ଭୁବନେଶ୍ବର : ମୋ ପାଖରେ ପୁଳା ପୁଳା ଶହେ ଟଙ୍କିଆ ନୋଟ ଅଛି। ଲକ୍ଷ ଲକ୍ଷ ଟଙ୍କାର କଳାଧନ ରହିଛି । ଆପଣ ଯଦି ଶହେ ଟଙ୍କିଆ ନୋଟ ନେଇ ପ୍ରତିବଦଳରେ ୫ ଶହ ଟଙ୍କିଆ ନୋଟ ଦେବେ ତେବେ ଆପଣଙ୍କୁ ଦୁଇଗୁଣ ଟଙ୍କା ଦିଆଯିବ। କଳା ଧନକୁ ଧଳା କରିଦେଲେ ଦୁଇ ଗୁଣ ଟଙ୍କା ଫେରସ୍ତ ମିଳିବ। ଗୋଟିଏ ୫ ଶହ ଟଙ୍କିଆ ନୋଟ ଦେଲେ ୧୦ଟି ଶହେ ଟଙ୍କିଆ ନୋଟ ମିଳିବ। ଏଭଳି କଥା କହି ରାଜଧାନୀ ଭରତପୁର ଓ ନୟାପଲ୍ଲୀ ଥାନା ଅଞ୍ଚଳରେ ଜାଲ ବିଛାଇ ଗତ ଫେବୃଆରୀ ମାସରେ ଦୁଇ ଜଣଙ୍କୁ ଚୁନ ଲଗାଇଥିବା ୫ ଅଭିଯୁକ୍ତଙ୍କୁ ଗିରଫ କରିଛି କମିଶନରେଟ ପୋଲିସର୍ ସ୍ପେଶାଲ ସ୍କ୍ବାଡ। ଗିରଫ ଅଭିଯୁକ୍ତଙ୍କ ମଧ୍ୟରେ ଜଣେ ମହିଳା ମଧ୍ୟ ରହିଛନ୍ତି। ଏମାନେ ବ୍ୟାଗରେ ରଖିଥିବା ଟଙ୍କା ବିଡ଼ା ଉପରେ ଅସଲି ଟଙ୍କା ରଖି ବିଡ଼ା ଭିତରେ ପେପର କଟିଂ ପୁରାଇ ଚକମା ଦେଉଥିଲେ। ନୟାପଲ୍ଲୀ ଅଞ୍ଚଳର ଜଣଙ୍କ ଠାରୁ ଏଭଳି ମିଠା ମିଠା କଥା କହି ୬ ଲକ୍ଷ ଓ ଭରତପୁର ଥାନା ଅଞ୍ଚଳରୁ ୪ ଲକ୍ଷ ୩୦ ହଜାର ଠକି ନେଇଥିଲେ ଠକ।ସେମାନଙ୍କ ଠାରୁ ୧ ଲକ୍ଷ ଟଙ୍କା, ମୋବାଇଲ ଆଦି ଜବତ କରାଯାଇଛି।
