ନନ୍ଦିଘୋଷ ବ୍ୟୁରୋ: ପୁଣି ଖସିଲା ସୁନା ଦର । ଆଜି ରାଜଧାନୀ ଭୂବନେଶ୍ବରରେ ୨୨ କ୍ୟାରେଟ୍ ସୁନା ୧୦ ଗ୍ରାମ ପିଛା ଦର ରହିଛି ୧ ଲକ୍ଷ ୧୯ ହଜାର ୮୦୦ ଟଙ୍କା । ସେହିପରି ୨୪ କ୍ୟାରେଟ୍ ସୁନା ୧୦ ଗ୍ରାମ ପିଛା ଦର ହ୍ରାସ ପାଇ ହୋଇଛି ୧ ଲକ୍ଷ ୩୦ ହଜାର ୬୯୦ ଟଙ୍କା । ସେହିପରି ରୂପା ଦରରେ ବି ଅହେତୁକ ହ୍ରାସ ପାଇଛି ।
ଆଜି ବଜାରରେ ରୂପା କିଲୋ ପିଛା ରହିଛି ୧ ଲକ୍ଷ ୬୮ ହଜାର ଟଙ୍କା । ତେବେ ସୁନା ଓ ରୂପା ଦର ହ୍ରାସ ପାଇବା ପଛରେ କେତୋଟି କାରଣ ରହିଛି । ପ୍ରଥମ କାରଣ ହେଲା ବିଶ୍ବ ବଜାରରେ ଆମେରିକା ଡଲାର ମୂଲ୍ୟ ଦିନକୁ ଦିନ ଅଧିକ ହେବାରେ ଲାଗିଛି । ଯେହେତୁ ସୁନା କିଣିବା ପାଇଁ ଡଲାର ଦେବାକୁ ପଡ଼େ ସେଥିପାଇଁ ଡଲାର ଦର ବଢ଼ୁଥିବାରୁ ସୁନା କିଣିବାକୁ ଦେଶମାନେ ଆଗ୍ରହ ଦେଖାଉନାହାନ୍ତି । ଫଳରେ ସୁନାର ଚାହିଦା କମିବାରେ ଲାଗିଛି। ଅନ୍ୟପଟେ ସୁନାରେ ପୁଞ୍ଜି ନିବେଶ ମଧ୍ୟ କମିବାରେ ଲାଗିଛି । ଏହାର ମୂଳ କାରଣ ହେଲା ଆମେରିକା ଫେଡେରାଲ ରିଜର୍ଭ ସୁଧ ହାର ବୃଦ୍ଧି କରିଥିବାରୁ ସୁନାରେ ପୁଞ୍ଜି ନିବେଶ ଅପେକ୍ଷା ବ୍ୟାଙ୍କରେ ଟଙ୍କା ରଖିବାକୁ ପୁଞ୍ଜି ନିବେଶକାରୀ ଅଧିକ ପସନ୍ଦ କରିଲେଣି । ଆମେରିକା ବଣ୍ଡ ମୂଲ୍ୟରେ ୫ ପ୍ରତିଶତ ବୃଦ୍ଧି ଘଟିବାରୁ ପୁଞ୍ଜି ନିବେଶକାରୀ ଆମେରିକା ବଣ୍ଡରେ ଅଧିକ ପୁଞ୍ଜି ଲଗାଣ କରୁଛନ୍ତି ।
ଲଗାତାର ସୁନା ଓ ରୂପା ଦର କମୁଥିବାରୁ ପୂର୍ବରୁ ସୁନାରେ ପୁଞ୍ଜି ନିବେଶ କରିଥିବା ଲୋକମାନେ ଅଧିକରୁ ଅଧିକ ସୁନା ଓ ରୁପା ବଜାରରେ ବିକ୍ରି କରିବା ଆରମ୍ଭ କରିଛନ୍ତି । ଏଥିଲାଗି ବଜାରରେ ମଧ୍ୟ ସୁନା ଓ ରୂପା ଅଧିକ ପରିମାଣରେ ଉପଲବ୍ଧ ହେବାରେ ଲାଗିଛି । ସେହିପରି ଇଭି ଶିଳ୍ପ ପାଇଁ ରୂପାର ଯେଭଳି ଚାହିଦା ଆଗରୁ ଥିଲା ତାହା କମିବାରେ ଲାଗିଛି । ଏହାର ଅର୍ଥ ରୂପା ପାଇଁ ଶିଳ୍ପ ଚାହିଦା ଆଗଭଳି ଆଉ ନାହିଁ । ଏସବୁ କାରଣ ଯୋଗୁଁ ସୁନା ଓ ରୂପା ଦର କମିବାରେ ଲାଗିଛି । ବଜାର ବିଶେଷଜ୍ଞଙ୍କ ଆକଳନ ଆଗକୁ ୨୨ କ୍ୟାରେଟ୍ ସୁନା ଦର ଆଉ କିଛି ଦିନ ପରେ ୧୦ ଗ୍ରାମ ପିଛା ୧ ଲକ୍ଷ ୧୫ ହଜାର ଟଙ୍କାକୁ କମିପାରେ ।

