ ହତ୍ୟା କରି ଫେରାର ହୋଇଯାଇଥିଲା ଅଭିଯୁକ୍ତ ବଳଭଦ୍ର ମହାରଣା । ପୋଲିସକୁ ଚକମା ଦେବାକୁ ବଦଳାଉଥିଲା ସହର ପରେ ସହର, ହେଲେ ଆଇନର ଜାଲରୁ ବର୍ତ୍ତି ପାରିଲାନି ।
ଦୀର୍ଘ ୧୦ ଦିନର ଛକାପଞ୍ଝା ପରେ ସୁରଟରୁ ତାକୁ କାବୁ କରିଛି କମିଶନରେଟ୍ ପୋଲିସର ସ୍ପେଶାଲ ସ୍କ୍ୱାଡ୍ । କିନ୍ତୁ ଏହି ଘଟଣା ଏବେ ଅନେକ ପ୍ରଶ୍ନ ଛିଡ଼ା କରିଛି । ଘରେ ରଖୁଥିବା ଘରୋଇ ସହାୟକଙ୍କ ପରିଚୟ ଓ ପୂର୍ବ ରେକର୍ଡ ଯାଞ୍ଚ କରୁଛନ୍ତି ତ? ଅଜଣା ଲୋକଙ୍କ ହାତରେ ଘରର ସୁରକ୍ଷା ଦାୟିତ୍ୱ ଦେବା କେତେ ବିପଦଜନକ? ରାଜଧାନୀରେ ବାରମ୍ବାର ଘରୋଇ ସହାୟକଙ୍କ ସମ୍ପୃକ୍ତିରେ ଚୋରି ଓ ହତ୍ୟା ଭଳି ଘଟଣା ଘଟୁଥିବା ବେଳେ, ଏବେ ସାଧାରଣ ଲୋକଙ୍କ ସୁରକ୍ଷା ନେଇ ବଡ଼ ପ୍ରଶ୍ନ ଉଠିଛି । ତେବେ ଭରସା କରିବା ପୂର୍ବରୁ ଯାଞ୍ଚ କେତେ ଜରୁରୀ? ଆଉ ଘରୋଇ ସହାୟକଙ୍କ ଅପରାଧ ରୋକିବାକୁ ପୋଲିସର ଆଗାମୀ ରଣନୀତି କ’ଣ? ଏସବୁକୁ ନେଇ ଏବେ ଉଠିଛି ପ୍ରଶ୍ନ ।
ପ୍ରକାଶ ଥାଉ କି, ଚଳିତ ବର୍ଷ ୮ ସେପ୍ଟେମ୍ବରରେ ଲକ୍ଷ୍ମୀସାଗର ଥାନା ଜଗନ୍ନାଥ ନଗର ଲେନ ୪ରେ ରହୁଥିବା ଅବସରପ୍ରାପ୍ତ ଯନ୍ତ୍ରୀଙ୍କ ଘରୁ ୬୫ ଲକ୍ଷର ଚୋରି ହୋଇଥିଲା । ପୋଲିସ ତଦନ୍ତ କରି ଅସ୍ତରଙ୍ଗରୁ କେୟାରଟେକର ବିକାଶ ବିଶ୍ୱାଳକୁ ଗିରଫ କରିଥିଲା। ସେହିପରି ସମାନ ଢଙ୍ଗରେ ଅଗଷ୍ଟ ୩୦ ତାରିଖରେ ଚନ୍ଦ୍ରଶେଖରପୁର ଅଞ୍ଚଳର ରଶ୍ମିପ୍ରଭା ବେଉରାଙ୍କ ଘରୁ ବଡ଼ ଧରଣର ଲୁଟପାଟ ହୋଇଥିଲା । ଆଉ ମାଷ୍ଟରମାଇଣ୍ଡ ଥିଲେ ଘରୋଇ ସହାୟିକା। ୨୦୧୫ ମସିହା ବହୁଚର୍ଚ୍ଚିତ ଡାକ୍ତର ଡବଲ ମର୍ଡର ଘଟଣାରେ ଗତ ୨୦୨୪ ମସିହା ମାର୍ଚ୍ଚ ୨୮ ତାରିଖରେ ଆସିଥିଲା ରାୟ । ଡାକ୍ତର ପ୍ରଫୁଲ ମିଶ୍ର, ସୁଷମା ମିଶ୍ର ହତ୍ୟାକାଣ୍ଡ ଘଟଣାରେ ମଧ୍ୟ ମାଷ୍ଟରମାଇଣ୍ଡ ଥିବା ଚାକର ଚକାରାଣୀଙ୍କ ବିରୋଧରେ ଆଜୀବନ କାରାଦଣ୍ଡର ସଜ୍ଜା ଶୁଣାଇଥିଲେ ମାନ୍ୟବର କୋର୍ଟ ।
