spot_img

Latest Posts

ଆଧାର ନାହିଁ ବୋଲି ଭତ୍ତା ବନ୍ଦ ! ଭୋକ ଉପାସରେ ଦିନ କାଟୁଛନ୍ତି ଦିବ୍ୟାଙ୍ଗ ମିନତୀ

ନନ୍ଦିଘୋଷ ବ୍ୟୁରୋ : ଆଧାର କାର୍ଡ ପାଇଁ ଭତ୍ତା ବନ୍ଦ । ଦୟନୀୟ ଅବସ୍ଥାରେ ଦିନ କାଟୁଛନ୍ତି ଦିବ୍ୟାଙ୍ଗ । ତିନି ମାସ ହେଲା ମିଳୁନି ଦିବ୍ୟାଙ୍ଗ ଭତ୍ତା। ସରକାରୀ ଚାଉଳ ମଧ୍ୟ ବନ୍ଦ ହୋଇଯାଇଛି। ଦୁଃଖ ଓ ଯନ୍ତ୍ରଣାରେ ଭୋକ ଉପାସରେ କଟୁଛି ଜୀବନ  । ବୟସ ପ୍ରାୟ ୪୦ ହେବ, ବାପା ଓ ମାଆ ଚାଲିଯିବା ପରେ ବେସାହାରା । ଦିଓଳି ଦିମୁଠା ଖାଇବା ପାଇଁ ନିଇତି କରୁଛନ୍ତି ସଂଘର୍ଷ। ଖାଇବା ପାଇଁ ପଡ଼ୋଶୀ ଓ ସମ୍ପର୍କୀୟଙ୍କ ଉପରେ ନିର୍ଭର କରୁଛନ୍ତି। କେହି ଖାଇବାକୁ ଦେଲେ ଖାଉଛନ୍ତି, ନହେଲେ ଭୋକରେ ରହିବାକୁ ପଡ଼ୁଛି। ହାତ ସଂକ୍ରମିତ ହୋଇ ବଙ୍କା ହୋଇଯାଇଛି। ଫଳରେ ଆଧାର କାର୍ଡ ପାଇଁ ଆବଶ୍ୟକ ବାୟୋମେଟ୍ରିକ୍ ଦେବା ମଧ୍ୟ ସମ୍ଭବ ହେଉନାହିଁ ।

ପିଲାବେଳେ ସ୍କୁଲରେ ଖେଳୁଥିବା ସମୟରେ ବାମ ଗୋଡ଼ରେ ଆଘାତ ଲାଗିଥିଲା। କିନ୍ତୁ ପରିବାରର ଆର୍ଥିକ ଅବସ୍ଥା ଭଲ ନଥିବାରୁ ଚିକିତ୍ସା ହୋଇପାରିଲା ନାହିଁ। ଧୀରେ ଧୀରେ ଗୋଡ଼ର କାର୍ଯ୍ୟକ୍ଷମତା ନଷ୍ଟ ହୋଇଗଲା। ସେବେଠୁ ଯନ୍ତ୍ରଣାରେ କଟୁଛି ମିନତୀଙ୍କ ଜୀବନ । ସେପଟେ ଖମୋଳ ପଞ୍ଚାୟତ ସମିତି ସଭ୍ୟ କହିଛନ୍ତି, ସେ ମିନତୀଙ୍କୁ ତିନି ରୁ ୪ ଥର ବ୍ଲକ କାର୍ଯ୍ୟାଳୟକୁ ନେଇ ଆଧାର କାର୍ଡ ପଞ୍ଜୀକରଣ କରାଇବାକୁ ଚେଷ୍ଟା କରିଥିଲେ। କିନ୍ତୁ ଟିପ ଚିହ୍ନ ଓ ଆଖି ସ୍କାନ୍ ହୋଇପାରୁନି। ଆଧାର କାର୍ଡ ନ ଥିବାରୁ ଏବେ ଦିବ୍ୟାଙ୍ଗ ଭତ୍ତା ପାଇବାରୁ ବଞ୍ଚିତ ହୋଇଛନ୍ତି। ଏଠି ପ୍ରଶ୍ନ ଉଠୁଛି, ଯେଉଁ ମହିଳା ଉଠିବାକୁ ଅକ୍ଷମ, ଯାହାର ବାୟୋମେଟ୍ରିକ୍ ହେଉନାହିଁ, ସେମାନଙ୍କୁ ସରକାରୀ ସହାୟତା ପାଇଁ କେତେ ଦିନ ଅପେକ୍ଷା କରିବାକୁ ପଡ଼ିବ?

Latest Posts

Don't Miss