ପୁରୀ: ପୁରୀ ଶ୍ରୀମନ୍ଦିର ପ୍ରଶାସନର ଭକ୍ତନିବାସ ନାମରେ ନକଲି ୱେବସାଇଟ ଖୋଲି ଠକେଇ ଘଟଣା । ଆଇନଗତ କାର୍ଯ୍ୟାନୁଷ୍ଠାନ ପାଇଁ କ୍ରାଇମବ୍ରାଞ୍ଚ ଡିଜିଙ୍କୁ ଅନୁରୋଧ କଲେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢୀ । ଏକ ପତ୍ର ମାଧ୍ୟମରେ ମୁଖ୍ୟ ପ୍ରଶାସକ ଜଣାଇଛନ୍ତି ଯେ, ଶ୍ରୀମନ୍ଦିରର ନିଜସ୍ବ ୱେବସାଇଟ www.shreejagannatha.in ଏବଂ www.stayatpurijagannatha.in ମାଧ୍ୟମରେ ଭକ୍ତନିବାସ ଗୁଡିକର ବୁକିଂ ହୋଇଆସୁଛି । କିନ୍ତୁ କିଛି ଦୁର୍ବୃତ୍ତ ନକଲି ୱେବସାଇଟ୍ ତିଆରି କରି ଭକ୍ତନିବାସ ନାମରେ ଲୋକଙ୍କୁ ଠକୁଛନ୍ତି । ଏପରିକି ଏକ ନକଲି ବ୍ୟାଙ୍କ ଆକାଉଣ୍ଟ ଖୋଲାଯାଇ ଠକେଇ ନେଣଦେଣ ହେଉଥିବା ଅଭିଯୋଗ ହୋଇଛି । ତେଣୁ ତୁରନ୍ତ ଏନେଇ ପଦକ୍ଷେପ ନେବାକୁ ଚିଠିରେ ଅନୁରୋଧ କରାଯାଇଛି। ଏହା ସହିତ ପୂର୍ବରୁ ବିଭିନ୍ନ ଥାନାରେ ଦାଖଲ ହୋଇଥିବା ଏଫ୍.ଆଇ.ଆର୍ ଗୁଡିକର ତଥ୍ୟ ମଧ୍ୟ ସଂଲଗ୍ନ କରାଯାଇଅଛି।
ଚାକିରିଆଙ୍କୁ ବଡ଼ ଉପହାର ଦେବେ କେନ୍ଦ୍ର ସରକାର? PF ସୁଧ ହାରକୁ ନେଇ ହେବ ବଡ଼ ନିଷ୍ପତ୍ତି
ନୂଆଦିଲ୍ଲୀ: ଇନକମ ଟ୍ୟାକ୍ସ ଉପରେ ଜନତାଙ୍କୁ ଆଶ୍ବସ୍ତି ମିଳିବା ପରେ ଏବେ କେନ୍ଦ୍ର ଦରକାର କରିପାରନ୍ତି ଆଉ ଏକ ବଡ଼ ଘୋଷଣା । ମୋଦୀ ସରକାର ଚାକିରିଆଙ୍କୁ ଦେଇପାରନ୍ତି ଏକ ବଡ଼ ଉପହାର । ପ୍ରକୃତ କଥା ହେଉଛି, କର୍ମଚାରୀ ଭବିଷ୍ୟ ନିଧି ସଂଗଠନ (EPFO) ଆସନ୍ତା ୨୮ ତାରିଖରେ ସିବିଟି ବୈଠକରେ ବଡ଼ ନିଷ୍ପତ୍ତି ନେଇପାରେ । ୨୦୨୪-୨୫ ପାଇଁ ଭବିଷ୍ୟ ନିଧି (PF) ଜମା ଉପରେ ସୁଧ ହାର ବଦଳିପାରେ । ଏକ ସୂତ୍ର ମୁତାବକ, ଏହି ବୈଠକରେ ୨୦୨୪-୨୫ ପାଇଁ ପିଏଫ ଡିପୋଜିଟ ଉପରେ ସୁଧ ହାରକୁ ୮ ପ୍ରତିଶତରୁ ଅଧିକ ଓ ଗତବର୍ଷ ପାଇଁ ଘୋଷଣା ହୋଇଥିବା ୮.୨୫ ପ୍ରତିଶତ ପାଖାପାଖି ରଖାଯାଇପାରେ ।
ସାଧାରଣ ଭାବେ କୌଣସି ବର୍ଷ ପାଇଁ ପିଏଫ ଜମା ଉପରେ ସୁଧ ହାର ପ୍ରଥମେ EPFO ଦ୍ବାରା ନିର୍ଦ୍ଧାରଣ କରାଯାଇଥାଏ ଓ ତା’ପରେ ସିବିଟି ଦ୍ବାରା ଅଧିକୃତ କରାଯାଇଥାଏ । ଏହି ନୋଟିଫିକେସନ ଜାରି କରାଯିବା ପୂର୍ବରୁ ଅର୍ଥ ମନ୍ତ୍ରଣାଳୟର ମଞ୍ଜୁରୀ ଜରୁରୀ ହୋଇଥାଏ । ତା’ପରେ ସୁଧ ରାଶିକୁ EPFO ଗ୍ରାହକଙ୍କ ଖାତାରେ ଜମା କରାଯାଇଥାଏ । EPFOର ୬୫ ମିଲିୟନରୁ ଅଧିକ ଗ୍ରାହକ ରହିଛନ୍ତି । ପିଏଫ ବାଲାନ୍ସ ଚେକ କରିବା ପାଇଁ ଗ୍ରାହକମାନେ ନିଜର ସ୍ମାର୍ଟଫୋନରେ ଉମଙ୍ଗ ଆପର ଉପଯୋଗ କରିପାରିବେ । ଯଦି ଆପଣ UAN ସାଇଟରେ ପଞ୍ଜୀକୃତ ଅଟନ୍ତି, ଆପଣ ନିଜ ମୋବାଇଲ ନମ୍ବରରୁ ମିସଡ କଲ ମଧ୍ୟ କରି ସୂଚନା ପାଇ ପାରିବେ ।
ଯାତ୍ରା ପେଣ୍ଡାଲରେ ଆଧାତ୍ମିକ ବାତାବରଣ: ୧୫ ମିନିଟ୍ ଭିତରେ ପରିବେଷଣ ହେଲା ରାମାୟଣ
ଭୁବନେଶ୍ବର: ଯାତ୍ରା ପେଣ୍ଡାଲରେ ଜମିଲା ରାମାୟଣ । ଖଣ୍ଡଗିରି ମେଳାରେ ତୁଳସୀ ଗଣନାଟ୍ୟ ତରଫରୁ ପରିବେଷଣ ହେଲା ରାମାୟଣ । ମୋବାଇଲ ଟର୍ଚ୍ଚ ଜାଳି ପ୍ରଭୁ ରାମ ଲକ୍ଷ୍ମଣ ଓ ମା’ ସୀତାଙ୍କୁ ଦର୍ଶକମାନେ ସ୍ଵାଗତ କରିଛନ୍ତି । ଲାଇଟ ସାଉଣ୍ଡ ଓ ମିଉଜିକରେ ସହ କମ୍ପିଲା ଜୟ ଶ୍ରୀରାମ ନାରା । ୧୫ ମିନିଟ୍ ଭିତରେ ପରିବେଷଣ ହେଲା ରାମାୟଣ । କେଇ ମିନିଟ ଭିତରେ ରାମଙ୍କ ବନବାସ, ମା ସୀତାଙ୍କ ହରଣ, ରାମ ସେତୁ ନିର୍ମାଣ, ଲଙ୍କା ବିଜୟ ଓ ରାବଣ ଦହନକୁ ଦେଖାଇଲେ କଳାକାର । ହନୁମାନ ଲଙ୍କାରେ ତାଣ୍ଡବ ରଚାଇଥିବା ବେଳେ ମଞ୍ଚ ଉପରେ ପାଚିଲା କଦଳୀ କାନ୍ଦିରୁ କଦଳୀ ଛିଡାଇ ଲୋକଙ୍କ ଉପରକୁ ଫିଙ୍ଗି ଥିଲେ । ଆଉ ହନୁମାନଙ୍କ ପ୍ରସାଦ ଭାବି ଦର୍ଶକମାନେ ଖାଇଥିଲେ । ଯାତ୍ରାରେ ସମ୍ପୂର୍ଣ୍ଣ ଆଧାତ୍ମିକ ବାତାବରଣ ସୃଷ୍ଟି ହୋଇଥିଲା ।
ନୂଆଦିଲ୍ଲୀ ରେଳ ଷ୍ଟେସନରେ ଦଳାଚକଟା: ଘଟଣାର ତଦନ୍ତ ପାଇଁ କମିଟି ଗଠନ କଲା ରେଲଓ୍ବେ
ନୂଆଦିଲ୍ଲୀ: କୁମ୍ଭମେହଳାକୁ ଯିବା ବେଳେ ନୂଆଦିଲ୍ଲୀ ରେଳ ଷ୍ଟେସନରେ ଦଳାଚକଟା । ପ୍ଲାଟଫର୍ମ ନମ୍ବର ୧୩ ଓ ୧୪ରେ ଠେଲାପେଲା ହେବାରୁ ୧୮ ଜଣ ଶ୍ରଦ୍ଧାଳୁଙ୍କ ମୃତ୍ୟୁ ହୋଇଛି । ଏକାଧିକ ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି। ମୃତକଙ୍କ ମଧ୍ୟରେ ୧୪ ଜଣ ମହିଳା ଥିବା କହିଛି ପୋଲିସ। ଦଳାଚକଟାରେ ବିହାରରୁ ୯ ଜଣ, ଦିଲ୍ଲୀରୁ ୮ ଓ ହରିୟାଣାରୁ ଜଣଙ୍କର ମୃତ୍ୟୁ ହୋଇଛି। କୁମ୍ଭମେଳା ଯିବା ଲାଗି ହଜାର ହଜାର ଯାତ୍ରୀଙ୍କ ସମାଗମ ଯୋଗୁ ଅଘଟଣ ଘଟିଥିଲା। ଅଘଟଣ ପରେ ଉଦ୍ଧାର କାର୍ଯ୍ୟକୁ ତ୍ବରିତ କରାଯାଇଥିଲା। ସୂଚନା ଅନୁସାରେ, ପ୍ରୟାଗରାଜ ଏକ୍ସପ୍ରେସ୍ ଯେତେବେଳେ ୧୪ ନମ୍ବର ପ୍ଲାଟଫର୍ମରେ ଛିଡା ହୋଇଥିଲା ସେତେବେଳେ ପ୍ଲାଟଫର୍ମରେ ପ୍ରବଳ ଭିଡ଼ଥିଲା । ସେହିପରି ସ୍ବତନ୍ତ୍ରତା ସେନାନୀ ଏକ୍ସପ୍ରେସ୍ ଓ ରାଜଧାନୀ ଏକ୍ସପ୍ରେସ୍ ମଧ୍ୟ ବିଳମ୍ବିତ ହୋଇଥିବା ବେଳେ ୧୨, ୧୩ ଓ ୧୪ ନମ୍ବର ପ୍ଲାଟଫର୍ମରେ ଯାତ୍ରୀଙ୍କ ଭିଡ଼ ରହିଥିଲା । ଏହି ସମୟରେ ପ୍ରାୟ ଶତାଧିକ ଜେନେରାଲ ଟିକେଟ୍ ବିକ୍ରି ହୋଇ ଯାଇଥିବାରୁ ଭିଡ଼ ନିୟନ୍ତ୍ରଣ ବାହାରକୁ ଚାଲିଯାଇଥିଲା । ଫଳରେ ଧସ୍ତାଧସ୍ତି ଭଳି ପରିସ୍ଥିତି ସୃଷ୍ଟି ହୋଇଥିଲା ଏବଂ ଯାତ୍ରୀମାନେ ପରସ୍ପର ଉପରେ ଚଢ଼ିଯାଇଥିଲେ । ଲୋକଙ୍କୁ ନିୟନ୍ତ୍ରଣ କରିବାକୁ ବ୍ୟବସ୍ଥା ନଥିବାରୁ ପରିସ୍ଥିତି ଅତି ସାଂଘାତିକ ରୂପ ନେଇଥିଲା। ଘଟଣାସ୍ଥଳରେ NDRF ଟିମ୍ ପହଞ୍ଚି ଯାତ୍ରୀଙ୍କୁ ଉଦ୍ଧାର କରିଥିଲା।
ଅନ୍ୟପକ୍ଷରେ ଦଳାଚକଟାକୁ ନେଇ ଦୁଃଖ ପ୍ରକାଶ କରିଛନ୍ତି ରାଷ୍ଟ୍ରପତି ଓ ପ୍ରଧାନମନ୍ତ୍ରୀ। ମୃତକଙ୍କ ପରିବାରକୁ ସମବେଦନା ଜଣାଇବା ସହ ଆହତଙ୍କ ଆଶୁ ଆରୋଗ୍ୟ କାମନା କରିଛନ୍ତି। ମୃତକଙ୍କ ପରିବାରକୁ ୧୦ ଲକ୍ଷ ଟଙ୍କାର ସହାୟତା ରାଶି ଘୋଷଣା ହୋଇଥିବା ବେଳେ, ଗୁରୁତରଙ୍କ ପାଇଁ ଅଢ଼େଇ ଲକ୍ଷ ଓ ଆହତଙ୍କ ପାଇଁ ୧ ଲକ୍ଷ ଟଙ୍କାର ସହାୟତା ରାଶି ଘୋଷଣା ହୋଇଛି। ତେବେ କିଭଳି ସ୍ଥିତିରେ ଏଭଳି ଅଘଟଣ ଘଟିଥିଲା, ସେନେଇ ଉଚ୍ଚସ୍ତରୀୟ ତଦନ୍ତ ନିର୍ଦ୍ଦେଶ ଦିଆଯାଇଛି। ଏହାସହ ଘଟଣାର ତଦନ୍ତ ପାଇଁ କମିଟି ଗଠନ କରିଛି ରେଲଓ୍ବେ। ଷ୍ଟେସନରେ ଥିବା ଯାତ୍ରୀଙ୍କ ପାଇଁ ୪ଟି ସ୍ବତନ୍ତ୍ର ଟ୍ରେନର ବ୍ୟବସ୍ଥା କରାଯାଇଛି। ଦରକାର ପଡ଼ିଲେ ଆହୁରି ଅଧିକ ଟ୍ରେନ ଚଳାଚଳ କରିବାକୁ ନିର୍ଦ୍ଦେଶ ଦିଆଯାଇଛି।
‘ରିଲେସନ ଯିଏ ଭାଙ୍ଗିବ, ସେ ଟଏଲେଟ ସଫା କରିବ’: ଭ୍ୟାଲେଣ୍ଟାଇନ ଡେ’ରେ କପଲଙ୍କ ହାଇଭୋଲଟେଜ ଏଗ୍ରୀମେଣ୍ଟ
ଫେବୃଆରୀ ୧୪ ତାରିଖରେ ଭ୍ୟାଲେଣ୍ଟାଇ ଡେ ଅବସରରେ ବହୁ ପ୍ରେମୀଯୁଗଳ ନିଜ ନିଜର ସାଥୀଙ୍କ ଆଗରେ ହୃଦୟର କଥାକୁ ପ୍ରକାଶ କରିଥିଲେ । ତେବେ ଏଥର ଭ୍ୟାଲେଣ୍ଟାଇନ ଡେ’ରେ ଘଟିଛି ଏକ ଅଜବ ଘଟଣା । ଇଣ୍ଟରନେଟରେ ଭାଇରାଲ ହୋଇଛି ଏକ ’କ୍ଲେଶ ଏଗ୍ରିମେଣ୍ଟ । ୫୦୦ ଟଙ୍କିଆା ଷ୍ଟାମ୍ପରେ କପଲଙ୍କ ମଧ୍ୟରେ ହୋଇଛି ଏକ ଏଗ୍ରିମେଣ୍ଟ । ପଶ୍ଚିମବଙ୍ଗର ଏହି କପଲ ରିଲେସନକୁ ନେଇ ଏକ କଡ଼ା ନିୟମ ରଖିଥିଲେ । ଯିଏ ରିଲେସନ ଭାଙ୍ଗିବ, ତାଙ୍କୁ କଠୋର ଦଣ୍ଡ ମିଳିବ ବୋଲି ସେଥିରେ ଉଲ୍ଲେଖ ରହିଛି । କପଲଙ୍କ ଏହି ଏଗ୍ରୀମେଣ୍ଟକୁ ନେଇ ଏବେ ସୋସିଆଲ ମିଡ଼ିଆ ୟୁଜସର୍ଙ୍କ ମଧ୍ୟରେ ଖୁବ୍ ଚର୍ଚ୍ଚା ଜାରି ରହିଛି । ଏହି ଏଗ୍ରୀମେଣ୍ଟ ବିଷୟରେ ଯିଏ ଶୁଣୁଛି ସେ ହସକୁ ରୋକିପାରୁ ନାହାନ୍ତି ।
ସାଧାରଣ ଭାବେ ନିଜର ବୈବାହିକ ସମ୍ପର୍କ, ଲଭ୍ ଲାଇଫକୁ ଦୀର୍ଘସ୍ଥାୟୀ କରିବା ପାଇଁ ସବୁ ପୁଅ-ଝିଅମାନେ ନୂଆ ନୂଆ ତରିକା ଆପଣାଇଥାନ୍ତି । ତେବେ ନିଜର ସମ୍ପର୍କକୁ ମଜବୁତ କରିବା ପାଇଁ କପଲଙ୍କ ଏହି ପ୍ରୟାସ ଏବେ ୟୁଜର୍ସଙ୍କ ମଧ୍ୟରେ କୌତୁହଳ ସୃଷ୍ଟି କରିଛି । ଖାଇବା ଟେବୁଲରେ ରୋମାନ୍ସ ଚାଲିଥିବା ବେଳେ ପତି ପ୍ରଫିଟ ଲସ ଉପରେ ନ କହିବା ପାଇଁ କୁହାଯାଇଛି । ୯ଟା ପରେ କ୍ରିପ୍ଟୋ ପରି ଶବ୍ଦମାନଙ୍କର ପ୍ରୟୋଗ ନ କରିବାକୁ ମଧ୍ୟ କୁହାଯାଇଛି । ପତ୍ନୀ ବାରମ୍ବାର ନିଜର ମା’ଙ୍କ ଆଗରେ ପତିଙ୍କୁ ନେଇ ଅଭିଯୋଗ ନ କରିବାକୁ ଏଗ୍ରୀମେଣ୍ଟରେ କୁହାଯାଇଛି । ଝଗଡ଼ା ସମୟରେ ଏକ୍ସଙ୍କୁ ନ ଆଣିବା ଓ ବିଳମ୍ବିତ ରାତିରେ ଅନଲାଇନ୍ ଫଡ ଅର୍ଡର ନ କରିବାକୁ ମଧ୍ୟ କୁହାଯାଇଛି । ଉଭୟଙ୍କ ମଧ୍ୟରୁ ଯଦି କେହି ନିୟମ ଭାଙ୍ଗନ୍ତି, ତେବେ ତାଙ୍କୁ କପଡ଼ା ଧୋଇବା ଠାରୁ ଆରମ୍ଭ କରି ଟଏଲେଟ ସଫା କରିବା, ତିନି ମାସ ପର୍ଯ୍ୟନ୍ତ ଘର ଭଡ଼ା ନିଜେ ଦେବାକୁ ଏଗ୍ରୀମେଣ୍ଟରେ ସ୍ପଷ୍ଟ ଶବ୍ଦରେ ଲେଖାଯାଇଛି । ଏହି ଏଗ୍ରୀମେଣ୍ଟ ଭାଇରାଲ ହେବା ପରେ ଲୋକମାନେ ଭିନ୍ନ ଭିନ୍ନ ମନ୍ତବ୍ୟ ଦେଉଥିବା ଦେଖାଯାଇଥିଲା । ’ଏହି କାହାଣୀ ପ୍ରତ୍ୟେକ ଘରର’ ବୋଲି ଜଣେ ୟୁଜର ଲେଖିଛନ୍ତି ।
ଶ୍ରୀମନ୍ଦିରରେ ବଡ଼ ମହାସ୍ନାନ: ରକ୍ତର ଛିଟା ପଡ଼ିଥିବା ଦେଖିବା ପରେ ବନ୍ଦ ହେଲା ଦର୍ଶନ
ପୁରୀ: ଶ୍ରୀମନ୍ଦିରରେ ବଡ଼ ମହାସ୍ନାନ । ବେହେରଣ ଦ୍ୱାର ନିକଟରେ ରକ୍ତ ଛିଟା ପଡ଼ିଥିବା ଦେଖିବା ପରେ ବଡ଼ ମହାସ୍ନାନ କରାଯାଇଛି । ଅବକାଶ ପୂଜା ପରେ ମଇଲମ, ରୋଷହୋମ ହୋଇ ମହାପ୍ରଭୁଙ୍କ ବେଶ ହେବା ସମୟରେ ସେବାୟତ ଦେଖିବାକୁ ପାଇଥିଲେ ରକ୍ତ ଛିଟା । କେଉଁ କାରଣ ଯୋଗୁଁ ରକ୍ତ ଛିଟା ପଡ଼ିଥିଲା ସେନେଇ ସେବାୟତଙ୍କ ଦୃଷ୍ଟି ଆକର୍ଷଣ ହେବାରୁ ଦର୍ଶନ ବନ୍ଦ କରାଯାଇ ମହାସ୍ନାନ ଜାରି ରହିଛି । ମହାସ୍ନାନ ପରେ ଚୂନ ପାଣି ପଡି ଗୋପାଳ ବଲ୍ଲଭ ନୀତି ଅନୁଷ୍ଠିତ ହେବ l
ନୂଆଦିଲ୍ଲୀ ଦଳାଚକଟା ଘଟଣାରେ ପୀଡ଼ିତଙ୍କ ପାଇଁ ସହାୟତା ରାଶି ଘୋଷଣା: ମୃତକଙ୍କ ପାଇଁ ୧୦ ଲକ୍ଷ, ଆହତଙ୍କ ପାଇଁ ୨.୫ ଲକ୍ଷ
ନୂଆଦିଲ୍ଲୀ: ନୂଆଦିଲ୍ଲୀ ରେଲଓ୍ବେ ଷ୍ଟସନରେ ଗତକାଲି ରାତିରେ ଘଟିଥିବା ଦଳାଚକଟାରେ ୧୮ ଜଣଙ୍କ ମୃତ୍ୟୁ ଘଟିଥିବା ବେଳେ ଏକାଧିକ ଲୋକ ଆହତ ହୋଇଥିଲେ । ଏହି ଘଟଣା ପରେ ପୀଡ଼ିତଙ୍କ ପାଇଁ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୋକ ପ୍ରକାଶ କରିଥିଲେ । ତେବେ ଦିଲ୍ଲୀ ଦଳାଚକଟା ଘଟଣାର ପୀଡ଼ିତଙ୍କ ପାଇଁ ସରକାରଙ୍କ ତରଫରୁ ସହାୟତା ରାଶି ଘୋଷଣା କରାଯାଇଛି । ମୃତକଙ୍କ ପାଇଁ ୧୦ ଲକ୍ଷ ଓ ଆହତଙ୍କ ପାଇଁ ୨.୫ ଲକ୍ଷ ଟଙ୍କା ସହାୟତା ରାଶି ଘୋଷଣା କରାଯାଇଛି । ଏଥିସହିତ ସାମାନ୍ୟ ଆହତଙ୍କୁ ୧ ଲକ୍ଷ ଟଙ୍କା ସହାୟତା ରାଶି ଦିଆଯିବ ବୋଲି ଘୋଷଣା କରାଯାଇଛି ।
ସୂଚନାଯୋଗ୍ୟ ଯେ, ନୂଆଦିଲ୍ଲୀ ରେଳ ଘଟିଥିବା ଦଳାଚକଟାରେ ୯ ଜଣ ମହିଳା, ୪ ଜଣ ପୁରୁଷ ଓ ୫ ଜଣ ଶିଶୁ ରହିଛନ୍ତି । ମୃତକଙ୍କ ମଧ୍ୟରେ ବିହାରର ସର୍ବାଧିକ ୯ ଜଣ, ଦିଲ୍ଲୀର ୮ ଜଣ ଓ ହରିୟାଣାର ଜଣେ ରହିଥିଲେ। ରାତି ପାଖାପାଖି ୧୦ଟା ସମୟରେ ୧୩ ଓ ୧୪ ନମ୍ବର ପ୍ଲାଟଫର୍ମରେ ଏହି ଘଟଣା ଘଟିଥିଲା । ପ୍ରୟାଗରାଜ ମହାକୁମ୍ଭ ଯିବାକୁ ହଜାର ହଜାର ସଂଖ୍ୟାରେ ଶ୍ରଦ୍ଧାଳୁ ଏକତ୍ର ହୋଇଥିବା ବେଳେ ଏହି ଘଟଣା ଘଟିଥିଲା । ଟ୍ରେନରେ ଚଢ଼ିବାକୁ ଲୋକମାନେ ପ୍ରୟାସ କରୁଥିବା ବେଳେ ଅନେକ ମୃତାହତ ହୋଇଥିଲେ । ତେବେ ସବୁଠାର ବଡ଼ ପ୍ରଶ୍ନ ହେଉଛି ଅଚାନକ ଏତେବଡ଼ ଅଘଟଣ ଘଟିଲା କାହିଁକି? ସବୁ ପ୍ଲାଟଫର୍ମରେ ବହୁତ ଭିଡ଼ ଥିଲା । ମାତ୍ର ପ୍ଲାଟଫର୍ମ ନମ୍ବର ୧୨, ୧୩, ୧୪ ଓ ୧୫ରେ ଅତ୍ୟଧିକ ଭିଡ଼ ଥିଲା । ରେଲଓ୍ବେ ତରଫରୁ ଟ୍ରେନ ରହିବାକୁ ନେଇ ବାରମ୍ବାର ପ୍ଲାଟଫର୍ମ ନମ୍ବର ବଦଳିବାର ଘୋଷଣା କରାଯାଇଥିଲା । ଏହାକୁ ନେଇ ପ୍ଲାଟଫର୍ମରେ ଚଳାଚକଟା ହୋଇଥିଲା ବୋଲି ଦେଖଣାହାରୀ କହିଥିଲେ ।
ଆଜି ଆମେରିକାରୁ ଭାରତ ଫେରିବେ ଆଉ ୧୧୯ ଭାରତୀୟ
ନୂଆଦିଲ୍ଲୀ: ଦ୍ବିତୀୟ ପର୍ଯ୍ୟାୟରେ ଆଜି ଆମେରିକାରୁ ଭାରତ ଫେରିବେ ଆଉ ୧୧୯ ଭାରତୀୟ । ପଞ୍ଜାବ ଅମୃତସରରେ ପହଞ୍ଚିବ ଆମେରିକୀୟ ବିମାନ ସି-17 ଗ୍ଲୋବମାଷ୍ଟର । ପୂର୍ବରୁ ପ୍ରଥମ ପର୍ଯ୍ୟାୟରେ ଭାରତ ଆସିଥିଲେ ୧୦୪ ଭାରତୀୟ । ଆମେରିକାରେ ବେଆଇନ ଭାବେ ବାସ କରିଥିବା ଲୋକଙ୍କୁ ନିଜ ନିଜ ଦେଶକୁ ଫେରାଇଦିଆଯିବା ପ୍ରକ୍ରିୟା ଜାରି ରହିଥିବାବେଳେ ଭାରତକୁ ବହୁ ସଂଖ୍ୟକ ନାଗରିକ ଫେରିବା ସମ୍ଭାବନା ରହିଛି । ଫେରିବାକୁ ଥିବା ଲୋକଙ୍କ ମଧ୍ୟରେ ସର୍ବାଧିକ ୬୭ ଜଣ ଅଛନ୍ତି ପଞ୍ଜାବର । ହରିୟାଣାର ୩୩, ଗୁଜରାଟର ୮ ଜଣ, ଉତ୍ତରପ୍ରଦେଶର ୩ଜଣ, ରାଜସ୍ଥାନର ୨ ଜଣ, ମହାରାଷ୍ଟ୍ରର ୨ ଜଣ, ହିମାଚଳ ପ୍ରଦେଶ ଓ ଜାମ୍ମୁ ଓ କାଶ୍ମୀରର ୨ ଜଣ ଭାରତ ଫେରିେବ । ଦୟନୀୟ ଅବସ୍ଥାରେ ଭାରତୀୟମାନଙ୍କୁ ପଠାଇ ଦିଆଯାଉଥିବା ଘଟଣାକୁ ନେଇ ଦେଶରେ ବିବାଦ ଲାଗିରହିଛି । ଏହି ବିଷୟ ସଂସଦରେ ବି ଉଠିଛି । ପର୍ଯ୍ୟାୟକ୍ରମେ ଆମେରିକାରେ ବାସ କରୁଥିବା ବେଆଇନ ଭାରତୀୟଙ୍କୁ ଫେରାଇ ଅଣାଯିବ ବୋଲି ସୂଚନା ମିଳିଛି ।
ଦିଲ୍ଲୀ ମୁଖ୍ୟମନ୍ତ୍ରୀ ଚୟନ ପାଇଁ ନିଯୁକ୍ତି ହେବେ ପର୍ଯ୍ୟବେକ୍ଷକ: ହାଇକମାଣ୍ଡଙ୍କ ନିକଟକୁ ପଠାଯିବ ନାମ
ନୂଆଦିଲ୍ଲୀ: ଭାରତୀୟ ଜନତା ପାର୍ଟି ଦିଲ୍ଲୀରେ ଶାନଦାର ବିଜୟ ହାସଲ କରିବା ପରେ ଏବେ ମୁଖ୍ୟମନ୍ତ୍ରୀ ଚୟନକୁ ନେଇ ସସପେନ୍ସ ଜାରି ରହିଛି । ମୁଖ୍ୟମନ୍ତ୍ରୀ କାହାକୁ କରାଯିବ, କେଉଁ ଫର୍ମୂଲା ଆପ୍ଲାଏ ହେବ ତାହାକୁ ତଜର୍ମା କରୁଛନ୍ତି ହାଇକମାଣ୍ଡ । ଦୀର୍ଘବର୍ଷ ପରେ ଦିଲ୍ଲୀରେ ପଦ୍ମ ଫୁଟିଥିବାରୁ ଏଥର ବିଜେପି ସରପ୍ରାଇଜ୍ ଦେଇପାରେ ବୋଲି କୁହାଯାଉଛି । ବିଭିନ୍ନ ରାଜ୍ୟରେ ମୁଖ୍ୟମନ୍ତ୍ରୀ ଚୟନ ସମୟରେ ବିଜେପି ସର୍ବଦା ସଭିଙ୍କୁ ଚକିତ କଲା ଭଳି ପଦେକ୍ଷପ ଗ୍ରହଣ କରିଥାଏ । ତେଣୁ ଏଥର ରାଷ୍ଟ୍ରୀୟ ରାଜଧାନୀରେ ଅନୁରୂପ କିଛି ଦେଖିବାକୁ ମିଳିପାରେ ବୋଲି ରାଜନୈତିକ ବିଶାରଦମାନେ ଅନୁମାନ କରୁଛନ୍ତି । ମୁଖ୍ୟମନ୍ତ୍ରୀ ରେସରେ ଏକାଧିକ ଚେହେରା ରହିଥିଲେ ହେଁ ଦଳ କେଉଁ ଗୋଟି ଚାଳନା କରୁଛି, ତା’ ଉପରେ ସଭିଙ୍କ ନଜର ।
ଦିଲ୍ଲୀ ମୁଖ୍ୟମନ୍ତ୍ରୀ ନାମକୁ ନେଇ ବିଜେପି ଅନ୍ତିମ ରୂପ ଦେବାକୁ ଯାଉଛି । ଏଥିପାଇଁ ନବନିର୍ବାଚିତ ବିଧାୟକଙ୍କ ସହିତ ଆଲୋଚନା ପାଇଁ ଦଳ ପର୍ଯ୍ୟବେକ୍ଷକଙ୍କୁ ନିଯୁକ୍ତି କରିବ । ଦଳର କେନ୍ଦ୍ରୀୟ ନେତୃତ୍ବଙ୍କ ପ୍ରତିନିଧିତ୍ବ କରିବେ ପର୍ଯ୍ୟବେକ୍ଷକ । ଦଳର ୪୮ ଜଣ ବିଧାୟକ ଓ ହାଇକମାଣ୍ଡଙ୍କ ମଧ୍ୟରେ ମଧ୍ୟସ୍ଥତା କରିବେ ପର୍ଯ୍ୟବେକ୍ଷକ । ବିଧାୟକଙ୍କ ସହ ଆଲୋଚନା କରିବା ପରେ ମୁଖ୍ୟମନ୍ତ୍ରୀ ନାମ ହାଇକମାଣ୍ଡଙ୍କ ନିକଟକୁ ପଠାଇବେ ପର୍ଯ୍ୟବେକ୍ଷକ ବୋଲି କହିଛନ୍ତି ଦିଲ୍ଲୀ ଭାଜପା ଅଧ୍ୟକ୍ଷ ବୀରେନ୍ଦ୍ର ସଚଦେବା । ଖୁବଶୀଘ୍ର ଦିଲ୍ଲୀରେ ନୂଆ ମୁଖ୍ୟମନ୍ତ୍ରୀଙ୍କୁ ନେଇ ଜାରି ରହିଥିବା ସସପେନ୍ସ ଉପରୁ ହଟିବ ପରଦା । ସୂଚନାଯୋଗ୍ୟ ଯେ, ୨୭ ବର୍ଷ ପରେ ବିଜେପି ଦିଲ୍ଲୀରେ କ୍ଷମତାକୁ ଫେରିଛି । ବିଧାନସଭାର ମୋଟ ୭୦ଟି ଆସନ ମଧ୍ୟରୁ ବିଜେପି ୪୮ଟି ଆସନରେ ଜିତିଥିବା ବେଳେ ଆମ ଆଦମୀ ପାର୍ଟି (ଆପ)କୁ ୨୨ଟି ମିଳିଥିଲା । ଏଥର ଦିଲ୍ଲୀରେ ଆପର ଗଡ଼ ଚୁରମାର ହୋଇଯାଇଥିବା ବେଳେ କଂଗ୍ରେସ ଖାତା ଖୋଲିପାରିନଥିଲା ।
କିଏ ହେବେ ଦିଲ୍ଲୀ ମୁଖ୍ୟମନ୍ତ୍ରୀ: ଜଣେ ଅଣଚର୍ଚ୍ଚିତ ବ୍ୟକ୍ତିଙ୍କ ନାମରେ ବାଜିପାରେ ମୋହର
ନୂଆଦିଲ୍ଲୀ: ଆଜି ଘୋଷଣା ହୋଇପାରେ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ନାଁ। ଆଜି ୪୮ ବିଜେପି ବିଧାୟକଙ୍କ ବୈଠକରେ ନୂଆ ମୁଖ୍ୟମନ୍ତ୍ରୀଙ୍କ ନାଁ ହୋଇପାରେ ଘୋଷଣା। ତେବେ ମୁଖ୍ୟମନ୍ତ୍ରୀ କିଏ ହେବେ ତାହାକୁ ନେଇ ଜୋର ଧରିଛି ଚର୍ଚ୍ଚା। ନୂଆ ସିଏମଙ୍କ ନାଁ ଘୋଷଣା କରିବେ ହାଇକମାଣ୍ଡ। କୁହାଯାଉଛି ସିଏମ ରେସରେ ଜଣେ ସାଂସଦ ବି ଅଛନ୍ତି। ତେବେ ଜଣେ ବିଧାୟକଙ୍କୁ ହିଁ ସିଏମ କରାଯାଇପାରେ ବୋଲି ଆଲୋଚନା ଚାଲିଛି। ମଧ୍ୟପ୍ରଦେଶ ଓ ରାଜସ୍ଥାନ ଢାଞ୍ଚାରେ ଜଣେ ଅଣଚର୍ଚ୍ଚିତ ବ୍ୟକ୍ତିଙ୍କୁ ବି ମୁଖ୍ୟମନ୍ତ୍ରୀ କରାଯିବା ସମ୍ଭାବନା ରହିଛି। ବିଧାୟକଙ୍କ ମଧ୍ୟରେ ସବୁଠାରୁ ଅଧିକ ଆଗରେ ରହିଛନ୍ତି ପରବେଶ ବର୍ମା। ସେ ନୂଆଦିଲ୍ଲୀ ଆସନରେ ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କୁ ହରାଇଥିଲେ। ସେ ବି ପୂର୍ବତନ ମୁଖ୍ୟମନ୍ତ୍ରୀ ସାହେବ ସିଂ ବର୍ମାଙ୍କ ପୁଅ। ତେଣେ ଅଣପ୍ରଭାବଶାଳୀ ଜାତିର ଜଣେ ନେତାଙ୍କୁ ବି ମୁଖ୍ୟମନ୍ତ୍ରୀ କରିବା ସମ୍ଭାବନା ରହିଛି।