ନନ୍ଦିଘୋଷ ବ୍ୟୁରୋ: ମହାଶିବରାତ୍ରୀରେ ରାତି ୧୦ଟାରେ ଉଠିବ ଲିଙ୍ଗରାଜଙ୍କ ମହାଦୀପ। ସମନ୍ଵୟ କମିଟିରେ ଏହି ନିଷ୍ପତ୍ତି ହୋଇଛି। ଗତକାଲି ଆଇନ ମନ୍ତ୍ରୀଙ୍କ ଅଧ୍ଯକ୍ଷତାରେ ଏହି ସମନ୍ଵୟ ବୈଠକ ହୋଇଥିଲା। ବୈଠକରେ ଜାଗର ନେଇ ବିସ୍ତୃତ ଆଲୋଚନା କରାଯାଇଥିଲା। ଚଳିତ ବର୍ଷ ଲିଙ୍ଗରାଜଙ୍କ ଜାଗର ଯାତ୍ରାକୁ ସୁରୁଖୁରୁରେ ସମ୍ପନ୍ନ କରିବା ଉପରେ ଗୁରୁତ୍ଵ ଦିଆଯାଇଛି। ଆସନ୍ତା ୨୬ ତାରିଖ ହେବ ଜାଗର। ଭୋର୍ ୩ଟାରୁ ରାତି ସାଢ଼େ ୧୧ଟା ଓ ରାତି ସାଢ଼େ ୧୧ଟାରୁ ପରଦିନ ସକାଳ ୫ଟା ୧୫ ମିନିଟ ପର୍ଯ୍ୟନ୍ତ ଲିଙ୍ଗରାଜଙ୍କ ନୀତିକାନ୍ତି ବି ସ୍ଥିର ହୋଇଛି। ଲିଙ୍ଗରାଜଙ୍କ ଜାଗରକୁ ସୁରୁଖୁରୁରେ ସମ୍ପନ୍ନ କରିବା ପାଇଁ ଓ ଭକ୍ତଙ୍କ ସୁବିଧା ପାଇଁ ସବୁ ପ୍ରକାର ବ୍ୟବସ୍ଥା କରାଯିବ। ଭକ୍ତମାନେ ଯେମିତି ବିନା ସମସ୍ଯାରେ ଲିଙ୍ଗରାଜଙ୍କୁ ଦର୍ଶନ କରିପାରିବେ, ତା ଉପରେ ବୈଠକରେ ଫୋକସ୍ କରାଯାଇଛି। ମୁତୟନ ହେବେ ୪୦ ପ୍ଲାଟୁନ ଫୋର୍ସ। ଅଗ୍ନିଶମ ବାହିନୀ, ଜରୁରୀ ସ୍ଵାସ୍ଥ୍ୟ ସେବା ପାଇଁ ସ୍ଵତନ୍ତ୍ର ଟିମ୍ ମଧ୍ୟ ପ୍ରସ୍ତୁତ ରହିବେ। ବ୍ୟାରିକେଡ୍ ଲଗାଯିବା ସହିତ ପାନୀୟ ଜଳ ବ୍ୟବସ୍ଥା, ସୁଲଭ ଶୌଚାଳୟ, ସୁରକ୍ଷା ଓ ଟ୍ରାଫିକ୍ ପରିଚାଳନା ପାଇଁ ସ୍କାଉଟ ଗାଇଡ୍, ରେଡକ୍ରସ୍, ଏନସିସି କ୍ଯାଡେଟଙ୍କୁ ନିୟୋଜିତ କରାଯିବ। ମନ୍ଦିରର ଏକ କିଲୋମିଟର ପରିଧି ଭିତରେ ସିସିଟିଭି ଲଗାଯିବ। ମନ୍ଦିର ସେବାୟତ ଓ ଭିଆଇପିଙ୍କ ପାଇଁ ପୃଥକ୍ ଦ୍ଵାର ବ୍ୟବହାର କରାଯିବ। ବୈଠକରେ ମନ୍ଦିର ଟ୍ରଷ୍ଟ ବୋର୍ଡର କର୍ମକର୍ତ୍ତା, ସେବାୟତ, ଜିଲ୍ଲାପାଳ ଓ ବିଭିନ୍ନ ବିଭାଗର ଅଧିକାରୀ ଉପସ୍ଥିତ ଥିଲେ।
ଅବତରଣ ବେଳେ ଓଲଟିଲା ଡେଲଟା ଏୟାରଲାଇନ୍ସ ବିମାନ
ନନ୍ଦିଘୋଷ ବ୍ୟୁରୋ: ପୁଣି କାନାଡ଼ାରୁ ଆସିଲା ବିମାନ ଦୁର୍ଘଟଣାର ଖବର । ଅବତରଣ ବେଳେ ଓଲଟିଲା ହେଲଟା ଏୟାରଲାଇନ୍ସ ବିମାନ । ତେବେ ବିମାନରେ ୮୦ ଜଣ ଯାତ୍ରୀ ରହିଥିବା ସୂଚନା ମିଳିଛି । ଟରେଣ୍ଟ ଏୟାରପୋର୍ଟରେ ଏହି ଅଘଟଣ ଘଟିଛି । ତେବେ ଏହି ସମୟର ଏକ ଭିଡିଓ ମଧ୍ୟ ସାମନାକୁ ଆସିଛି । ଯାହା ଏବେ ବେଶ ଭାଇରାଲ ହେବାରେ ଲାଗିଛି । ତେବେ କେଉଁ କାରଣରୁ ଏଭଳି ଅଘଟଣ ଘଟିଲା ତାହା ସ୍ପଷ୍ଠ ହୋଇନାହିଁ । ଏହି ଦୁର୍ଘଟଣାରେ ୧୮ ଜଣ ଯାତ୍ରୀ ଆହତ ହୋଇଥିବା ଜଣାପଡ଼ିଛି । ସମସ୍ତ ଯାତ୍ରୀଙ୍କୁ ଉଦ୍ଧାର କରି ମେଡିକାଲରେ ଭର୍ତ୍ତି କରାଯାଇଛି ।
NEW: New footage shows passengers walking on the ceiling to escape the Delta jet that crashed in Toronto, Canada.
"Don't take a video. Put that phone away," a flight attendant could be heard saying.
Here is what we know so far:
– 15 people including a child were injured, at… pic.twitter.com/7FHt16WP2Q
— Collin Rugg (@CollinRugg) February 17, 2025
ଋଷ-ୟୁକ୍ରେନ ଯୁଦ୍ଧର ଘଟିପାରେ ଅନ୍ତ : ଆଜି ସାଉଦି ଆରବରେ ବୈଠକ
ନନ୍ଦିଘୋଷ ବ୍ୟୁରୋ: ରୁଷ-ୟୁକ୍ରେନରେ ମଧ୍ୟରେ ଯୁଦ୍ଧ ବନ୍ଦ କରିବା ନେଇ ଆଜି ବସୁଛି ବୈଠକ। ସାଉଦି ଆରବ ମଧ୍ୟସ୍ଥତାରେ ବସିବ ପ୍ରଥମ ବୈଠକ। ଏଥିରେ ଆମେରିକା ଓ ରୁଷର ପ୍ରତିନିଧି ଯୋଗ ଦେବାର କାର୍ଯ୍ୟକ୍ରମ ରହିଛି। ଏହି ବୈଠକ ପରେ ଦୁଇ ଦେଶର ରାଷ୍ଟ୍ରପତିଙ୍କ ମଧ୍ୟରେ ଆଲୋଚନା ନେଇ ବାଟ ଖୋଲିବା ସମ୍ଭାବନା ରହିଛି। ଆମେରିକା ଏବଂ ରୁଷର କୂଟନୈତିକ ପ୍ରତିନିଧି ସାଉଦି ଆରବରେ ଏହି ଆଲୋଚନା କରିବେ। ଆଲୋଚନାକୁ ନେଇ ଆମେରିକାର ନୂତନ ବୈଦେଶିକ ନୀତିର ଆରମ୍ଭ ବୋଲି କୁହାଯାଉଛି। ଯେଉଁଠାରେ ରୁଷକୁ ଛାରକାର କରିବା ବଦଳରେ ସହମତି ନେଇ ବାଟ ଖୋଜିବାରେ ଏହି ଆଲୋଚନା ସହାୟକ ହେବ। ଏହି ବୈଠକ ପରେ ରୁଷ ରାଷ୍ଟ୍ରପତି ବ୍ଲାଦିମିର ପୁଟିନ ଏବଂ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ ଆଲୋଚନା ନେଇ ବାଟ ସଫା ହୋଇଯିବ। ସେପଟେ ଏହି ବୈଠକକୁ ନେଇ ୟୁକ୍ରେନ ରାଷ୍ଟ୍ରପତି ଜେଲେନ୍ସକି ଆପତ୍ତି ଉଠାଇଛନ୍ତି। ୟୁକ୍ରେନ ପ୍ରତିନିଧିତ୍ଵ ବିନା ଶାନ୍ତି କଥାବାର୍ତ୍ତା ନେଇ ହୋଇପାରିବନାହିଁ ବୋଲି କରିଛନ୍ତି ଜେଲେନସ୍କି। ୟୁକ୍ରେନର ଭାଗିଦାରୀ ବିନା ଆଲୋଚନାର ପରିଣାମରକୁ ସେ ଅସ୍ଵୀକାର କରିବେ ବୋଲି ଚେତାଇ ଦେଇଛନ୍ତି। ଯଦି କିଭ ଏହି ଆଲୋଚନାରେ ସାମିଲ ହେବ ନାହିଁ ତେବେ ଏହି ବୈଠକ ବ୍ୟର୍ଥ ହେବ ବୋଲି କହିଛନ୍ତି ଜେଲେନସ୍କି। ସାଉଦିରେ ବସୁଥିବା ଏହି ବୈଠକରେ ଆମେରିକା ବୈଦେଶିକ ମନ୍ତ୍ରୀ ମାର୍କୋ ରୁବିଓ ଏବଂ ଜାତୀୟ ପରାମର୍ଶଦାତା ମାଇକ ୱାଲ୍ଟଜ ଏବଂ ଷ୍ଟିଭ ବିଟକଫ୍ ସାମିଲ ହେବେ। ଏହି ଟିମ ରୁଷ ପ୍ରତିନିଧି ମଣ୍ଡଳ ସହ ଆଲୋଚନା କରିବ। ରୁଷ ପ୍ରତିନିଧି ମଣ୍ଡଳୀରେ ରୁଷ ବୈଦେଶିକ ମନ୍ତ୍ରୀ ସର୍ଗେଇ ଲାଭାରୋବ ଏବଂ ରାଷ୍ଟ୍ରପତି ବ୍ଲାଦିମିର ପୁଟିନଙ୍କ ପରାମର୍ଶଦାତା ୟୁରୀ ଉଶାକୋଭ ସାମିଲ ହେବେ
ଭାରତୀୟ ଜର୍ସିରେ ପାକିସ୍ତାନ
ନନ୍ଦିଘୋଷ ବ୍ୟୁରୋ: ଚାମ୍ପିୟନ୍ସ ଟ୍ରଫି ପାଇଁ ସମସ୍ତ ଦଳର ନୂଆ ଜର୍ସି ଦେଖିବାକୁ ମିଳିଛି । ସମସ୍ତ ଦଳ ନିଜ ନିଜର ନୂଆ ଜର୍ସିରେ ଫଟୋସୁଟ କରିଛନ୍ତି । ତେବେ ଏହି ଟୁର୍ଣ୍ଣାମେଣ୍ଟଟି ପାକିସ୍ତାନ ଆୟୋଜନ କରୁଥିବାବେଳେ ଏହା ହାଇବ୍ରିଡ୍ ମଡେଲରେ ଖେଳଯାଉଛି । ଭାରତର ସମସ୍ତ ମ୍ୟାଚ ଦୁବାଇରେ ଖେଳାଯିବ । ସେପଟେ ପ୍ରଥମରୁ ଚର୍ଚ୍ଚା ହେଉଥିଲା କି, ଭାରତୀୟ ଜର୍ସିରେ ପାକିସ୍ତାନର ନାମ ରହିବ କି ନାହିଁ । ଆଉ ଏବେ ଭାରତୀୟ ଜର୍ସିରେ ଆୟୋଜକ ପାକିସ୍ତାନର ନାମ ରହିଛି । ICCର ସମସ୍ତ ଇଭେଣ୍ଟରେ ଯେଉଁ ଦେଶ ଆୟୋଜନ କରିଥାଏ ସେହି ଦେଶର ନାମ ସମସ୍ତ ଦଳର ଜର୍ସିରେ ରହିଥାଏ । ଏଣୁ ଭାରତୀୟ ଦଳର ଜର୍ସିରେ ମଧ୍ୟ ପାକିସ୍ତାନର ନାମ ରହିଛି । ଭାରତୀୟ ଖେଳାଳିଙ୍କ ଦ୍ବାରା କରାଯାଇଥିବା ବିଭିନ୍ନ ଫଟୋ ସବୁ ଏବେ ପ୍ରଂଶସକମାନେ ସେୟାର କରାଯାଉଛି ।
https://www.instagram.com/indiancricketteam/?utm_source=ig_embed&ig_rid=989522f0-714e-47e6-81da-367aa33d396b
ଚାମ୍ପିଅନ୍ସ ଟ୍ରଫି ୨୦୨୫ ଫେବୃଆରୀ ୧୯ରୁ ଆରମ୍ଭ ହେଉଛି। ଟିମ୍ ଇଣ୍ଡିଆ ଏହି ICC ଟୁର୍ଣ୍ଣାମେଣ୍ଟରେ ଦ୍ୱିତୀୟ ଦିନ ଅର୍ଥାତ୍ 20 ଫେବୃଆରୀରୁ ତା’ର ଅଭିଯାନ ଆରମ୍ଭ କରିବ। ଏହି ମ୍ୟାଚରେ ବାଂଲାଦେଶକୁ ଭେଟିବ, ଯାହା ଦୁବାଇର ଅନ୍ତର୍ଜାତୀୟ କ୍ରିକେଟ ଷ୍ଟାଡିୟମରେ ଖେଳାଯିବ। ଏହା ପରେ, ଭାରତକୁ ୨୩ ଫେବୃଆରୀରେ ପାକିସ୍ତାନକୁ ଭେଟିବାକୁ ପଡିବ। ମାର୍ଚ୍ଚ ୨ ତାରିଖରେ, ଏହା ଗ୍ରୁପ୍ ପର୍ଯ୍ୟାୟର ଶେଷ ମ୍ୟାଚ୍ରେ ନ୍ୟୁଜିଲାଣ୍ଡକୁ ଭେଟିବ।
ଗରମରେ ଲାଗିବ ବ୍ରେକ୍, ଏହିସବୁ ଜିଲ୍ଲାରେ ବର୍ଷା ସମ୍ଭାବନା
ନନ୍ଦିଘୋଷ ବ୍ୟୁରୋ: କାଲିଠୁ ଗରମରୁ ମିଳିବ ଆଶ୍ବସ୍ତି । ପଶ୍ଚିମା ଝଡ ଆଣିବ ବର୍ଷା । ଭିଜିବ ଉତ୍ତର ଆଭ୍ୟନ୍ତରୀଣ ଓଡ଼ିଶା । ଘଡଘଡି ବିଜୁଳି ସହ ବର୍ଷା ନେଇ ୬ ଜିଲ୍ଲାକୁ ୟେଲୋ ଆଲର୍ଟ ଜାରି କରିଛି ପାଣିପାଗ କେନ୍ଦ୍ର । ବର୍ଷା ସହ ପବନ ନେଇ ବି ସତର୍କତା ଜାରି କରାଯାଇଛି । ବଙ୍ଗୋପସାଗରରେ ସୃଷ୍ଟି ହେବାକୁ ଥିବା ପଶ୍ଚିମା ଝଡ ପ୍ରଭାବରେ କାଲିଠୁ ଦୁଇ ଦିନ ରାଜ୍ୟରେ ଘଡଘଡି ବିଜୁଳି ସହ ବର୍ଷା ହେବ ବୋଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର । ଏଥିପାଇଁ କାଲି ୬ଟି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ମୟୂରଭଞ୍ଜ, କେନ୍ଦୁଝର, ଯାଜପୁର, ଭଦ୍ରକ, ବାଲେଶ୍ବର ଏବଂ କେନ୍ଦ୍ରାପଡାରେ ବଜ୍ରପାତ ନେଇ ସତର୍କତା ଜାରି କରାଯାଇଛି । ସେହିଭଳି ସେହିପରି ୨୦ ରେ ବଜ୍ରପାତ ନେଇ ୧୦ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ଅନୁଗୁଳ, ଢେଙ୍କାନାଳ, ସୁନ୍ଦରଗଡ, ଦେବଗଡ, ମୟୂରଭଞ୍ଜ, କେନ୍ଦୁଝର, ଯାଜପୁର, ଭଦ୍ରକ, ବାଲେଶ୍ବର ଏବଂ କେନ୍ଦ୍ରାପଡାକୁ ସତର୍କତା ଜାରି କରାଯାଇଛି । ସେପଟେ ଆଜି ବି ରାଜ୍ୟରେ ଜାରି ରହିବ ତାତି । ସ୍ବାଭାବିକ ଠାରୁ ୨ ରୁ ୪ ଡିଗ୍ରୀ ଉପରେ ରହିବ ପାରଦ । ରାଜଧାନୀ ଭୁବନେଶ୍ବର ସମେତ ଝାରସୁଗୁଡା, ସମ୍ବଲପୁର, ବରଗଡ଼, ବଲାଙ୍ଗୀର, ସୋନପୁର, ବୌଦ୍ଧ, ମାଲକାନଗିରି, ଗଜପତି, ଭଦ୍ରକ, ଜଗତସିଂହପୁର ଜିଲ୍ଲାରେ ସ୍ବାଭାବିକ ଠାରୁ ୩ରୁ ୪ ଡିଗ୍ରୀ ଉପରେ ପାରଦ ରହିବ ବୋଲି ଆକଳନ କରାଯାଇଛି । ଏହି ସବୁ ଜିଲ୍ଲାରେ ୩୫ ରୁ ୩୮ ଡିଗ୍ରୀ ମଧ୍ୟରେ ଦିନର ତାପମାତ୍ରା ରେକର୍ଡ ହୋଇପାରେ । ମେଘମୁକ୍ତ ଆକାଶ ଏବଂ ସୂର୍ଯ୍ୟଙ୍କ ତେଜ ପାଇଁ ତାତି ବୃଦ୍ଧି ପାଇଛି ।
ଜ୍ଞାନେଶ କୁମାର ହେବେ ଦେଶର ପରବର୍ତ୍ତୀ ମୁଖ୍ୟ ନିର୍ବାଚନ କମିଶନର
ନନ୍ଦିଘୋଷ ବ୍ୟୁରୋ: ଜ୍ଞାନେଶ କୁମାର ହେବେ ଦେଶର ପରବର୍ତ୍ତୀ ମୁଖ୍ୟ ନିର୍ବାଚନ କମିଶନର। ପ୍ରଧାନମନ୍ତ୍ରୀଙ୍କ ଅଧ୍ୟକ୍ଷତାରେ ବୈଠକରେ ନିଷ୍ପତ୍ତି ନିଆଯାଇଛି । ବୈଠକରେ ଯୋଗ ଦେଇଥିଲେ କେନ୍ଦ୍ରମନ୍ତ୍ରୀ ଅମିତ ଶାହାଙ୍କ ସହ ବିରୋଧୀ ଦଳ ନେତା ରାହୁଲ ଗାନ୍ଧି । ଜ୍ଞାନେଶ କୁମାର ହେଉଛନ୍ତି ୧୯୮୮ ବ୍ୟାଚ କେରଳ କ୍ୟାଡର ଆଇଏଏସ । ସେ କେନ୍ଦ୍ର ଗୃହମନ୍ତ୍ରାଳୟରେ କାର୍ଯ୍ୟ କରିଛନ୍ତି । ଗତବର୍ଷ ଜାନୁଆରୀ ୩୧ରେ ସେ କେନ୍ଦ୍ର ସମବାୟ ମନ୍ତ୍ରାଳୟର ସଚିବ ପଦରୁ ଅବସର ନେଇଥିଲେ । ସେ ସଂସଦୀୟ ବ୍ଯାପାର ବିଭାଗ ସଚିବ ପଦ ବି ସମ୍ଭାଳିଥିଲେ । ବହୁ ଚର୍ଚ୍ଚିତ ଅଯୋଧ୍ଯା ମାମଲାରେ ସୁପ୍ରିମକୋର୍ଟଙ୍କ ରାୟ ଅନୁସାରେ କାର୍ଯ୍ୟାବଳୀର ସମୀକ୍ଷା ଲାଗି ୨୦୨୦ରେ ତାଙ୍କୁ ଗୃହ ମନ୍ତ୍ରାଳୟର ଅତିରିକ୍ତ ସଚିବ ଭାବେ ନିଯୁକ୍ତି ଦିଆଯାଇଥିଲା । ଚଳିତବର୍ଷ ବିହାର, ଆସନ୍ତାବର୍ଷ ପଶ୍ଚିମବଙ୍ଗ, ତାମିଲନାଡୁ, ଆସାମ ଓ କେରଳରେ ବିଧାନସଭା ନିର୍ବାଚନ ହେବାକୁ ଯାଉଥିବାବେଳେ ପରବର୍ତ୍ତୀ ସିଇସିଙ୍କ ଗୁରୁତ୍ବ ବଢିଛି । ସେପଟେ ଆଜି ଦାୟିତ୍ଵରୁ ଅବସର ନେବେ ରାଜୀବ କୁମାର। ଗତ ମେ ୨୦୨୨ରେ ରାଜୀବ କୁମାରଙ୍କୁ ସିଇସି ପଦରେ ଅଭିଷିକ୍ତ କରାଯାଇଥିଲା । ରାଜୀବଙ୍କ ଅମଳରେ ହାଇପ୍ରୋଫାଇଲ ୨୦୨୪ଲୋକସଭା ନିର୍ବାଚନ ସମେତ ମହାରାଷ୍ଟ୍ର, କର୍ଣ୍ଣାଟକ, ତେଲଙ୍ଗାନା, ଆନ୍ଧ୍ରପ୍ରଦେଶ, ମଧ୍ଯପ୍ରଦେଶ, ରାଜସ୍ଥାନ, ଓଡ଼ିଶା, ହରିୟାଣା, ଝାଡଖଣ୍ଡ, ଦିଲ୍ଲୀ, ଜାମ୍ମୁ ଓ କାଶ୍ମୀର ଆଦି ରାଜ୍ଯରେ ନିର୍ବାଚନ ହୋଇଥିଲା । ସିଇସି ପଦ ଲାଗି ପ୍ରାୟ ୪୮୦ଜଣଙ୍କ ନାଁ ଆସିଥିବା ବେଳେ ଜ୍ଞାନେଶ କୁମାରଙ୍କ ନାଁ ଚୟନ କରାଯାଇଛି ।
ଆଜିଠୁ +୨ ପରୀକ୍ଷା, ପ୍ରଥମ ଦିନରେ ହେବ ଓଡ଼ିଆ ପରୀକ୍ଷା
ନନ୍ଦିଘୋଷ ବ୍ୟୁରୋ: ଆଜିଠାରୁ ଯୁକ୍ତଦୁଇ ପରୀକ୍ଷା। ବିଜ୍ଞାନ ଓ ଧନ୍ଦାମୂଳକ ଶିକ୍ଷାର ପରୀକ୍ଷା ଆରମ୍ଭ ହେବ। ପ୍ରଥମ ଦିନରେ ଓଡ଼ିଆ ପରୀକ୍ଷା ଦେବେ ଛାତ୍ରଛାତ୍ରୀ । ସକାଳ ୧୦ଟାରୁ ଦିନ ୧ଟା ଯାଏ ହେବ ପରୀକ୍ଷା । ପରୀକ୍ଷା ଶୃଙ୍ଖଳିତ କରିବା ପାଇଁ CHSE ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ପରୀକ୍ଷା କେନ୍ଦ୍ର ଓ ବାହାରେ ପୋଲିସ ମୁତୟନ ସହ ଜିଲ୍ଲା ପ୍ରଶାସନର ସହଯୋଗରେ ପରୀକ୍ଷା କରାଯାଇଛି। ରାଜ୍ୟର ୧୨ଶହ ୭୬ ପରୀକ୍ଷା କେନ୍ଦ୍ରରେ ୩ ଲକ୍ଷ ୯୩ ହଜାର ୬୧୮ ପିଲା ପରୀକ୍ଷା ଦେବେ। ୧୯ ତାରିଖରେ କଳା ଓ ବାଣିଜ୍ୟ ପରୀକ୍ଷା ଆରମ୍ଭ ହେବ। ସବୁ କେନ୍ଦ୍ରରେ ସିସିଟିଭି ବ୍ୟବସ୍ଥା କରାଯାଇଛି। CHSE ପରିସରରେ ନିୟନ୍ତ୍ରଣ କକ୍ଷ କରାଯାଇଛି। ଯେଉଁଠି ଏକାସଙ୍ଗରେ ୫ଶହ ପରୀକ୍ଷା କେନ୍ଦ୍ରର ସ୍ଥିତି ସିସିଟିଭିରେ ଦେଖିହେବ। ଏଥର ପରୀକ୍ଷା ପାଇଁ ପଞ୍ଚସ୍ତରୀୟ ସ୍କ୍ୱାଡ୍ ବ୍ୟବସ୍ଥା କରାଯାଇଛି ।
ଯୁକ୍ତଦୁଇ ଉଚ୍ଚ ମାଧ୍ୟମିକ ବିଦ୍ୟାଳୟ ସ୍ତରରେ ଏକ ସ୍କ୍ୱାଡ୍ ସହ, ପର୍ଯ୍ୟବେକ୍ଷକ ସ୍କ୍ୱାଡ୍, ଜିଲ୍ଲା ପ୍ରଶାସନ ପକ୍ଷରୁ ଏକ ସ୍କ୍ୱା଼ଡ୍, ଜୋନାଲ, ସେଣ୍ଟ୍ରାଲ ସ୍କ୍ୱାଡ୍ ଗଠନ କରାଯାଇଛି । ଉତ୍ତରପତ୍ର ଓ ପ୍ରଶ୍ନପତ୍ର ସକାଳ ୮ଟା ୩୦ ମଧ୍ୟରେ ହବରୁ ପରୀକ୍ଷା କେନ୍ଦ୍ରରେ ପହଂଚିବ । ସକାଳ ୯ଟା ୩୦ରେ ପ୍ରଶ୍ନପତ୍ର ଖୋଲାଯିବ। ୯ଟା ୪୫ରେ ଉତ୍ତର ଖାତା ଦିଆଯିବ ଓ ୯ଟା ୫୫ରେ ପ୍ରଶ୍ନପତ୍ର ଦିଆଯିବ। କେହି ବି ମୋବାଇଲ ନେଇ ପରୀକ୍ଷା କେନ୍ଦ୍ରକୁ ଯାଇପାରିବେ ନାହିଁ । କେବଳ ସେଣ୍ଟର ସୁପରିଟେଣ୍ଡେଣ୍ଟ ସାଇଲେଣ୍ଟ ମୋଡ଼ରେ ମୋବାଇଲ ଫୋନ ରଖିପାରିବେ। ଏବେ ନୂତନ ପରୀକ୍ଷା ଢାଞ୍ଚାରେ କ୍ୟାମେରା ଵ୍ୟଵସ୍ଥା ହୋଇଛି । ଯାହା ଫଳରେ ସ୍ଵଛତାର ସହ ପରୀକ୍ଷା ହେବ। ହବ୍ ବ୍ୟବସ୍ଥା ଯୋଗୁ ପ୍ରଶ୍ନପତ୍ର ଲିକର ସମ୍ଭାବନା ମଧ୍ୟ କମ ରହିଛି ।
ବିଦେଶ ଅତିଥୀଙ୍କ ପାଇଁ ଚଳଚଞ୍ଚଳ ଗଞ୍ଜାମ: ଆରମ୍ଭ ହୋଇଛି ଅଲିଭ ରିଡଲେଙ୍କ ଗଣ ଅଣ୍ଡାଦାନ ପ୍ରକ୍ରିୟା
ଗଞ୍ଜାମ: ମାଇଲ ଦୂରରୁ ଛୁଟି ଆସିଛନ୍ତି ଅଲିଭ ରିଡଲେ । ଆରମ୍ଭ ହୋଇଛି ଏହି ବିରଳ କଇଁଛଙ୍କ ଗଣ ଅଣ୍ଡାଦାନ ପ୍ରକ୍ରିୟା । ଏଥିପାଇଁ ଚଳଚଞ୍ଚଳ ଗଞ୍ଜାମ ଋଷିକୂଲ୍ୟା ମୁହାଣ । ଅନୁକୂଳ ପାଗ ସହ ଦକ୍ଷିଣା ପବନ ଯୋଗୁ ହଜାର ହଜାର ସଂଖ୍ୟାରେ କଇଁଛ ଅଣ୍ଡାଦାନ କରି ସମୁଦ୍ରକୁ ଫେରୁଛନ୍ତି । ଗଞ୍ଜାମ ଜିଲ୍ଲାର ଗଞ୍ଜାମ ବ୍ଲକ ଅନ୍ତର୍ଗତ ପୋଡ଼ମପେଟା ଗ୍ରାମ ଠାରୁ ବଟେଶ୍ୱର ମନ୍ଦିର ନିକଟସ୍ଥ ସମୁଦ୍ର ବେଳାଭୂମିରେ ବିରଳ ଏହି କଇଁଛମାନେ ଉପରକୁ ଉଠିଆସି ଗଣଅଣ୍ଡା ଦାନ କରୁଥିବା ଦେଖିବାକୁ ମିଳିଛି । ଯାହାକୁ ନେଇ ପର୍ଯ୍ୟଟକ, ପରିବେଶବିତ୍ ମହଲରେ ଖୁସି ପ୍ରକାଶ ପାଇଥିବାବେଳେ ସୁରକ୍ଷା ନେଇ ବନ ବିଭାଗ ପକ୍ଷରୁ କରାଯାଇଛି ସ୍ବତନ୍ତ୍ର ବ୍ୟବସ୍ଥା ।
ବନ ବିଭାଗ ପକ୍ଷରୁ ପୂର୍ବରୁ ୫ କିଲୋମିଟର ପର୍ଯ୍ୟନ୍ତ ବ୍ୟାରିକେଡ୍ ନିର୍ମାଣ କରାଯାଇଛି । କୁକୁର, ବିଲୁଆଙ୍କ ଠାରୁ ସୁରକ୍ଷା ଦେବାକୁ ଲଗାଜାଇଛି ତାରଜାଲି । କଇଁଛ ପ୍ରାୟ ୧୨୦ରୁ ଅଧିକ ଅଣ୍ଡାଦେବା ପରେ ବାଲିରେ ପୋତି ସମୁଦ୍ର ମଧ୍ୟକୁ ଫେରି ଯାଇଥାନ୍ତି । ଅଣ୍ଡା ଦେବାର ୪୫ ଦିନ ପରେ ଅଣ୍ଡାରୁ ଛୁଆ ବାହାରି ସମୁଦ୍ରକୁ ଯାଇଥାନ୍ତି । ୨୦୨୪ ରେ ଗଣଅଣ୍ଡାଦାନ ହୋଇନଥିବା ବେଳେ ଚଳିତବର୍ଷ ଏହି ଗଣ ଅଣ୍ଡାଦାନ ହେଉଥିବା ଦେଖାଦେଇଛି । ଏଥିପାଇଁ ଗତବର୍ଷ ନଭେମ୍ବର ୧ ଠାରୁ ଚଳିତବର୍ଷ ମେ ୩୧ ପ୍ରଯ୍ୟନ୍ତ ଆର୍ଯ୍ୟପଲ୍ଲୀ ରୁ ପ୍ରୟାଗୀ ଯାଏଁ ୨୦ କିଲୋମିଟର ନୋ ଫିସିଙ୍ଗ ଜୋନ ଘୋଷଣା କରାଯାଇଛି । ସୁରକ୍ଷାକୁ ଦୃଷ୍ଟିରେ ରଖି ୫୦ଟି ସେଗମେଣ୍ଟ କରାଯାଇଛି । ଚଳିତ ବର୍ଷ ୬ ଲକ୍ଷରୁ ଅଧିକ କଇଁଛ ଗଣଅଣ୍ଡାଦାନ କରିବେ ବୋଲି ଆଶା ରଖିଛି ବନ ବିଭାଗ ।
ବିଧାନସଭାରେ ୱାଲଟିଅର ଡିଭିଜନ ତାତି: ପାତରଅନ୍ତର ନୀତି ନେଇ ବିଜେଡିର କଡ଼ା ସମାଲୋଚନା
ଭୁବନେଶ୍ବର: ୱାଲଟିଅର ପ୍ରସଂଗରେ ହୁଲସ୍ତୁଲ ବିଧାନସଭା । ଗୃହରେ ବିଜେଡିର ହଲ୍ଲାବୋଲ। ପୂର୍ବତଟ ରେଳପଥକୁ ବିକଳାଙ୍ଗ କଲା କେନ୍ଦ୍ର। ୧୦ ହଜାର କୋଟି ରାଜସ୍ବ ହରାଇବ ଓଡିଶା। ଶୂନ୍ୟକାଳରେ ଉଠିଲା ରେଲୱେ ତାତି। ଅବହେଳା ପ୍ରସଙ୍ଗ ଉଠାଇ କେନ୍ଦ୍ରର ଓ ରାଜ୍ୟ ବିଜେପିକୁ ଘେରିଲେ ବିରୋଧୀ ଦଳ ଉପ ନେତା ପ୍ରସନ୍ନ ଆଚାର୍ଯ୍ୟ। କହିଲେ, ଚଳିତ ମାସ ୭ ତାରିଖ ଥିଲା ଓଡ଼ିଶା ପାଇଁ କଳା ଦିନ। ପୂର୍ବତଟ ରେଲୱେ ୨୫ରୁ ୩୦ ହଜାର କୋଟି ଟଙ୍କାର ଅବଦାନ ଦେଇଥାଏ। ହେଲେ କେନ୍ଦ୍ରର ବଜେଟ ତାକୁ ବିକଳାଙ୍ଗ କରିଦେଲା । ୱାଲଟିଅର ଡିଭିଜନକୁ ବିଲୀନ କରିଦିଆଗଲା କେନ୍ଦ୍ର କ୍ୟାବିନେଟରେ । ପୂର୍ବତଟ ରେଲୱେରୁ ନେଇ ଆନ୍ଧ୍ରପ୍ରଦେଶରେ ମିଶାଇ ଦିଆଗଲା।
ରାଜନୈତିକ ଉଦ୍ଦେଶ୍ୟ ରଖି ଏହା କରାଗଲା। ଯଦି ଆନ୍ଧ୍ର ପାଇଁ ଏହି ଜୋନ୍ କରାଗଲା ତେବେ ଓଡିଶା ପାଇଁ ମଧ୍ୟ କରାଯାଉ ବୋଲି ଦାବି କରିଛି ବିଜେଡି। ଅନ୍ୟ ରାଜ୍ୟ ପାଇଁ ଗୋଟିଏ ନିୟମ, ଓଡିଶା ପାଇଁ ଅଲଗା କାହିଁକି ବୋଲି ପ୍ରଶ୍ନ କରିଛି ଦଳ। ଏଥିପାଇଁ ଗୃହରେ ପ୍ରସ୍ତାବ ଅଣାଯାଉ। ଓଡିଶା ପାଇଁ ରାଜ୍ୟକୁ ସୁହାଇଲା ଭଳି ଜୋନ୍ କରିବାକୁ ଦାବି କରିଥିଲେ । ରେଳମନ୍ତ୍ରୀ ଓଡିଶାରୁ ଯାଇ ଓଡିଶା ପାଇଁ କିଛି କରୁନାହାନ୍ତି ଏହା ଦୁର୍ଭାଗ୍ୟର ବିଷୟ। ଅନ୍ୟ ରାଜ୍ୟ ପାଇଁ ଅନୁଦାନ ଗୋଟିଏ ଆମ ପାଇଁ ଆଉ ଗୋଟିଏ ବୋଲି ଅଭିଯୋଗ କରିଛି ବିଜେଡି।
ୱାଲଟିଅର ଡିଭିଜନକୁ ବିଶାଖାପାଟଣା ଡିଭିଜନରେ ମିଶ୍ରଣ ପ୍ରସଙ୍ଗରେ କେନ୍ଦ୍ରକୁ କଡ଼ା ସମାଲୋଚନା କରିଥିଲେ ବରିଷ୍ଠ ବିଜେଡି ବିଧାୟକ ରଣେନ୍ଦ୍ର ପ୍ରତାପ ସ୍ଵାଇଁ। କେନ୍ଦ୍ର କ୍ୟାବିନେଟର ରିଜୋଲ୍ୟୁସନକୁ ଓଡ଼ିଶା ସ୍ବାର୍ଥ ବିରୋଧି କହି ଗୃହରେ ଚିରି ଦେଇଥିଲେ। ଏହି ନିଷ୍ପତ୍ତିରୁ ପୂର୍ବତଟ ରେଲୱେ ୧୦ ହଜାର କୋଟି ହରାଇବ। ରାଜ୍ୟ ସ୍ଵାର୍ଥ ନେଇ ବିଜେପିର ୨୦ ସାଂସଦ ମୁକ ବଧିର ହୋଇଯାଇଛନ୍ତି। ଯେଉଁ ମାପକାଠିରେ କେନ୍ଦ୍ର ଆନ୍ଧ୍ରକୁ ଦେଖୁଛି, ଓଡ଼ିଶାକୁ ସେହି ମାପ କାଠିରେ ଦେଖୁl ରାଜ୍ୟ ସ୍ବାର୍ଥ ପ୍ରସଙ୍ଗରେ ବିଜେଡି ଚୁପ୍ ବସିବନି। ରାଜ୍ୟ ସ୍ବାର୍ଥ ପାଇଁ ଆମେ ଲଢ଼େଇ କରିବୁ ବୋଲି କହିଛନ୍ତି ରଣେନ୍ଦ୍ର। ବିଜେଡିର ସ୍ଵରରେ ସ୍ଵର ମିଳାଇଛି କଂଗ୍ରେସ। ୱାଲଟିଅର ଡିଭିଜନ ମିଶ୍ରଣକୁ ଦୂର୍ଭାଗ୍ୟଜନକ କହିଛି ଦଳ।ସେପଟେ ବିରୋଧୀଙ୍କ ଅଭିଯୋଗ ନେଇ କେନ୍ଦ୍ର ପାଇଁ ଓକିଲାତି କରିଛନ୍ତି ବିଜେପି ବିଧାୟକ। ପୂର୍ବତଟ ରେଳବାଇରୁ ୱାଲଟିଅର ଡିଭିଜନକୁ ବାଦ ଦେଇ ଦକ୍ଷିଣ କେନ୍ଦ୍ରୀୟ ରେଲୱେରେ ମିଶ୍ରଣ ନିଷ୍ପତ୍ତିକୁ ନେଇ ସାରା ଓଡ଼ିଶାରେ ଉଦବେଶ ପ୍ରକାଶ ପାଇଛି । ହେଲେ ଡବଲ ଇଞ୍ଜିନ ସରକାର ନିଷ୍ପତ୍ତି ସପକ୍ଷରେ ଓକିଲାତି କରିଛି। ଯାହାକୁ ନେଇ ହୁଲସ୍ତୁଲ ବିଧାନସଭା ।
ଏଣିକି ସକାଳୁଆ ଚାଲିବ ଉଚ୍ଚ ଶିକ୍ଷାନୁଷ୍ଠାନ: SOP ଜାରି କଲା ଉଚ୍ଚଶିକ୍ଷା ବିଭାଗ
ଭୁବନେଶ୍ବର: ଏଣିକି ସକାଳୁଆ ଚାଲିବ ଉଚ୍ଚଶିକ୍ଷା ଅନୁଷ୍ଠାନ । SOP ଜାରି କଲା ଉଚ୍ଚଶିକ୍ଷା ବିଭାଗ । ଗ୍ରୀଷ୍ମ ପ୍ରବାହକୁ ଦୃଷ୍ଟି ରେ ରଖି ସକାଳୁଆ କ୍ଲାସ୍ ଓ ପରୀକ୍ଷା କରିବାକୁ ନିର୍ଦ୍ଦେଶ ଦିଆଯାଇଛି । ପ୍ରଚୁର ପରିମାଣର ପାନୀୟ ଜଳ ଓ ORS ମହଜୁଦ ରଖିବାକୁ ନିର୍ଦ୍ଦେଶ ଦିଆଯାଇଛି । ଗ୍ରୀଷ୍ମ ପ୍ରବାହ ମୁକାବିଲା ପାଇଁ କଲେଜରେ ଓ ପରୀକ୍ଷା କେନ୍ଦ୍ରରେ ଫାଷ୍ଟଏଡ୍ କିଟ୍ ରଖାଯିବ । ଗ୍ରୀଷ୍ମ ପ୍ରବାହ ମୁକାବିଲା, SOP ପାଳନ ତଦାରଖ ପାଇଁ ସ୍କ୍ବାଡ ଗଠନ ହେବ । ଏନେଇ ରାଜ୍ୟ ସବୁ ବିଶ୍ୱବିଦ୍ୟାଳୟର କୁଳସଚିବ ଓ କଲେଜ ଅଧ୍ୟକ୍ଷଙ୍କୁ ଉଚ୍ଚଶିକ୍ଷା ବିଭାଗ ଚିଠି ଲେଖି ନିର୍ଦ୍ଦେଶ ଦେଇଛି ।