ନନ୍ଦିଘୋଷବ୍ୟୁରୋ: ସୁନା ପ୍ରେମୀଙ୍କ ପାଇଁ ଖୁସି ଖବର । ପୁଣି ଖସିଲା ସୁନା ଦର । ଲଗାତାର ସୁନା ମୂଲ୍ୟରେ ହ୍ରାସ ଯୋଗୁଁ ଗ୍ରାହକଙ୍କୁ ମିଳିଛି ଆଶ୍ୱସ୍ତି । ଆଜି ମଧ୍ୟ ସୁନା ଦରରେ ଦେଖିବାକୁ ମିଳିଛି ବଡ଼ ହ୍ରାସ ।
ଅନ୍ତର୍ଜାତୀୟ ବଜାରରେ ଆମେରିକୀୟ ଡଲାର ମଜବୁତ ହେବା ସହ ମୁଦ୍ରାସ୍ଫୀତିର ପ୍ରଭାବ ସୁନା ବଜାର ଉପରେ ପଡ଼ିଛି । ଯାହାଫଳରେ ସୁନା ମୂଲ୍ୟ ହ୍ରାସ ପାଇଛି ।
ଆସନ୍ତୁ ଜାଣିବା ଆଜିର ସୁନା ଦର ।
୨୪ କ୍ୟାରେଟ୍ ସୁନାର ଦାମ୍ ୧୦ ଗ୍ରାମ ପିଛା ୨ ହଜାର ୧୮୦ ଟଙ୍କା ହ୍ରାସ ପାଇ ୧ ଲକ୍ଷ ୩୯ ହଜାର ୮୦୦ ଟଙ୍କାରେ ପହଞ୍ଚିଛି ।
ସେହିପରି ୨୨ କ୍ୟାରେଟ୍ ସୁନା ଦରରେ ମଧ୍ୟ ବଡ଼ ହ୍ରାସ ହୋଇଛି । ୧୦ ଗ୍ରାମ ପିଛା ୨ ହଜାର ଟଙ୍କା କମି ଏହା ୧ ଲକ୍ଷ ୨୮ ହଜାର ୧୫୦ ଟଙ୍କା ରହିଛି । କେବଳ ସୁନା ନୁହେଁ, ରୂପା ଦର ମଧ୍ୟ ଚର୍ଚ୍ଚାରେ ରହିଛି । ବର୍ତ୍ତମାନ ରୂପା କିଲୋଗ୍ରାମ ପିଛା ୨ ଲକ୍ଷ ଟଙ୍କା ରହିଛି ।
ଅନ୍ୟପଟେ ଧନତେରସ ଓ ଦୀପାବଳି ଭଳି ପାର୍ବଣ ଶେଷ ହେବା ପରେ ଖୁଚୁରା ବଜାରରେ ସୁନାର ଚାହିଦା ମଧ୍ୟ କମିଛି । ତେବେ ଲଗାତାର ସୁନା ଦର ହ୍ରାସ ପାଉଥିବାରୁ ଗହଣା କିଣିବାକୁ ଅପେକ୍ଷା କରିଥିବା ଗ୍ରାହକଙ୍କ ପାଇଁ ଏହା ଏକ ଖୁସି ଖବର । ଆଗକୁ ସୁନା ଦର ଆହୁରି କମିବ ନା ବଢ଼ିବ, ତାହା ଉପରେ ଏବେ ସମସ୍ତଙ୍କ ନଜର ।
