କୋର୍ଣାକ: କଇଁଛ ସୁରକ୍ଷା ନାଁରେ ହରିଲୁଟ୍ । ମିଥ୍ୟା ବିଲ କରି କରାଯାଉଛି କୋଟି କୋଟି ଟଙ୍କା ହଡ଼ପ । ପୁରୀ ଜିଲ୍ଲା ଅସ୍ତରଙ୍ଗ ଦେବୀ ମୁହାଣରେ ଅଲିଭ ରିଡଲେଙ୍କ ସୁରକ୍ଷା ନାଁରେ ଚାଲିଛି ତେଲ ଲୁଟ୍ । ଯାହାର ଦସ୍ତାବିଜ ନନ୍ଦିଘୋଷ ଟିଭି ହାତରେ ଲାଗିଛି । ୨୦୨୪- ୨୫ରେ ୪୦୦ ଏଚପି ବୋଟରେ ଘଣ୍ଟା ପିଛା ୧୦ ଲିଟର ତେଲ ଖର୍ଚ୍ଚ ହେଉଥିଲା । ୨୦୨୫-୨୬ରେ ୩୫ ଲିଟର ତେଲ ଖର୍ଚ୍ଚ ହେଉଥିଲା । ଏବେ ଏହି ସୀମା ହଟାଇ ଦେଇଛି ବନବିଭାଗ । ଗୋଟିଏ ମାଲିକକୁ ଦୀର୍ଘ ୩ ବର୍ଷ ହେଲା ଟେଣ୍ଡର ଦେଇଦେଉଛି । ୮ଟି ଟ୍ରଲରରୁ ଗୋଟିଏ ଟ୍ରଲର ବନବିଭାଗ ପାଟ୍ରୋଲିଂରେ ଲାଗୁଥିବା ବେଳେ ବାକି ଟ୍ରଲର ନିଷିଦ୍ଧାଞ୍ଚଳରେ ମାଛ ଧରୁଛି । ପ୍ରତିବାଦରେ ଅସ୍ତରଙ୍ଗ ବନ୍ୟପ୍ରାଣୀ ବନାଞ୍ଚଳ କାର୍ଯ୍ୟାଳୟ ସାମ୍ନାରେ ଅସ୍ତରଙ୍ଗ ଟ୍ରଲର ମାଲିକ ସଂଘ ଶାନ୍ତିପୂର୍ଣ୍ଣ ଧାରଣା ଦେଇଥିଲେ ।…
୨୦୨୬-୨୭ରେ ପୁରୀ ବନ୍ୟପ୍ରାଣୀ ଡିଭିଜନର ଟେଣ୍ଡର ନଂ ୨ ରେ ବ୍ୟାପକ ଅନିୟମିତତା ହୋଇଛି । ପିସିସିଏଫ୍, ଅର୍ଥ ବିଭାଗ, ଜିଲ୍ଲାପାଳ ଓ ନୂଆଗଡ ଥାନାରେ ୨୯ ଅକ୍ଟୋବର ୨୦୨୬ରେ ଦାୟର ହୋଇଛି ମାମଲା । ହେଲେ ଏଯାଏଁ କୌଣସି କାର୍ଯ୍ୟାନୁଷ୍ଠାନ ନିଆଗଲା ନାହିଁ । ତେଣୁ ଟ୍ରଲକ ମାଲିକ ସଂଘ ଆନ୍ଦୋଳନକୁ ଓହ୍ଲାଇଥିଲେ । ସ୍ଵାଧୀନ ଅଡ଼ିଟ ସହ ଟେଣ୍ଡର ବାତିଲ କରିବାକୁ ଦାବି କରିଥିଲେ । ଅନ୍ୟପଟେ ଦାବି ପତ୍ର ମିଳିଛି । ଉଚ୍ଚ ଅଧିକାରୀଙ୍କୁ ଦାବିପତ୍ର ପଠାଇ ଦିଆଯାଇଛି । ଯେଉଁମାନେ ଧାରଣାରେ ବସିଛନ୍ତି ସେମାନେ ବିଡର ନୁହନ୍ତି ବୋଲି କହିଛନ୍ତି ରେଞ୍ଜର । ଏଠି ପ୍ରଶ୍ନ ଉଠୁଛି- ବିଡର ନୁହଁନ୍ତି କହିଲେ କଣ ଜନତାଙ୍କ ପ୍ରଶ୍ନ ମରିଯିବ ? ଜନତା ଯଦି ବିଡର ନୁହନ୍ତି, ତେବେ ଜନତାଙ୍କ ଟଙ୍କାରେ ତେଲ କିଣାଯାଉଛି କାହା ପାଇଁ ?
ପୂର୍ବରୁ ବନବିଭାଗ ଝାଉଁ ଚାରା ରୋପଣରେ ହରିଲୁଟ କରିଥିବା ବେଳେ ଏବେ ତେଲ ଲୁଟ ଘଟଣା ସମସ୍ତଙ୍କୁ ଚକିତ କରିଛି । ସବୁ ଜାଣି କାହିଁକି ନିରବ ଜଙ୍ଗଲ ବିଭାଗ ? କେବେ ବିଦା ହେବେ ଦୁର୍ନୀତିଖୋର ଅଧିକାରୀ ? କେବେ ସାମ୍ନାକୁ ଆସିବ କୋଟିଏ ଟଙ୍କା ଅଭିଯୋଗର ସତ୍ୟାସତ୍ୟ ? ତାକୁ ନେଇ ଉଠିଛି ବଡ଼ ପ୍ରଶ୍ନବାଚୀ ।

