ଭୁବନେଶ୍ବର : ସୁଭଦ୍ରା ଶକ୍ତି ମେଳାରେ ଅଧିକାଂଶ ଷ୍ଟଲ୍ ଖାଁ ଖାଁ। ଭିଡ଼ ନାହିଁ। ଯେଉଁ ଷ୍ଟଲରେ ଲକ୍ଷେ ଟଙ୍କାର ବ୍ୟବସାୟ ହେବା କଥା, ସେଠାରେ ମାତ୍ର ୫ ହଜାର ଟଙ୍କାର କିଣାବିକା। ଭୁବନେଶ୍ଵର ଜନତା ମୈଦାନର ଏହି ଦୃଶ୍ୟ ଭଲ କରି ଦେଖନ୍ତୁ। ଷ୍ଟଲଟି ସୁନ୍ଦରଗଡ଼ର ଦିବ୍ୟଜ୍ୟୋତି ଏସ୍ଏଚ୍ଜିର । ମାଣ୍ଡିଆରେ ପ୍ରସ୍ତୁତ ସାମଗ୍ରୀ ବିକ୍ରିପାଇଁ ଆଣିଛନ୍ତି । କିନ୍ତୁ ଷ୍ଟଲ ଫାଙ୍କା । ସେମିତି ବାଲେଶ୍ବରରୁ ଆସିଥିବା ଏହି ଏସଏଚଜିର କତା ସାମଗ୍ରୀ ବେପାର ବି ମାନ୍ଦା। ଗାଡ଼ି ଭଡ଼ା କରି ଆଣିଥିବା ସାମଗ୍ରୀକୁ ଫେରାଇ ନେବାକୁ ପଡ଼ିବ। ଏସଏଚଜିର ମହିଳାମାନେ କହୁଛନ୍ତି, ବସ୍ ଖର୍ଚ୍ଚ ବି ଉଠିଲାନି। ଆଶ୍ଚର୍ଯ୍ୟର କଥା ହେଲା ନାଚ ଗୀତ ଦେଖିବାକୁ ବି ଲୋକ ନାହାନ୍ତି। ସାଂସ୍କୃତିକ କାର୍ଯ୍ୟକ୍ରମରେ ଦର୍ଶକ ମରୁଡ଼ି। ଫାଙ୍କା ପଡ଼ିଛି ଚେୟାର। … ତରବରିଆ ଭାବେ ସୁଭଦ୍ରା ମେଳା ଆୟୋଜନ କରି ରାଜ୍ୟ ସରକାର ବାହାବା ନେବାକୁ ଚାହୁଁଥିଲେ। କିନ୍ତୁ ଦୂରଦୃଷ୍ଟି ଅଭାବ ପାଇଁ ସବୁ ଫସର ଫଟିଗଲା। ଘାଟାରେ ପଡ଼ିଛନ୍ତି ସ୍ବୟଂ ସହାୟକ ଗୋଷ୍ଠୀ। ଏହାର କାରଣ ଟାଇମିଂରେ ଗଡ଼ବଡ଼। ଏବେ ମାଟ୍ରିକ ଓ ଯୁକ୍ତ ଦୁଇ ପରୀକ୍ଷା ଚାଲିଛି। ପିଲାମାନେ ପଢ଼ାପଢ଼ିରେ ବ୍ୟସ୍ତ। ବାପା ମାଆ ପୁଅ ଝିଅଙ୍କ କ୍ୟାରିୟର୍ ପ୍ରତି ଧ୍ୟାନ ଦେଇ ସେମାନଙ୍କୁ ପ୍ରସ୍ତୁତ କରାଉଛନ୍ତି। ସେଥିପାଇଁ ସଂଧ୍ୟାରେ ବୁଲାବୁଲି ନାହିଁ। ତା ଛଡ଼ା ଖରା ବି ଜୋର୍ ହେଲାଣି। ଏମିତି ସ୍ଥିତିରେ ଲୋକେ ଆସିବେ କେମିତି, ବେପାର ହେବ କିପରି ବୋଲି ପ୍ରଶ୍ନ କରିଛନ୍ତି ଏସଏସଜି।

ବିଜେଡି ସରକାର ସମୟରେ ହୋଇଥିବା ମିଶନ ଶକ୍ତିର ନାଁ ବଦଳାଇ ସୁଭଦ୍ରା ଶକ୍ତି କରିଛନ୍ତି ଏବର ବିଜେପି ସରକାର। କିନ୍ତୁ ବିନା ପ୍ଲାନିଂରେ ଏହି ସୁଭଦ୍ରା ଶକ୍ତି ମେଳାର ଆୟୋଜନ କରିବା ମହଙ୍ଗା ପଡ଼ିଛି। ପ୍ଲାନିଂ ନାହିଁ କି ଭାବି ଚିନ୍ତି କିଛି କରି ନାହାନ୍ତି। କେବଳ ପୂର୍ବ ସରକାରର ମିଶନ ଶକ୍ତିକୁ ବଦଳେଇ ସୁଭଦ୍ରା ଯୋଜନା ନାଁରେ ଶ୍ରେୟ ନେବାକୁ ଚେଷ୍ଟା କରିଥିଲେ ବିଜେପି ସରକାର। ତରବରିଆ ଭାବରେ ପରୀକ୍ଷା ସମୟରେ, ଖରା ହେବା ବେଳକୁ ଏହି ମେଳାର ଆୟୋଜନ କରିଛନ୍ତି। ଟାଇମିଂ ଗଡ଼ବଡ଼ ହେବାରୁ ସବୁ ଫସର ଫାଟିଛି। ଶୀତ ଦିନରେ ପ୍ରଦର୍ଶନୀ ପଡ଼ିଆ କି ଜନତା ମଇଦାନରେ ଯେଉଁ କାର୍ଯ୍ୟକ୍ରମ ହୁଏ, ସେତେବେଳେ ପ୍ରବଳ ଭିଡ଼ ହୁଏ। ପାଗ ଭଲ ଥାଏ, ମୁଣ୍ଡ ଉପରେ ପରୀକ୍ଷା ଚାପ ନ ଥାଏ। ସଂଧ୍ୟାରେ ବୁଲାବୁଲି ପାଇଁ ଲୋକଙ୍କୁ ସମୟ ମିଳେ। ଏଥିପାଇଁ ଗହଳି ଜମେ, ଭଲ ବ୍ଯବସାୟ ହୁଏ। ଏବେ କିନ୍ତୁ ପରୀକ୍ଷା ଋତୁ ଆରମ୍ଭ ହୋଇଥିବା ବେଳେ ଟାଇଁ ଟାଇଁ ଖରାରେ କାହିଁକି ଯେ, ସୁଭଦ୍ରା ଶକ୍ତି ମେଳା ଆୟୋଜନ କରିଛନ୍ତି, ରାଜ୍ଯ ସରକାର, ତାହା ବୁଝା ପଡୁ ନାହିଁ ।