spot_img

Latest Posts

ରାସ୍ତା ନଥିବାରୁ ୭ କିମି ଖଟିଆରେ ବୁହା ହେଲେ ରୋଗୀ

ନନ୍ଦିଘୋଷ ବ୍ୟୁରୋ : ରାୟଗଡ଼ା ଜିଲ୍ଲା ସଦର ବ୍ଲକ ଅନ୍ତର୍ଗତ ପୂଜାରୀବମ୍ବୁ ଗାଁରୁ ପୁଣିଥରେ ସାମ୍ନାକୁ ଆସିଛି ସରକାରୀ ସ୍ୱାସ୍ଥ୍ୟସେବା ଓ ଗମନାଗମନ ବ୍ୟବସ୍ଥାର ଏକ ଅତ୍ୟନ୍ତ ବିକଳ ତଥା ହୃଦୟବିଦାରକ ଚିତ୍ର। ଗାଁକୁ ପକ୍କା ରାସ୍ତା ଖଣ୍ଡିଏ ନଥିବାରୁ ଆମ୍ବୁଲାନ୍ସ ପହଞ୍ଚି ନପାରିବାରୁ ଜଣେ ଗୁରୁତର ରୋଗୀଙ୍କୁ ପରିବାର ଲୋକେ ଓ ଗ୍ରାମବାସୀ ଖଟିଆରେ ବୋହି ପାହାଡ଼-ଜଙ୍ଗଲ ଏବଂ ନାଗାବଳୀ ନଦୀ ପାର କରାଇଛନ୍ତି। ଗତକାଲି ପୂଜାରୀବମ୍ବୁ ଗାଁର କୁମୁଟାଣୀ ବିଡିକା ରାସ୍ତାରେ ହଠାତ୍ ପଡ଼ିଯିବାରୁ ତାଙ୍କ ଅଣ୍ଟାରେ ଗଭୀର ଆଘାତ ଲାଗିଥିଲା। ଯନ୍ତ୍ରଣା ବଢ଼ିବାରୁ ସେ ଗୁରୁତର ହୋଇପଡ଼ିଥିଲେ। ଆଜି ସକାଳୁ ପରିବାର ଲୋକେ ତାଙ୍କୁ ମେଡିକାଲ ନେବା ପାଇଁ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ। ଆମ୍ବୁଲାନ୍ସ ଆସିବା ପାଇଁ ବାହାରିଥିଲା ସତ, କିନ୍ତୁ ଗାଁକୁ ଭଲ ରାସ୍ତା ନଥିବାରୁ ତାହା ଗାଁ ଭିତରକୁ ପଶିପାରିନଥିଲା। ଶେଷରେ କୌଣସି ଉପାୟ ନପାଇ ଗ୍ରାମବାସୀ କୁମୁଟାଣୀଙ୍କୁ ଏକ ଖଟିଆରେ ଶୁଆଇ ପାହାଡ଼, ଜଙ୍ଗଲ ରାସ୍ତା ଦେଇ ଦୀର୍ଘ ୭ କିଲୋମିଟର ବୋହିଥିଲେ। ଏପରିକି ଭରା ନାଗାବଳୀ ନଦୀ ପାର କରାଇ ତାଙ୍କୁ ଆମ୍ବୁଲାନ୍ସ ଠିଆ ହୋଇଥିବା ସ୍ଥାନ ପର୍ଯ୍ୟନ୍ତ ଆଣିଥିଲେ, ଯେଉଁଠାରୁ ତାଙ୍କୁ ଡାକ୍ତରଖାନା ନିଆଯାଇଥିଲା।

ସ୍ୱାଧୀନତାର ଏତେ ବର୍ଷ ପରେ ମଧ୍ୟ ପୂଜାରୀବମ୍ବୁ ଗାଁ ଲୋକଙ୍କ ପାଇଁ ସର୍ବନିମ୍ନ ମୌଳିକ ସୁବିଧା ସାଜିଥିବା ରାସ୍ତାଟିଏ ନଥିବା ଅତ୍ୟନ୍ତ ଦୁର୍ଭାଗ୍ୟଜନକ। ପ୍ରଶାସନର ଏଭଳି ଅବହେଳାକୁ ନେଇ ଗ୍ରାମବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଆଗାମୀ ଦିନରେ ଯଦି ପୂଜାରୀବମ୍ବୁ ଗାଁକୁ ତୁରନ୍ତ ରାସ୍ତା ନିର୍ମାଣ ନହୁଏ, ତେବେ ଗ୍ରାମବାସୀ ରାଜରାସ୍ତାକୁ ଓହ୍ଲାଇ ଆନ୍ଦୋଳନକୁ ତୀବ୍ର କରିବେ ବୋଲି ପ୍ରଶାସନକୁ ଖୋଲା ଚେତାବନୀ ଦେଇଛନ୍ତି।
ଏହି ହୃଦୟବିଦାରକ ଘଟଣା ପ୍ରଶାସନର ପାରିବାପଣିଆ ଉପରେ ଅନେକ ପ୍ରଶ୍ନ ଛିଡ଼ା କରିଛି ।

Latest Posts

Don't Miss