ନନ୍ଦିଘୋଷ ବ୍ୟୁରୋ: ଅନୁମୋଦିତ ରାସ୍ତାର ନକ୍ସା ପରିବର୍ତ୍ତନକୁ ନେଇ ବିବାଦ । ହକ୍ ପାଇଁ ଘାଟି ବାସିନ୍ଦାଙ୍କ ମେଳି । ବୈଠକ ବସିଛି । ସାମ୍ନାସାମ୍ନି ହୋଇଛନ୍ତି ବିଭାଗୀୟ ଅଧିକାରୀ ଓ ଗ୍ରାମବାସୀ । ନିଜ ଭୁଲ ସ୍ୱୀକାର କରିଛି ବିଭାଗ । ତଥାପି ଫିଟୁନି ସମାଧାନର ବାଟ । ମାଲକାନଗିରି ମାଥିଲି ବ୍ଲକ ଗୁଗାପୋଦର ପାହାଡ଼ ତଳେ ବସିଥିଲା ଏହି ବୈଠକ । ଅଭିଯୋଗ ମୁତାବକ, ମାଥିଲି ବ୍ଲକ କର୍ତ୍ତନପାଲି ପଞ୍ଚାୟତ ସଦର ମହକୁମାରୁ ମାଳିଗୁଡ଼ା ଦେଇ ଗୁଗାପୋଦର ଗାଁକୁ ୬ କିଲୋମିଟର ରାସ୍ତା ନିର୍ମାଣ ହେବାର ଥିଲା । ହେଲେ ଗ୍ରାମ୍ୟ ଉନ୍ନୟନ ବିଭାଗର ନକ୍ସା ପରିବର୍ତ୍ତନ ଯୋଗୁଁ ସାଲିମି ପଞ୍ଚାୟତ ମାଳିଗୁଡ଼ାରୁ ଗୁଗାପୋଦର ପର୍ଯ୍ୟନ୍ତ ୨୨ କିଲୋମିଟର ରାସ୍ତା ନିର୍ମାଣ ହେଉଛି । ଫଳରେ ମୌଳିକ ସୁବିଧାରୁ ବଞ୍ଚିତ ହେଉଛନ୍ତି ଗୁଗାପୋଦରବାସୀ ।
ଭୁଲ ନକ୍ସାରେ ନିର୍ମିତ ରାସ୍ତା କାମ ବନ୍ଦ କର । ନଚେତ ନିର୍ମାଣ କାର୍ଯ୍ୟରେ ବ୍ୟବହୃତ ଗାଡ଼ି ପୋଡ଼ି ଦେବାକୁ ଚେତାବନୀ ଦେଇଛନ୍ତି ଗୁଗାପୋଦରବାସୀ । ପୂର୍ବ ଅନୁମୋଦିତ ୬ କିଲୋମିଟର ରାସ୍ତା ନିର୍ମାଣ କରିବାକୁ ଅଡ଼ି ବସିଛନ୍ତି । ଦାବି ପୂରଣ ନହେଲେ ନିର୍ମାଣ କାର୍ଯ୍ୟକୁ କୌଣସି ପରିସ୍ଥିତିରେ ଆଗକୁ ବଢିବାକୁ ଦେବେ ନାହିଁ ବୋଲି ଚେତାବନୀ ଦେଇଛନ୍ତି । ଏନେଇ କ୍ୟାମେରା ସମ୍ମୁଖରେ ମୁହଁ ଖୋଲୁନାହାନ୍ତି ଗ୍ରାମ୍ୟ ଉନ୍ନୟନ ବିଭାଗର ଅଧିକାରୀ ।
ଅନୁମୋଦିତ ରାସ୍ତାର ନକ୍ସା କିଏ ଓ କାହିଁକି ବଦଳାଇଲା ? ଏଥି ପାଇଁ ଦାୟୀ କିଏ ? ଆଉ କେତେ ଦିନ ରାସ୍ତା ଅପେକ୍ଷାରେ ରହିବେ ଗୁଗାପୋଦର ଗ୍ରାମବାସୀ ? ତାକୁ ନେଇ ଉଠିଛି ବଡ଼ ପ୍ରଶ୍ନବାଚୀ ।

