BJP MLA Arrested: ଦାଦାଗିରିର ଦି ଏଣ୍ଡ୍, ଗିରଫ ହେଲେ ବାରିପଦା ବିଧାୟକ
ବାରିପଦା : ବିଜେପି ବିଧାୟକ ପ୍ରକାଶ ସୋରୋନଙ୍କୁ ପୋଲିସ ଗିରଫ କରିଛି । ବିଧାୟକଙ୍କ ସମେତ ୪ ଜଣ ସହଯୋଗୀଙ୍କୁ ମଧ୍ୟ କୋର୍ଟ ଚାଲାଣ କରାଯାଇଛି । ଦଫା ୨୯୪, ୩୪୧, ୩୨୩, ୩୨୪, ୫୦୬ ଓ ୩୪ରେ ବିଧାୟକ ଓ ସେମାନଙ୍କ ସହଯୋଗୀ କୋର୍ଟ ଚାଲାଣ ହୋଇଛନ୍ତି । ଉଲ୍ଲେଖଯୋଗ୍ୟ ଯେ, ବାରିପଦା ଆଇଟିଡିଏ ନିର୍ବାହୀ ଯନ୍ତ୍ରୀ ଗଣପତି ଜେନାଙ୍କୁ ମାଡ଼ ମାରିବା ଘଟଣାରେ ବିଧାୟକ ପ୍ରକାଶ ସୋରେନ ଓ ତାଙ୍କ ସହଯୋଗୀ ପ୍ରଶାନ୍ତ ବେହେରା ଥାନାରେ ଅଟକ ରଖାଯାଇଥିଲା । ଜିଲ୍ଲା ସର୍କିଟ୍ ହାଉସରେ ନିର୍ବାହୀ ଯନ୍ତ୍ରୀ ଗଣପତି ଜେନାଙ୍କୁ ବିଧାୟକ ବିଭାଗୀୟ ବିଲ୍ ପେମେଣ୍ଟ ଏବଂ ନିଜ ସମର୍ଥକଙ୍କୁ ଠିକା କାମ ଦେବାକୁ ଧମକ ଦେବା ସହ ନିର୍ବାହୀ ଯନ୍ତ୍ରୀଙ୍କୁ ମାଡ଼ ମାରିଥିବା ଅଭିଯୋଗ ହୋଇଥିଲା ।
ଅଭିଯୋଗ ପରେ ଅତିରିକ୍ତ ଏସ୍ପିଙ୍କ ନେତୃତ୍ୱରେ ଘଟଣାର ତଦନ୍ତ କରିଥିଲେ । ଏହାପରେ ବିଧାୟକ ଓ ସମର୍ଥକଙ୍କୁ ଅଟକ ରଖାଯାଇଥିଲା । ସେପଟେ ବାରିପଦା ସଦର ବିଧାୟକ ପ୍ରକାଶ ସୋରେନ ଏବଂ ତାଙ୍କର ସହଯୋଗୀ ପ୍ରଶାନ୍ତ ବେହେରାଙ୍କୁ ଥାନାରେ ଅଟକ ରଖିବା ପ୍ରତିବାଦରେ ବିଜେପି ପକ୍ଷରୁ ଥାନା ସମ୍ମୁଖରେ ବିକ୍ଷୋଭ ପ୍ରଦର୍ଶନ ମଧ୍ୟ ହୋଇଥିଲା ।
