ନନ୍ଦିଘୋଷ ବ୍ୟୁରୋ: ବେଲଗୁଣ୍ଠା ବ୍ଲକ ଅଧ୍ଯକ୍ଷା ଭାବେ ନିର୍ବାଚିତ ହେଲେ ମମତା ଭୋଳ । ୧୭ ଜଣ ସମିତିସଭ୍ୟଙ୍କ ମଧ୍ୟରୁ ୯ ଜଣ ମମତା ଭୋଳଙ୍କୁ ମତଦାନ କରିଥିବା ବେଳେ ବିପକ୍ଷରେ ଗୀତାଞ୍ଜଳି ବିଶୋଇଙ୍କୁ ୮ଟି ଭୋଟ ମିଳିଥିଲା । ନିର୍ବାଚନ ଅଧିକାରୀ ମମତା ଭୋଳଙ୍କୁ ଅଧକ୍ଷ ପଦ ପାଇଁ ବିଜେତା ଘୋଷଣା କରିଛନ୍ତି । ବେଲଗୁଣ୍ଠା ବ୍ଲକ ଅଧକ୍ଷ ପ୍ରଶାନ୍ତ ନାୟକଙ୍କ ମୃତ୍ୟୁ ପରେ ଦୀର୍ଘ ୪ ମାସ ଧରି ଅଧକ୍ଷ ପଦ ଖାଲି ପଡ଼ିଥିଲା । ନିର୍ବାଚନ କମିଶନଙ୍କ ନିର୍ଦ୍ଦେଶ କ୍ରମେ ୧୭ ଜଣ ସମିତିସଭ୍ୟଙ୍କ ଉପସ୍ଥିତିରେ କଡ଼ା ସୁରକ୍ଷା ବଳୟ ମଧ୍ୟରେ ଗତ ଜାନୁଆରୀ ୩୦ ତାରିଖ ଦିନ ନିର୍ବାଚନ ହୋଇଥିଲା । ତତ୍କାଳୀନ ହାଇକୋର୍ଟଙ୍କ ନିର୍ଦ୍ଦେଶ କ୍ରମେ ଫଳାଫଳକୁ ସ୍ଥଗିତ ରଖାଯାଇଥିଲା । ଗତ ୨୦ ତାରିଖ ଦିନ ହାଇକୋର୍ଟଙ୍କ ନିର୍ଦ୍ଦେଶ କ୍ରମେ ଜିଲ୍ଲା ପ୍ରଶାସନ ଆଜି ବେଲଗୁଣ୍ଠା ବ୍ଲକ ପରିସରରେ ବୁଗୁଡ଼ା ତହସିଲଦାର ତଥା ନିର୍ବାଚନ ଅଧିକାରୀଙ୍କ ଉପସ୍ଥିତରେ ଭୋଟ ବାକ୍ସ ଖୋଲାଯାଇ ଗଣତି କରାଗଲା । ମମତା ଭୋଳ ବିଜୟୀ ହେଲା ପରେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ପୂର୍ବତନ ବିଧାୟକ ପୂର୍ଣ୍ଣଚନ୍ଦ୍ର ସ୍ୱାଇଁଙ୍କୁ ଅଶେଷ ଧନ୍ୟବାଦ ଜଣାଇଛନ୍ତି ।
ସରକାର ପରିବର୍ତ୍ତନ ପରେ ସରକାରୀ ବ୍ୟବସ୍ଥାକୁ ଚଳୁ କରିଦେଇଛନ୍ତି ସରକାରୀ ବାବୁ!
ନନ୍ଦିଘୋଷ ବ୍ୟୁରୋ: ସାପ କାମୁଡ଼ି ମରିବାର ୬ ମାସ ପରେ ବି ମିଳିନି ୪ ଲକ୍ଷ ଟଙ୍କା ଆର୍ଥିକ ସହାୟତା । ସରକାର ପରିବର୍ତ୍ତନ ପରେ ସରକାରୀ ବ୍ୟବସ୍ଥାକୁ ଚଳୁ କରିଦେଇଛନ୍ତି ସରକାରୀ ବାବୁ । ମୃତକଙ୍କ ପରିବାର ଆର୍ଆଇ, ତହସିଲଦାର ଓ ଜିଲ୍ଲାପାଳଙ୍କୁ ଗୁହାରି କଲା ପରେ ବି ସହାୟତା ମିଳିନାହିଁ । ଗଞ୍ଜାମ ଖଲ୍ଲିକୋଟ ପଥୁରା ନିବାସୀ ଲକ୍ଷ୍ମୀକାନ୍ତ ବେହେରାଙ୍କ ୫ ବର୍ଷର ପୁଅର ମୁଣ୍ଡକୁ ବିଷଧର ସାପ କାମୁଡି ପ୍ରାଣହାନୀ ଘଟିଲା । ପଚାରିଲେ ରାଜସ୍ବ ମନ୍ତ୍ରୀ କହୁଛନ୍ତି, ତାଙ୍କ ଦୃଷ୍ଟିକୁ ଆସିନାହିଁ । ଯାହାକୁ ନିନ୍ଦା କରିଛନ୍ତି ବିରୋଧୀ ।
ସରକାରୀ ବ୍ୟବସ୍ଥାକୁ ଫୁ କରିଦେଉଛନ୍ତି ସରକାରୀ ବାବୁ । ରାଜସ୍ବ ମନ୍ତ୍ରୀଙ୍କ ବିଭାଗରେ ଚରମ ଅବହେଳା । ବିଷଧର ସାପ କାମୁଡ଼ି ୫ ବର୍ଷ ପୁଅର ଜୀବନ ଗଲା । ୬ ମାସ ପରେ ବି ମିଳିନି ୪ ଲକ୍ଷ ଟଙ୍କା ଅନୁକମ୍ପା ରାଶି । ଆରଆଇ, ତହସିଲ, ଜିଲ୍ଲାପାଳଙ୍କୁ ଗୁହାରୀ ପରେ ବି କାର୍ଯ୍ୟାନୁଷ୍ଠାନ ଶୂନ । ରାଜସ୍ବ ମନ୍ତ୍ରୀଙ୍କ ଉତ୍ତର ତାଙ୍କ ଦୃଷ୍ଟିକୁ ଆସିଲେ ଧଡ଼ାଧଡ଼ ଟଙ୍କା ମିଳିବ । ସରକାର ପରିବର୍ତ୍ତନ ପରେ ଏ ହେଉଛି ମୋହନ ସରକାରଙ୍କ ବ୍ୟବସ୍ଥା । ଯାହାର ଯାହା ହେବ ଏଣିକି ବିଭାଗୀୟ ମନ୍ତ୍ରୀଙ୍କ ଦପ୍ତରକୁ ଆସି ଗୁହାରୀ କରିବେ କି ଲୋକେ ? ଘଟଣାଟି ଏପରି । ୨୦୨୪ ଅଗଷ୍ଟ ୨୩ ତାରିଖରେ ଗଞ୍ଜାମ ଖଲ୍ଲିକୋଟ ପଥୁରା ନିବାସୀ ଲକ୍ଷ୍ମୀକାନ୍ତ ବେହେରାଙ୍କ ୫ ବର୍ଷର ପୁଅ ପ୍ରବୀଣର ମୁଣ୍ଡକୁ ବିଷଧର ସାପ କାମୁଡିଲା । ବାଲୁଗାଁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଡାକ୍ତର ତାକୁ ଆଣ୍ଟି ସ୍ନେକ ଭେନମ୍ ଇଞ୍ଜେକସନ୍ ନ ଦେଇ ଭୁବନେଶ୍ବର କ୍ୟାପିଟାଲ ହସ୍ପିଟାଲକୁ ରେଫର କରିଦେଲେ । ଆମ୍ବୁଲାନ୍ସରେ ରୋଗୀକୁ ଅକ୍ସିଜେନ୍ ଲଗାଇ ଭୁବନେଶ୍ବର ଅଣାଗଲା । କିନ୍ତୁ ୧୫ କିଲୋମିଟର ଆସିବା ପରେ ଅକ୍ସିଜେନ୍ ସରିଗଲା । ପୁଣିଥରେ ଆମ୍ବୁଲାନ୍ସ ବାଲୁଗାଁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଫେରି ଆଉ ଗୋଟିଏ ଆମ୍ବୁଲାନ୍ସରେ ରୋଗୀକୁ ଧରି କ୍ୟାପିଟାଲ ହସ୍ପିଟାଲ ପହଞ୍ଚିଲାବେଳକୁ ପ୍ରବୀଣର ପ୍ରାଣବାୟୁ ଉଡିଯାଇଥିଲା । ବିଷଧର ସାପ କାମୁଡ଼ାରେ ପ୍ରବୀଣର ଜୀବନ ଯାଇଥିବା ଗତବର୍ଷ ଅଗଷ୍ଟ ୩୧ ତାରିଖରେ କ୍ୟାପିଟାଲ ହସ୍ପିଟାଲ କର୍ତ୍ତୃପକ୍ଷ ଶବବ୍ୟବଚ୍ଛେଦ ରିପୋର୍ଟ ଦେଲେ । ହେଲେ ଏ ପର୍ଯ୍ୟନ୍ତ ଟଙ୍କାଟିଏ ସହାୟତା ମିଳିନାହିଁ । କେନ୍ଦ୍ର ସରକାରଙ୍କ ନିୟମ ରହିଛି, ବନ୍ୟଜନ୍ତୁ ଆକ୍ରମଣରେ ମୃତ୍ୟୁ ହେଲେ ୨୪ ଘଣ୍ଟା ଭିତରେ କ୍ଷତିଗ୍ରସ୍ତ ପରିବାର ଦୁଆରେ ସରକାରଙ୍କ ପକ୍ଷରୁ ଅନୁକମ୍ପା ରାଶିର କିଛି ଅଂଶ ପ୍ରଦାନ କରାଯିବ ।
ରାଜସ୍ବ ବିଭାଗର ଏପରି ଅବହେଳାକୁ ନେଇ କଡ଼ା ଭାଷାରେ ସମାଲୋଚନା କରିଛନ୍ତି ବିରୋଧୀ । ପୂର୍ବ ବିଜେଡି ସରକାର ସମୟରେ ଏପରି ଅବହେଳା ଦେଖିବାକୁ ମିଳୁନଥିଲା । କଂଗ୍ରେସ ଅଭିଯୋଗ କରିଛି ଏ ସରକାରରେ ମନ୍ତ୍ରୀଙ୍କ କଥା ବାବୁ ଶୁଣୁନାହାନ୍ତି । ଅତୀତରେ ବି ରାଜ୍ୟରେ ସରକାର ପରିବର୍ତ୍ତନ ହୋଇଛି । ଶାସନ ବଦଳିଲେ ବ୍ୟବସ୍ଥା ବଦଳେନି । କିନ୍ତୁ ଏବେ ଗୋଟିଏ ବିଚିତ୍ର ସ୍ଥିତି ଦେଖିବାକୁ ମିଳୁଛି । ସାପ କାମୁଡ଼ା, ପାଣିରେ ବୁଡ଼ି କିମ୍ବା ବଜ୍ରପାତ ମୃତ୍ୟୁ ପାଇଁ ୪ ଲକ୍ଷ ଟଙ୍କା ସହାୟତା ମିଳିଥାଏ । ରାଜସ୍ବ ବିଭାଗ ଅଧୀନରେ ଥିବା ଏସ୍ଆର୍ସିଙ୍କ ପକ୍ଷରୁ ସବୁ ଜିଲ୍ଲା ପ୍ରଶାସନକୁ ଷ୍ଟାଣ୍ଡିଂ ନିର୍ଦ୍ଦେଶ ରହିଛି । ଏହାକୁ କାର୍ଯ୍ୟକାରୀ କରିବାରେ ଅସୁବିଧା ରହିଲା କେଉଁଠି ? ମୃତକର ପୋଷ୍ଟମର୍ଟମ ରିପୋର୍ଟ ଥାଇ କାହିଁକି ପରିବାର ସଦସ୍ୟ ସରକାରୀ ଦପ୍ତରର ଚକ୍କର କାଟିବେ ।
ଅନୁକମ୍ପା ରାଶି ମିଳୁନି । ବାଲୁଗାଁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ସ୍ବାସ୍ଥ୍ୟ ଅଧିକାରୀ ଯଦି ସାପ କାମୁଡ଼ା ଇଞ୍ଜେକ୍ସନ୍ ତତକ୍ଷଣାତ ଦେଇଥାନ୍ତେ ତାହେଲେ ସ୍ଥିତି କିଛି ଭିନ୍ନ ହୋଇଥାନ୍ତା । ଆମ୍ବୁଲାନ୍ସରେ ଅକ୍ସିଜେନ୍ ପୂରା ରହିଲାନି କେମିତି ? ଖୋଦ ଆଇନମନ୍ତ୍ରୀଙ୍କ ନିର୍ବାଚନମଣ୍ଡଳୀରେ ସ୍ବାସ୍ଥ୍ୟସେବା ଏକ ପ୍ରକାର ଠପ୍ । ତାହେଲେ ରାଜ୍ୟରେ ସ୍ବାସ୍ଥ୍ୟସେବା କେମିତି ଚାଲିଛି ଏଥିରୁ ଜଳଜଳ ବାରି ହୋଇପଡ଼ୁଛି । ଏବେ ଲକ୍ଷ୍ମୀକାନ୍ତଙ୍କ ପୁଅ ତ ଫେରିବନି । ଅବହେଳା ପାଇଁ ଯେଉଁମାନେ ଦାୟୀ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ କି ? ନା ଏଥିପାଇଁ କ୍ଷତିଗ୍ରସ୍ତଙ୍କୁ ମନ୍ତ୍ରୀଙ୍କ ଦ୍ବାରସ୍ଥ ହେବାକୁ ପଡ଼ିବ ?
ଓଡ଼ିଆ ଅସ୍ମିତା ରକ୍ଷା ଦିଗରେ ସରକାରଙ୍କ କୌଣସି ଆନ୍ତରିକତା ନାହିଁ
ନନ୍ଦିଘୋଷ ବ୍ୟୁରୋ: ସଙ୍କଟରେ ଓଡ଼ିଶାର ଭାସ୍କର୍ଯ୍ୟ। କଳା ଓ କଳାକାର ଉଭୟ ଆଶା ଆଶଙ୍କାରେ । ଓଡ଼ିଆ ଅସ୍ମିତା କଥା ସରକାର ବାରମ୍ବାର କହୁଛନ୍ତି । ଓଡ଼ିଶାର କଳା, ସଂସ୍କୃତି, ଭାସ୍କର୍ଯ୍ୟ ଅସ୍ମିତାର ପରିଚୟ ହୋଇଥିଲେ ବି ସରକାରଙ୍କ ପ୍ରୋତ୍ସାହନ ଅଭାବ ଏହି ଶିଳ୍ପକୁ ରୁଗଣ କରୁଛି। କଞ୍ଚାମାଲ ଯୋଗାଣ ଠାରୁ ଆରମ୍ଭ କରି ମାର୍କେଟ ଲିଙ୍କେଜ, ବୈଷୟିକ ଜ୍ଞାନ କୌଶଳ, ଡିଜାଇନ ପାଇଁ ସରକାରଙ୍କ ଆନ୍ତରିକତା ନାହିଁ ବୋଲି ଅଭିଯୋଗ କରିଛନ୍ତି ପଦ୍ମ ବିଭୂଷଣ ଭାସ୍କର୍ଯ୍ୟ ଶିଳ୍ପୀ ଗୁରୁ ସୁଦର୍ଶନ ସାହୁ। କେବଳ ପଥର କାରିଗର ନୁହଁନ୍ତି, ହସ୍ତତନ୍ତ କାରିଗର ମଧ୍ୟ ଅନେକ ସମସ୍ୟାରେ ଅଛନ୍ତି । କେନ୍ଦ୍ର ସଂସ୍କୃତି ମନ୍ତ୍ରୀ ଏ ବାବଦରେ ରାଜ୍ୟ ସରକାରଙ୍କ ସହ କଥା ହେବେ ବୋଲି କହିଛନ୍ତି ।
ରାଜ୍ଯ ସରକାରଙ୍କ ଅସ୍ମିତା କେବଳ ଏକ ସ୍ଲୋଗାନ । ଓଡ଼ିଆ ଅସ୍ମିତା ରକ୍ଷା ଦିଗରେ ସରକାରଙ୍କ କୌଣସି ଆନ୍ତରିକତା ନାହିଁ । ତାର ପ୍ରମାଣ ହେଲା ପଥର ଶିଳ୍ପ ଓ କାରିଗରଙ୍କ ଭାଗ୍ଯ । ସେମାନଙ୍କ ଭାଗ୍ଯ ଏବେ ପଥର ତଳେ । ସଙ୍କଟରେ ପଡିଯାଇଛି ପଥର ଶିଳ୍ପ ଓ କାରିଗର। କୋଣାର୍କରେ ପଥରର କାରିଗରୀ ପାଇଁ ଓଡ଼ିଶା ଅନ୍ତଜାର୍ତୀୟ ସ୍ତରରେ ପରିଚୟ ପାଇଥିଲେ ବି ଏବେ ଏହା ରୁଗଣ ଅବସ୍ଥାରେ। ୧୩ଶହ ଶତାବ୍ଦୀର ଭାସ୍କର୍ଯ୍ୟ ପ୍ରତି ସରକାରଙ୍କ ଉଦାସୀନତା ଯୋଗୁଁ ପଥର ଖୋଦେଇ ଶିଳ୍ପ ବୁଡିବାକୁ ବସିଲାଣି। କାରଣ ସରକାର ଯାହା କହୁଛନ୍ତି, ତାହା କରୁନାହାନ୍ତି। ପ୍ରତିଶୃତି ଦେଉଛନ୍ତି, ହେଲେ କିଛି ବି ପାଳନ କରୁନାହାନ୍ତି । ପଥର ଖୋଦେଇ କାରିଗରଙ୍କ ପାଇଁ ସୁଲଭ ମୂଲ୍ୟରେ କଞ୍ଚାମାଲ ଯୋଗାଣ ଠାରୁ ଆରମ୍ଭ କରି ଏଥିପାଇଁ ଋଣ ବ୍ୟବସ୍ଥା, ମାର୍କେଟିଙ୍ଗ ବ୍ୟବସ୍ଥା, ଶିଳ୍ପୀ ସଂଘର ଅସୁବିଧା, ଭାସ୍କର୍ଯ୍ୟ ଶିଳ୍ପରେ ଟେକ୍ନୋଲୋଜିର ବ୍ୟବହାର, ଡିଜାଇନ ପାଇଁ ପ୍ରୋତ୍ସାହନ ବାବଦରେ ରାଜ୍ୟ ସରକାର କିଛି କରୁନାହାନ୍ତି । ଏଭଳି ଚାଲିଲେ ଓଡ଼ିଆ ଅସ୍ମିତାର ପ୍ରତୀକ ଭାସ୍କର୍ଯ୍ୟ ଶିଳ୍ପ ଇତିହାସ ହୋଇଯିବ ବୋଲି କ୍ଷୋଭର ସହ କହିଛନ୍ତି ପଦ୍ମ ବିଭୂଷଣ ଭାସ୍କର୍ଯ୍ୟ ଶିଳ୍ପୀ ସୁଦର୍ଶନ ସାହୁ।
ସାଧାରଣତଃ ଶକ୍ତ ଗ୍ରାନାଇଟ୍, ଶକ୍ତ ବାଲି ପଥର, କଳା ମୁଗୁନି ପଥର ଖଣ୍ଡରୁ ଜୀବନ୍ତ ପ୍ରତିମୂର୍ତ୍ତି ପ୍ରସ୍ତୁତ କରିଥାଏ କାରିଗର। ବିଭିନ୍ନ ଦେବଦେବୀଙ୍କ ପଥର ମୂର୍ତ୍ତି, ଶିଳ, ଚନ୍ଦନ ପେଡ଼ି ଭଳି ଘରକରଣା ଦ୍ରବ୍ୟ ସହିତ ସୌନ୍ଦର୍ଯ୍ୟ ପାଇଁ ବିଭିନ୍ନ ଡିଜାଇନର ପଥର ଖଣ୍ଡର ଚାହିଦା ଅନେକ। ଏହାକୁ ପ୍ରସ୍ତୁତ କରିବାକୁ ଶିଳ୍ପୀକୁ ମାସ, ବର୍ଷ ଧରି ସମୟ ଲାଗିଥାଏ । ହେଲେ ସରକାରଙ୍କ ଆନ୍ତରିକତା ଅଭାବ ଯୋଗୁଁ କାରିଗରଟିଏ ମଜୁରୀ ବି ଠିକ୍ ଢଙ୍ଗରେ ପାଏନାହିଁ। ରାଜ୍ୟର ପଥର ଶିଳ୍ପୀମାନଙ୍କ ସମସ୍ୟା ବାବଦରେ ମୁହଁ ଖୋଲିଛନ୍ତି ବିଶିଷ୍ଟ ଭାସ୍କର୍ଯ୍ୟ ଶିଳ୍ପୀ ସୁଦର୍ଶନ ସାହୁ। ସରକାରଙ୍କୁ ଅପିଲ କରିଛନ୍ତି, ଯଦି ଅସ୍ମିତା ବଞ୍ଚାଇବା କଥା କୁହାଯାଉଛି, ତାହାଲେ ପଥର ଶିଳ୍ପକୁ ବଞ୍ଚାଇବାକୁ ପଡ଼ିବ। ଭୁବନେଶ୍ବରର ସୁଦର୍ଶନ ଆର୍ଟ ଏଣ୍ଡ କ୍ରାଫ୍ଟ ଭିଲେଜକୁ କେନ୍ଦ୍ର ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ପରିଦର୍ଶନ ସମୟରେ ତାଙ୍କ ଦୃଷ୍ଟି ବି ଆକର୍ଷଣ କରାଯାଇଛି । ଶିଳ୍ପ ଓ ଶିଳ୍ପୀଙ୍କ ସୃଷ୍ଟିକୁ ମନ୍ତ୍ରୀ ପ୍ରଶଂସା କରିଥିବା ବେଳେ ଏହା ରାଜ୍ୟ ସରକାରଙ୍କ ବ୍ୟାପାର ବୋଲି କହିଛନ୍ତି।
ଦଶନ୍ଧି ଦଶନ୍ଦି ଧରି ଭାସ୍କର୍ଯ୍ୟ ଶିଳ୍ପରେ ନିୟୋଜିତ ଶିଳ୍ପୀମାନଙ୍କ ବୟସ ହେବା ପରେ ସେମାନଙ୍କୁ ପେନସନ ଦେବା କଥା ସରକାର ଯେପରି ଭୁଲି ଯାଇଛନ୍ତି । କଳାକାର ଭତ୍ତା, ସେମାନଙ୍କ ପାଇଁ ସ୍ବାସ୍ଥ୍ୟ ବୀମା, ସ୍ବତନ୍ତ୍ର ପ୍ରୋତ୍ସାହନ ରାଶି କଥା ସରକାରଙ୍କ ପ୍ରତିଶୃତି ପ୍ରତାରଣା ପାଲଟିଛି ବୋଲି ଅଭିଯୋଗ ହେଉଛି।
ସଂଗଠନ ସଜାଡ଼ିବାକୁ କଂଗ୍ରେସର ନୂଆ ଷ୍ଟ୍ରାଟେଜି
ନନ୍ଦିଘୋଷ ବ୍ୟୁରୋ: ଅସଜଡା କଂଗ୍ରେସ ସଂଗଠନକୁ ସଜାଡିବାର ମଙ୍ଗ ଧରିବେ ବିଧାୟକମାନେ। ନିଜ ନିର୍ବାଚନୀ ମଣ୍ଡଳୀ ସହ ୨ଟି ଜିଲ୍ଳାରେ ସଂଗଠନର ଦାୟିତ୍ବରେ ରହିବେ ବିଧାୟକମାନେ। ପିସିସି ଓ ବିଧାୟକ ଦଳ ମଧ୍ୟରେ ସମନ୍ନୟ ବୈଠକ ମାନସମନ୍ଥନ ପରେ ଏପରି ଗୁରୁଦାୟିତ୍ବ ବିଧାୟକମାନଙ୍କୁ ଦେଇଛି ଦଳ। କଂଗ୍ରେସକୁ ମଜବୁତ କରିବାକୁ ପିସିସିର ଏପରି ନିଷ୍ପତିକୁ ବିଧାୟକମାନେ ସ୍ବାଗତ କରିଛନ୍ତି । ଆଗକୁ ସଂଗଠନକୁକୁ ସଶକ୍ତ କରିବା ସହ ଜୋରଦାର ଲଢେଇ କରିବାକୁ ବିଧାୟକମାନେ ଅଣ୍ଟା ଭିଡ଼ିଛନ୍ତି । ଯାହାକୁ ନେଇ କଂଗ୍ରେସ ଶିବିର ଚଳଚଞ୍ଚଚଳ ।
ମଜବୁତ ହେବ କଂଗ୍ରେସ । ବିଧାୟକ ଧରିବେ ମଙ୍ଗ। ଏଣିକି ନିର୍ବାଚିତ ବିଧାୟକମାନେ କେବଳ ନିଜ ନିର୍ବାଚନୀ ମଣ୍ଡଳୀରେ ସୀମିତ ରହିବେ ନାହିଁ । ନିଜ ନିର୍ବାଚନୀ ମଣ୍ଡଳୀ ସହ ୨ଟି ଜିଲ୍ଲାର ଦାୟିତ୍ବ ନେବେ ବିଧାୟକ। ଓଡିଶାରେ କଂଗ୍ରେସ ସଂଗଠନକୁ ତୃଣମୂଳସ୍ତରରୁ ସଶକ୍ତ କରିବାକୁ ଏପରି ନୂଆ ରଣନୀତି ଆପଣାଇଛି ଦଳ । ୧୪ ଜଣ ବିଧାୟକଙ୍ଗକ ସହ ପିସିସି ସଭାପତି ଓ ପ୍ରଭାରୀ ମିଳିତ ଓ ଓ୍ବାନ ଟୁ ଓ୍ବାନ ଆଲୋଚନା ପରେ ଏହି ନିଷ୍ପତି ନିଆଯାଇଛି । ୪ଦିନ ଧରି କଂଗ୍ରେସ ଭବନରେ ସଂଗଠନ ବିଷୟରେ ସମୀକ୍ଷା କରିବା ପରେ ପିସିସିର ଏପରି ଦାୟିତ୍ବ ବଣ୍ଟନ ନିଷ୍ପତିକୁ ବିଧାୟକମାନେ ସ୍ବାଗତ କରିଛନ୍ତି । କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ କହିଛନ୍ତି ଯେ ପିସିସି ସଭାପତି ଯେଉଁ ନିର୍ଦ୍ଦେଶ ଦେବେ ତାହାକୁ ଆପେ ପାଳନ କରିବୁ । ୨୫ ବର୍ଷ ଧରି କ୍ଷମତାରୁ ବାହାରେ ରହିଛି କଂଗ୍ରେସ । ଲୋକଙ୍କ ବିଶ୍ବାସକୁ ଜିଣିବା ପାଇଁ ବିଧାୟକମାନଙ୍କୁ ଦଳ ୨ଟି ଜିଲ୍ଳାର ଗୁରୁଦାୟିତ୍ବ ଦେଇଛନ୍ତି । ଯାହା ତୃଣମୂଳସ୍ତରେ ହାତକୁ ବଳ ଦେବ ।
କଂଗ୍ରେସର ୧୪ ଜଣ ବିଧାୟକ ୨୮ଟି ଜିଲ୍ଲାର ଦାୟିତ୍ବରେ ରହିବେ। ଲୋକଙ୍କ ସମସ୍ୟା ବୁଝିବା ସହ କଂଗ୍ରେସ ପ୍ରତି ବିଶ୍ବାସ ସୃଷ୍ଟି ହେବ । ବିଧାୟକମାନେ ପିସିସି ଓ ପ୍ରଭାରୀ ସହ ଆଲୋଚନା ସମୟରେ ଏ ଦିଗରେ ବିସ୍ତୃତ ଭାବେ ଆଲୋଚନା ହୋଇଛି । ତେଣୁ ନିଷ୍ପତି ଅନୁସାରେ ଗ୍ରାଉଣ୍ତରେ ବିଧାୟକମାନେ କାମ କରିବା ଆରମ୍ଭ କରିବାକୁ ଅଣ୍ଟା ଭିଡିଛନ୍ତି । ଅନ୍ୟପଟେ କଂଗ୍ରେସର ପଦଯାତ୍ରା ପରେ ବହୁ ଲୋକ କଂଗ୍ରେସ ମୁହାଁ ହୋଇଥିବା ବରିଷ୍ଠ କଂଗ୍ରେସ ନେତା ସୁରେଶ କୁମାର ରାଉତରାୟକ କହିଛନ୍ତି ।
୮ ମାସ ପରେ ଓଡିଶା କଂଗ୍ରେସକୁ ସଭାପତି ଓ ପ୍ରଭାରୀ ମିଳିଛି । ହାତ ସଂଗଠନକୁ ସଂଞ୍ଜିବନୀ ଦେବା ପାଇଁ ବିଧାୟକଙ୍କ ହାତରେ ସଂଗଠନର ମଙ୍ଗ ଧରାଇବ ଦଳ। ଦଳର ଏପରି ରଣନୀତି ଜିଲ୍ଲାସ୍ତରରେ ସଫଳ ହେଉଛି ଓ ଜିଲ୍ଳା ସଭାପତିମାନେ ଏଥୀରେ କେତେ ସହଯୋଗ କରୁଛନ୍ତି ତାହା ଦେଖିବାର କଥା ।
ଚାଷୀଙ୍କ ଖାତାକୁ ଆସିଲା ପିଏମ୍ କିଷାନ ଟଙ୍କା
ନନ୍ଦିଘୋଷ ବ୍ୟୁରୋ: କୃଷକଙ୍କ ଖାତାକୁ ଆସିଲା ପିଏମ୍ କିଷାନ ଟଙ୍କା । ବିହାରରୁ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧିର ୧୯ତମ କିସ୍ତି ଚାଷୀଙ୍କ ଆକାଉଣ୍ଟକୁ ପଠାଇଛନ୍ତି ପ୍ରଧାନମନ୍ତ୍ରୀ। ଡିବିଟି ଜରିଆରେ ୯ କୋଟି ୮୦ ଲକ୍ଷ ଚାଷୀଙ୍କ ଆକାଉଣ୍ଟକୁ ଟଙ୍କା ପଠାଯାଇଛି। ସରକାର ଏହି କିସ୍ତି ପାଇଁ ୨୨ ହଜାର କୋଟିରୁ ଅଧିକ ଅର୍ଥ ବ୍ୟୟ ବରାଦ କରିଛନ୍ତି। ପୂର୍ବରୁ ଯୋଜନାର ୧୮ତମ କିସ୍ତି ୨୦୨୪ ଅକ୍ଟୋବର ୫ ତାରିଖରେ ମହାରାଷ୍ଟ୍ରରୁ ଜାରି କରିଥିଲେ ପ୍ରଧାନମନ୍ତ୍ରୀ। ଯୋଜନାରେ ଚାଷୀଙ୍କୁ ପ୍ରତିବର୍ଷ ୩ଟି କିସ୍ତିରେ ୬ ହଜାର ଟଙ୍କା ପ୍ରଦାନ କରାଯିବ। ପ୍ରତ୍ୟେକ ୪ ମାସ ବ୍ୟବଧାନରେ ବାର୍ଷିକ ୩ କିସ୍ତିରେ କୃଷକଙ୍କ ଆକାଉଣ୍ଟକୁ ୬ ହଜାର ଟଙ୍କାର ଆର୍ଥିକ ସହାୟତା ପ୍ରଦାନ କରାଯାଉଛି। ଏହି ଯୋଜନାରେ ଓଡ଼ିଶାର ୩୪ ଲକ୍ଷରୁ ଅଧିକ ହିତାଧିକାରୀଙ୍କ ଆକାଉଣ୍ଟକୁ ଟଙ୍କା ଆସିଛି। ପୂର୍ବ କିସ୍ତିରେ ଯେଉଁମାନେ ବାଦ ପଡିଥିଲେ, ସେମାନଙ୍କୁ ସ୍ବତନ୍ତ୍ର ଡ୍ରାଇଭ୍ ଜରିଆରେ ସାମିଲ କରିଛି କୃଷି ବିଭାଗ। ପୂର୍ବ ଅପେକ୍ଷା ଏଥର ୩ ଲକ୍ଷ ୪୩ ହଜାର ୪୪୭ ଜଣ ଯୋଗ୍ୟ ହିତାଧିକାରୀଙ୍କୁ ସାମିଲ କରାଯାଇଛି।
ଏମିତି ଗାଁ, ଯେଉଁଠି ରହିଛି ୧୦୦ରୁ ଅଧିକ ଶିବ ମନ୍ଦିର
ନନ୍ଦିଘୋଷ ବ୍ୟୁରୋ: ଦିନକ ପରେ ଜାଗର । ଓଁ ନମଃ ଶିବାୟଃ ଧ୍ବନିରେ ପ୍ରକମ୍ପିତ ହୋଇ ଉଠିବ ସମସ୍ତ ଶୈବପୀଠ । ହେଲେ ଆଜି ଆମେ ଏମିତି ଏକ ଗାଁ ବିଷୟରେ କହିବୁ ଯେଉଁ ଗାଁରେ ଶତାଧିକ ସ୍ଥାନରେ ପାଳନ ହୁଏ ଜାଗର ଯାତ୍ରା । କାରଣ ଏହି ଗାଁରେ ଗୋଟିଏ ନୁହେଁ ୧୦୦ ରୁ ଅଧିକ ଶିବ ମନ୍ଦିର ରହିଛି ।
ଆସୁଛି ଜାଗର । ଉତ୍ସବ ମୁଖର ହୋଇ ଉଠିବ ସମସ୍ତ ଗାଁରେ ଥିବା ଶିବ ମନ୍ଦିର । ହେଲେ ଆଜି ଆମେ ଏମିତି ଏକ ଗାଁ ବିଷୟରେ କହିବୁ ଯେଉଁ ଗାଁରେ ଗୋଟିଏ ସ୍ଥାନରେ ନୁହେଁ ଶତାଧିକ ସ୍ଥାନରେ ପାଳନ ହୁଏ ଜାଗର ଯାତ୍ରା । କାରଣ ଗାଁରେ ଗୋଟିଏ ନୁହେଁ ୧୦୦ ରୁ ଅଧିକ ଶିବ ମନ୍ଦିର ରହିଛି । ଏମିତି ଏକ ଗାଁ ହେଉଛି ଭଦ୍ରକ ଜିଲ୍ଲା ତିହିଡି ବ୍ଲକର ନରେନ୍ଦ୍ରପୁର । ଏହି ଗାଁର ସ୍ୱତନ୍ତ୍ର ପରିଚୟ ସୃଷ୍ଟି କରିଛି ଏଠାରେ ଥିବା ବିରଳ ଓ ପ୍ରାଚୀନ ଶିବଲିଙ୍ଗ । ଗାଁର କୋଣ ଅନୁକୋଣରେ ଶିବଲିଙ୍ଗ ଗୁଡ଼ିକ ବିରାଜମାନ କରିଥିବାରୁ ସଦାସର୍ବଦା ଏଠାରେ ଆଧ୍ୟାତ୍ମିକ ପରିବେଶ ସୃଷ୍ଟି କରିଥାଏ । ବାବାଙ୍କର ପ୍ରତିଦିନ ପୂଜା କରାଯାଉଥିଲେ ମଧ୍ୟ ଜାଗର ଯାତ୍ରା ଖୁବ ଧୁମଧାମରେ ପାଳନ କରାଯାଏ । ଏବେ ବାବାଙ୍କ ଜାଗର ଯାତ୍ରା ପାଇଁ ଜୋରଦାର ଭାବେ ପ୍ରସ୍ତୁତି ଚାଲିଛି ।
କୁହାଯାଏ ଏହି ଗାଁରେ ଯେଉଁଠି ଖୋଳିବ ସେଠାରେ ଶିବଲିଙ୍ଗ ବାହାରେ । ଆଉ ସେହି ଅନୁସାରେ ବାବାଙ୍କ ନାମକରଣ ମଧ୍ୟ କରାଯାଏ । ବାଡ଼ ଖୋଳୁଥିବା ସ୍ଥାନରୁ ଶିବଲିଙ୍ଗ ବାହାରି ଥିବାରୁ ତାଙ୍କ ନାମ ବାଡେଶ୍ୱର ,ବେଲ ଗଛ ମୂଳରୁ ବାହାରିଥିବା ଲିଙ୍ଗର ନାମ ବେଲେଶ୍ଵର ସେହିପରି ବାଟେଶ୍ୱର, ସମୁଦ୍ରେଶ୍ୱର, ଚମ୍ପକେଶ୍ୱର ,ଭୂତେଶ୍ୱର ଆଦି ନାମରେ ପୂଜା ପାଇଥାନ୍ତି । ବିଶ୍ୱାସ ରହିଛି ବାବାଙ୍କ ପାଖରେ ମାନସିକ ରଖିଲେ ତାହା ପୂରଣ ହୋଇଥାଏ ,ଅପୁତ୍ରିକ ପୁତ୍ର ଲାଭ କରେ । ଭକ୍ତ ଓ ଭଗବାନଙ୍କର ଅପୂର୍ବ ମିଳନ ମହାଶିବରାତ୍ରି ଦିନ ଏଠାରେ ଦେଖିବାକୁ ମିଳିଥାଏ । ଗାଁ ହୁଏ ଆଲୋକିତ, ପରିବେଶ ହୁଏ ଆଧ୍ୟାତ୍ମିକ । ହରିବୋଲ ହୁଳହୁଳି ଆଉ ଓଁ ନମଃ ଶିବାୟଃ ଧ୍ବନିରେ ପ୍ରକମ୍ପିତ ହୋଇ ଉଠେ ଗଗନପବନ ।
ଏବେ ସରିବନି ଶ୍ରୀମନ୍ଦିର ରତ୍ନଭଣ୍ଡାର ମରାମତି କାମ
ନନ୍ଦିଘୋଷ ବ୍ୟୁରୋ: ଶ୍ରୀମନ୍ଦିର ରତ୍ନଭଣ୍ଡାର ମରାମତି ଏବେ ସରିବନି । ଆହୁରି ମାସେ ଦୁଇ ମାସ ଲାଗିବ । ତା ପରେ ଗଣତି ମଣତି କରାଯିବ । ଏଏସଆଇ ଙ୍କୁ ଯଥେଷ୍ଟ ସମୟ ମିଳିପାରୁନଥିବାରୁ ରତ୍ନଭଣ୍ଡାର ମରାମତି କାର୍ଯ୍ୟ ଅବଧି ସମୟ ଭିତରେ ସରିବା ନେଇ ଦେଖାଦେଇଛି ଅନିଶ୍ଚିତତା । ରତ୍ନ ଭଣ୍ଡାର ମରାମତି ନେଇ ଏଏସଆଇଙ୍କୁ ଅଧିକ ସମୟ ଯୋଗାଇ ଦିଆଯିବା ନେଇ କରାଯାଉଛି ଆଲୋଚନା । ଭିବିନ୍ନ ସମୟରେ ମହାପ୍ରଭୁଙ୍କ ନୀତିକାନ୍ତି ଓ ଦର୍ଶନାର୍ଥୀଙ୍କ ଭିଡ଼ ଯୋଗୁଁ ସ୍ଥଗିତ ରଖାଯାଉଛି ରତ୍ନଭଣ୍ଡାର ମରାମତି କାର୍ଯ୍ୟ । ମରାମତି କାର୍ଯ୍ୟ ତ୍ୱରାନ୍ୱିତ କରାଯିବା ପାଇଁ ପ୍ରଚେଷ୍ଟା କରାଯାଉଛି । ଜିପିଆରଏସ ସର୍ଭେ ଅନୁଯାଇ ଏଏସଆଇ ତାର କାର୍ଯ୍ୟ ସଠିକ ଭାବେ କରୁଛି ।ଯଥା ସମ୍ବବ ଏଏସଆଇଙ୍କୁ ବେଶି ସମୟ ଦେବା ପାଇଁ ସେବାୟତ ମାନଙ୍କ ସହ ଆଲୋଚନା କରାଯାଉଛି ବୋଲି ଶ୍ରୀମନ୍ଦିର ଉପ ମୁଖ୍ୟପ୍ରଶାସକ ସିଦ୍ଧାର୍ଥ ଶଙ୍କର ସ୍ୱାଇଁ ସୂଚନା ଦେଇଛନ୍ତି ।
୧୩୨ କେଭି ଟାୱାର ରେ ଚଢି ଯୁବକଙ୍କ ହାଇଡ୍ରାମା
ନନ୍ଦିଘୋଷ ବ୍ୟୁରୋ: ୧୩୨ କେଭି ଟାୱାର ରେ ଚଢି ଯୁବକଙ୍କ ହାଇଡ୍ରାମା । ନିଶାସକ୍ତ ଅବସ୍ଥାରେ ୭୦ ମିଟର ଉପରେ ଚଢ଼ି ଅଢେଇ ଘଣ୍ଟା ଧରି ବସିଲା ଯୁବକ । କାମାକ୍ଷାନଗର ଥାନା ବଡ଼ମୁକ୍ତାପଶି ଗାଁ ନିକଟରେ ୧୩୨ କେଭି ବିଦ୍ୟୁତ ଟାୱାରରେ ନିଶାସକ୍ତ ଅବସ୍ଥାରେ ଚଢ଼ିଗଲା ଯୁବକ । ଯୁବକ ଜଣକ ବଡ଼ମୁକ୍ତାପଶି ଗାଁର ସନିଆ ମଣ୍ଡଳ । ଆଜି ଅପରାହ୍ନ ରେ ଟାୱାର ଉପରେ ଚଢି ଯାଇଥିଲା । ତେବେ ଚଢ଼ିବା ପରେ ଓଲ୍ହାଇବାର ନାଁ ଧରୁନି ଯୁବକ । ଯେଉଁଥିପାଇଁ ପୋଲିସ, ଅଗ୍ନିଶମ ବାହିନୀ ଓ ବିଦ୍ୟୁତ ବିଭାଗ କୁ ନାକେଦମ ହେବାକୁ ପଡିଛି । ପ୍ରାୟ ଅଢେଇ ଘଣ୍ଟା ଧରି ଯୁବକ ଜଣକ ଟାୱାର ଉପରେ ବସିଥିବା ବେଳେ ଟାୱାର ପାଖକୁ ଯିବାକୁ ଯାଉଥିବା ଉଦ୍ଧାରକାରୀ ଦଳକୁ ଦେଖିଲେ ଡେଇଁବା ପାଇଁ ଉଦ୍ୟମ କରୁଛି । ଫଳରେ ଉଦ୍ଧାରକାରୀ ଦଳ ଯୁବକ ଜଣକ ନିକଟରେ ପହଞ୍ଚି ପାରୁନାହିଁ । ଯୁବକଙ୍କ ଏପରି କାଣ୍ଡ ଯୋଗୁଁ ବିଦ୍ୟୁତ ସରବରାହ ବନ୍ଦ ରହିଛି ।
ଚିକେନ ତରକାରୀ ପାଇଁ ଗଲା ସ୍ତ୍ରୀର ଜୀବନ, ସ୍ଵାମୀଙ୍କ ଚାପୁଡା ମାଡରେ ସ୍ତ୍ରୀ ମୃତ
ନନ୍ଦିଘୋଷ ବ୍ୟୁରୋ: ଚିକେନ ତରକାରୀ ପାଇଁ ଚାଲିଗଲା ସ୍ତ୍ରୀର ଜୀବନ । ଚିକେନ ତରକାରୀ ନଦେବାରୁ ସ୍ବାମୀର ଚାପୁଡ଼ାରେ ସ୍ତ୍ରୀ ମୃତ । ଘଟଣାଟି ଘଟିଛି ଢେଙ୍କାନାଳ ଜିଲା ଗଁନ୍ଦିଆ ଥାନା ଷଢ଼ଙ୍ଗୀ ଧନିଆନାଳି ମୁଣ୍ଡା ସାହିରେ । ସ୍ୱାମୀ ଜେନା ପିଙ୍ଗୁଆର ଏକ ଶକ୍ତ ଚାପୁଡ଼ାରେ ସ୍ତ୍ରୀ କୁନି ପିଙ୍ଗୁଆର ମୃତ୍ୟୁ ଘଟିଛି । ରାତିରେ ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ ଚିକେନ ତରକାରୀକୁ ନେଇ ଝଗଡ଼ା ଲାଗିଥିଲା । ତରକାରୀ ନଦେବାରୁ ସ୍ତ୍ରୀକୁ ଏକ ଶକ୍ତ ଚାପୁଡ଼ା ମାଲିଥଇଲେ ସ୍ବାମି ଜେନା । ଫଳରେ ଘଟଣାସ୍ଥଳରେ ତାଙ୍କର ମୃତ୍ଯୁ ହୋଇଥିଲା । ଖବର ପାଇ ଗଁନ୍ଦିଆ ଥାନା ପୋଲିସ ପହଞ୍ଚି ମୃତଦେହକୁ ଉଦ୍ଧା କରି ବ୍ୟବଚ୍ଛେଦ ପାଇଁ ଢେଙ୍କାନାଳ ଜିଲା ମୁଖ୍ୟ ଚିକିତ୍ସାଳୟକୁ ପଠାଇଛନ୍ତି । ସ୍ଵାମୀ ଜେନା ପିଙ୍ଗୁଆକୁ ଗିରଫ କରିଛି ପୋଲିସ I ଢେଙ୍କାନାଳ ୨୪ ଘଣ୍ଟା ଭିତରେ ଦୁଇ ଦୁଇଟି ହତ୍ୟାକାଣ୍ଡ ଘଟିଛି । ଗତକାଲି ଭିଣୋଇ ଗୁଳିରେ ଶଳା ମୃତ ହୋଇଥିବା ବେଳେ ଏବେ ସ୍ବାମୀର ଚାପୁଡ଼ା ରେ ସ୍ତ୍ରୀର ମୃତ୍ଯୁ ହୋଇଛି ।
ଅଜବ ସରକାରରେ ଅଜବ ବ୍ୟବସ୍ଥା, ଫାଇଲରେ ସମୀତ ଯୋଜନା
ନନ୍ଦିଘୋଷ ବ୍ୟୁରୋ: ନିର୍ବାଚନୀ ଇସ୍ତାହାର ବେଳେ ବିଜେପି ସରକାର ଦେଇଥିବା ପ୍ରତିଶୃତି ପାଲଟିଛି ପାଣିରଗାର । ଫାଇଲରେ ସୀମିତ ରହୁଛି ଯୋଜନା । ହେଲେ ପ୍ରକୃତ ହିତାଧିକାରୀଙ୍କୁ ବର୍ଦ୍ଧିତ ଭତ୍ତା ମିଳୁନାହିଁ । ଏଭଳି ଅଭିଯୋଗ ଆସିଛି ନୂଆପଡା ଜିଲ୍ଲା ଖଡିଆଳ ବ୍ଲକ ଠକପାଲି ଗାଁରୁ । ୯୦ ପ୍ରତିଶତ ଭିନ୍ନକ୍ଷମଙ୍କୁ ଏପର୍ଯ୍ଯନ୍ତ ବର୍ଦ୍ଧିତ ଭତ୍ତା ମିଳୁପାରିନାହିଁ । ଭତ୍ତା ପାଇଁ ଅନେକ ଥର ପ୍ରଶାସନ ନିକଟକୁ ଧାଇଁ ନିରାଶ ହେଲେଣି ।
ନିର୍ବାଚନୀ ଇସ୍ତାହାରରେ ଭତ୍ତା ବୃଦ୍ଧି କଥା କହି ଶାସନକୁ ଆସିଲେ ବିଜେପି ସରକାର । ସରକାରକୁ ଆସିବା ପରେ ୮୦ ବର୍ଷରୁ ଉର୍ଦ୍ଧ୍ଵ ବୃଦ୍ଧ ବୃଦ୍ଧା ଏବଂ ୮୦ ପ୍ରତିଶତ ଭିନ୍ନକ୍ଷମମାନଙ୍କୁ ବର୍ଦ୍ଧିତ ଭତ୍ତା ଦିଆଯିବ ବୋଲି ମାପ ଦଣ୍ଡ ରଖିଲେ । କିନ୍ତୁ ଏହି ମାପ ଦଣ୍ଡ ତାଲିକାରେ ଥିବା ଭିନ୍ନକ୍ଷମଙ୍କୁ ମଧ୍ୟ ଏବେ ମିଳୁନି ସହାୟତା । ଏଭଳି ଅଭିଯୋଗ ଆସିଛି ନୂଆପଡା ଜିଲ୍ଲା ଖଡିଆଳ ବ୍ଲକ ଠକପାଲି ଗାଁରୁ । ଗାଁରେ ଥିବା ଉମକାନ୍ତୀ ଭୋଇଙ୍କ ପୁଅ ଝିଅଙ୍କୁ ମିଳୁନି ବର୍ଦ୍ଧିତ ଭତ୍ତା । ପୁଅ ଘନଶ୍ୟାମ ଭୋଇ ଓ ଝିଅ ଭାର୍ଗବୀ ଭୋଇ ୯୦ ପ୍ରତିଶତ ଭିନ୍ନକ୍ଷମ ହୋଇଥିଲେ ମଧ୍ଯ ଏଯାଏଁ ଦୁହେଁ ଭତ୍ତାରୁ ବଞ୍ଚିତ ଅଛନ୍ତି । ବିଧବା ମା ପୁଅ ଓ ଝିଅଙ୍କୁ ଧରି ଅନେକ ଥର ପ୍ରଶାସନ ନିକଟକୁ ଧାଇଁ ନିରାଶ ହେଲେଣି । ସେହିପରି ଡୁଆଝର ଗାଁର ରାମଜୀ ସତନାମି ରାଜ୍ୟ ବାହାରକୁ କାମ କରିବାକୁ ଯାଇ ଟ୍ରେନରେ ଦୁଇ ଗୋଡ ହରାଇ ବସିଛନ୍ତି । ଶତ ପ୍ରତିଶତ ଦିବ୍ଯାଙ୍କ ହୋଇ ସୁଦ୍ଧା ସେ ବି ବର୍ଦ୍ଧିତ ଭତ୍ତା ପାଇନାହାଁନ୍ତି । ଓଲଟା ତାଙ୍କୁ ମିଳୁଥିବା ୧୨ ଶହ ଭତ୍ତା ଟଙ୍କାରୁ ଏବେ ୨ ଶହ କାଟି ଦିଆଯାଉଥିବା ନେଇ ସେ କହିଛନ୍ତି ।
ଜିଲ୍ଲାରେ ଅନେକ ଜଣ ୮୦ ରୁ ଶତ ପ୍ରତିଶତ ଭିନ୍ନକ୍ଷମ ଥିଲେ ମଧ୍ଯ ସେମାନେ ବର୍ଦ୍ଧିତ ଭତ୍ତା ପାଇବାରୁ ବଞ୍ଚିତ ଅଛନ୍ତି। ସରକାରୀ ଯୋଜନା ଠିକ୍ ଭାବରେ କାର୍ଯ୍ୟକାରୀ ହେଉ ନଥିବା ବେଳେ ସରକାର କେବଳ ନିଜ ଭାଷଣ ବାଜିରେ ବାହା ବାହା ନେଉଥିବା ନେଇ ସ୍ଥାନୀୟ ଲୋକେ କହିଛନ୍ତି । ଅନ୍ଯପଟେ ଭିନ୍ନକ୍ଷମଙ୍କ ସମସ୍ଯା ଓ ତାର ସମାଧାନ ପାଇଁ ସ୍ଥାନୀୟ ବିଡିଓ ମାନଙ୍କୁ ନିର୍ଦ୍ଦେଶ ଦେଇଥିବା ନେଇ କହିଛନ୍ତି ଜିଲ୍ଲାପାଳ ।