ନନ୍ଦିଘୋଷ ବ୍ୟୁରୋ : କର୍ଣ୍ଣାଟକ ମାଙ୍ଗାଳୁରୁ ଜେଲରେ ଫୁଡ ପଏଜନିଂ। ୪୫ରୁ ଅଧିକ ବିଚାରାଧୀନ କଏଦୀ ଅସୁସ୍ଥ ହୋଇଛନ୍ତି। ସମସ୍ତ ଅସୁସ୍ଥ କଏଦୀଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି। ଖାଦ୍ୟ ଖାଇବା ପରେ ସମସ୍ତଙ୍କ ପେଟ ଯନ୍ତ୍ରଣା ଓ ବାନ୍ତି ହେବା ପରେ ଜେଲରେ ଚାଞ୍ଚଲ୍ୟ ଖେଳିଯାଇଥିଲା। ଏହି ଘଟଣା ପରେ ବିଷାକ୍ତ ଖାଦ୍ୟ ନେଇ ତନାଘନା ଜାରି ରହିଛି। ଏହା ସହ ଜେଲର ସୁରକ୍ଷାକୁ ବଢାଇ ଦିଆଯାଇଛି। ପୋଲିସ କମିଶନର ଅନୁପମ ଅଗ୍ରୱାଲ ହସ୍ପିଟାଲ ପରିଦର୍ଶନ କରିବା ସହ ଘଟଣା ତଦନ୍ତ ନିର୍ଦ୍ଦେଶ ଦେଇଛନ୍ତି।
ବଢ଼ିଲା ଔରେଙ୍ଗଜେବଙ୍କୁ ନେଇ ମନ୍ତବ୍ୟ ବିବାଦ, ମହାରାଷ୍ଟ୍ର ବିଧାନସଭାରୁ ସସପେଣ୍ଡ ହେଲେ ସାଂସଦ ଆବୁ ଆଜମୀ
ନନ୍ଦିଘୋଷ ବ୍ୟୁରୋ : ବଢ଼ିଲା ଔରେଙ୍ଗଜେବଙ୍କୁ ନେଇ ମନ୍ତବ୍ୟ ବିବାଦ। ମହାରାଷ୍ଟ୍ର ବିଧାନସଭାରୁ ସସପେଣ୍ଡ ହେଲେ ସମାଜବାଦୀ ପାର୍ଟି ବିଧାୟକ ଆବୁ ଆଜମୀ। ମୋଗଲ ଶାସକଙ୍କୁ ସେ ପ୍ରଶଂସା କରିବା ସହ ଛାବା ଚଳଚ୍ଚିତ୍ରରେ ଐତିହାସିକ ଘଟଣାବଳୀକୁ ବିକୃତ କରାଯାଇଥିବାରୁ ସମାଲୋଚନା କରିଥିଲେ। ଏପରିକି ଔରେଙ୍ଗଜେବଙ୍କୁ ଜଣେ ଭଲ ପ୍ରଶାସକ ବୋଲି କହିଥିଲେ ଆଜମୀ। ଏହା ସହ ଅତୀତରେ ଆଫଗାନିସ୍ତାନ ଓ ପରେ ବର୍ମା ଯାଏ ଭାରତର ସୀମା ପରିବ୍ୟାପ୍ତ ହୋଇଥିଲା। ଔରେଙ୍ଗଜେବ ଅନେକ ମନ୍ଦିର ନିର୍ମାଣ କରିଥିଲେ। ସେ ଜଣେ ନିଷ୍ଠୁର ପ୍ରଶାସକ ନଥିଲେ। ଔରେଙ୍ଗଜେବଙ୍କ ସମୟରେ ଭାରତ ସୁନାର ପକ୍ଷୀ ଥିଲା। ସେତେବେଳେ ବିଶ୍ବ ଜିଡିପିରେ ଭାରତର ଅବଦାନ ୨୪ ପ୍ରତିଶତ ଥିଲା ବୋଲି କହିଥିଲେ ଆଜମୀ।
ଏହାକୁ କେନ୍ଦ୍ର କରି ଆଜମୀଙ୍କୁ ଗୃହରୁ ବାହାର କରିବା ଲାଗି ସଂସଦୀୟ ବ୍ୟାପାର ମନ୍ତ୍ରୀ ଚନ୍ଦ୍ରକାନ୍ତ ପାଟିଲ ଏକ ପ୍ରସ୍ତାବ ଆଗତ କରିବା ପରେ ତାହା ଗୃହୀତ ହୋଇଥିଲା। ସେପଟେ ଏହି ନିଷ୍ପତ୍ତିକୁ ଅନ୍ୟାୟ ବୋଲି କହିଛନ୍ତି ୪ ଥରର ବିଧାୟକ ଆଜମୀ। ରାଜ୍ୟରେ ଦୁଇ ପ୍ରକାର ଆଇନ ରହିଛଇ କି ବୋଲି ସେ ପ୍ରଶ୍ନ କରିଛନ୍ତି। ପୂର୍ବରୁ ଛତ୍ରପତି ଶିବାଜୀଙ୍କ ସମ୍ପର୍କରେର ଅଭିନେତା ରାହୁଲ ସୋଲାପୁର୍କର ଓ ପୂର୍ବତନ ସାମ୍ବାଦିକ ପ୍ରଶାନ୍ତ କୋରତକର ମନ୍ତବ୍ୟ ଦେଇଥିବାରୁ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ବିରୋଧୀ। ଆଜମୀ ତାଙ୍କର ଏହି ବିବୃତି ପ୍ରତ୍ୟାହାର କରି ନିଅନ୍ତୁ ବୋଲି ଦାରି କରିଥିଲେ ଉପମୁଖ୍ଯମନ୍ତ୍ରୀ ଏକନାଥ ସିଦେ। ତେଣେ ଆଜମୀଙ୍କ ବିରୋଧରେ ଏମପି ନରେଶ ମିହାସେକ ଏକ ଏଫଆଇଆର ଦାୟର କରିଛନ୍ତି। ଆବୁ ଆଜମୀ ମନଖୁର୍ଦ୍ଦ ଶିବାଜୀ ନଗରରୁ ପ୍ରତିନିଧିତ୍ବ କରୁଛନ୍ତି। ତେଣେ ଏହି ପ୍ରସଙ୍ଗରେ ମୁହଁ ଖୋଲିଛନ୍ତି ଉତ୍ତରପ୍ରଦେଶ ମୁଖ୍ଯମନ୍ତ୍ରୀ ଯୋଗୀ ଆଦିତ୍ୟନାଥ। ଆଜମୀଙ୍କୁ ସମାଜବାଦୀ ପାର୍ଟିରୁ ବହିଷ୍କାର କରିବା ଲାଗି ସେ ଦାବି କରିଛନ୍ତି। ଏହି ଧରଣର ଲୋକଙ୍କୁ କିପରି ସାବାଡ କରାଯିବ ତାହାକ ଉତ୍ତରପ୍ରଦେଶ ଜାଣେ ବୋଲି ସେ କହିଛନ୍ତି।
ଆମେରିକା ଲାଗି ସୁବର୍ଣ୍ଣ ଯୁଗ, ଗ୍ରୀନଲାଣ୍ଡ ଓ ପାନାମା କେନାଲ କବଜା ଲକ୍ଷ୍ୟ
ନନ୍ଦିଘୋଷ ବ୍ୟୁରୋ : ଆମେରିକା ଲାଗି ଆରମ୍ଭ ହୋଇଛି ସୁବର୍ଣ୍ଣ ଯୁଗ। ଏଥିଲାଗି ଦେଶବାସୀଙ୍କୁ ପ୍ରସ୍ତୁତ ହେବାକୁ ପଡିବ। ଆମେରିକୀୟ କଂଗ୍ରେସର ମିଳିତ ଅଧିବେଶନରେ ଉଦବୋଧନ ଦେଇଛନ୍ତି ରାଷ୍ଟ୍ରପତି ଡୋନାଲଡ ଟ୍ରମ୍ପ। ରାଷ୍ଟ୍ରପତି ନିର୍ବାଚିତ ହେବା ପରେ ଆମେରିକୀୟ କଂଗ୍ରେସକୁ ଉଦବୋଧନ ଦେଇଛନ୍ତି ଟ୍ରମ୍ପ। ଦେଶର ଆଭ୍ୟନ୍ତରୀଣ ଓ ବୈଦେଶିକ ନୀତି ପ୍ରସଙ୍ଗରେ ମତ ରଖିଛନ୍ତି ଟ୍ରମ୍ପ। ମାତ୍ର ୬ ସପ୍ତାହର ଶାସନ କାଳରେ ଦେଶରେ ପ୍ରବାସୀଙ୍କୁ ନିଜ ଦେଶକୁ ଫେରାଇବା, ବହୁ ରାଷ୍ଟ୍ର ଉପରେ ଶୁଳ୍କ ଲାଗୁ କରିବା, ବ୍ୟାପକ ଛଟେଇ କରି ବିଶ୍ବକୁ ଥରହର କରିସାରିଲେଣି ଟ୍ରମ୍ପ।
ଆମେରିକା ସୀମାରେ ଗ୍ରୀନଲ୍ୟାଣ୍ଡକୁ ସାମିଲ କରିବା ପାଇଁ ଲକ୍ଷ୍ୟ ରଖିଛନ୍ତି ଟ୍ରମ୍ପ। ନିଜ ଭବିଷ୍ୟତ ନିଜେ ନିର୍ଦ୍ଧାରଣ କରିବାକୁ ଗ୍ରାନଲ୍ୟାଣ୍ଡବାସୀଙ୍କୁ ଆହ୍ବାନ ଦେଇଛନ୍ତି ଟ୍ରମ୍ପ। ଏହା ସହ ଆମେରିକାର ନିରାପତ୍ତା ଲାଗି ଗ୍ରୀନଲାଣ୍ଡକୁ ମିଶାଇବା ଲକ୍ଷ୍ୟ ବିଷୟ ସେ ଘୋଷଣା କରିଛନ୍ତି। ସେହିପରି ପାନାମା କେନାଲକୁ ଆମେରିକା ନିଜ ଅକ୍ତିଆରକୁ ଆଣିବ ବୋଲି ସେ ସୂଚନା ଦେଇଛନ୍ତି। ଆବ୍ରାହମ ଚୁକ୍ତି ଅନୁସାରେ ଗାଜାରୁ ପଣବନ୍ଦୀଙ୍କୁ ମୁକୁଳାଇ ଆଣିବାକୁ ସେ ପ୍ରତିଶ୍ରୁତି ଦେଇଛନ୍ତି। ଏହା ସହ ଗାଜା ପ୍ରସଙ୍ଗରେ ଆହୁରି କିଛି ଚୁକ୍ତି ସ୍ବାକ୍ଷର କରାଯିବ ବୋଲି ସେ କହିଛନ୍ତି।
ଆମେରିକା ସହ ୟୁକ୍ରେନ ରାଷ୍ଟ୍ରପତି ଜେଲେନସ୍କି ଖଣିଜ ଚୁକ୍ତି କରିବାକୁ ଆଗ୍ରହୀ ଅଛନ୍ତି। ଏନେଇ ସେ ଜେଲେନସ୍କିଙ୍କଠାରୁ ପତ୍ର ପାଇଛନ୍ତି ବୋଲି ସେ କହିଛନ୍ତି। ୟୁକ୍ରେନକୁ ସମସ୍ତ ପ୍ରକାର ସାମରିକ ସହାୟତା ବନ୍ଦ ଘୋଷଣା ପରେ ନରମିଛନ୍ତି ଜେଲେନସ୍କି। ଭାରତ ପକ୍ଷରୁ ଲାଗୁ କରାଯାଇଥିବା ଅଧିକ ଶୁଳ୍କକୁ ସେ ବିରୋଧ କରିବା ସହ ଏହାର ଫଳ ଭୋଗିବାକୁ ପଡିପାରେ ବୋଲି ସେ ଚେତାବନୀ ଦେଇଛନ୍ତି। ଏହା ସହ ଶୁଳ୍କ ପ୍ରସଙ୍ଗରେ ଚୀନ ଓ ୟୁରୋପୀୟ ୟୁନିଅନକୁ ବି ଟାର୍ଗେଟ କରିଛନ୍ତି।
ଆସନ୍ତା ଏପ୍ରିଲ ୨ରୁ ବିଜିନେସ ପାର୍ଟନରଙ୍କ ଲାଗି ନୂଆ ଶୁଳ୍କ ନୀତି ଲାଗୁ ହେବ ବୋଲି ଚେତାବନୀ ଦେଇଛନ୍ତି ଟ୍ରମ୍ପ। ସରକାରୀ ସ୍ତରରେ ଚାଲିଥିବା ଜାଲିଆତିକୁ ବିଲୋପ କରାଯିବା ସହ କର୍ମଚାରୀଙ୍କ ଦକ୍ଷତା ସମ୍ପର୍କରେ ସମୀକ୍ଷା କରାଯିବ। ଆମେରିକା ଉପରେ ଇସ୍ରାଏଲ ପରି ମିସାଇଲ ଡିଫେନ୍ସ ସିଲ୍ଡ ପ୍ରତିଷ୍ଠା କରାଯିବ ବୋଲି ସୂଚନା ଦେଇଛନ୍ତି ଟ୍ରମ୍ପ।
ଜନଗଣନା ପରେ ଆସନ୍ତାବର୍ଷ ସୀମା ପୁନଃନିର୍ଦ୍ଧାରଣ; ଲୋକସଂଖ୍ୟା ଓ ଭୌଗୋଳିକ ସ୍ଥିତିକୁ ଦେଖି ଚାଲିବ ପ୍ରକ୍ରିୟା
ନନ୍ଦିଘୋଷ ବ୍ୟୁରୋ : ଜନସଂଖ୍ୟା ଆଧାରରେ ସୀମା ପୁନଃନିର୍ଦ୍ଧାରଣ ହେବ । ସାରା ଦେଶରେ ଏହି ପ୍ରକ୍ରିୟା କରିବା ପାଇଁ କେନ୍ଦ୍ର ସରକାର ଅଣ୍ଟା ଭିଡିଥିବା ବେଳେ ଅନେକ ରାଜ୍ୟରେ ଏ ନେଇ ସୃଷ୍ଟି ହୋଇଛି ଦ୍ବନ୍ଦ୍ବ । ପ୍ରଥମେ ୨୦୨୫ରେ ଜନଗଣନା ଓ ୨୦୨୬ରେ ସୀମା ପୁନଃନିର୍ଦ୍ଧାରଣ ପ୍ରକ୍ରିୟା ତ୍ବରାନ୍ବିତ ହେବ । ଲୋକସଂଖ୍ୟା ଓ ଭୌଗୋଳିକ ସ୍ଥିତିକୁ ଦେଖି ଯଦି ସୀମା ପୁନଃନିର୍ଦ୍ଧାରଣ କରାଯାଏ ତେବେ ଓଡିଶାର ଲୋକସଭା ଆସନ ସଂଖ୍ୟା ୨୧ରୁ ୨୮କୁ ବୃଦ୍ଧି ପାଇବାର ସମ୍ଭାବନା ରହିଛି । ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟଙ୍କ ଯୁକ୍ତି- ଗଣତାନ୍ତ୍ରିକ ବ୍ୟବସ୍ଥା ଅନୁସାରେ ସୀମା ପୁନଃନିର୍ଦ୍ଧାରଣ କରାଯାଉ । କିଛି ରାଜ୍ୟରେ ଦେଖାଦେଇଥିବା ବିବାଦକୁ ମଧ୍ୟ ଏଡାଇ ଦେବା ଅନୁଚିତ । କାହିଁକି ଏଯାଏଁ କେନ୍ଦ୍ର ସରକାର ଜାତିଭିତ୍ତିକ ଜନଗଣନା କରୁନାହାଁନ୍ତି ବୋଲି ଦଳ ପ୍ରଶ୍ନ ଉଠାଇଛି । ଓଡିଶା ସରକାର ଜନସଂଖ୍ୟା ନିୟନ୍ତ୍ରଣରେ ଅନ୍ୟ ରାଜ୍ୟ ତୁଳନାରେ ଅଧିକ ସଫଳତା ପାଇଛନ୍ତି । ତେଣୁ ଏହାଦ୍ବାରା କେଉଁଠି ନା କେଉଁଠି ଓଡିଶା ପ୍ରଭାବିତ ହେବାର ଆଶଙ୍କା ରହିଛି ।
ରାଜ୍ୟର ଉଭୟ ଲୋକସଭା ଓ ବିଧାନସଭା ଆସନ ସଂଖ୍ୟା ବଢିବା ଦରକାର । ସେହି ଅନୁସାରେ କାର୍ଯ୍ୟକ୍ରମର ଆବଶ୍ୟକତା ରହିଛି । କଂଗ୍ରେସ ବିଧାୟକ ଅଶୋକ ଦାସ କହିଛନ୍ତି- ପ୍ରଥମେ କେନ୍ଦ୍ର ସରକାର ଜନଗଣନା କରନ୍ତୁ । ଜନଗଣନା ନକରି କେଉଁ ଆଧାରରେ ସୀମା ପୁନଃନିର୍ଦ୍ଧାରଣ କରିବେ ବୋଲି କଂଗ୍ରେସ ପ୍ରଶ୍ନ ଉଠାଇଛି । ବିଜେପି ବିଧାୟକ ଅଶ୍ବିନୀ ଷଢଙ୍ଗୀ କହିଛନ୍ତି- କେନ୍ଦ୍ର ସବୁ ଦିଗକୁ ବିଚାର କରି ନିୟମ ଅନୁସାରେ ସୀମା ପୁନଃନିର୍ଦ୍ଧାରଣ କରୁଛନ୍ତି । ସୀମା ପୁନଃନିର୍ଦ୍ଧାରଣ କରାଗଲେ ଓଡିଶାର କେତେ ଲୋକସଭା ଓ କେତେ ବିଧାନସଭା ଆସନ ବଢିବ ଓ କେବେ ଜାତିଭିତ୍ତିକ ଜନଗଣନା କରାଯିବ ତାକୁ ନେଇ ଆରମ୍ଭ ହୋଇଛି ବୟାନବାଜି ।
ରଙ୍ଗବଦଳା ରାଜନୀତିରେ ଆଉ ଏକ ରୂପ, ଗେରୁଆ ହେବ ସରକାରୀ ସ୍କୁଲ
ଭୁବନେଶ୍ୱର : ରାଜ୍ୟରେ ବଦଳିବ ସବୁ ସ୍କୁଲ କୋଠାର ରଙ୍ଗ । ଗେରୁଆ ହେବ ସମସ୍ତ ସରକାରୀ ସ୍କୁଲ । ସମସ୍ତ ସରକାରୀ ସ୍କୁଲ ଏବଂ ପିଏମ୍ ଶ୍ରୀ ସ୍କୁଲ ରଙ୍ଗ ସମାନ କରିବାକୁ ନିର୍ଦ୍ଦେଶ ଦିଆଯାଇଛି । ଏ ନେଇ ସମସ୍ତ ଜିଲ୍ଲାପାଳମାନଙ୍କୁ ନିର୍ଦ୍ଦେଶ ଦେଇଛି ସ୍କୁଲ ଓ ଗଣଶିକ୍ଷା ବିଭାଗ। ସ୍କୁଲ ନିର୍ମାଣ, ମରାମତି ବେଳେ ରଙ୍ଗ ସମାନ କରିବାକୁ ନିର୍ଦ୍ଦେଶ ଦିଆଯାଇଛି । ସ୍କୁଲକୁ ଗେରୁଆ ରଙ୍ଗ କରିବାକୁ ନିର୍ଦ୍ଦେଶନାମା ଜାରି ହୋଇଛି । ପୂର୍ବରୁ ୟୁନିଫର୍ମ ରଙ୍ଗ ବଦଳାଇବାକୁ ଯୋଜନା କରିଛି କରିଛି ବିଜେପି ସରକାର। ଏବେ ସ୍କୁଲ ରଙ୍ଗକୁ ଗେରୁଆ କରିବାକୁ ନିର୍ଦ୍ଦେଶ ଦେଇଛି ସ୍କୁଲ ଓ ଗଣଶିକ୍ଷା ବିଭାଗ।
ଯାଜପୁରରେ ଭୂମିପୁତ୍ର ବିଜୁ ପଟ୍ଟନାୟକଙ୍କ ସର୍ବବୃହତ ପ୍ରତିମୂର୍ତ୍ତି ଉନ୍ମୋଚିତ
ନନ୍ଦିଘୋଷ ବ୍ୟୁରୋ : ଟଲ୍ ମ୍ୟାନଙ୍କ ସର୍ବବୃହତ ପ୍ରତିମୂର୍ତ୍ତି। ଯାଜପୁରରେ ଉନ୍ମୋଚିତ ହେଲା ସବୁଠୁ ବଡ଼ ପ୍ରତିମୂର୍ତ୍ତି। ଏକାଠି ହେଲେ ହଜାର ହଜାର ବିଜୁ ପ୍ରେମୀ। ବିଜୁ ଜୟନ୍ତୀରେ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ୪୫ ଫୁଟର ବିଶାଳ ପ୍ରତିମୂର୍ତ୍ତିଙ୍କୁ ଉନ୍ମୋଚିତ କରି ଓଡ଼ିଶା ନିର୍ମାତାଙ୍କୁ ମନେ ପକାଇଛନ୍ତି ବିଜେଡି ନେତା। ବିଜୁ ବାବୁଙ୍କ ଚିନ୍ତାଧାରାରେ ଏକାଠି ହୋଇଛନ୍ତି ଓଡ଼ିଶାବାସୀ। ହୀନମନ୍ୟତା ଦର୍ଶାଇ ସରକାର ସିନା ବିଜୁ ଜୟନ୍ତୀ ଛୁଟି ବନ୍ଦ କଲେ। ହେଲେ ଓଡ଼ିଆଙ୍କ ମନରୁ ବିଜୁ ବାବୁଙ୍କୁ କଦପି କାଢ଼ି ହେବନି ବୋଲି କହିଛନ୍ତି ବରିଷ୍ଠ ବିଜେଡି ନେତା ଦେବୀ ମିଶ୍ର। ସେହିପରି ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଛନ୍ତି, ଯାଜପୁର ଜିଲ୍ଲାରେ ଯାହା ବିକାଶ ହୋଇଛି ତାହା କେବଳ ବିଜୁ ବାବୁଙ୍କ ପାଇଁ। ଯାଜପୁରକୁ ଜିଲ୍ଲାର ମାନ୍ୟତା ସହ ଶିଳ୍ପାୟନ ନୂଆ ଯୁଗ ଆରମ୍ଭ କରିଥିଲେ ବିଜୁ ପଟ୍ଟନାୟକ। ଓଡ଼ିଶାବାସୀଙ୍କ ହୃଦୟରେ ବିଜୁ ପଟ୍ଟନାୟକ ପ୍ରତି ସ୍ବତନ୍ତ୍ର ସ୍ଥାନ ରହିଛି ବୋଲି କହିଛନ୍ତି ପ୍ରମିଳା ମଲ୍ଲିକ।
ବିଜୁ ଜୟନ୍ତୀରେ ଓଡ଼ିଶାର ସର୍ବବୃହତ ବିଜୁ ପଟ୍ଟନାୟକ ପ୍ରତିମୂର୍ତ୍ତି ଉନ୍ମୋଚନ ପୂର୍ବରୁ ଶୋଭାଯାତ୍ରାରେ ବାହାରିଥିଲେ ବିଜେଡି ନେତା ଓ ବିଜୁ ପ୍ରେମୀ। ଏହା ପରେ ଯଯାତି କେଶରୀ ମେଡିକାଲ କଲେଜ ସମ୍ମୁଖରେ ଥବା ବିଶାଳକାୟ ୪୫ ଫୁଟର ସର୍ବବୃହତ ବିଜୁ ବାବୁଙ୍କ ପ୍ରତିମୂର୍ତ୍ତି ସମ୍ମୁଖରେ ଏକାଠି ହୋଇ ପୁଷ୍ପମାଲ୍ୟ ଅପର୍ଣ କରିଥିଲେ ବିଜେଡି ନେତା। ଜନ୍ମ ଜୟନ୍ତୀରେ ଭୂମି ପୁତ୍ରଙ୍କୁ ମନେ ପକାଇ ତାଙ୍କ ସ୍ବପ୍ନକୁ ଆଗେଇ ନେବାକୁ ସଙ୍କଳ୍ପ ନେଇଥିଲେ ନେତା।
କାର୍ଯ୍ୟକ୍ରମରେ ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ, ସାଂସଦ ମାନସ ମଙ୍ଗରାଜ, ବିଧାୟକ ସଂଜୀବ ମଲ୍ଲିକ, ବ୍ୟୋମକେଶ ରାୟ, ଦେବୀ ରଂଜନ ତ୍ରୀପାଠୀ, ବିଧାୟକ ବିଶ୍ୱ ରଂଜନ ମଲ୍ଲିକ, ପୂର୍ବତନ ବିଧାୟକ ପ୍ରଣବ ବଳବନ୍ତ ରାୟ, ପ୍ରଣବ ପ୍ରକାଶ ଦାସ, ପୂର୍ବତନ ସାଂସଦ ଶର୍ମିଷ୍ଠା ସେଠୀ ପ୍ରମୁଖ ସାମିଲ ହୋଇଥିଲେ । ୧୦ ହଜାରରୁ ଅଧିକ ବିଜୁପ୍ରେମୀ ସାମିଲ ହୋଇ ବିଜୁବାବୁଙ୍କ ଓଡ଼ିଶା ପ୍ରତି ଥିବା ଅବଦାନକୁ ମନେ ପକାଇଥିଲେ। ଯାହାକୁ ନେଇ ଉତ୍ସବ ମୁଖର ହୋଇଥିଲା ଯାଜପୁର ସହର।
କେଦାରନାଥରେ ଚାଲିବ ରାପଓ୍ୱେ ; ସହଜ ହେବ ଯାତ୍ରା, କ୍ୟାବିନେଟ୍ ବୈଠକରେ ମିଳିଲା ମଞ୍ଜୁରୀ
ନନ୍ଦିଘୋଷ ବ୍ୟୁରୋ : ଏବେ ସହଜ ହେବ କେଦାରନାଥ ଯାତ୍ରା । ବୁଧବାର କେନ୍ଦ୍ର କ୍ୟାବିନେଟ ବୈଠକରେ ଉତ୍ତରାଖଣ୍ଡକୁ ଏକ ବଡ଼ ଉପହାର ମିଳିଛି। ଉତ୍ତରାଖଣ୍ଡର କେଦାରନାଥ ଧାମ ପାଇଁ ରୋପୱେ ପ୍ରକଳ୍ପକୁ କ୍ୟାବିନେଟ୍ ପକ୍ଷରୁ ଅନୁମୋଦନ କରାଯାଇଛି । ସୋନପ୍ରୟାଗରୁ କେଦାରନାଥ ପର୍ଯ୍ୟନ୍ତ ୧୨.୯ କିଲୋମିଟର ରୋପୱେ ନିର୍ମାଣ କରାଯିବ, ଯେଉଁଥିରେ ୪୦୮୧ କୋଟି ଟଙ୍କା ଖର୍ଚ୍ଚ ହେବ। ନ୍ୟାଶନାଲ ହାଇଓ୍ବେ ଲଜିଷ୍ଟିକ୍ସ ମ୍ୟାନେଜମେଣ୍ଟ ଏହାକୁ ନିର୍ମାଣ କରିବ।
କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି, ବର୍ତ୍ତମାନ ୮-୯ ଘଣ୍ଟାରେ ସମାପ୍ତ ହେଉଥିବା ଯାତ୍ରା ୩୬ ମିନିଟ୍କୁ ହ୍ରାସ ପାଇବ, ଯାହା ଲୋକଙ୍କ ପାଇଁ ବଡ଼ ସୁବିଧା ଦାୟକ ହେବ। ଏଥିରେ ୩୬ ଜଣଙ୍କ ବସିବା କ୍ଷମତା ରହିବ। ଏହା ସ୍ଥାନୀୟ ବ୍ୟବସାୟଗୁଡ଼ିକୁ ଲାଭ ଦେବ ଏବଂ ଅଞ୍ଚଳର ଆର୍ଥିକ ଅଭିବୃଦ୍ଧିକୁ ବୃଦ୍ଧି କରିବ। ଏହା ସମ୍ପୂର୍ଣ୍ଣ ଛଅ ମାସ ପାଇଁ ତୀର୍ଥଯାତ୍ରୀଙ୍କ ନିରନ୍ତର ପରିବହନ ସୁନିଶ୍ଚିତ କରିବ । କେବଳ ଏତିକି ନୁହେଁ, ଯାତ୍ରା ଋତୁରେ ନିଯୁକ୍ତି ସୁଯୋଗ ମଧ୍ୟ ବୃଦ୍ଧି ପାଇବ । ଅନ୍ୟପକ୍ଷେ ଦ୍ୱିତୀୟ ପ୍ରକଳ୍ପ ହେଉଛି ହେମକୁଣ୍ଡରେ ଏକ ରୋପୱେ ପ୍ରକଳ୍ପ ନିର୍ମାଣ କରିବା, ଯାହା ପାଇଁ ୨୭୩୦ କୋଟି ଟଙ୍କା ଖର୍ଚ୍ଚ ହେବ। ଏହି ପ୍ରକଳ୍ପ ମାଧ୍ୟମରେ, ହେମକୁଣ୍ଡ ସାହିବ ଏବଂ ଫୁଲ ଉପତ୍ୟକା ଯାତ୍ରା କରିପାରିବେ ।
ହିନ୍ଦୁଙ୍କ ଘରେ ଲାଗିଲା ଏପରି ପୋଷ୍ଟର , ଖେଳି ଗଲାଣି ଆତଙ୍କ
ନୂଆଦିଲ୍ଲୀ : ରାଷ୍ଟ୍ରୀୟ ରାଜଧାନୀ ଦିଲ୍ଲୀରେ ଏପରି ଏକ ମାମଲା ସାମ୍ନାକୁ ଆସିଛି ଯାହା ଦୁଇଟି ସମ୍ପ୍ରଦାୟ ମଧ୍ୟରେ ଉତ୍ତେଜନା ବୃଦ୍ଧି କରିଛି । ପ୍ରକୃତରେ, ଦିଲ୍ଲୀର ବ୍ରହ୍ମପୁରୀ ଅଞ୍ଚଳରେ, ହିନ୍ଦୁ ପରିବାର ମାନଙ୍କ ଘର ବାହାରେ ଏପରି ଏକ ପୋଷ୍ଟର ଲଗାଇଛନ୍ତି ଯାହା ଯୋଗୁଁ ଆଖପାଖ ପରିବେଶରେ ବିଶୃଙ୍ଖଳା ସୃଷ୍ଟି ହୋଇଛି । ଏହି ହିନ୍ଦୁ ପରିବାରମାନେ ସେମାନଙ୍କ ଘର ସାମ୍ନାରେ ପୋଷ୍ଟର ଲଗାଇଛନ୍ତି, ଯେଉଁଥିରେ ଲେଖାଯାଇଛି ଯେ ‘ଘରଟି ବିକ୍ରୟ ପାଇଁ ଅଛି’ ।
କାହିଁକି ଲାଗିଛି ଏପରି ପୋଷ୍ଟର ?
ସେଠାରେ ରହୁଥିବା ଲୋକମାନେ ଅଭିଯୋଗ କରିଛନ୍ତି ଯେ ସେମାନଙ୍କ ଗଳିରେ ଏକ ମସଜିଦର ସମ୍ପ୍ରସାରଣ କାର୍ଯ୍ୟ ଚାଲିଛି। ଏହା ନିକଟରେ ଏକ ଶିବ ମନ୍ଦିର ଅଛି ଯେଉଁଠାରେ ହିନ୍ଦୁ ପରିବାର ପୂଜା ଏବଂ କୀର୍ତ୍ତନ କରନ୍ତି। କିନ୍ତୁ ଯଦି ମସଜିଦର ଗେଟ୍ ଶିବ ମନ୍ଦିର ଆଡକୁ ଖୋଲେ, ତେବେ ଉଭୟ ପାର୍ଶ୍ୱର ଲୋକମାନେ ସମସ୍ୟାର ସମ୍ମୁଖୀନ ହେବେ । ଏଠାରେ ରହୁଥିବା ଲୋକେ କହିଛନ୍ତି କି, ଏହି କାରଣରୁ ସମ୍ପ୍ରତିକ ଦଙ୍ଗାକୁ ନେଇ ଏଠାରେ ଭୟ ଏବଂ ଆତଙ୍କର ବାତାବରଣ ରହିଛି। ସେଥିପାଇଁ ହିନ୍ଦୁଙ୍କ ଘର ବାହାରେ ଘର ବିକ୍ରି ପାଇଁ ପୋଷ୍ଟର ଲଗାଯାଇଛି।
ପ୍ରକୃତ କାରଣ କ’ଣ ?
୨୦୨୦ ମସିହାରେ ଘଟିଥିବା ଦଙ୍ଗା ପରେ ସମଗ୍ର ଅଞ୍ଚଳରେ ଭୟର ବାତାବରଣ ଖେଳିଯାଇଥିଲା ଥିଲା। ଦଙ୍ଗା ପରେ ଅନେକ ହିନ୍ଦୁ ପରିବାର ସ୍ଥାନାନ୍ତରିତ ହୋଇଥିଲେ । ଏବେ ଏପରି ପରିସ୍ଥିତିରେ, ଲେନ ନମ୍ବର ୧୩ ରେ ନିର୍ମିତ ମସଜିଦକୁ ଲେନ ନମ୍ବର ୧୨କୁ ମଧ୍ୟ ସମ୍ପ୍ରସାରିତ କରାଯାଉଛି । ଯଦି ଏହି ଲେନରେ ଗେଟ୍ ଖୋଲିଯାଏ, ତେବେ ସମସ୍ତେ ଅସୁବିଧାର ସମ୍ମୁଖୀନ ହେବେ। ଏହି କାରଣରୁ, ଅନେକ ହିନ୍ଦୁଙ୍କ ଘରକୁ ମୁସଲମାନମାନେ କିଣି ନେଉଛନ୍ତି।
ସରକାରଙ୍କୁ ରାଜନୈତିକ ପକ୍ଷାଘାତ ହୋଇଛି : ବିଧାୟକ ଅରୁଣ ସାହୁ
ଭୁବନେଶ୍ୱର : ସରକାରଙ୍କୁ ରାଜନୈତିକ ପକ୍ଷାଘାତ ହୋଇଛି । ଦୁଇମାସ ତଳେ ସରକାର ଗୋଟିଏ ନିଷ୍ପତ୍ତି ନେଇ, କ୍ୟାଲେଣ୍ଡରରେ ମାର୍ଚ୍ଚ ୫କୁ ଛୁଟି ଘୋଷଣା କରିଥିଲେ । ହଠାତ୍ ଦୁଇଦିନ ତଳେ ସେହି ଛୁଟିକୁ ପୁଣି ବାତିଲ କରିଛନ୍ତି । ଏହା ରାଜ୍ୟ ସରକାରଙ୍କ ବାଚଳାମିକୁ ତୀବ୍ର ସମାଲୋଚନା କରିଛନ୍ତି ବିଧାୟକ ଅରୁଣ ସାହୁ । ଗୋଟିଏ ସରକାର ଦୁଇ ଦୁଇଟି ନିଷ୍ପତ୍ତି କେମିତି ନେଉଛନ୍ତି । ଏହା କେବଳ ରାଜନୈତିକ ପକ୍ଷାଘାତ ବୋଲି କହିଛନ୍ତି ଅରୁଣ । ନୟାଗଡ଼ ବିଜୁ ଜନତା ଦଳ କାର୍ଯ୍ୟାଳୟରେ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ୧୦୯ ତମ ବିଜୁ ଜୟନ୍ତୀ ପାଳନ କରିବା ଅବସରରେ ଏହା କହିଛନ୍ତି ଅରୁଣ ସାହୁ । ବିଜୁ ବାବୁ ତ୍ରିସ୍ତରୀୟ ପଞ୍ଚାୟତି ରାଜ ବ୍ୟବସ୍ଥାକୁ ଆରମ୍ଭ କରିଥିଲେ । କଂଗ୍ରେସ ଦଳ ଠାରୁ ଆରମ୍ଭ କରି ସମସ୍ତ ଦଳ ମାର୍ଚ୍ଚ ୫ କୁ ବିଜୁ ବାବୁଙ୍କ ଜନ୍ମ ଦିବସ ତଥା ପଞ୍ଚାୟତ ରାଜ ଦିବସ ଭାବେ ସାରା ରାଜ୍ୟରେ ପାଳନ କରି ଆସୁଥିଲେ । ହେଲେ ବିଜେପି ସରକାର ଏହାକୁ ବନ୍ଦ କରିଦେଇଛନ୍ତି ।
ରାହୁଲ ଗାନ୍ଧିଙ୍କ ଉପରେ ଅଦାଲତ ଲଗାଇଲେ ୨ଶହ ଟଙ୍କାର ଜରିମାନା
ନନ୍ଦିଘୋଷ ବ୍ୟୁରୋ : କଂଗ୍ରେସ ନେତା ରାହୁଲ ଗାନ୍ଧିଙ୍କ ଉପରେ ୨୦୦ ଟଙ୍କାର ଜରିମାନା ଲଗାଇଲେ ଲକ୍ଷ୍ନୌ କୋର୍ଟ । ଲଗାତାର ଶୁଣାଣିରେ କୋର୍ଟରେ ହାଜର ନହେଉଥିବାରୁ ଏହି ଜରିମାନା ଲଗାଇଛନ୍ତି ଅତିରିକ୍ତ ମୁଖ୍ୟ ନ୍ୟାୟିକ ମାଜିଷ୍ଟେଟ୍ । ଏହାଛଡ଼ା ଯେକୌଣସି ପରିସ୍ଥିତିରେ ଏପ୍ରିଲ ୧୪ ତାରିଖରେ କୋର୍ଟରେ ଆଦେଶ ହେବାକୁ ମଧ୍ୟ ଚେତାବନୀ ଦେଇଛି କୋର୍ଟ ।
ବୀର ସାଭରକରଙ୍କ ଉପରେ ମନ୍ତବ୍ୟ ଦେବା ଘଟଣା ନେଇ ଲକ୍ଷ୍ନୌ କୋର୍ଟରେ ଶୁଣାଣି ଚାଲିଥିବା ବେଳେ ବାରମ୍ୱାର ଲୋକସଭାର ବିରୋଧୀଦଳ ନେତା ରାହୁଲ ଗାନ୍ଧୀଙ୍କୁ ହାଜର ହେବାକୁ କୁହାଗଲେ ସୁଦ୍ଧା ସେ ଆସୁନାହାନ୍ତି । ଏଥିପାଇଁ କୋର୍ଟ ରାହୁଲଙ୍କ ଉପରେ ୨୦୦ଟଙ୍କାର ଜୋରିମାନା ଲଗାଇଛନ୍ତି ।
୨୦୨୨ ମସିହାରେ, ଓକିଲ ନୃପେନ୍ଦ୍ର ପାଣ୍ଡେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ବିରୁଦ୍ଧରେ ଫୌଜଦାରୀ କାର୍ଯ୍ୟବିଧି ସଂହିତା (CRPC) ଧାରା ୧୫୬ (୩) ଅନୁଯାୟୀ ଅଭିଯୋଗ ଦାଖଲ କରିଥିଲେ। ଅଭିଯୋଗର ଶୁଣାଣି କରିବା ସମୟରେ, କୋର୍ଟ ରାହୁଲ ଗାନ୍ଧୀଙ୍କୁ ସମନ ଜାରି କରାଯାଇଥିଲା। ସୂଚନା ମୁତାବକ ଓକିଲ ନୃପେନ୍ଦ୍ର ପାଣ୍ଡେଙ୍କ ଅଭିଯୋଗ ଥିଲା ଯେ, ରାହୁଲ ଗାନ୍ଧୀ ୧୭ ଡିସେମ୍ବର, ୨୦୨୨ରେ ମହାରାଷ୍ଟ୍ରର ଆକୋଲାରେ ଏକ ସାମ୍ବାଦିକ ସମ୍ମିଳନୀ ସମୟରେ ବୀର ସାଭରକରଙ୍କୁ ‘ବ୍ରିଟିଶଙ୍କ ଦାସ’ ଏବଂ ‘ପେନସନଭୋଗୀ’ ବୋଲି କହିଥିଲେ।
କାହିଁକି ହାଜର ହେଲେନି ରାହୁଲ ଗାନ୍ଧୀ ?
୫ ମାର୍ଚ୍ଚ , ୨୦୨୫ରେ ଶୁଣାଣି ସମୟରେ, ରାହୁଲ ଗାନ୍ଧୀଙ୍କ ପକ୍ଷରୁ, ତାଙ୍କ ଓକିଲ ପ୍ରାଂଶୁ ଅଗ୍ରୱାଲ କୋର୍ଟରେ ଏକ ଆବେଦନ ଦାଖଲ କରିଥିଲେ, ଯେଉଁଥିରେ ସେ ଆଜି ବ୍ୟକ୍ତିଗତ ଭାବରେ ହାଜର ନହେବାର କାରଣ ଦର୍ଶାଇଥିଲେ। ରାହୁଲ ଗାନ୍ଧୀଙ୍କ ପକ୍ଷରୁ ଦାୟର ଆବେଦନରେ କୁହାଯାଇଛି ଯେ ସେ ବର୍ତ୍ତମାନ ସଂସଦରେ ବିରୋଧୀ ଦଳ ନେତା। ତାଙ୍କର ଜଣେ ବିଦେଶୀ ପ୍ରତିଷ୍ଠିତ ବ୍ୟକ୍ତିଙ୍କ ସହ ପୂର୍ବ ନିର୍ଦ୍ଧାରିତ ସାକ୍ଷାତ ଥିଲା। ଏହା ବ୍ୟତୀତ ଅନ୍ୟ ସରକାରୀ କାମରେ ବ୍ୟସ୍ତ ଥିବାରୁ ସେ କୋର୍ଟରେ ହାଜର ହୋଇପାରିଲେ ନାହିଁ। ସେ କୋର୍ଟଙ୍କ ନିର୍ଦ୍ଦେଶକୁ ସମ୍ମାନ କରନ୍ତି ଏବଂ ଜାଣିଶୁଣି କୋର୍ଟରେ ହାଜର ହେବାକୁ ଏଡାଇବାକୁ ଚେଷ୍ଟା କରୁନାହାଁନ୍ତି।
ଲକ୍ଷ୍ନୌ କୋର୍ଟର ନିଷ୍ପତ୍ତି
କଂଗ୍ରେସ ନେତା ରାହୁଲ ଗାନ୍ଧୀଙ୍କ ଅନୁପସ୍ଥିତି ପାଇଁ କୋର୍ଟ ୨୦୦ ଟଙ୍କା ଜରିମାନା ଲଗାଇଛନ୍ତି ଏବଂ ପରବର୍ତ୍ତୀ ଶୁଣାଣିର ତାରିଖ ୧୪ ଏପ୍ରିଲ ୨୦୨୫ ଧାର୍ଯ୍ୟ କରିଛନ୍ତି। କୋର୍ଟ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ ଯଦି ରାହୁଲ ଗାନ୍ଧୀ ଏହି ତାରିଖରେ ମଧ୍ୟ ବ୍ୟକ୍ତିଗତ ଭାବରେ ହାଜର ନ ହୁଅନ୍ତି, ତେବେ ତାଙ୍କ ବିରୁଦ୍ଧରେ ଆହୁରି ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।