ନନ୍ଦିଘୋଷ ବ୍ୟୁରୋ: ସୀମାରେ ଉତ୍ତେଜନା ପରେ ଏବେ ଡିଜିଟାଲ୍ ଦୁନିଆରେ ଭାରତକୁ ଚ୍ୟାଲେଞ୍ଜ କରିବାକୁ ଚୀନ୍ର ଉଦ୍ୟମ! ଅରୁଣାଚଳ ପ୍ରଦେଶ ଉପରେ ନିଜର ଦାବିକୁ ମଜବୁତ କରିବା ପାଇଁ ଅନଲାଇନ୍ ମାନଚିତ୍ରରେ ହେରଫେର କରାଯାଉଥିବା ଅଭିଯୋଗ ହୋଇଛି। ଓପନ୍-ସୋର୍ସ ମ୍ୟାପିଂ ପ୍ଲାଟଫର୍ମ OpenStreetMapରେ କିଛି ବ୍ୟବହାରକାରୀ ସୀମାରେଖା ପରିବର୍ତ୍ତନ କରିବାକୁ ଉଦ୍ୟମ କରୁଥିବା ନେଇ ରିପୋର୍ଟ ସାମ୍ନାକୁ ଆସିଛି। ଏହାକୁ ଭାରତ ବିରୋଧରେ ଚୀନ୍ର ଏକ ନୂଆ ଡିଜିଟାଲ୍ ରଣନୀତି ବା ‘କାର୍ଟୋଗ୍ରାଫିକ୍ ୱାର୍ଫେୟାର’ ବୋଲି ବିଶ୍ଳେଷକମାନେ ଦେଖୁଛନ୍ତି।
ଅରୁଣାଚଳର ତିନିଟି ସ୍ଥାନରେ ସୀମା ପରିବର୍ତ୍ତନ ଅଭିଯୋଗ
ରିପୋର୍ଟ ଅନୁଯାୟୀ, ଗତ ୩୦ ଦିନ ମଧ୍ୟରେ ଅରୁଣାଚଳ ପ୍ରଦେଶର ସୀମାନ୍ତବର୍ତ୍ତୀ ତିନୋଟି ଅଞ୍ଚଳରେ OpenStreetMapରେ ସନ୍ଦେହଜନକ ସମ୍ପାଦନା କରାଯାଇଛି। ଏହି ପରିବର୍ତ୍ତନଗୁଡ଼ିକ ଚୀନ୍ ସହ ଜଡ଼ିତ କିଛି ବ୍ୟବହାରକାରୀଙ୍କ ଦ୍ୱାରା କରାଯାଇଥିବା ଆଶଙ୍କା ପ୍ରକାଶ ପାଇଛି। ଏପରିକି ତାକ୍ସିଂ ଅଞ୍ଚଳର ସୀମାରେଖାକୁ ନେଇ ମଧ୍ୟ ହେରଫେର ଅଭିଯୋଗ ହୋଇଛି। ଚୀନ୍ ଭାଷାରେ ନାମ ଓ ଭୌଗୋଳିକ ବିବରଣୀ ଯୋଡ଼ିବା ସହ ମାନଚିତ୍ରରେ ପରିବର୍ତ୍ତନ କରାଯାଉଥିବା ନେଇ ମଧ୍ୟ ଚର୍ଚ୍ଚା ହେଉଛି। ତେବେ ଏହି ସମ୍ପାଦନା ପଛରେ କୌଣସି ସରକାରୀ ନିର୍ଦ୍ଦେଶ ରହିଛି କି ନାହିଁ, ତାହା ସ୍ପଷ୍ଟ ହୋଇନାହିଁ।
ମାନଚିତ୍ର ମାଧ୍ୟମରେ ନିଜ ଦାବିକୁ ମଜବୁତ କରିବା ଉଦ୍ୟମ!
ବିଶେଷଜ୍ଞଙ୍କ ମତରେ, ଏହା କେବଳ ଏକ ଅନଲାଇନ୍ ମାନଚିତ୍ରରେ ପରିବର୍ତ୍ତନ ନୁହେଁ। ବରଂ ମାନଚିତ୍ର, ସୀମାରେଖା ଓ ଭୌଗୋଳିକ ନାମକୁ ବ୍ୟବହାର କରି କୌଣସି ଅଞ୍ଚଳ ଉପରେ ନିଜର ଆଞ୍ଚଳିକ ଦାବିକୁ ସୁଦୃଢ଼ କରିବାର ଏକ ରଣନୀତି। ଏହାକୁ ‘କାର୍ଟୋଗ୍ରାଫିକ୍ ୱାର୍ଫେୟାର’ ବା ମାନଚିତ୍ର ଯୁଦ୍ଧ କୁହାଯାଉଛି। ଏଭଳି ଭୁଲ୍ ତଥ୍ୟକୁ ଠିକ୍ ସମୟରେ ସଂଶୋଧନ କରା ନଗଲେ ଏହା ଅନ୍ୟ ଡିଜିଟାଲ୍ ମ୍ୟାପିଂ ପ୍ଲାଟଫର୍ମ, ଅନ୍ତର୍ଜାତୀୟ ଡାଟାବେସ୍ ଓ ବିଭିନ୍ନ ଗବେଷଣା ସଂସ୍ଥାର ତଥ୍ୟରେ ସ୍ଥାନ ପାଇପାରେ। ଫଳରେ ବିଶ୍ୱସ୍ତରରେ ଏହି ଅଞ୍ଚଳର ଭୌଗୋଳିକ ଚିତ୍ରଣକୁ ନେଇ ଭ୍ରମ ସୃଷ୍ଟି ହେବାର ଆଶଙ୍କା ରହିଛି।
ଅରୁଣାଚଳ ଭାରତର ଅବିଚ୍ଛେଦ୍ୟ ଅଙ୍ଗ: ଭାରତର ଦୃଢ଼ ଆଭିମୁଖ୍ୟ
ଅରୁଣାଚଳ ପ୍ରଦେଶକୁ ନେଇ ଭାରତ ଓ ଚୀନ୍ ମଧ୍ୟରେ ଦୀର୍ଘଦିନ ଧରି ବିବାଦ ରହିଆସିଛି। ଚୀନ୍ ଏହି ଅଞ୍ଚଳ ଉପରେ ଦାବି କରୁଥିବା ବେଳେ ଭାରତ ଏହାକୁ ସର୍ବଦା ଖାରଜ କରିଆସିଛି। ଭାରତର ସ୍ପଷ୍ଟ ଆଭିମୁଖ୍ୟ ହେଉଛି, ଅରୁଣାଚଳ ପ୍ରଦେଶ ଦେଶର ଅବିଚ୍ଛେଦ୍ୟ ଅଙ୍ଗ ଏବଂ ଏହା ଉପରେ ଚୀନ୍ର ଦାବି ଗ୍ରହଣୀୟ ନୁହେଁ। ଏହି ପରିପ୍ରେକ୍ଷୀରେ ଅଗଷ୍ଟ ୨୦୨୬ରେ ଭାରତ ନିଜର ସରକାରୀ ମାନଚିତ୍ରରେ ଅରୁଣାଚଳ ପ୍ରଦେଶର ୨୭ଟି ରଣନୈତିକ ସ୍ଥାନ ଓ ଭୌଗୋଳିକ ବୈଶିଷ୍ଟ୍ୟର ମାନକ ଭାରତୀୟ ନାମ ସାମିଲ କରିଥିବା ଦାବି କରାଯାଇଛି। ସୀମାରେ ସାମରିକ ତିକ୍ତତା ମଧ୍ୟରେ ଏବେ ଡିଜିଟାଲ୍ ମାନଚିତ୍ରକୁ ନେଇ ନୂଆ ବିବାଦ ସୃଷ୍ଟି ହୋଇଛି। ଭାରତର ଭୌଗୋଳିକ ସାର୍ବଭୌମତ୍ୱକୁ ଡିଜିଟାଲ୍ ମଞ୍ଚରେ ମଧ୍ୟ ସୁରକ୍ଷିତ ରଖିବା ଏବେ ଏକ ବଡ଼ ଆହ୍ୱାନ ପାଲଟିଛି।

