ବରଗଡ : ଦୁର୍ଦ୍ଦିନରେ କଂସା କାରିଗର । ପ୍ଲାଷ୍ଟିକ ଓ ଷ୍ଟିଲ ଯୁଗରେ କମିଛି କଂସାର ଚାହିଦା। କୌଳିକ ବୃତ୍ତିରୁ ମୁହଁ ଫେରାଉଛନ୍ତି କଂସାରୀ। ଚିନ୍ତାରେ ବରଗଡ଼ ଜିଲ୍ଲା କଟାପାଲି ଗାଁର ଶତାଧିକ କଂସାରୀ ପରିବାର। ଦିନେ ପ୍ରାୟ ୫୦ ପ୍ରତିଶତ ଲୋକ କଂସା କାରିଗରୀ କରୁଥିଲେ। କଂସାରି ଗ୍ରାମ କୁହାଯାଉଥିବା କଟାପାଲି ଗାଁର କଂସା ଓ ପିତ୍ତଳ ଶାଳ ଏବେ ରୁଗ୍ଣ ଅବସ୍ଥାରେ। ମାତ୍ର କିଛି ହାତଗଣତି କଂସା କାରିଗର ରହିଛନ୍ତି | ଦିନଥିଲା ସକାଳ ହେଲେ ଠୁକୁର ଠୁକୁର ଶବ୍ଦରେ କମ୍ପୁଥିଲା ଗାଁ। ମାତ୍ର କଂସାର ଚାହିଦା କମିଥିବାରୁ ନା ଆଗପରି ବିକ୍ରିବଟା ହେଉଛି ନା ମିଳୁଛି କଞ୍ଚାମାଲ। ତେଣୁ ବାଧ୍ୟ ହୋଇ କିଏ ଅନ୍ୟତ୍ର କାମ କରି ତ ଆଉ କିଏ ଦିନମଜୁରିଆ ଭାବେ କାମ କରି ଗୁଜୁରାଣ ମେଣ୍ଟାଉଛନ୍ତି।
କଂସାର ପ୍ଲେଟ, ଥାଳି, ଘଚା, ବେଲା ଓ ପରାତ ଥାଳି ତିଆରିରେ ଲାଗିଛନ୍ତି କିଛି ହାତଗଣତି କାରିଗର । ଏଥିପାଇଁ ଆବଶ୍ୟକ କଂଚାମାଲକୁ କୋଇଲା ଭାଟିର ଉଚ୍ଚ ତାପମାତ୍ରରେ ତରଳାଇ ବିଭିନ୍ନ ପ୍ରକାର ଛାଚାରେ ଢ଼ଳା ଯାଇ କଂସାବାସନ ତିଆରି କରାଯାଇଥାଏ । ମେସିନ ତିଆରି କଂସା, ବାସନ ଓ କଂଚାମାଲର ଦର ବୃଦ୍ଧି ଯୋଗୁଁ କଂସା ସାମଗ୍ରୀର ଚାହିଦା ହ୍ରାସପାଇବାରେ ଲାଗିଛି। ତେଣୁ ଅଧିକାଂଶ ପରିବାର ଏବେ ଆର୍ଥିକ ସଂକଟ ମଧ୍ୟରେ ଅତି ଦୟନୀୟ ଅବସ୍ଥାରେ ଚଳୁଛନ୍ତି । କଂସା ତିଆରି ସାମଗ୍ରୀ ବିକ୍ରି ଲାଗି ଏ ଯାଏ ଉପଯୁକ୍ତ ବଜାରଟିଏ ମଧ୍ୟ ସୃଷ୍ଟି ହୋଇପାରିନାହିଁ । ତେବେ ବୁଣାକାରଙ୍କୁ କଞ୍ଚାମାଲ ଯୋଗାଇଦେବା ସହ ସରକାର ସ୍ଵତନ୍ତ୍ର ବଜାର ବ୍ୟବସ୍ଥା କରିଥିବା ବେଳେ କଂସା କରିଗରଙ୍କ ପ୍ରତି ଅବହେଳା କାହିଁକି ବୋଲି ଉଠିଛି ପ୍ରଶ୍ନ।
