ନନ୍ଦିଘୋଷ ବ୍ୟୁରୋ: ଲାଜରେ ନଇଁପଡିଥିଲା ଆଖି, ହାତପାଦରେ ଜଞ୍ଜିର ସହିତ ମନରେ କ୍ରୋଧ ଏବଂ ଅପବାଦର ଡର । ଏମିତି କିଛି ଅନୁଭବ ଥିଲା ବିମାନରେ ବନ୍ଦୀ ହୋଇ ବସିଥିବା ନିର୍ବାସିତ ଭାରତୀୟଙ୍କର । ବଡଲୋକ ହେବାର ସ୍ବପ୍ନ ତାଙ୍କୁ ବଳି ପକେଇଦେଇଥିଲା । ଭାବିଥିଲେ ଆମେରିକାରେ ପହଞ୍ଚି ବଡଲୋକ ହେବେ । ହେଲେ ସ୍ବପ୍ନରେ ଲାଗିଯାଇଥିଲା ଟ୍ରମ୍ପଙ୍କ କଳା ଛାୟା । କିଛିଦିନ ବିତିଯାଇଥିଲେ ହୁଏତ ପହଞ୍ଚିଯାଇଥାଆନ୍ତେ ନିଜ ଲକ୍ଷ୍ୟରେ । ହେଲେ ସବୁ ଯୋଜନା ପଣ୍ଡ ହୋଇଗଲା ଟ୍ରମ୍ପଙ୍କ ନୂଆ ଆଇନ ଆଗରେ । ଟ୍ରମ୍ପଙ୍କ ରାଷ୍ଟ୍ରବାଦ ନୀତି, ଅହଙ୍କାରର ବ୍ୟାଖା ଆମେରିକାର ଉଦାରବାଦକୁ ନାକେଦମ କରିଦେଇଥିବା ବେଳେ କେମିତି ବଞ୍ଚିଯାଇଥାଆନ୍ତେ ଏହି ନିର୍ବାସିତ ଭାରତୀୟ ।
ଏ କାହାଣୀ ହେଉଛି ସେହି ହରବିନ୍ଦର, ଯଶପାଲ , ନିକିତା ଏବଂ କେତୁଲ ପଟେଲଙ୍କର । ବହୁ ସ୍ବପ୍ନ ସଜେଇ ସେ ବାହରିଥିଲେ ଆମରିକା । ସେଠାକୁ ଯିବେ ଗୋରା ଲୋକଙ୍କ ଭଳି ରହିବେ ବହୁତ ରୋଜଗାର କରିବେ ଏବଂ ବଡଲୋକ ହୋଇ ଫେରିବେ । କିନ୍ତୁ ବଲିଉଡର ଡଙ୍କି ସିନେମା ଭଳି ତାଙ୍କ ସହିତ ମଧ୍ୟ ଧୋକା ହୋଇଥିଲା । ଭାଙ୍ଗିକି ଚୁରମାର ହୋଇଯାଇତିଲା ସବୁ ସ୍ବପ୍ନ । ଡଙ୍କି ରୁଟ୍ ଦେଇ ଯାତ୍ରା କରିବାବେଳେ କିପରି ମୃତ୍ୟୁକୁ ନିକଟରୁ ଦେଖିଥିଲେ ବଖାଣିଛନ୍ତି ତାଙ୍କ ଭିତରେ ଥିବା ଯଶପାଲ ।
ଏହି କାହାଣୀ ହେଉଛି ଆମେରିକାନ ‘ଡ୍ରିମ୍ର ‘କ୍ରାସ୍ ଲ୍ୟାଣ୍ଡିଂର । ଯାହା ଗତ ବୁଧବାର ଅମୃତସରରେ ଲ୍ୟାଣ୍ଡିଂ ହୋଇଥିଲା । କାହାଣୀର ଅଭିନେତା ହେଉଛନ୍ତି ଯଶପାଲ । ଅମୃତସର ଏୟାରପୋର୍ଟରେ ଓହ୍ଲାଇଥିବା ଯଶପାଲ ବହୁ ସ୍ବପ୍ନ ନେଇ ଜୁଲାଇ ମାସରେ ଆମେରିକା ଯାଇଥିଲେ । ସେଠାରେ ପହଞ୍ଚିବାକୁ ତାଙ୍କୁ ୬ମାସ ସମୟ ଲାଗିଥିଲା । ତା ଭିତରେ ବ୍ରାଜିଲରେ ମଧ୍ୟ ସେ ୬ମାସ ରହିଥିଲେ । ହେଲେ ବିଡମ୍ବନାର କଥାଯେ ଆମେରିକା ବର୍ଡର ପାର କରିବା ପୂର୍ବରୁ ହିଁ ପଡିଯାଇଥିଲେ ପୋଲିସ ହାବୁଡରେ । “ଜାନୁଆରୀ ୨୪ ତାରିଖରେ ଆମେରିକା ସୀମାରୁ ପାଟ୍ରୋଲିଂ ବେଳେ ତାଙ୍କୁ ଗିରଫ କରାଯାଇଥିଲା ।” ଜଣାନାହିଁ ସେମାନଙ୍କୁ ଆମେରିକା ଏଜେଣ୍ଟ କେଉଁଠୁ ଉଠାଇଲା । କେମିତି ତାଙ୍କ ବିଷୟରେ ସୂଚନା ପାଇଲା । ହେଲେ ହାତରେ ସୁନାର ବ୍ରେସଲେଟ ପିନ୍ଧିବା ସ୍ବପ୍ନ ଦେଖିଥିବା ଯଶପାଲଙ୍କ ହାତରେ ପଡିଗଲା ଜଞ୍ଜିର ।
ଗୁରୁଦାସପୁର ହରଦୋବାଲ ଗାଁର ଜସପାଲଙ୍କ ଆମେରିକା ଗମନର କାହାଣୀ ୨୦୨୪ରେ ଆରମ୍ଭ ହୋଇଥିଲା । ଦିଲ୍ଲୀରୁ ଆମେରିକା ଯିବା ପାଇଁ ବିମାନ ଯୋଗେ ପ୍ରାୟ ୨୫-୩୦ଘଣ୍ଟା ସମୟ ଲାଗୁଥିବା ବେଳେ ତାଙ୍କୁ ୪୪୦୦ଘଣ୍ଟା ବା ୬ମାସ ସମୟ ଲାଗିଥିଲା । ଅମୃତସର ଏୟାରପୋର୍ଟରେ ଆମେରିକା ବାୟୁ ସେନାର ମାଲବାହୀ ବିମାନ -17ରୁ ଓହ୍ଲାଇଥିବା ଜସପାଲ ବୁଧବାର ରାତିରେ ନିଜ ଗାଁରେ ପହଞ୍ଚିଥିଲେ । ତାଙ୍କ କହିବାନୁଯାୟୀ ବିମାନରେ ତାଙ୍କ ହାତରେ ହାତକଡି ଏବଂ ପାଦରେ ଜଞ୍ଜିର ବନ୍ଧାଯାଇଥିଲା । ବିମାନରେ ତାଙ୍କୁ ବସାଉଥିବା ବେଳେ ତାଙ୍କୁ କୁହାଯାଇନଥିଲା ସେମାନଙ୍କୁ କୁଆଡେ ନିଆଯାଉଥିଲା ।
ହଠାତ ଜଣେ ପୋଲିସ ଅଧିକାରୀ ତାଙ୍କୁ କହିଥିଲେକି ସେମାନଙ୍କୁ ଭାରତ ନିଆଯାଉଛି । କିନ୍ତୁ ତାଙ୍କ ଜଞ୍ଜିର ଅମୃତସର ଏୟାରପୋର୍ଟରେ ଖୋଲାଯାଇଥିଲା । ନିଜ ସହିତ ଘଟିଥିବା ଏହି ଅଘଟଣ ପାଇଁ ଜସପାଲ ଟ୍ରାଭେଲ ଏଜେନ୍ସିକୁ ଦୋଷ ଦେଉଛନ୍ତି । ତାଙ୍କ କହିବାନୁଯାୟୀ ମୁଁ ଏଜେଣ୍ଟକୁ ବୈଧ ଭାବରେ ଆମେରିକାରେ ପ୍ରବେଶ ଲାଗି କହିଥିଲି । କିନ୍ତୁ ସେ ମୋତେ ଧୋକା ଦେଇଥିଲା । ଆମେରିକା ଯିବା ପାଇଁ ଏଜେଣ୍ଟ ସହିତ ଜସପାଲଙ୍କର ୩୦ଲକ୍ଷର ଚୁକ୍ତି ହୋଇଥିଲା ।
୩୦ଲକ୍ଷ ଖର୍ଚ୍ଚ କଲି, ଅବୈଧ ହେଇ ରହିଲି
“ଗତବର୍ଷ ଜୁଲାଇରେ ବିମାନ ଯୋଗେ ବ୍ରାଜିଲ ପହଞ୍ଚିଥିଲି। ମୋତେ ପ୍ରତିଶ୍ରୁତି ଦିଆଯାଇଥିଲା ପରବର୍ତ୍ତୀ ପର୍ଯ୍ୟାୟ ମଧ୍ୟ ବିମାନ ଯୋଗେ ହେବ। ତଥାପି, ଏଜେଣ୍ଟ ପ୍ରତାରଣା କରିଥିଲେ, ସେହି ଏଜେଣ୍ଟ ବେଆଇନ ଭାବରେ ସୀମା ପାର କରିବାକୁ ବାଧ୍ୟ କରିଥିଲେ ।” ଯଶପାଲଙ୍କ କହିବା ଅନୁସାରେ ବ୍ରାଜିଲରେ ଛଅ ମାସ ରହିବା ପରେ ସେ ଆମେରିକା ସୀମା ପାର କରିଥିଲେ । କିନ୍ତୁ ଆମେରିକା ସୀମାରୁ ତାଙ୍କୁ ଗିରଫ କରାଯାଇଥିଲା। “୧୧ ଦିନ ଅଟକ ରଖାଯିବା ପରେ ଘରକୁ ଫେରାଇ ଦିଆଯାଇଥିଲା । ବ୍ରାଜିଲରେ ଜସପାଲ ୬ମାସ କାଳ ଅବୈଧ ଭାବରେ ରହିଥିଲେ । ତାଙ୍କ ପାଖରେ ବୈଧ କାଗଜପତ୍ର ନଥିଲା । ସେନେଇ ସେ କାହାରି ସାହାଯ୍ୟ ନେଇପାରୁନଥିଲେ । ସେ ଲୁଚିଛପି ଜୀବନ କାଟୁଥିଲେ । ଆମେରିକା ଯିବାର ସ୍ବପ୍ନ ଯସପାଲଙ୍କର ସମ୍ପୁର୍ଣ୍ଣ ରୂପେ ଭାଙ୍ଗିଯାଇଥିବା ବେଳେ ଆମେରିକା ଯିବା ପାଇଁ ବହୁ ଧାରକରଜ କରିନେଇଥିଲେ ।
୧୦୪ଲୋକଙ୍କୁ ନେଇ ଅମୃତସର ପହଞ୍ଚିଥିଲା ବିମାନ
ଗତ ବୁଧବାର ୧୦୪ଅବୈଧ ପ୍ରବାସୀଙ୍କୁ ନେଇ ଆମେରିକା ସୈନ୍ୟବିମାନ ଅମୃତର ଏୟାରପୋର୍ଟରେ ଅବତରଣ କରିଥିଲା । ଏହି ବିମାନରେ ୩୩ଭାରତୀୟ ଥିଲେ । ଏଥିମଧ୍ୟରୁ ହରିୟାଣା ଓ ଗୁଜୁରାଟରୁ ୩୩ଭାରତୀୟ ଥିବା ବେଳେ ପଞ୍ଜାବରୁ ୩୦ ଓ ମହାରାଷ୍ଟ୍ର, ଉତ୍ତରପ୍ରଦେଶ ଏବଂ ଚଣ୍ଡୀଗଡରୁ ୩ଜଣ ଲେଖାଁଏ ଥିଲେ । ସେମାନଙ୍କ ମଧ୍ୟରୁ ୧୯ଜଣ ମହିଳା ଥିବା ବେଳେ ୧୩ଜଣ ନାବାଳିକା ସାମିଲ ଥିଲେ ।
କ’ଣ କହୁଛନ୍ତି ଜସପାଲଙ୍କ ପରିବାର
ଜସପାଲଙ୍କ ମାଆ ଶିନ୍ଦର କୌର ଏବଂ ଦାଦାପୁଅ ଭାଇ ଜସବୀର ସିଂଙ୍କ କହିବାନୁଯାୟୀ ୨ବର୍ଷ ଇଂଲଣ୍ଡରେ କାମ କରିବା ପରେ ଜସପାଲ ୧୨ ଦିନ ପୂର୍ବରୁ ଆମେରିକା ଯାଇଥିଲା । ତାଙ୍କ କହିବାନୁୟୀ ସେ ବହୁତ ଦୁଃଖିତ କିନ୍ତୁ ଖୁସୀ ଯେ ତାଙ୍କ ପୁଅ ଫେରିଆସିଛନ୍ତି । ଜସପାଲ ସିଂଙ୍କର ଗୋଟିଏ ପୁଅ ଏବଂ ଗୋଟିଏ ଝିଅ ଅଛନ୍ତି । ତାଙ୍କର ସାନଭାଇ ଶିରୋମଣି ଗୁରୁଦ୍ବାର ପ୍ରବନ୍ଧକ କମିଟିରେ କାର୍ଯ୍ୟ କରନ୍ତି । ତାଙ୍କ ପିତାଙ୍କ ନିଧନ ହୋଇଯାଇଛି । ଜସପାଲ ଜଣେ ପରିଶ୍ରମୀ ଯୁବକ ଥିବାବେଳେ ସେ ସାଉଦି ଆରବରେ ୮ବର୍ଷ ଏବଂ କତାରରେ ୪ବର୍ଷ କାର୍ଯ୍ୟ କରିଛନ୍ତି ।
କେତୁଲ ପଟେଲଙ୍କ କାହାଣୀ
ଜସପାଲଙ୍କ ଭଳି କେତୁଲ ପଟେଲଙ୍କ କାହାଣୀ ମଧ୍ୟ ଦୁଃଖଭରା । କେତୁଲ ତାଙ୍କ ପରିବାର ସହିତ ସୁରଟର ଡିଣ୍ଡୋଲିରେ ରହୁଥିଲେ । ସେ ଗୋଟେ ବର୍ଷ ପୁର୍ବରୁ ନିଜ ଫ୍ଲାଟ ବିକ୍ରି କରି ଆମେରିକା ଯାଇଥିଲେ । କେତୁଲଙ୍କ ଅନୁପସ୍ଥତିରେ ତାଙ୍କ ବାପା ତାଙ୍କ ପରିବାରର ଭରଣପୋଷଣ କରୁଥିଲେ ।
ଏମାନଙ୍କ ସହିତ ଅମୃତସରରେ ପହଞ୍ଚିଥିବା ଅନ୍ୟ ୩୩ଗୁଜୁରାତିଙ୍କୁ ଅହମ୍ମଦାବାଦ ନିଆଯାଇଥିଲା । ପରେ ପୋଲିସ ସେମାନଙ୍କୁ ନିଜ ନିଜ ସ୍ଥାନକୁ ପଠାଇଥିଲା ।
