ବାରିପଦା : ମୟୂରଭଞ୍ଜ ଜିଲ୍ଲା ଝାଟିଅଡ଼ା ଶ୍ରୀମା ଶିକ୍ଷା ସଦନ ସରକାରୀ ଉଚ୍ଚ ବିଦ୍ୟାଳୟରେ ଅଭାବନୀୟ ଘଟଣା । ହିନ୍ଦୀ ଶିକ୍ଷକ ସୁବାଷ ଚାନ୍ଦ ଛାତ୍ରୀ ମାନଙ୍କୁ ଅଶାଳୀନ କଥାବାର୍ତ୍ତା କରୁଥିବା ଅଭିଯୋଗ ହୋଇଛି । ପ୍ରଧାନ ଶିକ୍ଷକ ଏନେଇ ଏକ ବୈଠକ ଡାକିଥିଲେ । ବୈଠକରେ ସଂପୃକ୍ତ ଶିକ୍ଷକ ଜଣଙ୍କ ଦୋଷ ସ୍ଵୀକାର କରିଥିଲେ । ପ୍ରଧାନ ଶିକ୍ଷକ ଏ ଘଟଣା ବାବଦରେ ଉପରସ୍ତ ଅଧିକାରୀଙ୍କୁ ଅବଗତ ନକରାଇ ଘଟଣାକୁ ଚାପିଦେଇ ଥିଲେ । ତେବେ ସୁବାଷ ଚାନ୍ଦ ଏହି ଘଟଣାର ପୁନରାବୃତ୍ତି କରିଥିବାରୁ ଅଭିଭାବକ ମାନେ ବିଦ୍ୟାଳୟରେ ପହଞ୍ଚି ହୋହଲ୍ଲା କରିଥିଲେ । ପ୍ରଧାନ ଶିକ୍ଷକ ହିନ୍ଦୀ ଶିକ୍ଷକଙ୍କୁ ସମର୍ଥନ କରି ତାଙ୍କର ସମସ୍ତ ଭୁଲକୁ ଘଣ୍ଟ ଘୋଡାଉଥିବା ଅଭିଯୋଗ କରିଛନ୍ତି ଅଭିଭାବକ । ଏହାସହ ବିଦ୍ୟାଳୟର ପିଅନ ଶିବଶଙ୍କର ଗିରି ଏହି ଘଟଣା ବାବଦରେ ଛାତ୍ରୀମାନଙ୍କୁ କମେଣ୍ଟ କରୁଥିବା ସେମାନେ ଅଭିଯୋଗ କରିଛନ୍ତି । ବ୍ଲକ ଭାରପ୍ରାପ୍ତ ଶିକ୍ଷା ଅଧିକାରୀ ଏବଂ ରାସଗୋବିନ୍ଦପୁର ପୋଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତି ଆୟତ୍ତ କରିଥିଲେ । ସଂପୃକ୍ତ ହିନ୍ଦୀ ଶିକ୍ଷକ, ପ୍ରଧାନ ଶିକ୍ଷକ, ପିଅନଙ୍କୁ ଥାନା ପରିସରକୁ ନେଇ ପଚରାଉଚରା ଚଳାଇଛି ପୋଲିସ ।
