ନନ୍ଦିଘୋଷ ବ୍ୟୁରୋ : ବନ୍ୟା ପରିଚାଳନାରେ ବିଫଳ। ଭତ୍ତା ବଣ୍ଟନ, ବିପର୍ଯ୍ୟସ୍ତ ଆଇନ ଶୃଙ୍ଖଳା, କୋଟିଆ, ମହାନଦୀ ପ୍ରସଙ୍ଗରେ ରାଜ୍ୟ ସରକାର ବିଫଳ। ସାରା ରାଜ୍ୟରେ ଅସନ୍ତୋଷର ବହ୍ନି। ବିଧାନସଭା ଚାଲି ପାରୁନି। ବ୍ୟାକ ଫୁଟ୍ ରେ ବିଜେପି ସରକାର। ଏସବୁକୁ ଓଡ଼ିଶାବାସୀଙ୍କ ଦୃଷ୍ଟିରୁ ଦୂରେଇବା ପାଇଁ ବିଚଳିତ ହୋଇଛନ୍ତି ରାଜ୍ୟ ସରକାର। ଅପ୍ରସଙ୍ଗକୁ ପ୍ରସଙ୍ଗ କରି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ପୂର୍ବତନ ବ୍ୟକ୍ତିଗତ ସଚିବଙ୍କ ଭି.କେ. ପାଣ୍ଡିଆନଙ୍କ ରାଜ୍ୟ ସ୍ୱାର୍ଥ ସମ୍ବଳିତ ବିଦେଶ ଗସ୍ତକୁ ନେଇ ତଦନ୍ତ ନିର୍ଦ୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ। ଏହାକୁ ନେଇ ମୋହନ ସରକାରଙ୍କ ଉପରେ ବର୍ଷିଛି ବିଜେଡି। ବିଧାୟକ ଗୌତମ ବୁଦ୍ଧ ଦାସ କହିଛନ୍ତି, ପୂର୍ବରୁ ବିଜେପି ସରକାର ୩ଟି ତଦନ୍ତ କରିଛନ୍ତି। ରତ୍ନ ଭଣ୍ଡାର ଚାବି ହଜିଥିବା କେନ୍ଦ୍ରୀୟ ନେତୃତ୍ୱ ନିର୍ବାଚନ ପୂର୍ବରୁ କହିଥିଲେ। ପରେ ନିଜେ ଏହାକୁ କ୍ଲିନ ଚିଟ ଦେଲେ। ହେଲିକପ୍ଟରରେ ପାଣ୍ଡିଆନ ବୁଲିବା ଘଟଣାରେ ବି କୋର୍ଟ କ୍ଲିନ୍ ଚିଟ୍ ଦେଲେ। ତେଣୁ ସରକାର ଶସ୍ତା ରାଜନୀତିରୁ ଦୂରେଇ ରହନ୍ତୁ ବୋଲି କହିଛି ବିଜେଡି।
ସେପଟେ ସରକାରଙ୍କ ଉପରେ ବର୍ଷିଛନ୍ତି ପିସିସି ସଭାପତି ଭକ୍ତ ଦାସ। ସେ କହିଛନ୍ତି- ନିଜ ବିଫଳତାକୁ ଘୋଡେ଼ଇବା ପାଇଁ ସରକାର ଏଭଳି ତଦନ୍ତ ନିର୍ଦ୍ଦେଶ ଦେଇଛନ୍ତି। ବନ୍ୟା ପରିଚାଳନାରେ ସମ୍ପୂର୍ଣ୍ଣ ବିଫଳ ହୋଇଛନ୍ତି ସରକାର। ସରକାରୀ ଫାଇଲ ପୋଡ଼ି ଯାଉଛି। ମୁଖ୍ୟମନ୍ତ୍ରୀଙ୍କ ଗସ୍ତ ଲୁଚି ଛପି ହୁଏନି। ସବୁ ମୁଖ୍ୟମନ୍ତ୍ରୀ ଯାଆନ୍ତି। ବିଜେପି କହିଛି, ରାଜ୍ୟର ମୁଖ୍ୟମନ୍ତ୍ରୀ, ମନ୍ତ୍ରୀ ବା ବିଧାୟକ ହୁଅନ୍ତୁ, ସେମାନେ ବିଦେଶ ଗଲେ କେଉଁ ଉଦ୍ଦଶ୍ୟରେ ଗଲେ ରାଜ୍ୟ ସରକାର ତାଙ୍କ ପାଇଁ ଖର୍ଚ୍ଚ କେତେ କଲେ ସେ ବିଷୟରେ ରାଜ୍ୟ ସରକାର ଜାଣିବାର ଆବଶ୍ୟକତା ଅଛି। ମୁଖ୍ୟମନ୍ତ୍ରୀ ଏହା ଜାଣିବାକୁ ଇଚ୍ଛା କରିଛନ୍ତି। ତାହା ତଦନ୍ତ ଆସିବା ପରେ ଜଣାଇ ଦିଆଯିବ। ରାଜନୈତିକ ସମୀକ୍ଷକ କିନ୍ତୁ ଏ ପ୍ରସଙ୍ଗରେ ଭିନ୍ନ ମତ ଦେଇଛନ୍ତି। ବିଜେପି ସରକାର ଅଧା ବର୍ଷ ପୂରିବା ପରେ କାହିଁକି ଏପରି ତଦନ୍ତ ନିର୍ଦ୍ଦେଶ ଦେଇଛନ୍ତି ବୋଲି ପ୍ରଶ୍ନ କରିଛନ୍ତି ସମୀକ୍ଷକ।

