ନନ୍ଦିଘୋଷ ବ୍ୟୁରୋ: ଲଣ୍ଡନରେ ଭାରତୀୟ ପତାକାକୁ ଚିରିଲେ ଖଲିସ୍ତାନୀ ସମର୍ଥକ । କେବଳ ଏତିକି ନୁହେଁ ବୈଦେଶିକ ମନ୍ତ୍ରୀ ଏସ. ଜୟଶଙ୍କରଙ୍କ ଗସ୍ତ ଭଣ୍ଡୁର ଲାଗି ବି କରିଛନ୍ତି ଉଦ୍ୟମ । ଲଣ୍ଡନଗସ୍ତରେ ଥିବା ଜୟଶଙ୍କର ଉଚ୍ଚସ୍ତରୀୟ ଆଲୋଚନା ସାରି ଚେଟମ ହାଉସରୁ ବାହାରିବା ମାତ୍ରେ ଖଲିସ୍ତାନୀ ସମର୍ଥକ ନାରାବାଜି କରିବା ସହ ତାଙ୍କୁ ବିରୋଧ କରିଥିଲେ । ଭାରତୀୟ ପତାକାକୁ ସେମାନେ ଅସମ୍ମାନ ପ୍ରଦର୍ଶନ କରିବା ସହ ଚିରିଦେଇଥିଲେ । ଏହା ସହ ଜଣେ ବ୍ୟକ୍ତି ଜୟଶଙ୍କରଙ୍କ କାର୍ ଆଡକୁ ମାଡିଆସିଥିଲା । ତେବେ ସେଠାରେ ଉପସ୍ଥିତ ଥିବା ପୋଲିସ ତାକୁ ଅଟକ ରଖିଛି । ଚେଟମ ହାଉସରେ ଆଲୋଚନା ଚାଲିଥିବାବେଳେ ବି ଆନ୍ଦୋଳନରତ ଖଲିସ୍ତାନୀ ସମର୍ଥକମାନେ ବି ଖଲିସ୍ତାନ ସପକ୍ଷବାଦୀ ନାରାବାଜି କରିବା ଦେଖାଯାଇଥିଲା । ମାର୍ଚ୍ଚ ୪ରୁ ମାର୍ଚ୍ଚ ୯ ଯାଏ ବ୍ରିଟେନ ଗସ୍ତରେ ଅଛନ୍ତି ଜୟଶଙ୍କର । ଜୟଶଙ୍କର ଓ ବ୍ରିଟେନ ବୈଦେଶିକ ମନ୍ତ୍ରୀ ଡାଭିଡ ଲାମିଙ୍କ ମଧ୍ୟରେ ବିଭିନ୍ନ ରାଜନୈତିକ ସହଯୋଗ, କୌଶଳଗତ ସମନ୍ବୟ, ଦ୍ବିପାକ୍ଷିକ ପ୍ରସଙ୍ଗ ଉପରେ ଆଲୋଚନା ହୋଇଥିଲା । ଏହା ସହ ବାଣିଜ୍ୟ, ଶିକ୍ଷା, ପ୍ରଯୁକ୍ତି ଓ ବୈଷୟିକ ସହଯୋଗ ସମ୍ପର୍କରେ ବି ଦୁଇ ନେତା ଆଲୋଚନା କରିଥିଲେ । ଦୁଇ ନେତାଙ୍କ ମଧ୍ଯରେ ପାକିସ୍ତାନ ପ୍ରସଙ୍ଗରେ ବି ଆଲୋଚନା ହୋଇଥିବା ସୂଚନା ମିଳିଛି ।
କେଉଁ ରାଜନେତାଙ୍କ ନିର୍ଦ୍ଦେଶରେ ଦୁବାଇରୁ ଆଣୁଥିଲେ ସୁନା ? ସାମ୍ନାକୁ ଆସିଲା ସତ..
ନନ୍ଦିଘୋଷ ବ୍ୟୁରୋ: ଏୟାରପୋର୍ଟରୁ ସୁନା ଧରାପଡ଼ିବା ଘଟଣାରେ ଛନ୍ଦି ହୋଇଥିବା କନ୍ନଡ଼ ଅଭିନେତ୍ରୀ ରାନ୍ୟା ରାଓଙ୍କୁ ନେଇ ଏବେ ସବୁଠି ଚର୍ଚ୍ଚ । ତେବେ ସେ କାହିଁକି ଏମିତି କରୁଥିଲେ ? ତାଙ୍କୁ ସୁନା ଆଣିବା ପାଇଁ କିଏ କହୁଥିଲା ? ଏମିତି ଅନେକ ପ୍ରଶ୍ନ ଉଠୁଥିବାବେଳେ ତାଙ୍କ ପିତା ଡିଜିପି ରାମଚନ୍ଦ୍ର କହିଛନ୍ତି କି, ମୋ କ୍ୟାରିୟରରେ କୌଣସି ଦାଗ ଲାଗିନାହିଁ । ମାତ୍ର ମୁଁ ଯେତେବେଳେ ଏହି ଖବର ଶୁଣିଥିଲି ମୋତେ ବହୁତ ଖରାପ ଲାଗିଥିଲା । ତେବେ ସେ ପାରିବାରିକ ବିବାଦ ପାଇଁ ନିଜ ସ୍ବାମୀଙ୍କ ଠାରୁ ଅଲଗା ରହୁଛନ୍ତି । ଏପରିକି କାମ କରୁଥିବା କଥା ମୋତେ ପୂର୍ବରୁ ଜଣାନଥିଲା । ସେପଟେ ପ୍ରାଥମିକ ତଦନ୍ତରୁ ଜଣା ପଡ଼ିଛି କି, ଜଣେ ରିଷ୍ଠ ରାଜନେତାଙ୍କ ନିର୍ଦ୍ଦେଶରେ ସେ ଏମିତି କରୁଥିଲେ । ଯେଉଁଥି ପାଇଁ ଏକ ବଡ଼ ସୁନା ଦୋକାନରୁ ବିଭିନ୍ନ ଡିଜାଇନର ଗହଣା ମଧ୍ୟ ମିଳିଛି ।
ଶେଷ ଖବର ସୁଦ୍ଧା ୧୭ କୋଟିରୁ ଅଧିକ ଟଙ୍କା ଏବଂ ଗହଣା ଜବତ ହୋଇ ସାରିଛି । ସେ ନିଜ ଶରୀରରେ ୧୪ କେଜିରୁ ଅଧିକ ସୁନା ଗହଣା ଆଣୁଥିବାବେଳେ ଧରା ପଡ଼ିଥିଲେ । ଏହାପରେ ତଦନ୍ତ ଜୋରଦାର ହୋଇଥିଲା । ପ୍ରାୟତଃ ସେ ଗୋଟିଏ ଡ୍ରେସ ପିନ୍ଦି ଯାଉଥିଲେ । ଜ୍ୟାକେଟ ଏବଂ ବେଲ୍ଟରେ ସୁନା ନେଇ ଆସୁଥିବା ଜଣାପଡ଼ିଛି । ବାରମ୍ବାର ଦୁବାଇ ଯାଉଥିବାବେଳେ ପୋଲିସ ତାଙ୍କ ଉପରେ ନଜର ରଖିଥିଲା । ଆଉ ଶେଷରେ ବହୁ ସତ ଏବେ ସାମ୍ନାକୁ ଆସିଛି । ତେବେ କଷ୍ଟମ ଆକ୍ଟ ୧୯୬୨ ଅନୁଯାୟୀ ତାଙ୍କ ନାମରେ ମାମଲା ରୁଜୁ ହେବ । ଯାହାଦ୍ବାରା ସ୍ବାମୀ, ପରିବାର ଲୋକଙ୍କ ସହ ତାଙ୍କ ସହ ଜଡିତ ସମସ୍ତ ଲୋକଙ୍କୁ ମଧ୍ୟ ପଚରା ଉଚରା କରାଯିବ ବୋଲି କୁହାଯାଉଛି ।
ଆମ୍ବ ଟାକୁଆ ଟ୍ରାଜେଡି : ପୁଣି ୫ ମହିଳା ଗୁରୁତର
ନନ୍ଦିଘୋଷ ବ୍ୟୁରୋ: କନ୍ଧମାଳ ଜିଲ୍ଲା ଦାରିଙ୍ଗବାଡି ବ୍ଲକ ଗଦାପୁର ପଞ୍ଚାୟତ ନିକଟସ୍ଥ ମାଣ୍ଡିପଙ୍କା ଗ୍ରାମରେ ପୁଣି ଅସୁସ୍ଥ ମହିଳା। ଆମ୍ବ ଟାକୁଆ ଟ୍ରାଜେଡି ଘଟଣାରେ ୩ ଜଣ ମହିଳା ମୃତ୍ୟୁ ହୋଇଥିବା ବେଳେ ୫ ଜଣ ମହିଳା ଗୁରୁତର ହୋଇଥିଲେ। ସେହି ୫ଜଣ ଗୁରୁତର ମହିଳାଙ୍କୁ ବ୍ରହ୍ମପୁର ମେଡିକାଲ ଏବଂ କଟକ ମେଡିକାଲରେ ଚିକିତ୍ସା କରି ଘରକୁ ଫେରାଇ ଆଣିଥିଲେ। ପୁଣି ୪ ମାସ ପରେ ଆଜି ୫ ଜଣ ମହିଳା ଗୁରୁତର ହୋଇ ପଡିଛନ୍ତି। ଚିକିତ୍ସା ପାଇଁ ଗତକାଲି ବ୍ଲକ ପ୍ରଶାସନକୁ ଗୁହାରି ଜଣାଇ ଥିଲେ ମଧ୍ୟ ଏ ପର୍ଯ୍ୟନ୍ତ କୌଣସି ପ୍ରଶାସନିକ ଅଧିକାରୀ ପହଞ୍ଚି ନଥିବା ଜଣାପଡିଛି।
କୋଲକାତା ଟ୍ରିପଲ ମର୍ଡରର ଲୋମହର୍ଷକ ଖୁଲାସା: ହତ୍ୟା ନୁହେଁ ଆତ୍ମହତ୍ୟା ପାଇଁ ହୋଇଥିଲା ବୁଝାମଣା
ନନ୍ଦିଘୋଷ ବ୍ୟୁରୋ: କୋଲକାତା ଟ୍ରିପଲ ମର୍ଡରର ଲୋମହର୍ଷକ ଖୁଲାସା । ସମୂହ ଆତ୍ମହତ୍ୟା ଲାଗି ହୋଇଥିଲା ବୁଝାମଣା । ୧୬ କୋଟି ଟଙ୍କାର ଋଣ ଭାର ଯୋଗୁ ଗୋଟିଏ ପରିବାରର ଭୟଙ୍କର ନିଷ୍ପତ୍ତି ଏବେ ଚର୍ଚ୍ଚାର ବିଷୟ ପାଲଟିଛି । ଗତ ଫେବୃଆରୀ ୧୯ରେ କୋଲକାତାର ଟାଙ୍ଗରା ଇଲାକାରେ ଏକ ଘରୁ ତିନି ଜଣଙ୍କ ମୃତଦେହ ଠାବ ହେବାକୁ ନେଇ ବଢିଥିଲା ସସପେନ୍ସ । ପରେ ପରେ ଦୁଇ ଭାଇ ଓ ସେମାନଙ୍କ ମଧ୍ୟରୁ ଜଣଙ୍କର ସନ୍ତାନ କାରରେ ଯାଉଥିବାବେଳେ ଏକ ପିଲାରରେ କାରକୁ ଧକ୍କା କରାଇବା ଘଟଣା ଅଧିକ ସନ୍ଦେହ ସୃଷ୍ଟି କରିଥିଲା । ତେବେ ଜେରା ସମୟରେ ସେମାନେ ଆତ୍ମହତ୍ୟା କରିବା ଲାଗି ଦୁର୍ଘଟଣା ଘଟାଇଥିଲେ ବୋଲି କହିବା ପରେ ସମସ୍ତ ଘଟଣା ରହସ୍ୟମୟ ହୋଇଉଠିଥିଲା । ଜେରାବେଳେ ଜଣେ ଭାଇ ପ୍ରସୂନ ଦେ ସ୍ବୀକାର କରିଥିଲେ ଯେ ସେ ହିଁ ପତ୍ନୀ ରୋମି ଦେ, ଝିଅ ଓ ଭାଇବୋହୂ ସୁଦେଷ୍ଣାଙ୍କୁ ହତ୍ୟା କରିଥିଲେ ।
ତେବେ ଏହି ହତ୍ୟା ପଛରେ ୧୬ କୋଟି ଟଙ୍କାର ଋଣ ଭାର ପ୍ରକୃତ କାରଣ ଥିଲା । ଦୁଇଭାଇ ପ୍ରସୂନ ଓ ପ୍ରଣୟ ବିବାହିତ । ପ୍ରଣୟଙ୍କ ଗୋଟିଏ ପୁଅ ଓ ପ୍ରସୂନଙ୍କ ଗୋଟିଏ ଝିଅ ଥିଲେ । ତେବେ ବିପୁଳ ଋଣଭାରକୁ ନେଇ ପରିବାରରେ କରାଯାଇଥିଲା ଏକ ସୁଇସାଇଡ ବୁଝାମଣା । ପ୍ରସୂନର ବୟାନ ମୁତାବକ ଆତ୍ମହତ୍ୟା ଲାଗି ତାଙ୍କ ପତ୍ନୀ ରୋମି, ଭାଇବୋହୂ ଓ ଭାଇ ପ୍ରଣୟଙ୍କ ମଧ୍ୟରେ ନିଷ୍ପତ୍ତି ହୋଇଥିଲା । ଗତ ମାସ ୧୭ ତାରିଖରେ ପାଏସରେ ଅଧିକ ନିଦବଟିକା ମିଶାଇ ଖାଇଥିଲେ । ମାତ୍ର ପରଦିନ ସମସ୍ତେ ବଞ୍ଚିଥିବା ଦେଖାଯାଇଥିଲା । ଫଳରେ ସେମାନେ ପ୍ଲାନ-ବି ଆପଣାଇଥିଲେ । ପିଲାମାନେ କିନ୍ତୁ ଏହା ଜାଣିପାରି ନଥିଲେ । ପରଦିନ ନିଜ ଝିଅକୁ ତକିଆରେ ଚାପି ହତ୍ୟା କରିଥିଲା ପ୍ରସୂନ ।
ଏଥିରେ ସହାୟତା କରିଥିଲେ ପତ୍ନୀ । ପରେ ପତ୍ନୀ ରୋମି ନିଜ ହାତର ଧମନୀ କାଟି ଦେଇଥିଲେ । ମାତ୍ର ମୃତ୍ୟୁ ନହେବାରୁ ପ୍ରସୂନ ରୋମିଙ୍କ ଗଳା କାଟିଦେଇଥିଲେ । ପରେ ଭାଇବୋହୂଙ୍କୁ ବି ସେ ହତ୍ୟା କରିଥିଲେ । ଗଣହତ୍ୟା ପରେ ପ୍ରସୂନ ତାଙ୍କ ଭାଇ ଓ ପୁତୁରାଙ୍କୁ ନେଇ କାରରେ ବାହାରିଯାଇଥିଲେ । ପରେ ସେ ଜାଣିଶୁଣି ଏକ ପିଲାରରେ କାରକୁ ପିଟିଦେଇଥିଲେ । ଉଦ୍ଦେଶ୍ୟ ଥିଲା ଆତ୍ମହତ୍ୟା । ମାତ୍ର ସେମାନେ ରକ୍ଷା ପାଇଯାଇଥିଲେ । ସେମାନଙ୍କୁ ନୀଳ ରତନ ସର୍କାର ମେଡିକାଲ କଲେଜରେ ଚିକିତ୍ସା କରାଯାଉଛି । ଏସବୁ ପଛରେ ଥିବା ୧୬ କୋଟି ଟଙ୍କାର ଋଣ ବୋଝ । ସେମାନେ ମାସକୁ ପ୍ରାୟ ୪୭ ଲକ୍ଷ ଟଙ୍କା ଇଏମଆଇ ଦେଉଥିଲେ । ତିନିଟି କାରରୁ ୨ଟି କାର ଉପରେ ବି ଋଣ ଥିଲା ।
ପାକିସ୍ତାନ ଗଣମାଧ୍ୟମର ପ୍ରଶ୍ନ, କଡ଼ା ଜବାବ ଦେଲେ ରାଜୀବ ଶୁକ୍ଲା
ନନ୍ଦିଘୋଷ ବ୍ୟୁରୋ: ଚାମ୍ପିୟନ୍ସ ଟ୍ରଫି ୨୦୨୫ ପାକିସ୍ତାନ ଆୟୋଜନ କରିଥିବାବେଳ ପ୍ରଥମେ ଦଳ ଫାଇନାଲରୁ ବାହାର ହୋଇଥିଲା ଆଉ ଏବେ ଫାଇନାଲ ପାକିସ୍ତାନରୁ ବାହାର ହୋଇଛି । କାରଣ ଭାରତ ଫାଇନାଲରେ ପହଞ୍ଚିଥିବାବେଳେ ଫାଇନାଲ ଦୁବାଇରେ ହିଁ ହେବ । ତେବେ ଦ୍ବିତୀୟ ସେମିଫାଇନାଲ ନ୍ୟୁଜିଲଶଣ୍ଡ ବିଜୟୀ ହୋଇଛି । ତେବେ ଏହି ମ୍ୟାଚ ସମୟରେ ପାକିସ୍ତାନରେ ଉପସ୍ଥିତ ରହିଥିଲେ ବିସିସିଆଇ ଉପାଧ୍ୟକ୍ଷ ରାଜୀବ ଶୁକ୍ଲା । ତେବେ ପାକିସ୍ତାନୀ ଗଣମାଧ୍ୟମ ପକ୍ଷରୁ ତାଙ୍କୁ ବିଭିନ୍ନ ପ୍ରଶ୍ନମାନ ପଚରା ଯାଇଥିଲା ।
ପାକିସ୍ତାନୀ ଗଣମାଧ୍ୟମ ପକ୍ଷରୁ ରାଜୀବ ଶୁକ୍ଲାଙ୍କୁ ଏକ କଡ଼ା ପ୍ରଶ୍ନ ପଚରା ଯାଇଥିଲା । କୁହାଯାଇଥିଲା କି, ଭାରତ କେବଳ ଗୋଟିଏ ସ୍ଥାନରେ ମ୍ୟାଚ ଖେଳୁଛି । ମାତ୍ର ଅନ୍ୟ ଦଳମାନେ ଟ୍ରାଭେଲ କରିବାକୁ ପଡ଼ୁଛି । ଏହା କଣ ଅନ୍ୟାୟ ନୁହେଁ କି ? ଯାହାର ଉତ୍ତରରେ କଡ଼ା ଜବାବା ଦେଇଥିଲେ ରାଜୀବ ଶୁକ୍ଲା । ସେ କହିଥିଲେ କି, ଟୁର୍ଣ୍ଣାମେଣ୍ଟ ଆରମ୍ଭରୁ ଆଇସିସି କହିଥିଲା କି, ଭାରତ ସମସ୍ତ ମ୍ୟାଚ ଦୁବାଇରେ ଖେଳିବ । ବାକି ମ୍ୟାଚ ପାକିସ୍ତାନରେ ହେବ । ଏବେ ଏଥିରେ ନ୍ୟାୟ ଅନ୍ୟାୟ କଥା ଉଠୁଛି କେଉଁଠି । ଭାରତ ଅଲଗା ଅଲଗା ପିଚରେ ଖେଳୁଛି । ଭାରତ ନିଜ ଦମରେ ଖେଳୁଛି । ସେ ଯେମିତି ପରିସ୍ଥିତି ହେଲେ ମଧ୍ୟ ଦଳ ସବୁବଳେ ଭଲ ପ୍ରଦର୍ଶନ କରୁଛି ।
ସେପଟେ ଗୌତମ ଗମ୍ଭୀର ମଧ୍ୟ ଦୁବାଇରେ ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ସମାନ ପ୍ରଶ୍ନର ସାମ୍ନା କରିଥିଲେ । ଗମ୍ଭୀର କହିଥିଲେ ଯେ ଯେଉଁମାନେ ଟିମ୍ ଇଣ୍ଡିଆର ସମସ୍ତ ମ୍ୟାଚ୍ ଦୁବାଇରେ ଖେଳୁଥିବା ନେଇ ଅଭିଯୋଗ କରୁଛନ୍ତି, ଯାହା ଏହାକୁ ଏକ ସୁବିଧା ଦେଉଛି, ସେମାନଙ୍କୁ ଟିକେ ବଡ଼ ହେବା ଆବଶ୍ୟକ। ସେ କହିଥିଲେ ଯେ ଆମେ ଦୁବାଇରେ ଖେଳୁଛୁ କିନ୍ତୁ ଏହି ପଡ଼ିଆ ଆମ ପାଇଁ ଅନ୍ୟ ଦଳଗୁଡ଼ିକ ପରି ନିରପେକ୍ଷ। ଆମେ ଏଠାରେ ଅଭ୍ୟାସ ମଧ୍ୟ କରୁନାହୁଁ। ଏଥିପାଇଁ ଆମେ ICC କ୍ରିକେଟ୍ ଏକାଡେମୀକୁ ମଧ୍ୟ ଯାଉ, ଯେଉଁଠାର ପରିସ୍ଥିତି ଦୁବାଇର ଅନ୍ତର୍ଜାତୀୟ କ୍ରିକେଟ୍ ଷ୍ଟାଡିୟମଠାରୁ ସମ୍ପୂର୍ଣ୍ଣ ଭିନ୍ନ।
ଗୋଟିଏ ଡ୍ରେସକୁ ୧୫ଥର ପିନ୍ଧି ଯାଇଥିଲେ ଦୁବାଇ.. ଜାଣନ୍ତୁ କେମିତି ଫସିଲେ ଅଭିନେତ୍ରୀ ?
ନନ୍ଦିଘୋଷ ବ୍ୟୁରୋ: କନ୍ନଡ଼ ଅଭିନେତ୍ରୀ ରାନ୍ୟା ରାଓଙ୍କ ନିକଟରୁ ୧୪ କେଜିରୁ ଅଧିକ ସୁନା ଧରା ପଡ଼ିବା ପରେ ଏବେ ସେ ବେଶ ଚର୍ଚ୍ଚାରେ ରହିଛନ୍ତି । କିଏ ତାଙ୍କୁ ସୁରକ୍ଷା ଦେଉଥିଲା ଏବଂ କାହିଁକି ଏମିତି କରୁଥିଲେ ଏହାକୁ ନେଇ ଅଧିକ ତଦନ୍ତ ଚାଲିଛି । ସେପଟେ ତାଙ୍କ ବାପା ଜଣେ ବରିଷ୍ଠ ପୋଲିସ ଅଧିକାରୀ ହୋଇଥିବାବେଳେ ଏହାକୁ ନେଇ ମଧ୍ୟ ଅଧିକ ପ୍ରଶ୍ନବାଚୀ ସୃଷ୍ଟି ହୋଇଛି । ତାଙ୍କ ବାପା ରାମଚନ୍ଦ୍ର ରାଓ ବର୍ତ୍ତମାନ କର୍ଣ୍ଣାଟକ ରାଜ୍ୟ ପୋଲିସ ହାଉସିଂ ଏବଂ ଭିତ୍ତିଭୂମି ବିକାଶ ନିଗମ ଲିମିଟେଡର ଅଧ୍ୟକ୍ଷ ଏବଂ ପରିଚାଳନା ନିର୍ଦ୍ଦେଶକ ପଦବୀରେ ଅଛନ୍ତି। ତେବେ ଅଭିନେତ୍ରୀ ଝିଅ ୧୫ ଦିନରେ ୪ଥର ଦୁବାଇ ଯାତ୍ରା କରିଥିଲେ । ଯାହାକୁ ନେଇ ସନ୍ଦେହ ବଢ଼ିଥିଲା । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି କି, ପ୍ରତିଥର ସେ ଗୋଟିଏ ଡ୍ରେସ ପିନ୍ଧି ଯାତ୍ରା କରୁଥିଲେ । ଯେଉଁଥିରୁ ସନ୍ଦେହ ବଢ଼ିଥିଲା । ଏହାପରେ ଘରେ ଆସି ଯାଞ୍ଚ କରାଯିବା ପରେ ୧୭ କେଜିରୁ ଅଧିକ ସୁନା ସହ ଅନ୍ୟ ମୂଲ୍ୟବାନ ଗହଣା ମିଳିଥିଲା । କୋଟି କୋଟି ଟଙ୍କାର ଗହଣା ଚାଲାଣ ମାମଲାରେ ତାଙ୍କୁ ଗିରଫ କରାଯାଇଥିବାବେଳେ ପୋଲିସ ଆହୁରି ଅଧିକ ତଦନ୍ତ କରୁଛି । ସେପଟେ ତଦନ୍ତରୁ ଏକ ବଡ଼ ତଥ୍ୟ ସାମନାକୁ ଆସିଛି । କେଜିଏ ସୁନା ପିଛା ସେ ଲକ୍ଷେ ଟଙ୍କା ପାଉଥିଲେ । ଏମିତିକି ଗୋଟିଏ ଥର ଦୁବାଇ ଯାଇ ଆସିଲେ ସେ ୧୩ରୁ ୧୪ ଲକ୍ଷ ଟଙ୍କା ପାଉଥିଲେ । ଏମିତି ଗତବର୍ଷ ବହୁବାର ଯାଇଥିବା ଜଣାପଡ଼ିଛି । ପ୍ରତିଥର କିନ୍ତୁ ଗୋଟିଏ ଜ୍ୟାକେଟ ଏବଂ ବେଲ୍ଟ ପିନ୍ଧି ଯାଉଥିଲେ । ଯାହା ସାହାର୍ଯ୍ୟରେ ସୁନା ଚାଲାଣ କରୁଥିଲେ ।
ଭିଜିଲାନ୍ସ ଜାଲରେ STA ଡେପୁଟି କମିଶନର, ଏକକାଳୀନ ୯ଟି ସ୍ଥାନରେ ରେଡ୍
ନନ୍ଦିଘୋଷ ବ୍ୟୁରୋ: ଭିଜିଲାନ୍ସ ଜାଲରେ STA ଡେପୁଟି କମିଶନର। ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ରେଡ୍। ଏକକାଳୀନ ୯ଟି ସ୍ଥାନରେ ରେଡ କରୁଛି ଭିଜିଲାନ୍ସ। ଭୁବନେଶ୍ଵର, ଖୋର୍ଦ୍ଧା, ପୁରୀ, ନୟାଗଡ଼ ଓ କଟକରେ ରେଡ୍ ଚାଲିଛି। STA ଡେପୁଟି କମିଶନର ପ୍ରଦୀପ କୁମାର ମହାନ୍ତିଙ୍କ ଘରେ ରେଡ୍ କରୁଛି ଭିଜିଲାନ୍ସ।
୨ ଅତିରିକ୍ତ ଏସପି, ୧୩ ଡିଏସପି, ୧୨ ଇନ୍ସପେକ୍ଟର, ୨୫ ଏଏସଆଇ ରେଡରେ ସାମିଲ ହୋଇଛନ୍ତି। ଅନ୍ୟ ସହକାରୀ ଷ୍ଟାଫ୍ ମଧ୍ୟ ରେଡରେ ସାମିଲ ହୋଇଛନ୍ତି। ଚନ୍ଦ୍ରଶେଖରପୁର ମୈତ୍ରୀ ବିହାର ବାସଭବନରେ ରେଡ୍ ଚାଲିଛି। ରେଡରୁ ଅନେକ ସମ୍ପତ୍ତି ଠାବ ହୋଇଛି। ଭୁବନେଶ୍ଵର ରଘୁନାଥପୁର ଏକ ଫ୍ଲାଟ୍, ନୟାଗଡ଼ ରଣପୁର କୁଳପଲ୍ଲାରେ ପାର୍ମ ହାଉସ, ଭୁବନେଶ୍ଵର ଗୋବିନ୍ଦପ୍ରସାଦରେ ୫ ମହଲା କୋଠା, ଖୋର୍ଦ୍ଧା ଟାଙ୍ଗୀ ପୈତୃକ ବାସଭବନରେ ରେଡ କରୁଛି ଭିଜିଲାନ୍ସ। ପୁରୀରେ ଥିବା ସମ୍ପର୍କୀୟଙ୍କ ଘରେ ରେଡ୍ ଚାଲିଛି। ସମ୍ପର୍କୀୟଙ୍କ ନାଁରେ ଭୁବନେଶ୍ଵର ମଳିପଡ଼ାରେ ଏକ ପେଟ୍ରୋଲ ପମ୍ପ ରହିଛି। ପୁରୀ ବାଲୁଖଣ୍ଡରେ ନିର୍ମାଣାଧୀନ କୋଠା ଥିବା ଜଣାପଡିଛି। କଟକ ସ୍ଥିତ STA ଅଫିସରେ ମଧ୍ୟ ଚାଲିଛି ରେଡ୍।
ନବ ନିର୍ମାଣ କୃଷକ ସଂଗଠନ ପକ୍ଷରୁ ମୁଖ୍ୟମନ୍ତ୍ରୀଙ୍କ ବାସଭବନକୁ ଧସେଇ ପଶିବାକୁ ଉଦ୍ୟମ, ଉଠାଇ ନେଲା ପୋଲିସ
ନନ୍ଦିଘୋଷ ବ୍ୟୁରୋ: ମୁଖ୍ୟମନ୍ତ୍ରୀଙ୍କ ବାସଭବନ ଘେରାଉ। ମୁଖ୍ୟମନ୍ତ୍ରୀଙ୍କ ବାସଭବନକୁ ଧସେଇ ପଶିବାକୁ ଉଦ୍ୟମ। ନବ ନିର୍ମାଣ କୃଷକ ସଂଗଠନ ସଦସ୍ୟ ଧସେଇ ପଶିବାକୁ କଲେ ଉଦ୍ୟମ। ଲୋୟର ପିଏମଜି ସରକାରୀ ବାସଭବନକୁ ଧସେଇ ପଶିବା ପାଇଁ ଉଦ୍ୟମ। ପୋଲିସ ସହ ଧସ୍ତାଧସ୍ତି। ୨୦ ରୁ ଉର୍ଦ୍ଧ୍ବ ନବନିର୍ମାଣ କୃଷକ ସଙ୍ଗଠନର କର୍ମୀଙ୍କ ପ୍ରତିବାଦ। ରାଜ୍ୟରେ ଚାଲିଥିବା କଟନି ଛଟନି ପ୍ରତିବାଦରେ ବିକ୍ଷୋଭ ପ୍ରଦର୍ଶନ କରୁଛନ୍ତି ସଦସ୍ୟ। ଯୁବନେତା ମନଓ୍ବର ଅଲ୍ଲୀ, ଶେଷଦେବ ନନ୍ଦଙ୍କ ସମେତ ସମସ୍ତ ବିକ୍ଷୋଭକାରୀଙ୍କୁ ଉଠାଇ ନେଲା ପୋଲିସ। ମିଲରଙ୍କ ମନମାନି, ଧାନର FAQ ମାନ ସଠିକ ଥିଲେ ମଧ୍ୟ କୁଇଣ୍ଟାଲ ପ୍ରତି ୫ ରୁ ୧୦ କିଲୋ ପର୍ଯ୍ୟନ୍ତ କଟନି ଛଟନି କରାଯାଉଥିବା ଅଭିଯୋଗ। ଏହାର ପ୍ରତିବାଦରେ ନବନିର୍ମାଣ କୃଷକ ସଙ୍ଗଠନ ର ଆବାହକ ଅକ୍ଷୟ କୁମାର ଦୀର୍ଘ ୨୦ ଦିନ ହେବ ଅନଶନରେ ବସିଛନ୍ତି। ପୂର୍ବରୁ ଏହି ସମସ୍ୟା ର ସମାଧାନ ପାଇଁ ପୂର୍ବରୁ ମୁଖ୍ୟମନ୍ତ୍ରୀ ଉପମୁଖ୍ୟମନ୍ତ୍ରୀ ସଂଗଠନ କୁ ଡାକି ଆଲୋଚନା କରିଥିଲେ। କଟନି ଛଟନି ହେବ ନାହିଁ ବୋଲି ପ୍ରତିଶ୍ରୁତି ଦେଇଥିଲେ। କିନ୍ତୁ ଏପର୍ଯ୍ୟନ୍ତ କୌଣସି ପ୍ରତିଶୃତି ପାଳନ କଲେନାହିଁ ସରକାର।
ଟଙ୍କା ପାଇଁ ମାନବିକତା ଭୁଲିଗଲା କି ହସ୍ପିଟାଲ ? ICUରୁ ଦୌଡ଼ି ଆସି ରୋଗୀ ଯାହା କହିଲେ, ମୋ ହାତ-ଗୋଡ଼ ବାନ୍ଧି…
ନନ୍ଦିଘୋଷ ବ୍ୟୁରୋ: କୁହାଯାଏ କି, ଡାକ୍ତର ହେଉଛନ୍ତି କଳିଯୁଗର ଚଳନ୍ତି ଠାକୁର । କିନ୍ତୁ ମେଡିକାଲରେ ରୋଗୀଙ୍କୁ ଜବରଦସ୍ତ ବାନ୍ଧି ସ୍ତ୍ରୀଙ୍କୁ କହିଥିଲେ କି ତୁମ ସ୍ବାମୀ କୋମାକୁ ଚାଲି ଯାଇଛନ୍ତି । ଶ୍ରୀଘ୍ର ଟଙ୍କା ଆଣନ୍ତୁ । ସେ କଥାବାର୍ତ୍ତା କିମ୍ବା ଚେତା ମଧ୍ୟ ଫେରି ପାରୁନାହାନ୍ତି । ଯେଉଁ କାରଣରୁ ସ୍ତ୍ରୀ ଟଙ୍କା ଯୋଗାଡ଼ କରିବା ପାଇଁ ଚାଲିଯାଇଥିଲେ । ମାତ୍ର ସ୍ବାମୀଙ୍କୁ ମେଡିକାଲରେ ନିର୍ଯାତନା ଦେଇଥିବା ଅଭିଯୋଗ ଆଣିଛନ୍ତି । ଏମିତିକି ସେ ଏକ ଟାଓ୍ବାଲ ପିନ୍ଧି ବାହାରକୁ ପଳେଇ ଆସିଥିବା ଦେଖିବାକୁ ମିଳିଥିଲା । ଯାହାର ଭିଡିଓ ଏବେ ସୋସିଆଲ ମିଡିଆରେ ବେଶ ଭାଇରାଲ ହେଉଥିବାବେଳେ ପୋଲିସ ଏହି ଘଟଣାର ତଦନ୍ତ ଆରମ୍ଭ କରିଛି ।
ମଧ୍ୟପ୍ରଦେଶର ରତଲାମ ଅଞ୍ଚଳରୁ ଆସିଛି ଏଭଳି ଖବର । ଜିଡି ହସ୍ପିଟାଲ ରତଲାମ ନାମକ ଏକ ଘରୋଇ ହସ୍ପିଟାଲ ନାଁରେ ଆସିଛି ଏଭଳି ସଙ୍ଗୀନ ଅଭିଯୋଗ । ବଣ୍ଟି ନିନାମା ନାମକ ଜଣେ ରୋଗୀ ମେଡିକାଲରେ ଚିକିତ୍ସିତ ହେଉଥିବାବେଳେ ପତ୍ନୀ ଲକ୍ଷ୍ମୀ ଟଙ୍କା ଯୋଗାଡ଼ ପାଇଁ ପରିବାର ଲୋକଙ୍କ ପାଖକୁ ଯାଇଥିଲେ । କିନ୍ତୁ ସ୍ବାମୀ ଯେତେବେଳେ ସ୍ତ୍ରୀଙ୍କୁ ଦେଖିବାକୁ କହିଥିଲେ ମେଡିକାଲ କର୍ମଚାରୀ ତାଙ୍କୁ ବାନ୍ଧି ରଖିଥିଲେ । ପରେ ସ୍ତ୍ରୀ ଆସିବା ପରେ ଉଭୟ ମେଡିକାଲରୁ ସେମିତି ପରିସ୍ଥିତିରେ ଆସିଥିବାବେଳେ ମାର୍ଚ୍ଚ ୩ ତାରିଖରେ ଏମିତି ଘଟଣା ନଜରକୁ ଆସିଥିଲା ।
ତାଙ୍କୁ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା । ଆଉ ମେଡିକାଲରେ କୁହାଯାଇଥିଲା ଯେ ତୁମ ସ୍ବାମୀ କୋମାକୁ ଚାଲିଯାଇଛନ୍ତି । ତାଙ୍କର ହୋସ ନଥିବାବେଳେ ମେରୁଦଣ୍ଡ ମଧ୍ୟ ଭାଙ୍ଗି ଯାଇଛି । ଅପରେସନ ପାଇଁ ଲକ୍ଷେ ଟଙ୍କା ଆବଶ୍ୟକ । ଆଉ ଲକ୍ଷ୍ମୀ ଟଙ୍କା ପାଇଁ ସମ୍ପର୍କୀୟଙ୍କ ପାଖକୁ ଯାଇଥିଲେ । ମାତ୍ର ଆସି ଦେଖିବାବେଳେ ତାଙ୍କ ହାତ ଗୋଡ଼ ବାନ୍ଧି ଦିଆଯାଇଥିଲେ । ମୋତେ ପ୍ରଥମେ ଲାଗୁଥିଲା କି, ସେ କାଳେ ହଲଚଲ ହେଉଛନ୍ତି ଯେଉଁ କାରଣରୁ ସେମାନେ ଏମିତି କରିଛନ୍ତି । କିନ୍ତୁ ପରେ ଜାଣିବାକୁ ପାଇଥିଲି କି, ସ୍ବାମୀ କହିଥିଲେ କି, ମୋ ହୋସ ଆସିଥିଲା ମୁଁ ଭେଟିବା ପାଇଁ କହିବା ପରେ ମୋତେ ଏମିତି ନିର୍ଯାତନା ଦେଇଥିଲେ ।
ସେପଟେ ଏହି ଘଟଣା ସୋସିଆଲ ମିଡିଆରେ ବେଶ ଭାଇରାଲ ହେବା ପରେ ତଦନ୍ତ ଆରମ୍ଭ ହୋଇଛି । ୩ ଜଣିଆ କମିଟି ଗଠନ କରାଯାଇଥିବାବେଳେ ତଦନ୍ତ ଜୋରଦାର ହୋଇଛି । ହସ୍ପିଟାଲ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଛି । ହସ୍ପିଟାଲର ସିସିଟିଭି ଫୁଟେଜ୍ ସଂଗ୍ରହ କରାଯାଇଛି। ହସ୍ପିଟାଲ କର୍ମଚାରୀ ଏବଂ ପରିଚାଳନା ଲୋକଙ୍କ ବୟାନ ମଧ୍ୟ ରେକର୍ଡ କରାଯାଇଛି। ଯଦି ଏଥିରେ ହସ୍ପିଟାଲ ପରିଚାଳନା ଦୋଷୀ ସାବ୍ୟସ୍ତ ହୁଏ, ତେବେ ନର୍ସିଂ ହୋମ୍ ଆଇନ ଅନୁଯାୟୀ ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ମଧ୍ୟପ୍ରଦେଶ ଉପମୁଖ୍ୟମନ୍ତ୍ରୀ ଏବଂ ସ୍ୱାସ୍ଥ୍ୟମନ୍ତ୍ରୀ ରାଜେନ୍ଦ୍ର ଶୁକ୍ଳା ମଧ୍ୟ ଏହି ମାମଲାରେ ନିଜର ପ୍ରତିକ୍ରିୟା ଦେଇଛନ୍ତି। ସେ କହିଲେ, ଅଭିଯୋଗରେ କେତେ ସତ୍ୟତା ଅଛି ଏବଂ ହସ୍ପିଟାଲର କ’ଣ ଦୋଷ ଅଛି ତାହା ତଦନ୍ତ କରାଯାଉଛି। ଆଇନରେ କାର୍ଯ୍ୟାନୁଷ୍ଠାନର ବ୍ୟବସ୍ଥା ଅଛି କିନ୍ତୁ ସର୍ତ୍ତ ହେଉଛି ଯେ ଦୋଷୀ କିଏ ତାହା ନିର୍ଣ୍ଣୟ ହେବା ପରେ। ରିପୋର୍ଟ ଆସିବା ପର୍ଯ୍ୟନ୍ତ ଆମ ସମସ୍ତଙ୍କୁ ଅପେକ୍ଷା କରିବା ଉଚିତ।
ମଣିପୁରରେ ଅସ୍ତ୍ରଶସ୍ତ୍ର ଜମା କରିବାର ଆଜି ସରୁଛି ଡେଡଲାଇନ
ନନ୍ଦିଘୋଷ ବ୍ୟୁରୋ: ମଣିପୁରରେ ଅସ୍ତ୍ରଶସ୍ତ୍ର ଜମା କରିବାର ଆଜି ସରୁଛି ଡେଡଲାଇନ । ରାଜ୍ୟରେ ରାଷ୍ଟ୍ରପତି ଶାସନ ଜାରି ହେବା ପରେ ଅସ୍ତ୍ରଶସ୍ତ୍ର ଜମା ଦେବା ଲାଗି ନିର୍ଦ୍ଦେଶ ଦେଇଥିଲେ ରାଜ୍ୟପାଳ ଅଜୟ ଭାଲ୍ଲା। ରାଜ୍ୟରେ ଶାନ୍ତି ପ୍ରତିଷ୍ଠା ଲାଗି ବେଆଇନ ଅସ୍ତ୍ରଶସ୍ତ୍ର ଜମା ଦେବା ଉପରେ ଗୁରୁତ୍ବ ଦେଇଥିଲେ ରାଜ୍ୟପାଳ। ଏହା ଯୋଗୁ ଉଭୟ ଉପତ୍ୟକା ଓ ପାର୍ବତ୍ଯାଞ୍ଚଳରେ ଶାନ୍ତି ଓ ସ୍ଥିରତା ଫେରିବା ଉପରେ ଗୁରୁତ୍ବ ଦିଆଯାଇଥିଲା। ଗତ ୨୦୨୩ ମେ ମାସରୁ ଉତ୍ତେଜନା ପରଠାରୁ ୬ ହଜାରରୁ ଅଧିକ ଅସ୍ତ୍ରଶସ୍ତ୍ର ଲୁଟ୍ ହୋଇଥିବା ଅଭିଯୋଗ ହୋଇଥିଲା। ପୂର୍ବରୁ ୮ ତାରିଖ ସୁଦ୍ଧା ରାଜ୍ୟରେ ଅବାଧ ଚଳାଚଳ ଦିଗରେ ପଦକ୍ଷେପ ନେବା ଲାଗି ନିର୍ଦ୍ଦେଶ ଦେଇଥିଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ। ଏନେଇ ବସିଥିଲା କେନ୍ଦ୍ର ଗୃହମନ୍ତ୍ରାଳୟର ବୈଠକ। ରାଜ୍ୟର ସମସ୍ତ ରାସ୍ତାରେ ଯେପରି ଲୋକେ ମୁକ୍ତ ଭାବେ ଚଳାଚଳ କରିପାରିବେ ସେଥିଲାଗି ପଦକ୍ଷେପ ନେବାକୁ ନିର୍ଦ୍ଦେଶ ଦେଇଥିଲେ ଗୃହମନ୍ତ୍ରୀ। ଯେଉଁମାନେ ରାସ୍ତା ଅବରୋଧ କରିବେ କିମ୍ବା ସାଧାରଣ ଚଳାଚଳ ଉପରେ ପ୍ରତିବନ୍ଧକ ସୃଷ୍ଟି କରିବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦିଆଯାଇଥିଲା ନିର୍ଦ୍ଦେଶ। ଏହା ସହ ମଣିପୁରର ଅନ୍ତର୍ଜାତୀୟ ସୀମାରେ ଥିବା ପ୍ରବେଶ ସ୍ଥଳଗୁଡିକରେ ତାରବାଡ ଯଥାଶୀଘ୍ର ସାରିବା ଲାଗି ପଦକ୍ଷେପ ନିଆଯାଇଛି।