ନନ୍ଦିଘୋଷ ବ୍ୟୁରୋ : ଘଞ୍ଚ ଜଙ୍ଗଲରେ ନୀଳ ଜହର ନେଟୱର୍କ ଉପରେ ନଜର । ପଡ଼ୋଶୀ ରାଜ୍ୟକୁ ଚାଲାଣ ପୂର୍ବରୁ ପ୍ରଚଣ୍ଡ ପ୍ରହାର ଏସଟିଏଫ । ଗଞ୍ଜେଇ ଚାଷ ସୂଚନା ପାଇଁ ବିଲ ଉପରେ ଉଡୁଛି ଡ୍ରୋନ୍ । ୨୦ ଦିନରେ ନଷ୍ଟ ହୋଇଛି ୧୧ ହଜାର ଏକର ନିଳ ଜହର । ୨୦୨୯ ସୁଦ୍ଧା ନିଶାମୁକ୍ତ ଓଡିଶା ଗଠନ ପାଇଁ ଚାଲିଛି ପ୍ରୟାସ । ନିଶାମାଫିଆଙ୍କୁ ଗିରଫ ସହ ସେମାନଙ୍କ ସମ୍ପତ୍ତି ବ୍ୟାଜାପ୍ତି କରାଯାଉଛି । ଏହି ଇନଫୋର୍ସମେଣ୍ଟକୁ ଅଧିକ ବ୍ୟାପକ କରିବାକୁ ଅଣ୍ଟା ଭିଡ଼ିଛି ସ୍ପେଶାଲ ଟାସ୍କଫୋର୍ସ । ବିଗତ ୨୦ ଦିନରେ ୧୧ ହଜାର ଏକରରୁ ଅଧିକ ଗଞ୍ଜେଇ ଚାଷ ନଷ୍ଟ କରିଛି ଏସଟିଏଫ । ଚଳିତ ମାସରେ ୧୫ ହଜାର ଏକର ନଷ୍ଟ କରିବାକୁ ଟାର୍ଗେଟ ରହିଛି । ରାଜ୍ୟର ୬ଟି ହଟାତ ଜିଲ୍ଲାକୁ ଚିହ୍ନଟ କରିଛି ଏସଟିଏଫ । କନ୍ଧମାଳ ଓ ବୌଦ୍ଧ ଜିଲ୍ଲା ସବୁଠାରୁ ଅଧିକ ହଟ୍ସ୍ପଟ୍ ଥିବା ବେଳେ ମାଲକାନଗିରି, କୋରାପୁଟ ଓ ରାୟଗଡ଼ା ଜିଲ୍ଲାରେ ମଧ୍ୟ ଚାଲିଛି ବଡ଼ ଧରଣର ଅଭିଯାନ। କେବଳ ତଥାକଥିତ ଉପାୟ ନୁହେଁ, ଟେକ୍ନୋଲୋଜିର ସହାୟତା ନିଆଯାଉଛି । ସାଟେଲାଇଟ୍ ଇମେଜ୍, ଡ୍ରୋନ୍ ସର୍ଭିଲାନ୍ସ ଓ ଲାଟିଚ୍ୟୁଡ, ଲଙ୍ଗିଚ୍ୟୁଡ୍ ଆଧାରରେ ଚାଷ ଜମି ଚିହ୍ନଟ କରାଯାଉଛି । ଗ୍ରାଉଣ୍ଡ ରିପୋର୍ଟ ସହ ସାଟେଲାଇଟ୍ ତଥ୍ୟକୁ ମ୍ୟାଚ୍ କରିବା ପରେ ଚାଲିଛି ଗଞ୍ଜେଇ ଗଛ ନଷ୍ଟ।
ନଭେମ୍ବର ଶେଷ ଓ ଡିସେମ୍ବରରେ ଅମଳ ସମୟ ଆସିବା ପୂର୍ବରୁ ସମସ୍ତ ଚାଷ ନଷ୍ଟ କରିବାକୁ ଏସଟିଏଫର ଲକ୍ଷ୍ୟ ରହିଛି । ଅନ୍ୟପଟେ ଗଞ୍ଜେଇ ଚାଷ ନଷ୍ଟ ପରେ ବିକଳ୍ପ ଚାଷକୁ ଗୁରୁତ୍ୱ ଦିଆଯାଉଛି । ଜିଲ୍ଲା ପ୍ରଶାସନ, ବନ ବିଭାଗ ଓ ରାଜସ୍ୱ ବିଭାଗ ମିଳିତ ଭାବେ ଚାଷୀଙ୍କୁ ବିକଳ୍ପ ଫସଲ ପାଇଁ ଉତ୍ସାହିତ କରୁଛନ୍ତି । ଏହା ସହ ଗଞ୍ଜେଇ ମାଫିଆଙ୍କ ଆର୍ଥିକ କାରବାରର ତଦନ୍ତ, ସମ୍ପତ୍ତି ଜବତ ଓ ସିଣ୍ଡିକେଟ୍ ଭାଙ୍ଗିବା ଉପରେ ମଧ୍ୟ ଫୋକସ୍ ରହିଛି । ଗଞ୍ଜେଇ ଚାଷ ସମ୍ପର୍କରେ ପୋଲିସକୁ ସୂଚନା ଦେବାକୁ ଲୋକଙ୍କୁ ଅପିଲ୍ କରାଯାଉଛି । ରାଜ୍ୟରୁ ଶୂନ୍ୟ ଗଞ୍ଜେଇ ଚାଷ ଲକ୍ଷ୍ୟ ହାସଲ ପାଇଁ ଚାଲିଛି ଜୋରଦାର ପ୍ରୟାସ । କେବଳ ଗଞ୍ଜେଇ ଗଛ ନଷ୍ଟ ନୁହେଁ, ମାଫିଆଙ୍କ ଆର୍ଥିକ ନେଟୱର୍କ ଉପରେ ମଧ୍ୟ ହେବ ପ୍ରହାର ବୋଲି ଚେତାବନୀ ଦେଇଛନ୍ତି ଆଇଜି ।

