କୋଣାର୍କ: ଠାକୁରଙ୍କୁ ବି ଡରୁନାହାନ୍ତି ଦୁର୍ବୃତ୍ତ। ପାପ ପୁଣ୍ୟର ବିଚାର ନକରି ମନ୍ଦିରରୁ ଲୁଟି ନେଇଛନ୍ତି ୨୦ ଲକ୍ଷରୁ ଅଧିକ ଟଙ୍କାର ଅଳଙ୍କାର ଓ ଦାନ ରାଶି। ପୁରୀ ଜିଲ୍ଲା କୋଣାର୍କ ରାମଚଣ୍ଡୀ ଥାନା ଅନ୍ତର୍ଗତ ବାବା କପିଳେଶ୍ୱର ମନ୍ଦିରରେ ଘଟିଛି ଏହି ଚୋରି ଘଟଣା।
ମନ୍ଦିରର ମୁଖ୍ୟ ଗେଟ୍ ତାଲାକୁ କଟରରେ କାଟିବା ପରେ ଭିତର ଗେଟ୍ ତାଲା ଭାଙ୍ଗି ମନ୍ଦିର ଭିତରେ ପଶିଥିଲେ ଦୁର୍ବୃତ୍ତ। ମନ୍ଦିରରେ ଥିବା ରୁପା ମୁକୁଟ ସମେତ ସମସ୍ତ ଅଳଙ୍କାର ଲୁଟି ନେଇଛନ୍ତି। ମା’ ପାର୍ବତୀଙ୍କ ସୁନା ଆଖି, ନୋଥ, ଆଖିପତା, ନାସା ଚିତା, ମୁକୁଟ, ସୁନା କିରିଟି ଏବଂ ଦୁଇ କେଜିରୁ ଅଧିକ ରୁପା ଅଳଙ୍କାର ଚୋରି ହୋଇଛି।
ତେବେ ଅଳଙ୍କାର ଲୁଟ୍ ସହ ମନ୍ଦିରର ହୁଣ୍ଡିକୁ ମଧ୍ୟ ଭାଙ୍ଗି ଲକ୍ଷାଧିକ ଟଙ୍କାର ଦାନ ରାଶି ଲୁଟି ନେଇଛନ୍ତି ଦୁର୍ବୃତ୍ତ। ସକାଳେ ପୂଜକ ଭାସ୍କର ନାୟକ ଓ ମାନସ ପଣ୍ଡା ମନ୍ଦିରକୁ ଆସି ଚୋରି ଘଟଣା ଦେଖିବା ପରେ ପୋଲିସକୁ ଖବର ଦେଇଥିଲେ। ତେବେ ଖବର ପାଇ ପୋଲିସ ଓ ସାଇଣ୍ଟିଫିକ୍ ଟିମ୍ ମନ୍ଦିରରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଚୋରିରେ ସମ୍ପୃକ୍ତ ଦୁର୍ବୃତ୍ତଙ୍କୁ ଧରିବା ପାଇଁ ତଦନ୍ତ ଚାଲିଛି।
କିଛି ଦିନ ପୂର୍ବରୁ କୋଣାର୍କର ରାମ ମନ୍ଦିରରୁ ମଧ୍ୟ ଏଭଳି ଚୋରି ହୋଇଥିଲା। ନିମାପଡ଼ା, କୋଣାର୍କ ଓ ଅସ୍ତରଙ୍ଗ ଅଞ୍ଚଳରେ କିଛି ଦିନ ହେଲା ମନ୍ଦିର ଚୋରି ଘଟଣା ବଢ଼ିବାକୁ ନେଇ ଚିନ୍ତା ବଢ଼ିଛି।

