ନନ୍ଦିଘୋଷ ବ୍ୟୁରୋ: ପୁରୀ ଜିଲ୍ଲା ସତ୍ୟବାଦୀ ଜୟା ହୋଟେଲ ପରେ ଏବେ ପୁରୀର ଶେଖ ବାବୁ ମଟନ ସପ୍ ସିଲ୍ । ଏଠାରେର ଗୋମାଂସ ବିକ୍ରି ଅଭିଯୋଗ ପରେ ସିଲ୍ କରାଯାଇଛି ଦୋକାନ। ଏକ ଭିଡିଓରେ ଶେଖ ବାବୁର ନାମ ନେଇଥିଲା ଜଣେ ଯୁବକ। ଏହାକୁ ଏକ ପ୍ରମାଣ ଭାବେ ନେଇ ପୋଲିସ ତଦନ୍ତ କରୁଛି। ଶେଖ ବାବୁଙ୍କୁ ଅଟକ ରଖି ଦୁଇ ଘଣ୍ଟା ଧରି ପଚରା ଉଚରା କରିଛି ପୋଲିସ। କିନ୍ତୁ ଏହି ଅଭିଯୋଗକୁ ଖଣ୍ଡନ କରିଛନ୍ତି ଶେଖ ବାବୁ। ସେ କହିଛନ୍ତି, ୫୦ ବର୍ଷ ହେଲେ ବେପାର କରୁଛି। ଲୋକଙ୍କ ଆସ୍ଥା ଜିଣିଛି । ଛେଳି, ମେଣ୍ଢା, ଖାସି ଛଡ଼ା ଆଉ କିଛି କାଟିନାହିଁ। ପୁରୀ ପରି ପବିତ୍ର ମାଟିରେ ଛିଡା ହୋଇ ମିଛ କହିବି ନାହିଁ ବୋଲି କହି କାନ୍ଦି କାନ୍ଦି ପ୍ରତିକ୍ରିୟା ରଖିଛନ୍ତି ଶେଖ ବାବୁ। ଭିଡିଓର ସତ୍ୟାସତ୍ୟ ଯାଞ୍ଚ କରିବାକୁ ସେ ଦାବି କରିଛନ୍ତି। ସ୍ଵଚ୍ଛତା ଅବଲମ୍ଵନ କରି ମାଂସ କିଣା ବିକା କରିବାକୁ ସମସ୍ତ ହୋଟେଲ, ରେଷ୍ଟୁରାଣ୍ଟ ଓ ଦୋକାନୀଙ୍କୁ କହିଛି ପ୍ରଶାସନ। ଲୋକଙ୍କ ଭାବାବେଗକୁ ପ୍ରାଥମିକତା ଦେବାକୁ ନିର୍ଦ୍ଦେଶ ଦିଆଯାଇଛି।
ୟୁପିରେ ସାମ୍ବାଦିକଙ୍କୁ ହତ୍ୟା : ଅଭିଯୁକ୍ତଙ୍କୁ ଧରିବା ଲାଗି ୪ଟି ଟିମ୍ ଗଠିତ
ନନ୍ଦିଘୋଷ ବ୍ୟୁରୋ: ଉତ୍ତରପ୍ରଦେଶରେ ପୁଣି ବିଗିଡ଼ିଲା ଆଇନଶୃଙ୍ଖଳା ସ୍ଥିତି। ସୀତାପୁର ଅନ୍ତର୍ଗତ ଲକ୍ଷ୍ମୌ-ଦିଲ୍ଲୀ ଜାତୀୟ ରାଜପଥ ନିକଟରେ ଜଣେ ସାମ୍ବାଦିକ ତଥା ଆରଟିଆଇ କର୍ମୀଙ୍କୁ ଗୁଳି କରି ହତ୍ଯା କରାଯାଇଛି। ଏକ ହିନ୍ଦୀ ଦୈନିକରେ କାର୍ଯ୍ୟରତ ସାମ୍ବାଦିକଙ୍କ ନାଁ ହେଉଛି ରାଘବେନ୍ଦ୍ର ବାଜପାୟୀ। ରାଘବେନ୍ଦ୍ର ବାଇକରେ ଯାଉଥିବାବେଳେ ଆତତାୟୀମାନେ ତାଙ୍କ ବାଇକକୁ ଧକ୍କା ଦେଇଥିଲେ ଏବଂ ୩ ରାଉଣ୍ଡ ଗୁଳି କରିଥିଲେ। ଗୁଳିକାଣ୍ଡ କରି ସେମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ। ଗୁରୁତର ଅବସ୍ଥାରେ ତାଙ୍କୁ ଏକ ଜିଲ୍ଲା ହସ୍ପିଟାଲରେ ଭର୍ତ୍ତି କରାଯାଇଥିଲା। ମାତ୍ର ସେଠାରେ ତାଙ୍କୁ ମୃତ ଘୋଷଣା କରାଯାଇଥିଲା। ତାଙ୍କ ଦେହରୁ ୩ଟି ଗୁଳି ବାହାର କରାଯାଇଥିଲା। ଏକ ଫୋନ କଲ୍ ପାଇବା ପରେ ୩୫ ବର୍ଷ ବୟସ୍କ ସାମ୍ବାଦିକ ଘରୁ ବାହାରିଥିଲେ। ପରେ ରାଜପଥରେ ତାଙ୍କୁ ହତ୍ୟା କରାଯାଇଥିଲା। ଅଭିଯୁକ୍ତଙ୍କୁ ଗିରଫ କରିବା ଲାଗି ୪ଟି ଟିମ୍ ଗଠନ କରାଯାଇଛି। ଘଟଣାସ୍ଥଳରେ ଏସଓଜି ଟିମ୍ ବି ମୁତୟନ କରାଯାଇଛି। ସେପଟେ ଅପରାଧୀଙ୍କୁ ଗିରଫ କରା ନଗଲେ ରାଜ୍ୟବ୍ୟାପୀ ଆନ୍ଦୋଳନ କରିବାକୁ ଧମକ ଦେଇଛନ୍ତି ବରିଷ୍ଠ କଂଗ୍ରେସ ନେତା ଅଜୟ ରାଏ।
କର୍ଣ୍ଣାଟକରୁ ଦାରିଙ୍ଗବାଡ଼ି ତେରାବାଡି ଗାଁକୁ ଆସିଲା ବିଭାଷ କୁମାର ନାୟକଙ୍କ ପାର୍ଥିବ ଶରୀର
ନନ୍ଦିଘଷାଷ ବ୍ୟୁରୋ: କର୍ଣ୍ଣାଟକରୁ ଦାରିଙ୍ଗବାଡ଼ି ତେରାବାଡି ଗାଁକୁ ଆସିଲା ବିଭାସ କୁମାର ନାୟକଙ୍କ ପାର୍ଥିବ ଶରୀର। ମୃତଦେହ ପହଞ୍ଚିବା ପରେ ଗାଁରେ ଶୋକାକୁଳ ପରିବେଶ ସୃଷ୍ଟି ହୋଇଛି । ଆତ୍ମୀୟ ସ୍ବଜନଙ୍କ କାନ୍ଦ ବୋବାଳିରେ ଫାଟିପଡୁଛି ସାରା ଅଞ୍ଚଳ ।ବିଭାସଙ୍କ ଶେଷ ଦର୍ଶନ ପାଇଁ ଗୁଡ୍ରିପଡ଼ିରେ ସମ୍ପର୍କୀୟଙ୍କ ଭିଡ଼ ଲାଗିଛି । ଗାଁ ମଶାଣୀରେ ବିଭାସଙ୍କ ପାର୍ଥୀବ ଶରୀରର ଶେଷକୃତ୍ୟ ସମ୍ପନ୍ନ ହେବ । ଗୁରୁବାର ରାତିରେ ତାଙ୍କୁ ହତ୍ୟା କରାଯାଇଥିଲା। ଦୁଷ୍କର୍ମ ରୋକିବାକୁ ଚେଷ୍ଟା କରିବାରୁ ଦୁର୍ବୃର୍ତ୍ତମାନେ ବିଭାସଙ୍କୁ କେନାଲଙ୍କୁ ଠେଲି ଦେଇଥିଲେ। ପାଣିରେ ବୁଡ଼ି ତାଙ୍କର ମୃତ୍ୟୁ ହୋଇଥିଲା। ଗତକାଲି ମିଳିଥିଲା ମୃତଦେହ। ନିଜର ସାଙ୍ଗମାନଙ୍କ ସହିତ ସେ କର୍ଣ୍ଣାଟକର ହାମ୍ଫି ଅଞ୍ଚଳକୁ ବୁଲିବାକୁ ଯାଇଥିଲେ। ତାଙ୍କ ସାଙ୍ଗରେ ଥିଲେ ଦୁଇ ଜଣ ପୁଅ ସାଙ୍ଗ ଓ ଦୁଇ ଜଣେ ମହିଳା। ମହିଳା ଦୁଇ ଜଣଙ୍କ ମଧ୍ୟରୁ ଜଣେ ଇସ୍ରାଏଲର ନାଗରିକ ଓ ହୋଟେଲର ମାଲିକ। ଦୁର୍ବୃର୍ତ୍ତମାନେ ବିଭାସ ଓ ଅନ୍ୟ ଦୁଇ ଜଣଙ୍କୁ କେନାଲ ଭିତରକୁ ଠେଲି ଦେଇ ମହିଳା ଦୁଇ ଜଣଙ୍କୁ ଗଣଦୁଷ୍କର୍ମ କରିଥିଲେ। ପାଣିରେ ବୁଡ଼ି ବିଭାସଙ୍କ ମୃତ୍ୟୁ ହୋଇଥିଲା। ଗତକାଲି ତାଙ୍କର ମୃତଦେହ ଉଦ୍ଧାର ହୋଇଛି।
ରାଜ୍ୟରେ ପୁଣି ଫେରିଲା ତାତି, କାଲିଠୁ ଜାଳିବ!
ନନ୍ଦିଘୋଷ ବ୍ୟୁରୋ: ଆସନ୍ତା ୭ ଦିନ ପର୍ଯ୍ୟନ୍ତ ରାଜ୍ୟରେ ସ୍ଥିର ରହିବ ତାପମାତ୍ରା । ଦିନରେ ଖରା, ରାତିରେ ହାଲୁକା ଥଣ୍ଡା । ରାଜ୍ୟକୁ ପଶ୍ଚିମ ଦିଗରୁ ବହୁଥିବା ଶୁଷ୍କ ପବନ ପ୍ରବାହ କମିବା ପରେ ଏଭଳି ପାଗ ଦେଖାଦେଇଛି । ଗତ ଦୁଇଦିନ ହେବ ରାଜ୍ୟରେ ଉପକୂଳ ଓଡ଼ିଶା ସମେତ ଆଭ୍ୟନ୍ତରୀଣ ଓଡ଼ିଶାରେ ତାତି କମିଛି । ବିଶେଷ କରି କିଛି ଜିଲ୍ଲାରେ ୨ ରୁ ୩ ଡିଗ୍ରୀ ପର୍ଯ୍ୟନ୍ତ ତାପମାତ୍ରା କମିଛି । ଆସନ୍ତା ସପ୍ତାହେ ପର୍ଯ୍ୟନ୍ତ ତାପମାତ୍ରାରେ କୌଣସି ପରିବର୍ତ୍ତନ ହେବ ନାହିଁ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ପୁଣି ୧୫ ତାରିଖରୁ ୨୦ ତାରିଖ ପର୍ଯ୍ୟନ୍ତ ତାପମାତ୍ରା ବୃଦ୍ଧି ହେବ । ନୂଆପଡା, ସମ୍ବଲପୁର, ବରଗଡ, ବୌଦ୍ଧ, ସୋନପୁର, ଝାରସୁଗୁଡା, କଳାହାଣ୍ଡି, କନ୍ଧମାଳ, ଅନୁଗୁଳ, ଢେଙ୍କାନାଳ, ମାଲକାନଗିରି, ଗଜପତି ସମେତ ଭୁବନେଶ୍ବରରେ ତାପମାତ୍ରା ବଢିବ ବୋଲି ଆକଳନ କରାଯାଇଛି । ଗତ ୨୪ ଘଣ୍ଟା ମଧ୍ୟରେ ୩୬.୩ ଡିଗ୍ରୀ ସହ ମାଲକାନଗିରି ରାଜ୍ୟର ସବୁଠୁ ଉତ୍ତପ୍ତ ସହର ଭାବରେ ରେକର୍ଡ କରିଛି । ଭୁବନେଶ୍ବରରେ ୩୩.୪ ଏବଂ କଟକରେ ୩୧.୮ ଡିଗ୍ରୀ ତାପମାତ୍ରା ରେକର୍ଡ ହୋଇଛି ।
ପୁଅର ଟାଙ୍ଗିଆ ଚୋଟରେ ବାପାର ମୃତ୍ୟୁ
ନନ୍ଦିଘୋଷ ବ୍ୟୁରୋ: ପୁଅର ଟାଙ୍ଗିଆ ଚୋଟରେ ବାପାର ମୃତ୍ୟୁ । ଏହି ଜଘନ୍ୟକାଣ୍ଡ ଘଟିଛି ସୁନ୍ଦରଗଡ଼ ଜିଲ୍ଲା କୁତ୍ରା ଥାନା ଛୁରିଚଖା ଗାଁରେ। କୌଣସି କାରଣକୁ ନେଇ ସିରାନୁସ ଟେଟେ ଓ ତାଙ୍କ ପୁଅ ସୁରଜ ଟେଟେଙ୍କ ମଧ୍ୟରେ ଝଗଡ଼ା ହୋଇଥିଲା । ଏଥିରେ ଉତ୍ୟକ୍ତ ହୋଇ ପୁଅ ସୂରଜ ଟାଙ୍ଗିଆରେ ବାପାଙ୍କୁ ଆକ୍ରମଣ କରିଥିଲା। ଘଟଣାସ୍ଥଳରେ ହିଁ ସିରାନୁସଙ୍କ ମୃତ୍ୟୁ ଘଟିଥିଲା। କୁତ୍ରା ଥାନାରେ ଅଭିଯୋଗ ପରେ ପୋଲିସ ଓ ସାଇଣ୍ଟିଫିକ୍ ଟିମ୍ ଘଟଣା ସ୍ଥଳରେ ପହଞ୍ଚିବା ପରେ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଅଭିଯୁକ୍ତକୁ ଅଟକ ରଖି ପୋଲିସ ପଚରା ଉଚରା କରୁଛି।
ତେଲେଙ୍ଗାନା ଟନେଲ ଟ୍ରାଜେଡି: ୧୬ ଦିନ ପରେ ବି ଉଦ୍ଧାର ହେଲେନି ଶ୍ରମିକ, ମିଳିଲା ଗୋଟିଏ ମୃତଦେହ
ନନ୍ଦିଘୋଷ ବ୍ୟୁରୋ: ତେଲେଙ୍ଗାନାରେ ଟନେଲରେ ଫସିଥିବା ଶ୍ରମିକଙ୍କୁ ଉଦ୍ଧାର ପାଇଁ ଜାରି ରହିଛି ଅପରେସନ । ତେବେ ୧୬ ଦିନ ପରେ ବି ଏଯାବତ ଉଦ୍ଧାର ହୋଇନାହାନ୍ତି । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି କି, ଗୋଟିଏ ମୃତଦେହ ମେସିନ ମଧ୍ୟରୁ ଉଦ୍ଧାର କରାଯାଇଛି । ଉଦ୍ଧାରକାରୀ ଦଳ ଟନେଲ ଭିତରେ ପଶି ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ଏବେ ରୋବର୍ଟ ନିୟୋଜନ କରାଯିବା ସହ ଉଦ୍ଧାର କାର୍ଯ୍ୟ ଆହୁରି ତ୍ବରାନ୍ବିତ କରାଯିବ ବୋଲି ସୂଚନା ମିଳିଛି । ତେବେ ଏଥିଲାଗି ୪ କୋଟି ଖର୍ଚ୍ଚ ହେବ । ସେପଟେ ତେଲେଙ୍ଗାନା ମୁଖ୍ୟମନ୍ତ୍ରୀ ଆସନ୍ତା ୧୧ ତାରିଖରେ ଘଟଣାସ୍ଥଳକୁ ଯିବେ ।
କହି ରଖୁଛୁ କି, ଫେବୃଆରୀ ୨୨ ତାରିଖରୁ ଟନେଲରେ ଫସି ରହିଛନ୍ତି ଶ୍ରମିକ । ସୁଡ଼ଙ୍ଗର ଏକ ଅଂଶ ଭାଙ୍ଗଯିବା ପରେ ଶ୍ରମିକମାନେ ଟନେଲ ଭିତରେ ଫସି ରହିଛନ୍ତି । ଯୁଦ୍ଧକାଳିନ ଭିତ୍ତିରେ ଉଦ୍ଧାର କାର୍ଯ୍ୟ ଜାରି ରହିଛି । ବହୁ ତାଲିମପ୍ରାପ୍ତ କର୍ମଚାରୀ ଉଦ୍ଧାର କାର୍ଯ୍ୟରେ ନିୟୋଜିତ ହୋଇଛନ୍ତି । ଉଦ୍ଧାର କାର୍ଯ୍ୟ ପାଇଁ କେରଳ ପୋଲିସର ସ୍ୱତନ୍ତ୍ର ତାଲିମପ୍ରାପ୍ତ ଶବ ଶୁଙ୍ଘୁଥିବା କୁକୁରମାନଙ୍କୁ ମଧ୍ୟ ନିୟୋଜିତ କରାଯାଇଛି। ଏହି ମୃତଦେହ କୁକୁରମାନଙ୍କୁ ନିଖୋଜ ଲୋକ ଏବଂ ମୃତଦେହ ଠାବ କରିବା ପାଇଁ ସ୍ୱତନ୍ତ୍ର ଭାବରେ ତାଲିମ ଦିଆଯାଇଛି।
Nagarkurnool, Telangana | SLBC Tunnel rescue operation | Rescue teams have found one dead body inside the tunnel. The body is stuck in the machine. The rescue teams are currently cutting the machine to retrieve the body: Rescue teams
— ANI (@ANI) March 9, 2025
ଅନ୍ୟ ଜାତିରେ ବିବାହ କରିବାରୁ ଆକ୍ରମଣ, ଘରେ ପଶି ପୁଅର ଭଉଣୀ ଓ ମାଆକୁ ନିସ୍ତୁକ ମାଡ଼ ମାରିଲେ ଦୁର୍ବୃତ୍ତ
ନନ୍ଦିଘୋଷ ବ୍ୟୁରୋ: ଖୋର୍ଦ୍ଧା ଜିଲ୍ଲା ଜଟଣୀ ଥାନା ଅଂଚଳରେ ଅଭାବନୀୟ ଘଟଣା। ଅନ୍ୟ ଜାତିର ଝିଅକୁ ବିବାହ କଲା ବୋଲି ଘରେ ପଶି ପୁଅର ଭଉଣୀ ଓ ମାଆକୁ ନିସ୍ତୁକ ମାଡ଼ ମାରିଲେ ଦୁର୍ବୃତ୍ତ। ବିବାହିତ ଝିଅକୁ ଘରୁ ଟେକି ନେଇ କାର ଭିତରେ ଅସଦାଚରଣ କରିଥିବା ଅଭିଯୋଗ ହୋଇଛି।ପୁଅର ମାଆଙ୍କ ସହ ମଧ୍ୟ ଅସଦାଚରଣ କରିଥିବା ଭଳି ସାଂଘାତିକ ଅଭିଯୋଗ ଆଣିଛି ଦଳିତ ମହାସଂଘ। ମା, ଝିଅ ଉଭୟଙ୍କୁ ମରଣାନ୍ତକ ଆକ୍ରମଣ କରିବା ସହ ବର୍ବରକାଣ୍ଡ ଭିଆଇଛନ୍ତି ଦୁର୍ବୃତ୍ତ। ଏ ସମ୍ପର୍କରେ ଜଟଣୀ ପୋଲିସକୁ ଜଣାଇଥିଲେ ସୁଦ୍ଧା ନିରବଦ୍ରଷ୍ଟା ସାଜିଛି ପ୍ରଶାସନ। ଅଭିଯୋଗ ପରେ ବି ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନଥିବାରୁ ଅଭିଯୁକ୍ତଙ୍କୁ ଗିରଫ ଦାବି କରିଛି ଜାତୀୟ ଦଳିତ ଆଦିବାସୀ ମହାସଂଘ। ପୋଲିସ ପଦକ୍ଷେପ ଗ୍ରହଣ କରୁନଥିବାରୁ ପୁଅଙ୍କ ପରିବାର ଲୋକେ ପୋଲିସ ଡିଜିଙ୍କୁ ସାକ୍ଷାତ କରି ଅଭିଯୋଗ ଜଣାଇଛନ୍ତି। ଏଭଳି ଅମାନୁଷିକ କାଣ୍ଡ ଘଟାଇଥିବା ଅଭିଯୁକ୍ତଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବି କରିଛି ଜାତୀୟ ଦଳିତ ଆଦିବାସୀ ମାଇନୋରିଟି ମହାସଂଘ। ମା ଓ ଝିଅଙ୍କୁ ନ୍ୟାୟ ନ ମିଳିଲେ ଜଟଣୀ ଥାନା ଘେରାଉ କରାଯିବା ବୋଲି କହିଛନ୍ତି ମହାସଂଘ ସଭାପତି।
ପାକିସ୍ତାନରେ କେଉଁ ଭାରତୀୟ ଅଭିନେତାଙ୍କ ଫିଲ୍ମ ଅଧିକ ରୋଜଗାର କରିଛି ?
ନନ୍ଦିଘୋଷ ବ୍ୟୁରୋ: ଭାରତୀୟ ସିନେମା ଦେଶ ବିଦେଶରେ ମଧ୍ୟ ଭଲ ରୋଜଗାର କରିଥାଏ । ଏମିତିକି ତିନି ଖାନଙ୍କ ବହୁ ଫ୍ୟାନ୍ସ ବିଦେଶରେ ରହିଛନ୍ତି । କେବଳ ତିନି ଖାନ ନୁହଁନ୍ତି ବାକି ଷ୍ଟାରଙ୍କୁ ମଧ୍ୟ ବେଶ ଭଲ ପାଇଥାନ୍ତି ବିଦେଶୀ । ଯାହାର ଅନେକ ଜ୍ବଳନ୍ତ ଉଦାହରଣ ଏବଂ କଲେକ୍ସନ କଥା କହିବା ତାହେଲେ ବିଦେଶରୁ ଜଣାପଡ଼ିଛି । ତେବେ ଆସନ୍ତୁ ଜାଣିବା କି ଆମର ପାରମ୍ପରିକ ପ୍ରତିଦ୍ବନ୍ଦୀ କୁହାଯାଉଥିବା ପାକିସ୍ତାନରେ କେଉଁ ଭାରତୀୟ ଅଭିନେତାଙ୍କ ଫିଲ୍ମର ଅଧିକ କ୍ରେଜ୍ ରହିଛି ଏବଂ ଅଧିକ ରୋଜଗାର କରିଛି । ସବୁଠାରୁ ଗୁରୁତ୍ବପୂର୍ଣ୍ଣ କଥା ହେଉଛି କି, ପାକିସ୍ତାନରେ ସର୍ବାଧିକ ରୋଜଗାର କରିଥିବା ଫିଲ୍ମ ମଧ୍ୟରେ ପାକିସ୍ତାନ ଫିଲ୍ମକୁ ପଛରେ ପକାଇଛି ଭାରତୀୟ ସିନେମା ।
ତେବେ ପାକିସ୍ତାନରେ ଏଯାବତ ସର୍ବାଧିକ ରୋଜଗାର କରିଥିବା ଫିଲ୍ମ ତାଲିକାର ଉପରେ ରହିଛି ’ଦ ଲିଜେଣ୍ଡ ଅଫ୍ ମୌଲା ଜଟ୍ ’। ଯାହାକି ୨୦୨୨ ମସିହାରେ ରିଲିଜ ହୋଇଥିବାବେଳେ କେବଳ ପାକିସ୍ତାନରେ ୪୦୧.୨ କୋଟି ଟଙ୍କା ରୋଜଗାର କରିଥିଲା । ତେବେ ଦ୍ବିତୀୟ ସ୍ଥାନରେ ପାକିସ୍ତାନୀ ଫିଲ୍ମ ’ଜବାନୀ ଫିର ନେହିଁ ଆନି’ ଦ୍ବିତୀୟ ସ୍ଥାନରେ ରହିଛି । ଏହା ୨୦୧୮ ମସିହାରେ ୫୩ କୋଟି ଟଙ୍କା ବ୍ୟବସାୟ କରିଥିଲା । ତେବେ ପାକିସ୍ତାନୀ ଫିଲ୍ମକୁ ପଛରେ ପକାଇ ତୃତୀୟ ସ୍ଥାନରେ ରହିଛି ’ସଞ୍ଜୁ’ । ସଞ୍ଜୟ ଦତ୍ତଙ୍କ ଜୀବନ କାହାଣୀ ଉପରେ ନିର୍ମାଣ ହୋଇଥିବା ଏହି ଫିଲ୍ମରେ ରଣବୀର କପୁର ଅଭିନୟ କରିଥିଲେ । ଏହା କେବଳ ପାକିସ୍ତାନରେ ୩୭.୬୦ କୋଟି ଟଙ୍କାର ବ୍ୟବସାୟ କରିଥିଲା । ଏହାକୁ ବେଶ ପସନ୍ଦ ମଧ୍ୟ କରିଥିଲେ ପାକିସ୍ତାନୀ ଦର୍ଶକ । ଏହାସହ ଟପ୍ ଟେନ ମଧ୍ୟରେ କେବଳ ସଲମାନ ଖାନଙ୍କ ଅଭିନୀତି ଫିଲ୍ମ ସୁଲତାନ ରହିଛି । ଯାହାକି ୩୩ କୋଟି ଟଙ୍କା କେବଳ ପାକିସ୍ତାନରୁ ବ୍ୟବସାୟ କରିଛି ।
ଟସ୍ ପଡ଼ୁ ପଡ଼ୁ ରେକର୍ଡ କଲେ ରୋହିତ
ନନ୍ଦିଘୋଷ ବ୍ୟୁରୋ: ରବିବାର ଖେଳାଯାଉଛି ଚମ୍ପିୟନ୍ସ ଟ୍ରଫିର ଫାଇନାଲ ମୁକାବିଲା । ଟସ୍ ଜିତି ପ୍ରଥମେ ବ୍ୟାଟିଂ କରୁଛି ନ୍ୟୁଜିଲାଣ୍ଡ । ପ୍ରଥମରୁ ଯଦିଓ ଆକ୍ରମଣାତ୍ମକ ବ୍ୟାଟିଂ କରିଥିଲା ଦଳ । ତଥାପି ଭାରତୀୟ ସ୍ପିନରମାନେ ଖେଳରେ ପୁଣି ପରିବର୍ତ୍ତନ କରିଛନ୍ତି । ତେବେ ବଲ ପଡ଼ିବା ପୂର୍ବରୁ ନୂଆ ରେକର୍ଡ କରିଛନ୍ତି ଭାରତୀୟ ଦଳର ଅଧିନାୟକ ରୋହିତ ଶର୍ମା । ଦିନିକିଆରେ ଲଗାତାର ସର୍ବାଧିକ ଥର ଟସ୍ ହାରିଥିବା ଅଧିନାୟକର ରେକର୍ଡ କରିଛନ୍ତି ହିଟମ୍ୟାନ । ରୋହିତ ଲଗାତାର ୧୫ଥର ଟସ୍ ହାରିବାର ରେକର୍ଡ ନିଜ ନାମରେ କରିଛନ୍ତି । ଏହା ପୂର୍ବରୁ ଏହି ରେକର୍ଡ ଓ୍ବେଷ୍ଟଇଣ୍ଡିଜର ପୂର୍ବତନ ଅଧିନାୟକ ବ୍ରାଏନ ଲାରାଙ୍କ ନାମରେ ରହିଥିଲା । ସେ ମଧ୍ୟ ଲଗାତାର ୧୨ଥର ଟସ୍ ହାରିଥିଲ । ଆଉ ଏବେ ରୋହିତଙ୍କ ନାମରେ ଏହି ନୂଆ ରେକର୍ଡ ଯୋଡ଼ି ହୋଇଛି । ୧୯୯୯ରେ ସେ ଲଗାତାର ଟସ୍ ହାରିଥିଲେ । ତେବେ ଆଜିର ଏହି ଫାଇନାଲ ମୁକାବିଲାରେ ଉଭୟ ଦଳ ଦମଦାର ଫର୍ମରେ ରହିଥିବାବେଳେ କିଏ ବିଜୟ ହାସଲ କରୁଛି ଏହା ଉପରେ ରହିଛି ସମସ୍ତଙ୍କ ନଜର ।
ଚମ୍ପିୟନ୍ସ ଟ୍ରଫି: ଟସ୍ ଜିତି ନ୍ୟୁଜିଲାଣ୍ଡର ବ୍ୟାଟିଂ ନିଷ୍ପତ୍ତି
ନନ୍ଦିଘୋଷ ବ୍ୟୁରୋ: ବାଜିଲା ଚମ୍ପିୟନ୍ସ ଟ୍ରଫି ଫାଇନାଲ ବିଗୁଲ । ପଡ଼ିଲା ଟସ୍ । ଟସ୍ ଜିତିବା ପରେ ନ୍ୟୁଜିଲାଣ୍ଡ ବ୍ୟାଟିଂ ନିଷ୍ପତ୍ତି ନେଇଛି । ତେବେ ଆଜିକୁ ମିଶାଇ ଭାରତୀୟ କ୍ରିକେଟର ଅଧିନାୟକ ରୋହିତ ଶର୍ମା ଲଗାତର ୧୫ ଥର ଟସ୍ ହାରିଛନ୍ତି ।
ଭାରତୀୟ ଟିମରେ କୌଣସି ପରିବର୍ତ୍ତନ ହୋଇନାହିଁ । ପୂର୍ବ ଟିମକୁ ଧରି ପଡ଼ିଆକୁ ଓହ୍ଲାଇବେ ରୋହିତ । ସେହିପରି ନ୍ୟୁଜିଲାଣ୍ଡ ଟିମରେ ଗୋଟିଏ ପରିବର୍ତ୍ତନ ହୋଇଛି । ଆହତ ମେଟ ହେନେରୀଙ୍କ ସ୍ଥାନରେ ପ୍ଲେଇଂ-୧୧ରେ ସ୍ଥାନ ପାଇଛନ୍ତି ନାଥନ ସ୍ମିଥ ।
ଭାରତ ପ୍ଲେଇଂ-୧୧
ରୋହିତ ଶର୍ମା (ଅଧିନାୟକ)
ଶୁଭମନ ଗିଲ୍
ବିରାଟ କୋହଲି
ଶ୍ରେୟସ ଆୟର
କେ.ଏଲ. ରାହୁଲ (ଓ୍ବିକେଟ୍ କିପର)
ହାର୍ଦ୍ଦିକ ପାଣ୍ଡ୍ୟା
ଅକ୍ଷର ପଟେଲ
ରବୀନ୍ଦ୍ର ଜାଡେଜା
ବରୁଣ ଚକ୍ରବର୍ତ୍ତି
କୁଲଦୀପ ଯାଦବ
ମହମ୍ମଦ ସାମି
ନ୍ୟୁଜିଲାଣ୍ଡ ପ୍ଲେଇଂ ଇଲେଭେନ୍
ଓ୍ବିଲ ୟଙ୍ଗ
ରଚିନ୍ ରବୀନ୍ଦ୍ର
କେନ ଓ୍ବିଲିୟମସନ
ଡେରିଲ ମିଚେଲ
ଟମ୍ ଲେଥମ (ଓ୍ବିକେଟ୍ କିପର୍)
ଗ୍ଲେନ୍ ଫିଲିଫ୍ସ
ମାଇକେଲ ବ୍ରେସଓ୍ବେଲ
ମିଚେଲ ସେଣ୍ଟନର (ଅଧିନାୟକ)
ନାଥନ ସ୍ମିଥ
କାଇଲ ଜେମିସନ
ଓ୍ବିଲିୟମ୍ ଓରୋକେ