ନନ୍ଦିଘୋଷ ବ୍ୟୁରୋ : ବଲିଉଡ୍ ସୁପରଷ୍ଟାର ସଲମାନ ଖାନଙ୍କ ଆଗାମୀ ଆକ୍ସନ ଫିଲ୍ମ ‘ମନଷ୍ଟର’କୁ ନେଇ ଚର୍ଚ୍ଚା ଜୋର ଧରିଛି। ୨୦୨୭ ଇଦ୍ରେ ଏହି ଫିଲ୍ମ ପରଦାକୁ ଆସିବାକୁ ଥିବାବେଳେ, ଏଥିରେ ନୟନତାରାଙ୍କ ଭୂମିକାକୁ ନେଇ ଏକ ରୋଚକ ଖବର ସାମ୍ନାକୁ ଆସିଛି।
ଫିଲ୍ମରେ ନୟନତାରା ସଲମାନ ଖାନଙ୍କ ପତ୍ନୀ ଭୂମିକାରେ ନଜର ଆସିବେ। ହେଲେ ତାଙ୍କ ଚରିତ୍ର କେବଳ ଜଣେ ପତ୍ନୀ ମଧ୍ୟରେ ସୀମିତ ନୁହେଁ। ସେ ଜଣେ ଗୁପ୍ତ ପୋଲିସ ଅଧିକାରୀ ଭାବେ ମଧ୍ୟ ଅଭିନୟ କରିବେ। ତାଙ୍କୁ ନିଜ ସ୍ୱାମୀ ଅର୍ଥାତ୍ ସଲମାନ ଖାନଙ୍କୁ ଧରିବା ପାଇଁ ଏକ ସରକାରୀ ମିଶନର ଦାୟିତ୍ୱ ମିଳିବ।
ଏହି ଭୂମିକାରେ ନୟନତାରାଙ୍କ ଆକ୍ସନ ସହ ଭାବପ୍ରବଣ ଅଭିନୟ ମଧ୍ୟ ଦେଖିବାକୁ ମିଳିବ। ଫଳରେ ସ୍ୱାମୀ-ସ୍ତ୍ରୀଙ୍କ ସମ୍ପର୍କ ଭିତରେ ଏକ ରୋଚକ ଦ୍ୱନ୍ଦ୍ୱ ସୃଷ୍ଟି ହେବା ସହ କାହାଣୀରେ ନୂଆ ମୋଡ଼ ଆସିବାର ସମ୍ଭାବନା ରହିଛି।
ଭାମସି ପୈଦିପାଲିଙ୍କ ନିର୍ଦ୍ଦେଶନାରେ ଏବଂ ଦିଲ ରାଜୁଙ୍କ ପ୍ରଯୋଜନାରେ ନିର୍ମିତ ହେଉଛି ‘ମନଷ୍ଟର’। ଏହି ଫିଲ୍ମରେ ସଲମାନ ଖାନ ଓ ନୟନତାରା ପ୍ରଥମ ଥର ପାଇଁ ଏକାଠି ନଜର ଆସିବେ। ୨୦୨୭ ଇଦ୍ରେ ଫିଲ୍ମଟି ରିଲିଜ୍ ହେବାକୁ ଯୋଜନା ରହିଛି। ତେବେ ପରଦାରେ ସଲମାନ ଓ ନୟନତାରାଙ୍କ ଯୋଡ଼ି କେତେ ଧମାଲ କରୁଛି, ତାହା ଦେଖିବାକୁ ଦର୍ଶକଙ୍କ ଅପେକ୍ଷା।

