spot_img

Latest Posts

ବାରବାଙ୍କିରେ ଭୟଙ୍କର ସଡ଼କ ଦୁର୍ଘଟଣା, ଆମ୍ବୁଲାନ୍ସ-ପିକଅପ୍ ଧକ୍କାରେ ୫ ମୃତ

ନନ୍ଦିଘୋଷ ବ୍ୟୁରୋ : ଉତ୍ତରପ୍ରଦେଶର ବାରବାଙ୍କି ଜିଲ୍ଲାର ପୂର୍ବାଞ୍ଚଳ ଏକ୍ସପ୍ରେସୱେରେ ଶନିବାର ଭୋର ସମୟରେ ଘଟିଛି ଭୟଙ୍କର ସଡ଼କ ଦୁର୍ଘଟଣା। ରାସ୍ତାକଡ଼ରେ ଠିଆ ହୋଇଥିବା ଏକ ପିକଅପ୍ ଟ୍ରକକୁ ଦ୍ରୁତଗତିରେ ଆସୁଥିବା ଆମ୍ବୁଲାନ୍ସ ଧକ୍କା ଦେବାରୁ ୫ ଜଣଙ୍କର ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ଆମ୍ବୁଲାନ୍ସ ଡ୍ରାଇଭର ମଧ୍ୟ ଅଛନ୍ତି।

ସୁବେହା ଥାନା ଅଧୀନ ପୂର୍ବାଞ୍ଚଳ ଏକ୍ସପ୍ରେସୱେର ୫୩.୩ କିଲୋମିଟର ନିକଟରେ ଏହି ଦୁର୍ଘଟଣା ଘଟିଛି। ଜୟପୁରରୁ ପଶ୍ଚିମବଙ୍ଗ ଯାଉଥିବା ଆମ୍ବୁଲାନ୍ସଟି ନିୟନ୍ତ୍ରଣ ହରାଇ ରାସ୍ତାକଡ଼ରେ ଛିଡ଼ା ହୋଇଥିବା ପିକଅପ୍ ଟ୍ରକକୁ ଧକ୍କା ଦେଇଥିଲା। ଧକ୍କା ଏତେ ଜୋରଦାର ଥିଲା ଯେ ଆମ୍ବୁଲାନ୍ସଟି ସମ୍ପୂର୍ଣ୍ଣ ଭାଙ୍ଗିରୁଜି ଯାଇଥିଲା।

ଆମ୍ବୁଲାନ୍ସରେ ହୃଦଘାତରେ ମୃତ୍ୟୁବରଣ କରିଥିବା ୩୮ ବର୍ଷୀୟ ଅଜିଜୁଲ ହକ୍‌ଙ୍କ ମୃତଦେହକୁ ପରିବାରଲୋକେ ପଶ୍ଚିମବଙ୍ଗ ନେଉଥିଲେ। ଏହି ସମୟରେ ଘଟିଥିବା ଦୁର୍ଘଟଣାରେ ଅମିନୁର ହକ୍ (୪୦), ହରିଓମ୍ (୩୩), ରୂପିକ୍ (୫୦), ମକବୁଲ ଖାନ (୬୨) ଏବଂ ଆମ୍ବୁଲାନ୍ସ ଡ୍ରାଇଭର ଆଲାମଙ୍କ ମୃତ୍ୟୁ ହୋଇଛି।

ଖବର ପାଇ ପୋଲିସ ଓ ଉଦ୍ଧାରକାରୀ ଟିମ୍ ଘଟଣାସ୍ଥଳରେ ପହଞ୍ଚି ମୃତଦେହଗୁଡ଼ିକୁ ହାଇଦରଗଡ଼ କମ୍ୟୁନିଟି ହେଲ୍ଥ ସେଣ୍ଟରକୁ ପଠାଇଥିଲେ। ଦୁର୍ଘଟଣା ପରେ କିଛି ସମୟ ପାଇଁ ଏକ୍ସପ୍ରେସୱେରେ ଯାତାୟାତ ବନ୍ଦ ରହିଥିଲା। ବରିଷ୍ଠ ପୋଲିସ ଅଧିକାରୀମାନେ ଘଟଣାସ୍ଥଳ ଯାଞ୍ଚ କରିବା ସହ ଦୁର୍ଘଟଣାର କାରଣ ଖୋଜୁଛନ୍ତି।

ଅନ୍ୟପଟେ, ଏକ ହାଇସ୍ପିଡ୍ ଏକ୍ସପ୍ରେସୱେରେ ରାସ୍ତାକଡ଼ରେ ପିକଅପ୍ ଗାଡ଼ି ଠିଆ ହୋଇଥିବା ଘଟଣା ହାଇୱେ ପାଟ୍ରୋଲିଂ ଓ ସୁରକ୍ଷା ବ୍ୟବସ୍ଥା ଉପରେ ପ୍ରଶ୍ନ ଉଠାଇଛି। କେଉଁ ପରିସ୍ଥିତିରେ ପିକଅପ୍ ଗାଡ଼ିଟି ସେଠାରେ ଠିଆ ହୋଇଥିଲା ଏବଂ ପାଟ୍ରୋଲିଂ ଟିମ୍ ଏନେଇ ଅବଗତ ଥିଲେ କି ନାହିଁ, ତାହାର ତଦନ୍ତ କରୁଛି ପୋଲିସ।

Latest Posts

Don't Miss